1 Efimbo lyOshitufi shEemboloto inavi Fulikwa, hashi ifanwa Opaasa, olyali popepi. 2 Aawiliki yaayambi naalongimhango oya li taa kongo omhito, opo ya vipae Yesus meholeko, shaanhyi oya li ya tila aanhu.

3 Satana okwa ya muYudas Iskalioto, ngu a li umwe womaalongwa omulongo nayaali. 4 Opo nee Yudas okwa ya, ndee ta kundafana naawiliki yaayambi naakulunhu yaanangeli yotembeli nghee e na okuyandja Yesus momake yawo. 5 Oyali ya hafa, noya li ya uvaneka yemu pe oimaliwa. 6 Yudas okwe shi itaele nokwa kala ta kongo efimbo oliwa okuyandja Yesus kuyo, mhanga aanhu inaye shi shiwa.

7 Esiku lyOshitufi shEemboloto inavi Fulikwa olya fika, mu ozona yOpaasa yi na okuvipawa. 8 Yesus okwa tuma Peetulusa naYohanesa, nokwe ya lombwela a ti: "Indeni muke tu longekivile oulalelo wOpaasa tu lye."

9 Oye mu pula ya ti, "Owahala tu ke wu longekivile peni?"

10 Yesus okwa yamukula, "Shaa nhyi mwa yi moshilando, amu ka shakena nomulumenhu a hinda oshishuma shomeya. Mu landuleni siyo omeumbo mu a uka, 11 ndee amu lombwele mwene weumbo amu ti, Mulongi oteku pula ta ti, ‘Openi puna oshinyanga shaayenda, ndi lile mo pamwe naalongwa yange oulalelo wOpaasa?’ 12 Ote kemu ulikila onduda onene yopombada ya opalekwa. Longekiveni ayihe." 13 Oya ya, ndele oya hanga ayihe yi li nganhyi Yesus e ya lombwela, ndee taa longekiva oulalelo wOpaasa.

14 Efimbo nhyi lya fika, Yesus okwa kala omutumba poshililo pamwe naatumwa. 15 Yesus okwa ti kuyo, "Onda kala nda yeulukwa okulya Opaasa ndji pamwe nanye, mhanga inandi hepekwa. 16 Oshonhyi andi mu lombwele, ihandi ka lya ali Opaasa siyo nhyi tayi ka wanifwa mOuhamba waKalunga. 17 Yesus okwa kufa eholo ndee ta pandula Kalunga, ndee ta ti, "Tambuleni, mweni mo amuhe. 18 Andi mulombwele, okuza mha ihandi mu ali omaviinyu, siyo Ouhamba waKalunga tawuuya."

19 Okwa kufa omboloto, ndee ta pandula Kalunga, ndee teyi pambula ndee teya pe ta ti, "Ndu olwo olutu lwange ndu alu mu yandjelwa. Shi ningeni nokuvibuluka nge." 20 Nhyi ya mana okulya okwe ya pa eholo, ndee ta ti, "Eholo ndi olyo ehangano epe lyohonde yange, ndji tayi tilwahi molweni." 21 Ndele tala! Ngu ta kengelele nge opo e li poshililo mha pamwe naame! 22 Omona wOmunhu oku na okusa, nganhyi Kalunga e shi tokola nale, ndele oihuna oifike peni komunhu ngu te mu kengelele!"

23 Opo nee aalongwa oya tameka okupulafana taa ti, olye ngu womokati kawo te shi ningi.

24 Mokati kawo omwa tukuluka eenhamanana kutya, olye e na okutalwa omukulunhu e vule yakwawo ayehe. 25 Yesus okwa ti kuyo, "Eehamba vomouyuni ohavi pangele aanhu yavo keenghono, naapangeli yavo oya hala ya ifanwe ookaume kaanhu." 26 Ndele nye inamu kala mweya fa. Ngu a simana mokati keni, na kale a fa ina simana, ye omuwiliki na kale onga omuyakuli. 27 Lombweleni nge, olye a simana pokati kaanhu mba? Oye ngu e li omutumba a teelela okulya nenge oye ngu ta yakula? Ndishi oye ngu e li omutumba. Ndele ame ondili mokati keni ndafa omuyakuli."

28 Omwa kala pamwe naame momauviyu yange ayehe. 29 Nganhyi Tate a pange epitikilo lyokupangela, osho nghaa naame andi mu pe ouhamba mu vule okupangela. 30 Amu ka lya ndele, amu ka mwa poshililo shange mOuhamba wange, ndele amu ka kala omutumba koipangelapundi, mu pangule omazimo omulongo nayaali yaIsrael."

31 "Simoni, Simoni! Pwaikina! Satana okwa pewa epitikilo e mu makele amuhe, okutopola oiwa mumbi oiyi, onganhyi omunepya ta topola olungu noilya poshipale. 32 Ndee onde ku yalikanena, opo eitaelo lyoye liha kane. Nonge wa yalukile kwaame, twa yakweni omukumo."

33 Peetulusa okwa ti kuye, "Omwene, onde ilongekiva okuya movologo pamwe nooye nokusa pamwe nooye."

34 Yesus okwa ti kuye, "Peetulusa, andi ku lombwele, ousiku wonena, mhanga ekondobolo inali lila, otoke ivibika nge lutatu, to ti ku shii nge."

35 Yesus okwa ti kuyo, "Nhyi nde mu tumine, inamu hinda okamhunda koimaliwa, nenge omhunda yokweenda nayo nenge eenghaku, omwa li mwa pumbwa sha?" Yo oya ti, "Aaye."

