1 Omusimanekwa Tiofelius. Aashangi oyendji oya longa nouviinini, ya shange oiningwanima mbi ya ningwa mokati ketu. 2 Oya shanga nhyi twa li twa hokololelwa kumba yali ya mona nomeho yao okuza petameko, yo aayakuli yohapu yaYesus. 3 Onghee hano naame nhyi nda konaakona oinima ayihe okuza petameko, ondi wete shili mondjila, ndi ku shangele ehokololo lya yela omusimanekwa Tiofelius, 4 opo u shiwe oshili kombiga yaayihe mbi wa longwa.

5 Efimbo Helodesa a li omupangeli waYudea, okwa li kuna omuyambi wevina Sakalia, wometanga lyaAbia. Evina lyomukulukavi wae oElisapeta womezimo lyaAlona. 6 Ayehe yaali oya li aayuuki koshipala shaKalunga. Oya li ya vulika koipango ayihe nokomaufo ayehe yOmwene. 7 Oyali kaye na ounona molwanhyi Elisapeta okwa li iha mono ounona. Yo ayehe oya hangika ya kulupa unene.

8 Esiku limwe mhanga Sakalia a li ta longo moilonga yaye youyambi mEumbo lyaKalunga, 9 pamukalo mbu wa li wa landulwa kaayambi, Sakalia okwa li a hoololwa pashihoololifo opo a ka twinine mOtembeli, kokutya mEumbo lyOmwene. 10 Pefimbo lyetwinino, aanhu ayehe oya li ye li pondje taa yalikana.

11 Opo nee omuyengeli wOmwene okwe mu ihololela, a kala ofika kolulyo lwoaltali yokutwinina. 12 Nhyi Sakalia e mu mona, okwa haluka nokwa li a tila. 13 Ndele omuyengeli okwa ti kuSakalia: "Ino tila, eyalikano lyoye Kalunga okwe li uva. Omukiinhu woye Elisapeta oteku valele okaana okamati ndee toka luku Yohanesa. 14 Oto ka hafa, noyendji otaa ka hafela evalo lyako, 15 oshonhyi a ka ka kala omunhu omunene koshipala shOmwene. Omaviinyu noshikumwa kehe hashi kolifa ihe keshi mwa. Ota ka uvifwa nOmhepo Ondjapuki mhanga e li mepunda lyaina. 16 Oyendji yomoshiwana shaIsrael oteke ya alulila kOmwene Kalunga kawo. 17 Oye omutumwa wOmwene, te ya nomhepo neenghono afa Elia. Taka hanganifa oohe noyana, ta tula oonakuhavulika mondjila ya uka, ye ta longekiva aanhu ye ilongikivile Omwene wawo."

18 Sakalia okwa pula omuyengeli a ti, "Nhyi andi shi shiwa ngeepi? Oshonhyi ame onda kulupa, nomukulukavi wange naye okwa kulupa."

19 Omuyengeli okwe mu yamukula a ti, "Aame Ngapiela, nda fikama moukali po waKalunga, ngu a tuma nge ndi ku lombwele Onghundana Oiwa. 20 Nganhyi pwaikina; Molwanhyi ino itaela eehapu vage, vi a vi ka ninga voshili pefimbo lya opala, oto ka kala iho popi siyo esiku ndi ayihe mbi nda uvaneka tayi ka wanifwa."

21 Pefimbo ndyo aanhu oya li ya teelela Sakalia noya li ya kumwa kutya omolwashi a kala mo efimbo eleka motembeli. 22 Nhyi a zamo, okwa li iha vulu okupopya nayo. Aanhu oya vibulula kutya okwa mona emoniko motembeli. Molwanhyi Sakalia okwa li iha vulu oku popya nayo, okwe ya lombwele nokuninga omaviviliko nomake. 23 Omasiku yoilonga yomOtembeli nhyi ya pwa ko, Sakalia okwa shuna keumbo. 24 Konima yomasiku, omukulukavi waye Elisapeta okwa ningi eteelelo, nokwa kala meumbo oule weemwevi nhano ina zamo. Ndee Elisapeta okwa ti, 25 "Omwene oye eshi niningila nge. A ningila nge ouwa nokwa kufa nge okuvinwa kaanhu."

