1 Natango Yesus okwa tameka okulonga aanhu pomunghulo wefuta lyaGalilea. Ongudu onene yaanhu oya li ye mu ongalela, onghee okwa ya mokawato, ndele ta kala omutumba oya li momeya nongudu yaanhu ayihe oya li komutunda wefuta. 2 Okwe ya longa oinima oyindji momaele. Mokulonga kwaye okwa ti kuyo,

3 "Pwaikineni! Okwa li ku na omukuni, ngu a ya a ka kuna eembuto vaye. 4 Mokukuna kwaye, okwa li ta kunu ta kupula. Eembuto vimwe ova wila mondjila, neevila ove ya, ndele avi vi shomona po. 5 Vimwe ova wila mevu li na omamanya omendji, kapwa li evu lya wana neembuto ova mena meendelelo, molwanhyi evu kalya li eleka. 6 Ontenya nhyi wa twa, owa fika po oimeno mbi ya li oishona, shaanhyi kaya li yi na omivi va ya mopale, noimeno oya sa po. 7 Eembuto vimwe ova wila meehongo, neehongo ova koka, ndele avi finaneke oimeno, ndele oimeno inayi vula okutula ko nande omuma. 8 Ndele eembuto vimwe ova wila mevu oliwa. Ova mena, avi koko, ndee avi vala, vimwe olwomilongo nhatu, vimwe olwomilongo hamano navimwe olwefele."

9 Yesus okwa manifa ta ti, "Ngu e na omakutsi yokupwaikina, na uve ko nhyi andi ti!"

10 Mhanga Yesus a li e ikalela, yamwe yomumba ya li ye mu uva, oye ya kuye pamwe naalongwa omulongo nayaali. Oye mu indila opo e ya fatululile omayele. 11 Yesus okwa ti kuyo, "Nye omwa pewa okuuva ko oiholekwa yOuhamba waKalunga, mhanga aanhu yamwe, oinima ayihe otaye yi uvu pamayele, 12 opo nee,

ohaa tala,

ndele kaye wete ko,

ohaa pwaikine,

ndele kaye uvite ko.

ngeno okwa li haye shi ningi, ngeno otaa yalukile kuKalunga,

ndele teya viminepo.’ "

13 Ndele Yesus okwe ya pula a ti, "Nge kamu uvite ko eyele ndi, otamu vulu ngeepi okuuva ko omayele makwawo? 14 Omukuni okwa kuna ohapu yaKalunga. 15 Aanhu yamwe oya fa evu lyomondjila, mu mwa wila eembuto, ndele viyaviya konima nhyi ya uva ohapu, Satana okwe ya, ndele teya kufa ohapu ndji ya kunwa muyo. 16 Aanhu yamwe oya fa evu lyomamanya, ndi kali na evu lya wana, taa uvu eehapu, ndele ta ye vi tambula ko nehafo, 17 ndele iha vi ningine mo muyo vi kale nomivi. Otaye vi viinine ike pokafimbo, ndele shaa pwe ya ouviyu nenge omahepeko, eehapu otaye vi efa meendelelo. 18 Aanhu yamwe oya fa evu li na eehongo, mba oyo mba haa uvu eehapu, 19 ndele oshiho shouyuni mbu nohole yomaliko, nomauhalu ya yooloka, otaa finaneke eehapu, ndele iha vi imike ali oiyimati. 20 Ndele aanhu yamwe oya fa evu oliwa. Mba oyo mba taa uvu eehapu, ndele taye vi tambula ko, ndele taa yimike oiyimati lwomilongo nhatu, nolwomilongo hamano nolwefele.

21 Yesus okwe ya pula ta ti; "Oku na nghaa ngu ta tema olamba, ndele te yi tula kohi yoshimbale nenge kohi yombete? Ndi shi oku na oku yi tula koshikwatelwalamba? 22 Omolwanhyi kaku na nhyi sha holekwa, ihashi ke ya pouyelele, ko kaku na nhyi sha siikilwa ihashi ka suukulwa. 23 Ngu ena omakutsi yokupwaikina, na uve ko nhyi andi ti!"

24 Yesus okwe ya lombwela natango a ti, "Pwaikineni nawa kunhyi amu uvu! Eemhango vi tamu yelekifa navo yakweni, nanye ovo nghaa Kalunga te ke mu yelekifa navo, mwa wevelwako nokuli. 25 Oshonhyi ngu ena, oye ta ka pewa oshindji, ndele ngu ke na sha, nokashona ngha a li e na, oteke ka kufwa."

26 Yesus okwa twikila ko ta ti, "Ouhamba waKalunga owa fa omunhu a kuna eembuto mevu. 27 Omutenya nenge ousiku, a kofa nenge a penduka, eembuto a vi mene ndele a vi koko, ndele ke shii kutya osha ningwa ngeepi. 28 Evu olyo lyene tali kokifa oimeno, ndele ta li etififa oiyimati. Tango efina, ta li landulwa komutwe, neemuma avi kolo komutwe. 29 Ngeege eemuma va kukuta, omuteyi ota kufa oshiteyifo a teye, shaanhyi eteyo olya fika.

30 Yesus okwa pula a ti, "Ouhamba waKalunga atu ti owa fa shike? Eele lipi tu na oku longifa opo tuu fatulule?" 31 Owa fa omunhu ta kufa omuma oshona lela, hayi ifanwa omuma yomastada, ndele te yi kunu mevu. 32 Konima nhyi ya kunwa, ohai koko yi vule oimeno ayihe mepya. Ohai ningi oitayi oinene, neevila vokeulu ohavi tungile oihavila momuzile wawo.

33 Yesus okwa uvifila aanhu eehapu pamayele makwawo omendji ya fa nga, pandodo yeuveko lya wo. 34 Ayihe okwei popya momayele, ndele nhyi a li naalongwa yaye, okwe ya fatululila oinima ayihe.

35 Ongulohi yesiku ndyo, Yesus okwa ti kaalongwa yaye, "Tu taulukeni tuyeni kombiga onghwawo yefuta." 36 Oya fiipo ongudu yaanhu, ndele aalongwa oya londa mokawato mu Yesus a li omutumba, ndele taa yi pamwe naye. Mha ya li, opwa li ouwato umwe ali. 37 Okwa za omhepo onene tayi pepe kombada yomeya, nomakufikufi oya li taye ivege mokawato, nokawato hanga ka uva omeya. 38 Yesus okwa li a nangala kosindo yokawato a kofa, nomutwe waye wu li koshiwilo. Aalongwa oye mu pendula, ndele taa ti, "Mulongi, mboli ku na ko nasha nanhyi tu li po kusa?"

39 Yesus okwa penduka, ndele ta ngada omhepo a ti, "Mwena!" Ta lombwele omakufikufi a ti, "Kanghama!" Omhepo oya mwena, nomakufikufi oya lootela. 40 Yesus okwa ti kaalongwa yaye, "Oshishi hano mwa tila? Kamu na natango eitaelo nani?"

41 Aalongwa oya li ya haluka, yo ya tila neenghono, ndele oya pulafana taa ti, "Omulumenhu ngu oye olye naana? Nomhepo nomakufikufi tayi vulika kuye!"