1 Ongudu ayihe oya fikama noya fala Yesus kuPilatus. 2 Oya tameke oku mu lundila taa ti: "Otwa kwata omulumenhu ngu, molwanhyi ota pukifa aanhu ye ota keelele aanhu ya yandje oifendela komupangeli Omuroma, ye ote iti oye Kilistus, ohamba."

3 Pilatus okwe mu pula a ti, "Ooye ohamba yaYuda?" Yesus okwe mu yamukula a ti, "Nganhyi to ti."

4 Pilatus okwa lombwela aawiliki yaayambi nongudu ayihe yaanhu a ti, "Kandi wete etomhelo lyokutamaneka omulumenhu ngu."

5 Ndele aatamaneki oya popya nouviinini ya ti, "Ota piyaaneke aanhu nelongo lyaye muYudea ashihe. A tameka muGalilea, ndee paife oyengu mha."

6 Pilatus nhyi e shi uvu okwa pula, "Hano omulumenhu ngu Omugalilea?" 7 Nhyi a uva kutya Yesus okwa za koshitopolwa nhyi shili mepangelo lyaHelodesa, okwe mu tumu kuHelodesa, molwanhyi Helodesa okwa li muYelusalema efimbo ndyo. 8 Helodesa nhyi a mona Yesus, okwa li a hafa neenghono, oshonhyi okwa li ike e mu uva, nokwa kala efimbo eleka a hala oku mu mona, na unene okwa kala a hala a mone Yesus ta longo oshikumwifalonga. 9 Helodesa okwa pula Yesus omapulo omendji, ndele Yesus ina yamukula. 10 Aawiliki yaayambi naalongimhango oye ya, ndee taa lundile Yesus neenghono. 11 Opo nee Helodesa naakwaita yaye oye mu vini, ndee taye mu sheke. Oye mu zaleke onguwo ongohamba, ndee taye mu shunifa kuPilatus. 12 Oku za kesiku ndyo, Helodesa naPilatus oya panga oukaume, oshonhyi nale oya li ye tondafane.

13 Pilatus okwa ifana aawiliki yaayambi, naawiliki naakwashiwana 14 ndee te ya lombwele ta ti, "Omwa eta omunhu ngu kwaame amu ti ota pukifa aanhu. Onde mu pula moipafi yeni, ndele inandi mona mo nande ondjo ya sha muye yoku mu pangulifa. 15 Na Helodesa ine mu mona ondjo yasha, sho osho e mu shunifila kuse, onghee hano taleni, ina ninga sha shoku mu pefa ondjo yoku mu vipaifa. 16 Onda hala ike a vegwe opo nee andi mu efa.*

18 Opo nee ongudu ayihe oya ingiva ya ti, "Na vipawe! Mangulula Barabbas. 19 (Barabbas li a tulwa movologo molwepiyaaneko moshilongo nomolwevipao.) 20 Ndele molwa nhyi Pilatus okwa li a hala okumangulula Yesus, okwe ya lombwela natango, 21 ndele oya twikila taa ingiva, "Mu yalela komushiyakano, mu yalela komushiyakano!"

22 Pilatus okwa ti kuyo olutitatu, "Omolwashi hano? Ouyi wa shi a longa? Ame inandi mu mona ondjo yoku sa. Andi mu vegifa ike ndee andi mu efa."

23 Ndele oya twikila nokwiingiva mopale Yesus a yalelwe komushiyakano. Nokonima eindilo lyao olya itaelwa. 24 Opo nee Pilatus okwa tokola ehalo lyao liwanifwe. 25 Okwa mangulula mo omulumenhu ngu a li a ivililwa movologo, molwolwoovi nendipao, ndee Yesus okwe mu yandja momake yawo yemu ningile nhyi ya hala.

26 Mokweenda kwawo, oya shakena nomulumenhu wevina Simoni, Omukireni, a hangika ta zi kepya lyaye a uka koshilando, ndee taye mu twike omushiyakano.

27 Ongudu onene yaanhu oyali ya landula Yesus, mwakwatelwa nakiinhu mba ya li taa lili yo taa hekumuna omolwae. 28 Yesus okwa punguluka, ndee ta tala kuyo ta ti, "Yakiinhu nye Aayelusalem, inamu lila nge, ndele i lileni nye yene noyana yeni. 29 Oshonhyi omasiku otaye ke ya, mha aanhu taya ka tya, ‘Aanelao aakiinhu mba ihaa mono ounona, ihaa vala yo inaa nyamifa.’ 30 Pefimbo ndyo aanhu otaa ka tya, ‘Eendudu, tu yileni! Oikulundudu, tu siikileni!’ 31 Oshonhyi omuti omutalala nge osho tawu ningwa ngaanhyi, ongeepi mbela komuti omukukutu?"

