1 Yesus okwa zako komulonga waYoldan, a uva Omhepo Ondjapuki. Okwa wilikwa kOmhepo ndee tayi mu fala mombuwa. 2 Okwa kala mo oule womasiku omilongo ne ina lya sha. Momasiku nga, okwa kala ta shongwa kuSatana. Omasiku omilongo ne nhyi ya pwako, Yesus okwa li a sa ondjala.

3 Satana okwa ti kuye, "Nge oye Omona waKalunga lombwela emanya ndi li shituke omboloto."

4 Yesus okwe mu yamukula a ti, "Okwa shangwa, ‘Ha komboloto ike omunhu ta kala e na omwenyo.’"

5 Satana okwe mu kufa pamhepo, ndee temu fala mouleka, ndee temu ulikile omauhamba ayehe yomouyuni mepakumo lyeiho. 6 Satana okwa ti kuyeeye, "Andi ku pe eenghono nepangelo, nomauyamba ayehe. Oshonhyi ayihe mbi onde yi pewa, ndee andi vulu kuyi pa kehe ngu nda hala. 7 Ayihe mbi ota yi ningi yoye ngeege to inyongamene nge nongeege to yalikana nge."

8 Yesus okwe mu yamukula ta ti, "Okwa shangwa, ‘Omwene Kalunga koye oye auke una kwiinyongamena, ye oye auke una okulongela.’"

9 Satana okwe mu fala kuYelusalema, ndele te mu londeke kohulo yotembeli, ndee ta ti kuye, "Ngeege oye Omona waKalunga iyundulila pevu. 10 Oshonhyi okwa shangwa, ‘Omwene Kalunga koye ota lombwele aayengeli yeku amene, 11 taye ku hindipo momaako yao opo uheyi pume omhavi yoye kemanya.’"

12 Ndele Yesus okwe mu yamukula ta ti, "Okwa ti, ‘Ino shonga Omwene Kalunga koye.’"

13 Satana nhyi a mana okushonga Yesus, Satana okwa fiyapo Yesus mhanga.

14 Opo nee Yesus okwa yalukila muGalilea, neenghono vOmhepo Ondjapuki ova li pamwe naye. Onghundana kombiga yaye oya tandaela nomikunda avihe. 15 Okwa longa mOinangoga, naayehe oya li yemu popila mouwa.

16 Yesus okwa ya kuNasaleta, koshilando nghu a putukila. Mesiku lyEsabati okwa ya kOshinangoga nganhyi ha ningi shito. Okwa fikama a leshe Omishangwa omiyapuki, 17 nokwa pewa embo lyomuhunganeki Yesaya. Hano nhyi a tonyununa omishangwa, okwe itwa poima pwa shangwa,

18 "Omhepo yOmwene oyi li kombada yange,

oshonhyi okwa hoolola nge ndi lombwele eehepele Onghundana Oiwa.

Okwa tuma nge ndi uvifile eenghwatwa emanguluko,

aaposi ya twikuluke,

okumangulula oonakuhepekwa

19 noku uvifa kutya efimbo olya fika,

ndi Omwene te ya a hupife aanhu yaye."

20 Yesus nhyi a mana okulesha, embo okwe li pa omuyakuli, ndee ta kala omutumba, nomeho yaayehe mOshinangoga oya li ye mu tongolola, 21 nokwa ti kuyo, "Omishangwa vi mwa uva va leshwa nena ova wanifwa." 22 Yo ayehe oye mu popila mouwa noya li yemu hokwa, noya li ya kuminwa eehapu oviwa, vi va za mokanya kaye noya ti, "Hano keshi omona waYosef ngu?"

23 Yesus okwa ti kuyo, "Ondi shi shii kutya omwa hala kulombwela nge eele ndi, ‘Ndokotola, iyeluva.’ Nomwa hala natango okutya ‘Ninga oikumwifalonga momukunda weni nghanhyi mbi wa ninga muKapelenaum.’" 24 Ndele andi mu lombwele oshili, "Kaku na omuhunganeki ha tambulwako nawa kaanhu yomoshilongo shambilyao."