26 Momwevi omutihamano weteelelo lyaElisapeta, Kalunga okwa tuma omuyengeli Ngapiela a ye komukunda Nasaleta womuGalilea. 27 Okwa li a pewa etumwalaka lyomukavona a yalekwa komulumhenu wevina Yosef, womepata lyaDaavid. Evina lyomukavona oMalia. 28 Omuyengeli okweya kuye ndee tati, "Ombili nai kale nooye! Omwene okuli pamwe nooye nokwe ku yambeka."

29 Malia okwa li a piyaanekwa unene ketumwalaka ndi lya za komuyengeli, nokwe ipula kutya olya hala naana okutya ngeepi. 30 Omuyengeli okwa ti kuye, "Malia, ino tila, oshonhyi owa silwa onghenda kuKalunga. 31 Otoka ninga omusimba, ndee toka vala okaana okamati, toka luku Yesus. 32 Ye ota ka kala omunene, nota ka ifanwa Omona waKalunga Wokombadambada. Omwene Kalunga oteke mu ninga Ohamba nganhyi hekulu David. 33 Otaka kala Ohamba yoluvalo lwaYakopo, nOuhamba waye otau kala po siyo aluhe."

34 Malia okwa ti komuyengeli, "Ashi shiwa ngeepi nge natango ame omukavonaelela?"

35 Omuyengeli okwa yamukula, "Omhepo Ondjapuki otai keya kooye, neenghono vaKalunga Wokombadambada avi ka wila kombada yoye. Nomolwanhyi, okaana ngha a ka ka kala okayapuki, ko aka ka ifanwa Omona waKalunga. 36 Vibuluka omukwanezimo woye Elisapeta, ngu kwa itaelwa kutya ye etimhe, okuna eteelelo lyeemwevi hamano nonande ye okwa kulupa lela. 37 Oshonhyi kaku na sha ashi nyenge Kalunga."

38 Ndee Malia okwa ti, "Ame omupiya wOmwene, nandi ningilwe nganhyi wa popya." Opo nee omuyengeli okwa zapo puye.

39 Pefimbo olyo tuu ndyo, Malia okwa fikama ta endelele, ndee ta yi komukunda womuYudea, koshitopolwa shi na oikulundudu. 40 Okwa ya meumbo lyaSakalia ndee ta kundu Elisapeta. 41 Nhyi Elizabet a uva ekundo lyaMalia, okaana mepunda oka kulukuta. Opo nee Elisapeta okwa uvifwa nOmhepo Ondjapuki 42 ndee ta popi mopale a ti, "Owa yambekwa mokati kaakiinhu ooyakweni, nokaana ngha ke li mepunda lyoye oka yambekwa. 43 Omolwashi ndi na okuningilwa oshinenenima nhyi, yina wOmwene wange e ya okutalela nge po? 44 Ondaka yekundo lyoye nhyi ya fika momakutwi yange, okaana ngha ke li mepunda lyange oka nhuka kehafo. 45 Oumunelao, shaanhyi owa itaela kutya nhyi wa lombwelwa kOmwene ashi ka wanifwa."

46 Malia okwa ti,

"Omwenyo wange otau hambelele Omwene, 47 nomhepo yange otayi hafele Kalunga Omuhupifi wange,

48 oshonhyi okwa vibulula omupiya waye mokwiihupipika kwaye.

Okuza Nganhyi aanhu ayehe otaa ka ifana nge omunelao,

49 oshonhyi omunanghono auke okwa ningilange oinima oinene.

Evina lyaye eyapuki.

50 Ota sile onghenda ayehe mba haye mu tila,

okuza kepipi nepipi.

