1 Yesus nhyi a mana okupopya kaanhu ayihe mbi, okwa ya kuKapelenaum. 2 Omukulunhu waakwaita waLooma okwa li e na omupiya waye, ngu a li a simaneka, taaluka e li pokusa. 3 Nhyi omukulunhu waakwaita a uva kombiga yaYesus, okwa tuma aakulunhu yaaYuuda kuYesus, ye mu indile opo a ye a ka eluve omupiya waye. 4 Oye ya kuYesus ndee taye mu indile ya manamo ya ti, "Omulumenhu ngu okwa wana okukwafwa kwooye, 5 molwanhyi okuhole aanhu yetu, ye okwetu tungila nOshinagoga."

6 Yesus okwa ya nayo, ndee mhanga ye li pokufika, omukulunhu waakwaita okwa tuma ookaume kaye kuYesus ye mu lombwele taa ti, "Omwene, inandi hala wu ihepeke, oshonhyi ame inandi opala wuuye mo meumbo lyange. 7 Sho osho naame inandi opala nduuye kwooye. Popya ike ohapu imwe, omupiya wange ota eluka. 8 Oshonhyi naame omunhu ndi li kohi yepangelo, nondi na aakwaita mepangelo lyange. Andi lombwele ngu, ‘Inda!’ Ndee ota yi. Andi lombwele mukwao, ‘Ila’! Ndee ote ya. Andi lombwele omupiya wange, ‘Ninga nhyi’, Ndee oteshi ningi."

9 Nhyi Yesus eshi uva, okwa li eshi kuminwa. Okwa punguluka ndee ta taalele kongudu yaanhu ndji ya li ye mu landula, ndee ta ti, "Andi mu lombwele, inandi mona nande onale eitaelo lya fa mha, nomuIslaeli inandi li mona mo."

10 Hano mba ya li ya tumwa oya shuna keumbo lyomukulunhu waakwaita, ya hanga omupiya a eluka.

11 Inapu pita efimbo eleka, Yesus okwa ya komukunda wevina Nain, pamwe naalongwa yaye nongudu onene yaanhu. 12 Nhyi a fika posheelo shomukunda mbo, okwa shakenapo naanhu ya hinda omuviba taye kewu fundika. Nakusa okwa li e ivalelwa, nayina okwa li omuselekavi. Nongudu onene yaanhu yomomukunda mo oya ya pamwe naina yanakusa. 13 Nhyi Omwene a mona omuselekavi, okwe mu uvila olukeno ndee ta ti kuye, "Ino lila ali." 14 Yesus okwa heena popepi, ndee ta kumu mha pwa hindwa omuviba, naahindi yomuviba oya kanghama. Yesus okwa ti, "Mumati omunyasha, andi ku lombwele, penduka po!" 15 Omumati okwa penduka ndee ta tameka okupopya. Yesus okwe mu yandja kuyina.

16 Aanhu oya li ya tila, noya hambelela Kalunga ya ti, "Omuhunganeki omunene a holoka mokati ketu. Kalunga okwe ya a hupife aanhu yaye!"

17 Ehokololo kombiga yaYesus olya tandaela naYudea nomoitopolwa yopoushiinda.

18 Aalongwa yaYohanesa Omushashi oye mu hokololela ayihe mbi ya ningwa kuYesus. Yohanesa okwa ifana yaali yomaalongwa yaye, 19 ndee te ya tumu kOmwene yeke mu pule, "Ooye nghaa nakuuya nenge otu na okuteelela umwe?"

20 Aalongwa yaYohanesa nhyi ya fika kuYesus oya ti, "Yohanesa Omushashi okwe tu tuma tukupule nge ooye nghaa nakuuya nganhyi ta ti, nenge otuna oku teelela umwe?"

21 Pefimbo ndyo, Yesus okwa yeluva aanhu oyendji komauvu yao, komikifi nokeemhepo va kaka, nokwa monifako omeho yaaposi oyendji. 22 Yesus okwa yamukula aalongwa yaYohanesa a ti, "Shuneni muka hokololele Yohanesa ayihe mbi mwa mona nambi mwa uva; Aaposi otaa mono ko, oilema otai ende, aanashilundu otaa yela, aafitamakutwi otaa uvu ko, aasi otaa umuvwa, neehepele avi uvifilwa Onghundana Oiwa. 23 Omunelao oye ngu iha limbililwa nge."