36 Yesus okwa ti kuyo: "Ndele paife ngu e na okamhunda koimaliwa nenge omhunda yokweenda nayo neyi kufe. Ngu ke na eyongamwele na landife po ombaikifa yaye e li ilandele. 37 Oshonhyi andi mu lombwele, "Omishangwa vi avi ti, ‘Ye okwa li a talikako ongomukolokohi,’ ovi na okuwanifwa. Oshonhyi ashihe nhyi sha shangwa ashi popi nge, oshi na okuninga shoshili." 38 Aalongwa oya ti kuye, "Omwene, tala, otu na po omaonga yaali." Ye okwa ti kuyo, "Osha wana!"

39 Yesus okwa zamo moshilando ndee ta yi kondudu yeeholivi nganhyi naana a ikilila. Aalongwa yaye oye mu landula. 40 Nhyi a fika kehala ndyo, okwa ti kuyo, "Yalikaneni opo muha wile momamakelo." 41 Okwe ya fiyapo okanano okashona ndee ta tu eengolo ndee ta yalikana ta ti, 42 "Tate, nge oto shi pitike, ekopi ndi lyomahepeko nali pitilile nge po. Ndele hamolwehalo lyange, ndele omolwehalo lyoye li wanifwe. 43 Omuyengeli womeulu okwa mu holokela ndee temu nghonopaleke. 44 Okwa hangika koulululume omundji ndee ta yalikana a mana mo noupyu mbu wa li tawu zi muye owa li omata yohonde taa ndodele pevu.* 45 Konima yokuyalikana, Yesus okwa shuna kaalongwa yaye, mba a hanga ya kofa molwanhyi oya li ya sa oluhovi. 46 Yesus okwa ti kuyo, "Omolwashi amu kofa? Pendukeni mu yalikane, muha wile memakelo."

47 Mhanga a li ta popi, ongudu yaanhu oye ya po, yakwatelwa komeho kuYudas, umwe womaalongwa omulongo nayaali. Yudas okwa heena puYesus, ndee te mu hupita. 48 Yesus okwa ti kuye, "Yudas, Omona wOmunhu oto mu kengelele noku mu hupita?" 49 Aalongwa mba ya li pamwe naYesus nhyi ya mona nhyi ashi ningwa, oya ti, "Omwene, natu kondje nomaongamwele yetu?" 50 Wumwe womaalongwa okwa nghapa umwe womaapiya yomuyambi omukulunhu nokwe mu tete ekutwi lyokolulyo.

51 Ndele Yesus okwa yamukula a ti, "Opuwo, inamu shi ninga ali!" Yesus okwa kuma okutwi kwomumati, ndee te mu yeluva.

52 Yesus okwa lombwela aayambi aakulunhu, aakulunhu yaanangeli yotembeli naakulunhu yoshiwana mba ye ya oku mu kwata a ti, "Omwe ya okukwata nge ongomukulokohi mu na omaongamwele neendibo? 53 Esiku kehe onda kala nanye motembeli, ndee inamu kwata nge. Ndele ndi olyo efimbo lyeni nolyeenghono vomilaulu vi pangele."

54 Oya kwata po Yesus, ndee ta ye mu fala meumbo lyomuyambi omukulunhu. Peetulusa okwa landula mo, e li konima kokule. 55 Moluumbo lwomeni omwa li mu na yamwe ye li omutumba taa huhulukwa pomundilo. NaPeetulusa okwe ya, ndele ta kala omutumba mongudu yawo. 56 Nhyi umwe womaayakuli aakiinhu a mona Peetulusa ta huhulukwa, okwe mu tongolola, ndee ta ti, "Omulumenhu ngu naye okwa li pamwe naYesus." 57 Ndele Peetulusa okwe ivibike a ti, "Mukiinhu, kandi mu shii nande." 58 Konima yokafimbo natango omulumenhu umwe okwe mu vibulula, ndee ta ti, "Nooye oumwe womuyo." Peetulusa okwa yamukula a ti, "Menhu ooye, haame."

59 Nhyi pwa pita owili yimwe, omulumenhu umwe natango okwa koleka a ti, "Oshili, kape na omalimbililo, omulumenhu ngu okwa li pamwe naye, molwanhyi naye Omugalilea."

60 Peetulusa okwa yamukula a ti "Menhu oye, kandi uvite kutya oto popi kombiga yashi." Mhanga Peetulusa ali ta popi, ekondobolo olya lila. 61 Opo nee Omwene okwa punguluka, ndee ta tongolola Peetulusa. Peetulusa okwa vibulula eehapu vOmwene nhyi a tile, "Nena tuu ndji, otoke ivibike nge lutatu mhanga ekondobolo ina li lila. 62 Peetulusa okwa ya pondje, ndele ta lili nokulililila.

63 Aalumenhu mba ya li ya keelela Yesus oye mu sheka, ndele ta ye mu vege. 64 Oye mu manga komesho ndee taye mu pula ya ti, "Tengeneka kutya olye e ku vega?" 65 Oye mu sheka nomasheko makwawo omendji omayi.

66 Nhyi kwa sha, aakulunhu yoshiwana, aawiliki yaayambi naalongimhango oya ongala, ndee taa eta Yesus moshoongi shawo. 67 Mba yali moshoongi oye mu pula ya ti, "Tu lombwela; ooye Kilistus?"

Yesus okwe ya yamukula, "Nande ndi mu lombwele ihamu itaele nge. 68 Nande ndimu pule epulo limwe, iha mu li yamukula. 69 Ndele okuza mha, a mu ka mona Omona wOmunhu a kala omutumba kolulyo lwaKalunga omunanghono avihe."

70 Ayehe oye mu pula ya ti, "Ooye nee Omona waKalunga?" Yesus okwa ti kuyo, "Nye omwa ti aame." 71 Yo oya ti, "Se inatu pumbwa nande ombagi yimwe, yi tu hokololele shaanhyi otwe iyuvilako nale se yene keehapu avihe vi a popya."