1 Yesus naalongwa yaye oya fika komunghulo wefuta lyaGalilea, koshilongo shaGerasa. 2 Yesus nhyi a za mo mokawato, okwa shakenekwa komulumenhu e niwe keemhepo va kaka ta zi momaendo. 3 Omulumenhu okwa kala meembila vi va li va panda momamanya, ndele kakwa li kuna nande omunhu ta vulu oku mu manga nande onomalyenge shaanhyi okwa li e na eenghono. 4 Olundji okwa li ha mangwa nomalyenge noiketanga keenyala nokeemhavi, ndele kehe efimbo omalyenge noiketanga ohe yi tokaula mo. Okwa li ena eenghono, no kakwa li nande omunhu ta vu lu oku mu mweneka. 5 Omutenya nousiku okwa kala aluhe momaendo nomeendudu, ta ingiva mopale ye te itete nomamanya.

6 Omulumenhu okwa monena Yesus kokule nokwa tondoka, ndele ta tu eengolo koshipala shaye. 7 Okwa ingiva mopale ta ti, "Yesus, Omonamati waKalunga wokombadambada! Owa halela nge shike? Andi ku indile koshipala shaKalunga, ino hepeka nge!" 8 Omhepo ya kaka oya popya ayihe mbi, molwanhyi Yesus okwa popya tango petameko kutya, "Mhepo ya kaka, za mo momulumenhu ngu!"

9 Yesus okwe mu pula, "Evina lyoye olye?"

Omhepo ya kaka oya yamukula ya ti, "Aame Ongudu, shaanhyi otu li oyendji." 10 Omhepo ya kaka oya twikila noku indila Yesus neenghono, opo ina ta mo eemhepo va kaka mehala ndyo.

11 Opwa li pu na oshuunda oshinene shoingulu tayi li popepi neendudu. 12 Eemhepo va kaka ova indila Yesus avi ti, "Tu tumina moingulu, oye totu pitike tu kale muyo." 13 Yesus okwe vi pitike, neemhepo va kaka ova za mo momulumenhu ndele avi yi moingulu. Oshuunda ashihe shoingulu yi fike pomayovi yaali, osha nhuka okuza komutunda omuleka, ndele tashi iyumbile mefuta, ndele tashi sile mo.

14 Aasita yoingulu oya matuka, ndele taa yi momikunda nomoshilando, ndele taa ka hokolola nhyi sha ningwa po. Aanhu oya ya, opo ya ka tale nhyi sha ningwa ko. 15 Oye ya kuYesus, ndele oya mona omulumenhu ngu a li a kwatwa kongudu onene yeemhepo va kaka, e li omutumba, a zala nawa ye ena eendunge, naayehe oya li ya tila. 16 Aanhu mba ye shi mona, oya hokolola nhyi sha ningilwa omulumenhu ngu a li a kwatwa keemhepo va kaka, nanhyi sha ningilwa oingulu.

17 Aanhu yomoshitopolwa nhyi, oya indila Yesus a ze mo mehala lyao. 18 Mhanga Yesus ta londo mokawato, omulumenhu ngu a li a kwatwa keemhepo va kaka, okwa indila Yesus kutya okwa hala okuya naye.

19 Yesus ine mu pitika, ndele okwe mu lombwela a ti, "Inda keumbo kuyakweni, u ke ya ulikile nhyi Omwene e ku ningila nanhyi eku sila onghenda."

20 Omulumenhu okwa ya, nokweenda mOilando Omulongo, ta hokololele aanhu nhyi Yesus e mu ningila, ndele aanhu ayehe nhyi yeshi uva, oya li yakumwa.

21 Nhyi Yesus a shuna kombiga nghu a zilila nokawato, aanhu oyendji oye mu ongalela nhyi a li pomunghulo wefuta. 22 Okwa za umwe womaawiliki yOsinagoga, evina lyaye oJailus. Nhyi a mona Yesus okwa wila pohi peemhavi vaYesus, 23 ndele okwe mu indila neenghono ta ti, "Okamwangekavona otaka aluka unene, ila, uka tenheke eke lyoye, opo uka hupife, ko ka kale ke na omwenyo.

24 Yesus okwa ya pamwe naJairus. Aanhu oyendji oye mu landula, ndele oye mu fininika.

25 Okwa li ku na omukiinhu e na ouvu wetiko lyohonde eevula omulongo nambali, 26 okwa li a mona oihuna neenghono mokuya keendudu ovidji, noku vi futa ashihe nhyi a li e na, ndele ina kala nawa, ouvu owa ya ike komeho neenghono. 27 Omukiinhu ngu, nhyi a uva kombinga ya Yesus, okwe ifiinika mokati kaanhu a ye kuYesus, e mu zilila konima, ndele ta kumu onguwo yaye, 28 shaanhyi okwa vilaavila kutya, "Shamha nda kumu onguwo yaYesus, andi yeluka."

29 Viyaviya, etiko lyohonde olya mwena, nokwa uvu molutu lwaye kutya okwa yeluka. 30 Pokafimbo mho, Yesus okwa uvu eenghono va za mo muye, onghee okwa tala konima yaye mongudu yaanhu, ndele ta pula, "Olye a kuma onguwo yange?"

31 Aalongwa yaye oya yamukula ya ti, "Ou wete kutya aanhu oye ku fiinika, ndele oto pula ali kutya, "Olye a kuma nge?"

32 Ndele Yesus okwa kala nokukeyauka, opo a mone ngu eshi ninga. 33 Omukiinhu nhyi a vibulula nhyi a ningilwa, okwe ya, ndele ta tu eengolo koshipala shaYesus, a tila ye ta kakama, ndele te mu lombwele oshili ashihe. 34 Yesus okwa ti kuye, "Mukiinhu, eitaelo lyoye olye ku yeluva. Inda nombili, owa manguluka kouviyu woye."

35 Mhanga Yesus a li ta popi, opwe ya aanhu ya tumwa ya za kolya Jairus, omuwiliki wOshinagoga taa ti, "Okamwoyekavona oka sa. Oshishi to piyaaneke omuhongi?"

36 Yesus ina kala e na ko nasha neehapu vi ya popya, ndele okwa lombwela omuwiliki woshinagoga a ti, "Ino tila, itaela ike." 37 Ndele Yesus ina pitika nande omunhu e mu landule, kakele kuPeetulusa, Yakopo nomumwaina Yohanesa. 38 Nhyi ye ya peumbo lyomuwiliki wOshinagoga, okwa mona engwagwano maanhu, taa lili mopale yo taa hekumuna. 39 Yesus okwa ya meni, ndele ta ti kuyo, "Oshishi mwa ngwagwana? Omolwashi a mu lili? Okakavona inaka sa, oka kofa ike!"

40 Aanhu oye mu yola. Yesus okwa ta mo aanhu ayehe ya ye pondje, ta kufa he nayina yokakavona, namba ya li naye, ndele taa yi meni mu mwa nangala okakavona. 41 Yesus okwa kwata oshikaha shokakavona, ndele ta ti ku ko, "Talita, kumi," nhyi a shi ti, "Kakavona, andi ku lombwele, penduka!"

42 Viyaviya okakavona oka penduka, a ka tameke okweenda noya li ya kwatwa kehaluko enene. Okakavona oka li ke na eevula omulongo nambali. 43 Ndele Yesus okwe ya londova, ina ye shi lombwela nande omunhu, ndele okwe ya lombwela ya pe okakavona oikulya.