51 Okwa longa oilonga oinene nokwaako kwaye okunanghono,

ndele ta halakanifa po aainenepeki opamwe neemhangela vomitima vao.

52 Okwa kufa ko aapangeli aananghono koipangelapundi yawo,

ndele ta nenepeke aaihupipiki.

53 Okwa kutifa mba ya sa ondjala nouwa,

ndele aakengeli okwe ya taataa eenyala vashinya.

54 Okwe ya ku kwafa Israel omupiya wae,

mokuvibuluka esilonghenda lyaye,

55 nganhyi naanaa a li a uvanekela ootatekulu, Abeleham,

noluvalo lwae siyo aluhe."

56 Malia okwa kala naElisapeta oule weemwevi nhatu, ndee ta shuna keumbo lyao.

57 Efimbo lyaElisapeta lyokumona okaana nhyi lya fika, okwa mona okaana okamati. 58 Aashiinda naakwanezimo nhyi ya uva nghee Omwene e mu hololela onghenda onene i fike mho, oya hafela pamwe.

59 Okaana nhyi ka wanifa omasiku yahetatu, aanhu oye ya yeka pitife etanda. Oyali ya hala ye ka lukile he Sakalia. 60 Ndele yina okwa ti, "Aae, ota lukwa Yohanesa."

61 Yo oya ti kuye, "Mezimo lyoye kamuna omunhu e na evina ndyo." 62 Oya lombwela he nokuninga omaviviliko nomake opo yemu pule kutya, okaana okwa hala ka lukwe lye.

63 Sakalia okwa indila a pewe okapelende koku shanga ndee ta shanga ko, "Evina lyokaana oYohanesa." Aanhu ayehe oya li ya kumwa. 64 Pefimbo ndyo, ewi lyaye olya fituluka nelaka olya manguluka, ndee ta tameke okupopya, ta hambelele Kalunga. 65 Aanhu ayehe poushiinda oya kwatwa koumbada, naayihe mbi ya ningwa oya popiwa, ndele tayi tandaele noshitopolwa nhyo shoikulundudu shomuYudea. 66 Ndee ayehe mba yeshi uva, oya li yakumwa, noye ipula meemwenyo ya ti, "Mbela okaana ngha a ka ka kala ngeepi?" Ndele oya vibulula kutya, oke li momake yOmwene.

67 He ya Yohanesa Sakalia okwa li a uvifwa nOmhepo Ondjapuki, ndee ta hunganeke ta ti,

68 "Omwene Kalunga kaIslael na hambelelwe!

Oshonhyi okweya okukwafa nokumangulula aanhu yaye.

69 Okwe tu pa omuhupifi ependa,

a za mezimo lyaDavid omupiya wae."

70 Okwa uvaneka okupitila maahunganeki yaye aayapuki pefimbo lyonale kutya,

71 oteke tu hupifa maatondi yetu

nomomake yaayehe mba yetu tonde.

72 Nhyi okwe shi ninga opo a ulike onghenda yaye kootate, moku vibuluka ehangano lyaye eyapuki.

73 Okwa ana kutate Abeleham kutya,

74 ote tu hupifa, momake yaatondi yetu,

tumu longele katu na oumbada,

75 opo tu ninge aayuuki naayapuki koshipala shaye,

omasiku yetu ayehe.

76 "Oye mumwange, otoka ifanwa omuhunganeki waKalunga Wokombadambada.

Otoka tetekela Omwene,

umu palele ondjila,

77 oto ka longa aanhu yaye ya shiwe ehupifo,

kupitila meviminopo lyeendjo vawo.

78 Molwolukeno nesilonghenda lyaKalunga ketu,

ota ningi eluwa lyehupifo li tu tendele,

79 li minikile ayehe mba ye li momilaulu nomomuzizibwa weso,

lyo ali wilike eemhavi vetu mondjila yombili."

80 Okaana oka koka, ndee a ka kala ka pama pamhepo. Okwa kala mombuwa siyo esiku ndi ei hololela Aaislaeli.