1 Ndee Yesus okwa lombwela aalongwa yaye ta ti, okwa li ku na omulumenhu omuyamba, e na omutonateli weumbo lyaye, ngu aku popiwa a li ta hanauna po eliko lyomuhona wae. 2 Omuyamba okwa ifana omutonateli ndee ti kuye, "Onduuvite oshindji kombiga yoe. Penge eyalulo lyoinima ayihe mbi ya li metonatelo lyoye, molwanhyi ihoka twikila ali nokutonatela omaliko yange." 3 Omutonateli okwe ipopila ta ti, "Ondi na okuninga ngeepi, nhyi omuhona wange ta kufa nge moilonga? Okulima ihandi ku vulu, oku ehela onda sa ohoni. 4 Nhyi ndi na okuninga ondi shi shii, opo aanhu ya tambule nge momaumbo yawo ngeege nda tewa mo moilonga. 5 Okwa ifana kehe ngu a li e na eenguga vomuhona wae, ndee ta ti ku ngu e ya mo tango, ‘Ouna eenguga vomuhona wange vi fike peni?’ 6 Okwa yamukula, ‘Omaela yomaavi efele limwe’. Omupiya okwa ti, ‘Kufa omushangwa weenguga voye, kala omutumba, ndee to shanga po omilongo nhano.’ 7 Natango okwa pula mukwawo, ‘Oye ouna eenguga va ingapi?’ Okwa yamukula, ‘Eeshako voilya eyovi limwe.’ Omupiya okwa ti, ‘Kufa omushangwa weenguga voye, kala omutumba, ndee to shanga po omafele yahetatu.’

8 Ndee omuhona womutonateli okwe li pandula, molwanhyi lya longa neenduge. Oshonhyi aakolokohi naanhu mba haa yende pauyuni mbu, oye iwete ye na eenduge ye vule oyana yaKalunga."

9 Ndee Yesus okwa ti, "Onghee hano andi mu lombwele, ikongeleni ookaume neliko lyounyuni mbu, opo nge ali hulupo, muka tambulwe meumbo lyaaluhe. 10 Ngu omwiineekelwa moinima mbi oishona, ote ineekelelwa nambi oinene, nangu omunaipupulu moinima oishona, ye omunaipupula nomumbi oinene. 11 Nge kamu shi aayineekelwa mokulongifa eliko lyomouyuni mbu, amu vulu ngeepi okwiineekelelwa eliko lyoshili? 12 Nongeege kamu shi aayineekelwa moinima mbi kaishi yeni, olye te mu pe mbi yeni yene? 13 Kaku na omupiya ta vulu okulongela aahona yaali; oshonhyi ota tondo umwe, ndee ta kala e hole mukwawo, nenge ta simaneke ngu, ndee ta vini wiinya. Ihamu vulu okulongela Kalunga noimaliwa pefimbo limwe."

14 Nhyi Aafalisai ya uva oinima mbi ya popiwa kuYesus, oya yola, molwanhyi oya li ye hole oimaliwa. 15 Opo nee Yesus okwa ti kuyo, "Nye ohamu iyulike aayuki momeho yaanhu, ndele Kalunga okushii omitima veni nyhi vi li. Oshonhyi nhyi aanhu ya tala shina esimano, osho oihuna koshipala shaKalunga. 16 Omhango yaMoses nomanyolo yaahunganeki oya huulila muYohanesa. Okuza mho, Onghundana Oiwa tayi popi Ouhamba waKalunga otawuuvifwa, nakehe umwe ota kondjifa a ye mo. 17 Ndele okuhulapo kweulu nevu okuhwepo ku vule okukanapo kwokanghwanu kamwe komomhango. 18 Kehe omulumenhu ngu ta henge po omukiinhu wae, ndee ta hombola po umwe, ota hondele. Ndee nangu ta hombola omuhengwa ota hondele.

19 Okwa li ku na omulumenhu omuyamba, ha zala oikutu yondilo noha lumbu onghalamwenyo oiwa kehe esiku. 20 Posheelo sheumbo lyaye opwa li hapu kala ohepele yevina Lasalus, yi na omafina olutu aluhe. 21 Ohepele ndji ohai kala ya hala okulya oundjaumuke mbu tau wu koshitaafula shomuyamba. Olundji eembwa oha vi ya, ndee avi lafa omafina yaye. 22 Hano ohepele ndji nhyi ya sa, oya papatelwa kaayengeli ndee taye mu fala meulu puAbeleham. Omuyamba naye okwa sa, ndee ta fundikwa, 23 nomoshaasi okwa kala moululume. Nhyi a yelufa omeho kokule naye, okwa mona Abeleham ye li naLasalus. 24 Okwa ingiva a ti, ‘Tate Abeleham! Sila nge onghenda, u tume Lasalus, a ye omunwe wae momeya, ndee ta taalelife kelaka lyange, oshonhyi ondili moululume omundji momundilo!’ 25 Ndele Abeleham okwa ti kuye, ‘Mumwange, vibuluka kutya mhanga wa li momwenyo, owa pelwe oinima ayihe oiwa, ndele Lasalus okwa pelwe oinima ayihe mbi oiyi. Paife Lasalus okuli mehala oliwa, a mbilipalelwa, mhanga oye to lulumikwa. 26 Ndele nande ongaanhyo, pokati ketu nooye opuna elambo eleka, opo mba ya hala okutaulukila kunye, nenge mba ya hala okutaulukila kuse inaye shi vula.’ 27 Omuyamba okwa ti, ‘Andi ku indile tatekulu, u tume Lasalus keumbo lyatate, 28 ondina ko aamwameme aalumenhu yatano, opo e ke ya londove, ina ye ya mehala ndi lyoululume’ 29 Abeleham okwa ti, ‘Aamwanyoko oye na Moses naahunganeki, naye ya pwiikine.’ 30 Omuyamba okwa yamukula, ‘Ahawe tate Abeleham! Ngeno okwa li taku umuka umwe womaasi, ndee ta yi kuyo, ngeno ota ye itevulula.’ 31 Abeleham okwa ti, ‘Nge inaa pwaikina Moses naahunganeki, natango iha ya itaelifwa nande naku yumuke umwe kaasi.’"