1 Yesus okwa talaatala nokwa mono nghee aakengeli taa umbu ongalo moshikefa shoimaliwa shotembeli. 2 Okwa mona wo omuselekavi umwe ohepele, a tula mo oupeni uyali. 3 Yesus okwa ti, "Oshili andi mu lombwele kutya, kape na omalimbililo, omuselekavi ngu ohepele okwa tula mo oshindji e vule ayehe yamwe. 4 Molwanhyi ayehe oya umba ongalo yoimaliwa yomomaliko yawo, ndele omuselekavi moluhepo lwae okwa tula mo ashihe nhyi a li e na okwiipalufa yaye ayihe."

5 Yamwe yomaalongwa oya popya kombiga yOtembeli, nghee ya tungwa nomamanya ya opala, nomaano nga haa pewa Kalunga, ndee Yesus okwa ti, 6 Ayihe mbi mu wete mbi; efimbo a li keya, ihapu ka fiwa emanya lya londa kekwawo inali kumunwa po."

7 Opo nee aalongwa oyemu pula ya ti, "Mulongi, nhyi ashika ningwa naini? Neviviliko ndi ali ka holola kutya efimbo olya fika mbi yi ningwe lipi?"

8 Yesus okwa ti, "Kotokeni muha pukifwe. Molwanhyi aku ka holoka aanhu oyendji mevina lyange, taa ti oyo Kilistus, yo taa ti efimbo olya fika. Ndele ina mu ya landula. 9 Inamu tilifwa nge amu uvu eenghundana voita nomapiyaano. Mbi oyi na okuningwa, ndele ehulilo ina li fika natango."

10 Natango okwe ya lombwela ta ti, "Oilongo ota yi ka kondjifafana, nomauhamba otaye keilwifa. 11 Aku keya omakakamo yevu omanene, ondjala, omikifi omiviyu keembiga neembiga. Keulu aku ka holoka omaviviliko omanene nomatilifi." 12 Mhanga ayihe mbi ina yi ningwa, otamu ka kwatwa nokumonifwa oihuna. Otamu ka falwa keemhangu mOinangoga, ndele tamu ka evililwa meevologo. Amu ka falwa koipala yeehamba nomalenga omolwevina lyange." 13 Ashika kala omhito yeni, muya lombwele Onghundana Oiwa. 14 Inamu kala muna, mu na oshimhiyu kutya, amu ke ipopila ngeepi. 15 Molwanhyi andi ke mu pa oitya neenduge tavi nyenge aatondi yeni ayehe oku mu kondjifa. 16 Amu ka yandjwa moikaha yaataatayi yeni kaakulunhu yeni, kaamwanyoko aalumenhu, kaakwanezimo nokookaume keni, nayamwe yomunye otaa ka vipawa. 17 Amu ka tondwa kwaayehe mevina lyange. 18 Ndele amu ka kala mwa yamenwa, nohuki yimwe yokomitwe veni iha yi ka kana. 19 Kaleni mwa pama momahepeko, opo mu hupife eemwenyo veni."

20 Nge amu mono Yelusalema sha kondekwa komatanga yaakwaita, shiweni kutya, oshili popepi nokuhanaunwa po. 21 Ayehe mba ye li muYudea naatondokelele keendudu, namba ye li moshilando shoshene naamatuke po; namba taa ka hangika ye li pondje yasho, inaa yalukilamo. 22 Oshonhyi nga oyo omasiku yehandukilo, ewanifo lyaayihe mbi ya shangwa. 23 Woo! Oihuna, kaasimba naamwali yopefimbo ndyo! Ouviyu awu ka hanga evu ndi, nehandukilo lyaKalunga otali ke ya kombada yaanhu mba. 24 Yamwe otaa ka vipawa nemaongamwele, yo yamwe otaa ka tulwa meevologo moilongo ayihe. Aakwailongo otaa ka lela Yelusalema, siyo efimbo lyao a li puko.

25 Aku ka holoka omaviviliko omatilifi ketango, komwevi nokeenyofi. Aanhu ayehe yokombada yevu otaa ka tila, notaa ka tilifwa kepopomo lyefuta nokomakufikufi yalyo. 26 Aanhu otaa ka tila notaa ka ngabuka molwoumbada woinima mbi tayi ka hanga ouyuni auhe, oshonhyi eenghono vomewangandjo avi ka kakamifwa. 27 Ndee otaa ka mona Omona wOmunhu te ya, ta endele moshikoo, e na eenghono ovidji neyavimo. 28 Hano nge ayihe mbi ta yi tameke okuningwa, fikameni, yeluleni omitwe veni, oshonhyi ehupifo lyeni olili popepi."

29 Ndee okwe ya lombwela eyele ta ti, "Vilaavileni omukwiyu nomiti omikwawo vimwe. 30 Omafo yawo nge ta ye ya ko, omushi shii kutya ofinge oyi li popepi. 31 Hano osho nghaa nge a mu mono ayihe mbi ta yi ngwa, kaleni mushi shii kutya, Ouhamba waKalunga ouli popepi.

32 Oshili andi mu lombwele, epipi ihali hulupo, mhanga ayihe mbi inayi ningwa. 33 Eulu nevu ali hulu po, ndele eehapu vage ihavi hulu po.

34 Kotokeleni omitima veni nye yene, opo inamu faalelwa koitufi nokoukolwe, noiho yonghalamwenyo ndji, opo esiku ndyo kali mu hange ombaavilila. 35 Oshonhyi a li ya lya fa omwiyo, a li yakele aanhu ayehe kombada yevu alihe. 36 Tonateni nye mu yalikane efimbo alihe opo mu mone eenghono vokumu pitifa mwaayihe mbi ta yi ka ningwa, nokufikama koshipala shOmona wOmunhu."

37 Yesus okwa kala ta longo aanhu motembeli kehe esiku, ndee shaa kwa toka, oha yi a ka tokelwe kondudu yeeholivi. 38 Aanhu ayehe oha ya yi kOtembeli ongula kehe, ye kemu pwiikine.