24 Nhyi aatumwa yaYohanesa ya ya, Yesus okwa tameke okuhepululila eengudu vaanhu kombiga yaYohanesa ta ti, "Mombuwa omwa ile mo mu ka tale shi? Enenge a li nyengaanyengifwa komhepo? 25 Nenge omwa ile mu ka tale shi? Omunhu a zala oikutu yondilo? Ahawe, mba haa zala oikutu yondilo oye li mouwa meembala veehamba. 26 Nenge omwa li mwa teelela mu mone shi? Omuhunganeki mbela? Oshili andi mu lombwele, Ye oku vule omuhunganeki. 27 Oye tuu ngu a shangwa kwa ti, ‘Tala, andi ku tetekelifile omutumwa wange, teku longekivile ondjila.’" 28 Yesus okwa twikila ko ta ti, "Andi mu lombwele, Yohanesa okuvule ayehe mba ya valwa pambelela, nangu omushona e vulike kwaayehe mOuhamba waKalunga, oye e vule Yohanesa." 29 Aanhu ayehe naafendelifi mba ya li ya pwaikina euvifo, oya vulika kouyuuki waKalunga, ndee taa shashwa kuYohanesa. 30 Ndele Aafalisai naalongimhango inaa vulika kehalo lyaKalunga, onghee oya anya okushashwa kuYohanesa.

31 Yesus okwa twikila ko, "Nganhyii, aanhu yopefimbo ndi andi ya yeleke nashi? Oya fa shi? 32 Oya fa ounona u li omutumba pomalandifilo tau ingivile ukwao tau ti, ‘Otwe mu pandulila, ndele ina mu tutula ouvano. Otwa imba omaimbilo yeesa, ndele ina mu lila.’ 33 Oshonhyi Yohanesa omushashi okwe ya, te ivilike, ye iha mu omaviinyu, ndele nye amu ti, ‘Ye oku na eemhepo va kaka.’ 34 Omona wOmunhu okwe ya, ta li ye ta mu. Ndee amu ti, ‘Tala komufukanhu nokongholwe, kaume kaafendelifi nokaalunde.’ 35 Ounongo waKalunga owa hololwa wa yuuka kwaayehe mba yemu tambula".

36 Wumwe womAafalisai okwa hiya Yesus a ka lye oulalelo pamwe naye. Yesus okwa ya meumbo lyOmufalisai, ndee ta kala omutumba poshililo a lye. 37 Moshilando omwa li omukiinhu a lumba moulunde. Nhyi a uva kutya Yesus oku li meumbo lyOmufalisai ta li, okwe ya mo e na oshikola shomaavi ya nyika nawa unene. 38 Okwa fikama konima yaYesus peemhavi vaye. Okwa tameke oku lila ta moteke eemhavi vaYesus nomahovi yaye, nokwe vi puula neehuki vokomutwe waye. Okwa simaneka Yesus nokuhupita eemhavi vaye, ndee tevi yaeke nomaavi ya nyika nawa. 39 Ndee Omufalisai ngu a hiya Yesus nhyi eshi mona, okwe ipopile a ti, "Omulumenhu ngu ngeno okwa li omuhunganeki ngeno okuna okukala e shii kutya, omukiinhu ngu e mu piya omulunde."

40 Opo nee Yesus okwe mu lombwele a ti, "Simoni, ondi na sha nda hala ndi shi ku lombwele." Simoni okwa yamukula a ti,

"Mulongi lombwela nge!" 41 Yesus okwa ti kuye, "Okwa li kuna omulumenhu umwe a liwa eenguga kaanhu yaali, umwe okwe mu lya eenguga voimaliwa oikukutu oisiliveli omafele yatano, umwe okwe mu lya eenguga voimaliwa omilongo nhano. 42 Ayehe yaali oya li ya nyengwa oku vi futa, opo nee, okweya vimina po ayehe yaali. Olye womumba yaali ta kala e mu hole e vule mukwao?" 43 Ndee Simoni okwa yamukula ta ti, "Ondi wete kutya oye ngu a viminwa po eenguga ovindji." Yesus okwa ti kuye, "Owa pangula mondjila." 44 Ndee Yesus okwa pungulukila komukiinhu ndee ta ti kuSimoni, "Ouwete omukiinhu ngu? Onde ya meumbo lyoye, ndele ino pange omeya yokukoha eemhavi vage, ndele ye okwa moteka eemhavi vage nomahovi, ndee te vi puula neehuki vaye. 45 Oye ino tambulange ko nehupito, ndele omukiinhu ngu ina efa okusimaneka nge nokufipa eemhavi vage nghee nde ya mha. 46 Oye ino yaeka omutwe wange nomaavi, ndele ye okwa yaeka eemhavi vage noomaavi ya nyika nawa. 47 Onghee hano andi ku lombwele, ohole oyindji ndji a ulika oya koleka kutya okwa viminwa po eendjo ovidji. Ndee ngu a viminwa po eendjo eeshona, okuna ohole oshona."

48 Opo nee Yesus okwa ti komukiinhu, "Eendjo voye ova vimwa po."

49 Mba ya li ye li omutumba oya tameka okupulafana, "Hano oye naana lye ngu, ta vulu nokuvima po eendjo?"

50 Ndele nee Yesus okwa ti komukiinhu, "Eitaelo lyoye olye ku hupifa, Inda nombili."