32 Yesus okwa falwa a ka vipawe pamwe naalumenhu aakolokohi yaali. 33 Nhyi ya fika kehala ndyo, ha li ifanwa "Ekolotwe," oya alele Yesus komushiyakano pamwe naakolokohi mbo yaali komishiyakano vawo, umwe okolulyo lwae namukwawo okolumoho lwae. 34 Yesus okwa ti, "Tate, ya vimina po eendjo vawo, oshonhyi kaye shii nhyi taa ningi." Oya topolelafana oikutu yaYesus, pamukalo woku yi umbila oshihoololifo. 35 Aanhu oya li fikama ta ye mu tala, mhanga aakulunhu Aayuda ye mu sheka ya ti, "Okwa li ha hupifa aanhu, ne ihupife hano, nge oye Kilistus, omuhoololwa waKalunga."

36 Aakwaita nayo oye ya kuye, ta ye mu sheke, ndee ta ye mu pe omaviinyu omalulu 37 ndee taa ti, "Ihupifa hano, nge ooye ohamba yaYuda." 38 Eehapu vi ova li va shangwa pombada yomutwe wae, "NGU OYE OHAMBA yAayuda."

39 Wumwe womaakolokohi okwe mu sheka ta ti, "Kooye Kilistus hano? Ihupifa hano oye u tu hupife!"

40 Ndele omukolokohi omukwawo okwe mu ngada a ti, "Iho tila Kalunga? Nase otu li mehandukilo lya fa ndi. 41 Okuhandukilwa kwetu okwa okuli mondjila, nhyi atu ningilwa osho ike nhyi twe ilongela, ndele ngu ina ninga nande ouyi washa." 42 Onghee okwa ti kuYesus, "Yesus, vibuluka nge, nge wa fiki mOuhamba woe."

43 Yesus okwa ti kuye, "Oshili andi ku lombwele, nena ndji oto ka kala pamwe naame moparadisa."

44 Efimbo lyomulongo nambali womutenya, okwe ya omilaulu moshilongo ashihe siyo opefimbo lyonhatu yokomatango. 45 Elapi ndi lya li lya topola motembeli, olya tauka pokati moipambu iyali kuza pombada siyo opohi. 46 Yesus okwa ingiva mopale a ti, "Tate, omhepo yange andi yi yandja moikaha yoe." Nanhyi a popya ngaanhyi, okwa si.

47 Omukulunhu waakwaita nhyi a mona ayihe mbi ya ningwa po, okwa simaneke Kalunga a ti, "Kapuna omalimbililo, omulumenhu ngu okwa li kena ondjo."

48 Aanhu mba ya li ya ongala taa tala, nhyi ya mona nhyi sha ningwa po, ayehe oya shuna komaumbo ya sa oluhovi. 49 Aanhu ayehe mba ya li ye shii Yesus, mwakwatelwa naakiinhu mba ya li ye mu landula kuza kuGalilea, oya li ya fikama kokule taa tala oinima ayihe.

50 Okwa li ku na omulumenhu umwe evina lyaye oYosef. 51 Okwa li Omualimatia oshilando shomuYudea. Ye okwa li e na omikalo omiwa, ha ende moshili nokwa li a teelela ouhamba waKalunga. Nande nee ye okwa li oshilyo shaaleli, ye ka li a zimina omatokolo noilonga yawo. 52 Okwa ya ku Pilatus, ndee ta indile omuviba waYesus. 53 Okwe wu kufa, ndee te wu vigile melapi etokele te wu nangeke mombila ya li ya panda memanya, mu inamu tulwa nande omunhu nale. 54 Esiku olya li etitano, nEsabati olyali li li pokutameka.

55 Aakiinhu mba ya li ya landula Yesus oku za kuGalilea, oya li yaa naYosef. Oya mona ombila nanghee olutu lwaYesus lwa nangekwa mo. 56 Nhyi ya ya komaumbo, oya ka longekiva oiziba ya nyika nawa nomiwayo, ya ka yaeke omuviba. MEsabati oya vululukwa nganhyi sha ufwa komhango.