25 "Pwaikineni ndi mu lombwele oshili, muIslaeli omwa li aaselekavi oyendji pefimbo lyomuhunganeki Elia, nhyi kwa li inaku lokwa oule weevula nhatu noshitata, nomwa li ondjala onene moshilongo ashihe. 26 Ndele Elia ka li a tumwa nande okuumwe womaaselekavi mba, ndele okwa tuminwe ike komuselekavi wokuSalefat moshitopolwa shaSidon. 27 MuIslaeli omwa li natango muna aanashilundu oyendji pefimbo lyomuhunganeki Elisa, ndee Elisa ina eluva nande umwe womuyo, oNaeman ike Omusilia."

28 Aanhu mba yali mOshinagoga nhyi ya uva eehapu vi, oya hanya neenghono. 29 Oya kwata Yesus ndee taye mu kufamo moshilando, ndee taye mu fala komungege wondudu nghu kwa li kwa tungilwa oshilando shao, opo yemu undulile pevu. 30 Ndele Yesus okwa pita mokati kao, ndee ta yi.

31 Opo nee Yesus okwa ya kuKapelenaum, oshilando shi li muGalilea, ndee ta longo aanhu mesiku lyEvululuko ndi ha li ifanwa Esabati. 32 Aanhu oya li ya kuminwa elongo lyaye, oshonhyi eehapu vaye ova li vi na eenghono nepangelo. 33 MOshinangoga omwa li omulumenhu e niwe komhepo ya kaka. Omulumhenhu okwa ingiva mopale ta ti, 34 "Oihuna oyi fike peni! Yesus Omunasaleta owe tu halela shi? Owe ya u tu hanaune po? Ondi ku shii kutya oye omuyapuki waKalunga."

35 Yesus okwa hanyena omhepo ya kaka a ti, "Mwena, ndee to zimo muyeeye!" Omhepo ya kaka oya vega omulumenhu ngo pevu momeho yaanhu, ndee tai zimo muye inai mu ningila ouyi washa. 36 Aanhu ayehe oya li ya kumwa noya pulafana ya ti, "Eehapu va tya ngeepi vi? Ta lombwele eemhepo va kaka nepangelo neenghono, ndee avi zimo?" 37 Onghundana kombiga yaYesus oya tandaela apehe momikunda vomoshitopolwa nhyo.

38 Yesus okwa za mo mOshinagoga ndee ta yi meumbo lyaSimoni. Yinamweno yaSimoni okwa li ta aluka olwiivi neenghono, noya pula Yesus e mu kwafele. 39 Yesus okwa heena kuye, ndee ta hanyene olwiivi, nolwiivi olwe mu efa. Meendelelo okwa fikama po ndee te ya longekivile oikulya. 40 Etango nhyi lya ningina, aanhu ayehe mba ya li ye na aanauvu yomauvu ya yooloka, oye ya eta kuYesus. Yesus okwa tenheka omake yaye kukehe omunauvu ndee te ya eluva ayehe. 41 Neemhepo va kaka ova zamo maanhu oyendji avi ingiva avi ti, "Oye Omona waKalunga!" Ndee Yesus okwe vi hanyena, inevi pitika vi popye, shaanhyi ovi mu shii kutya oye Kilistus.

42 Nhyi kwasha, Yesus okwa zamo moshilando, ndele ta yi eke ikalela. Aanhu oye mu konga, nanhyi ye mu mona oya kambavala oku mu kwatela po aha ze po puyo. 43 Ndele okwa ti kuyo, "Ondi na okuuvifa Onghundana Oiwa yOuhamba waKalunga nomoilando ikwao, shaanhyi Kalunga osho a tuma nge ndi ninge."

44 Okwa twikila nokuuvifa mOinangoga yomuYudea.