1 Nhyi pwa pita omasiku omashona, Yesus okwa shuna kehala nghu Aayuda haa ongalele hali ifanwa Oshinagoga. Mehala mo omwa li mu na omulumenhu e na onyala ya lemana. 2 Aanhu yamwe mba ya li mo, oya li taa tala nge Yesus ote mu eluva mesiku lyEsabati, opo ya vule oku mu lundila, kutya ota longo nhyi inashi pitikwa okuningwa mEsabati. 3 Yesus okwa lombwela omulumenhu ngu e na onyala ya lemana a ti, "Ila u fikame komeho yaayehe." 4 Yesus okwe ya pula a ti, "Oshishi sha pitikwa okuningwa pamhango mesiku lyEsabati? Okulonga ouwa nenge okulonga ouyi? Okuhupifa omwenyo nenge okuvipaa?" Ndele inaa yamukula sha.

5 Yesus okwe ya tala ayehe noshipala sha handuka, a nyika oluhovi omolwoukukutu womitima vao. Okwa lombwela omulumenhu ngo ta ti, "Ukililifa oshikaha shoye." Omulumenhu okwe shi ukililifa, noshikaha shaye osha eluka. 6 Meendelelo, Aafalisai oya za mo moshinagoga, ya ka ongala naalanduli yaHelodesa, ndee taa kundafana omhangela opo ya vipae Yesus.

7 Yesus naalongwa yaye oya ya kefuta lyaGalilea, nongudu onene yaanhu oye mu landula, ya za kuGalilea kuYudea, 8 kuYelusalema, kuzaIdumea, kuza kouzilo womulonga waYoldan nokoshilando shaTilus naSidon. Aanhu ayehe mba oye ya kuYesus, molwanhyi ya uva ayihe mbi a ninga. 9 Molwoundji waanhu, Yesus okwa lombwela aalongwa yaye ye mu longekivile okawato, opo aanhu inaye mu finaneka. 10 Yesus okwa eluva aanhu oyendji, onghee mba ya li ye na omauvu, oya li taa kondjifa okwiifininika nelalakano ye mu kume. 11 Na kehe mha eemhepo va kaka avi mu mono, ohavi wile pohi koshipala shaye, ndele avi ingiva avi ti, "Ooye Omona waKalunga!"

12 Ndele nee, Yesus okwa lombwela eemhepo va kaka opo ina vi mu popya kutya oye lye.

13 Yesus okwa londa kondudu, ndee ta ifana aalumenhu mba ye mwene a hala, naalumenhu oye ya kuye. 14 Okwa hoolola mo omulongo nayaali, ndee teya luku "Aayapostoli" kokutya Aatumwa. Okwe ya hoolola, opo ya kale pamwe naye, yaka uvife, 15 yo ya kale ye na eenghono nepangelo, lyokuta mo eemhepo va kaka.

16 Aatumwa omulongo nayaali, mba a hoolola, omavina yao oyo, oSimoni ngu Yesus e mu luka Peetulusa, 17 naYakopo omonamati waSebedeus namumwaina Yohanesa, mba Yesus e ya luka Boanerges, nhyi ashi ti, "Oyana yomundudumo," 18 naAndiliasa, naFilippus, naBartolomeus, naMateusa, naTomas, naYakopo yaAlfeusa, naTaddeus, naSimoni ependa, 19 naYudas Iskalioto, ngu aka kengelela Yesus.

20 Yesus okwa ya keumbo, naanhu oyendji oya ongala, mha Yesus naalongwa yaye inaa mona efimbo lyokulya. 21 Nhyi aakwanezimo yaye ye shi uva, oya ya ko, yeke mu kwata, shaanhyi aanhu oya li taa ti, "Otayi eemhwengu!"

22 Aalongimhango mba ya za kuYelusalema oya ti, "Okuna Belsebul! Omukulunhu weemhepo va kaka ngu oye temu pe eenghono voku vi ta mo." 23 Yesus okwe ya ifana, ndee te ya lombwele momayele ta ti, "Satana ota vulu ngeepi okuta mo Satana? 24 Nge aanhu yomouhamba umwe otaye itopola pokati, ndee taye ilwifa, nena ouhamba mbo ihau kala po. 25 Osho nghaa naanhu yeumbo limwe, nge otaye itopola pokati, ndee taye ilwifa, eumbo ndyo iha li kala po. 26 Na Satana nge ote itopola, ndee te ikondjifa, iha vulu okukala po, ota hulu po.

27 "Kaku na ngu ta vulu okuya meumbo lyomunanghono, ndele ta kufa mo omaliko yaye, okuninga shapo ta manga tango omunaenghono, opo a vule okukufamo omaliko yaye.

28 "Oshili, andi mu lombwele, aanhu otaa viminwa po eendjo nomatukano yao ayehe nga taa popi ye li omhinge naKalunga. 29 Ndele kehe ngu ta sheke Omhepo Ondjapuki, iha viminwa po, ota kala ena eendjo vaaluhe." 30 Yesus okwa popya nhyi, molwanhyi aanhu yamwe oya li taa ti, "Okuniwe omhepo ya kaka."

31 Yina naamwaina yaYesus oye ya po. Oya kala ofika kondje yeumbo, ndee taa tumu mo etumwalaka, kulombwelwe Yesus kutya otaye mu pula. 32 Ongudu yaanhu oya li omutumba ya ngudumanena Yesus, noye mu lombwela taa ti, "Tala, nyoko naamwanyoko aalumenhu naakiinhu oye li pondje taye ku pula."

33 Yesus okwe ya yamukula a ti, "Meme olye naamwameme aalumenhu oolye?" 34 Okwa tala mba ye li omutumba puye, ndee ta ti, "Taleni, meme naamwameme oyo mba! 35 Kehe ngu ta longo ehalo lyaKalunga, oye mumwameme omulumenhu, namumwameme omukiinhu nameme."