1 Pefimbo ndyo, opwa li pu na aanhu mba ya hokololela Yesus kombiga yaAgalilea mba ya vipawa kuPilatus mhanga ya li taa yandja omayambo motembeli. 2 Yesus okwe ya yamukula a ti, "Amu viilavila kutya, molwanhyi Aagalilea ya vipawa momukalo mbu, oya li aalunde unene ye vule Yakwao? 3 Ahawe, andi mu lombwele, nge inamu itevulula komaulunde yeni, osho nanye amu ka sa nganhyi yo. 4 Nenge amu ti omulongo nayahetatu yenya ya sa nhyi ya wilwa koshungo yomuSiloa oya li aalunde ye vule aanhu ayehe yomuYelusalema? 5 Ahawe. Andi mu lombwele, nanye nge ihamu itevulula, amu ka hanauka po amuhe."

6 Ndee Yesus okwe ya lombwela eyele ndi," Okwa li ku na omunhu e na omukwiyu wa twikwa mepya lyomiviinyu, ndee teuya a konge mo oiyimati muwo, ndele ina mona mo sha. 7 Okwa lombwela omulongi wepya lyomiviinyu, "Tala, ‘Oule weevula nhatu onda kala andiya kukonga mo oiyimati momukwiyu mu, ndele inandi mona mo sha. Uka po. Omolwashike wu na okumana evu eenghono kauwalala? 8 Ndele omulongi okwa yamukula, "mwene, wu efa natango ovula yimwe, mhanga andi fe oshilambo shewu vigilila, ndee andi wu tutile ouhoho. 9 Onawa nge awu ka ima oiyimati movula yalandula, ndele nge ina wu ima, nau kewe po."

10 Esiku lyeSabati Yesus okwa li ta longo aanhu mOshinangoga. 11 Omwa li mu na omukiinhu e niwe komhepo ya kaka, ndji ye mu etela ouvu eevula omulongo nahetatu. 12 Nhyi Yesus e mu mona, okwa ti kuye, "Mukiinhu, owaeluka kouvu woe!" 13 Yesus okwa tenheke omake yaye kombada yomukiinhu, viyaviya omukiinhu okwa fikama, ndee ta tameke okuhambelela Kalunga.

14 Ndele omukulunhu wOshinangoga okwa tameke okuhandukila Yesus molwanhyi a yeluva mesiku lyesabati nokwa lombwela aanhu ta ti, "Oku na omasiku yahamano yoilonga, ileni hano momasiku ngo muyeluvwe, ndele kaishi mesabati."

15 Ndele Omwene okwe mu yamukula ta ti, "Munaineya oye! Ihamu pitifa mo ongobe ile ondoogi moshuunda mesiku lyEsabati, ndele amu keyi hwiila? 16 Ndee mha opu na omutekulu wAbeleham, ngu Satana a tula mouvu oule weevula omulongo nahetatu, ndele iha mangululwa ngeno mesiku lyEsabati?" 17 Hano Yesus nhyi a popya nhyi, aatondi yaye ayehe oya si ohoni, ndee aanhu yakwawo ayehe oya hafele oilonga oikumifi e yi longa.

18 Yesus okwa ti, "Ouhamba waKalunga owa fa shi? Andi wu yeleke nashi? 19 Owa fa omuma oshona lela, Omulumenhu e yi kufa, ndee te yi kunu mepya lyaye. Oya koka, ndee tayi ningi omuti, neevila ova tungilamo oihavila moitayi yawo."

20 Natango Yesus okwa pula, "Ouhamba waKalunga andi wu yeleke nashi? 21 Owa fa efulika, omukiinhu e li kufa, ndele te li pilulile mousila oimbale itatu, nde nande nee efulika olya li eshona lela, ousila auhe owa li wa fula."

22 Yesus okwa enda moilando nomomikunda, ta longo aanhu, nhyi a li mondjila yaye yokuya kuYelusalema. 23 Wumwe okwe mu pula, "Omwene, aanhu mba taa ka hupifwa aashona ike?" Yesus okwa ti kuyo, 24 "Kondjeni, mu ye mo mosheelo sha finana, sha uka mOuhamba waKalunga, oshonhyi andi mu lombwele, oyendji otaa kambavala okuya mo, ndele otaa ka nyengwa. 25 Mwene weumbo nge okwa penduka, ndee ta ivile omweelo weumbo, nena amu fikama pondje, ndee amu konghola pomweelo amu ti, ‘Mwene tu yeulula!’ Ndele ye otemu yamukula ta ti, ‘Kandi shii mha amu zi!’ 26 Ndee nye amu ka tya, ‘Se otwa lya nokunwa pamwe nooye, nowa longa aanhu mondoolopa shetu.’ 27 Ndele ye oteke mu lombwela ta ti, ‘Kandi shii mha amu zi, zeni po pwaame aakolokohi nye!’ 28 Ndee aku ka kala elilaano neikokoto lyomayoo, nhyi amu ka mona Abeleham naIsak naYakopo naahunganeki ayehe mOuhamba wa Kalunga, mhanga nye mwa undulilwa pondje. 29 Ndee aanhu otaa ka za keembiga avihe vouyuni ndee taa ka kala omutumba mOuhamba waKalunga. 30 Ndee aahwiinini otaa ka ninga aatango, naatango otaa ka ninga aahwiinini.

31 Pefimbo olyo tuu ndyo, yamwe yomAafalisai oye ya, ndele taa ti kuye, "Fikama, zapo mha, oshonhyi Helodesa okwa hala oku ku vipaa."

32 Yesus okwa ti kuyo, "Indeni mu ka lombwele kaandje ngo, amu ti, ‘Tala, nena nomongula andi temo eemhepo va kaka nokuyeluva, ndee esiku etitatu andi ka mana oilonga yange. 33 Ndele nande ongaanhyo, ondina ku twikila nondjila yange nena, mongula nomongheleinya. Oshonhyi omuhunganeki iha vipaelwa pamwe, ndele omuYelusalema."

34 "Yelusalema, Yelusalema, oye ngu ho vipaa aahunganeki noho vipaa nomamanya mba wa tuminwa. Lungapi nda li nda hala oku ongela aamwoye, nganhyi ohuhwa hayi ongele ouhuhwena wayo momawawa yawo, ndele nye inamu hala. 35 Tala, otembeli yeni otayi fiwa shinya. Ndele andi mu lombwele, ihamu mono nge ali siyo efimbo ali fiki, nhyi amu ka tya, ‘Na yambekwe ngu te ya mevina lyOmwene.’"