1 Pefimbo ndyo, ohamba Augustus oya li ya yandja omhango kutya aanhu ayehe yomoilongo mbi yi li mepangelo lyaLooma, oye na okwiinyolifa opo ya yalulwe. 2 Einyolifo ndi olyo lyali lyotango, onghee olya ningwa efimbo Kilenius ali omuleli waSilia. 3 Aanhu ayehe oya ya yeke inyolifa, kehe umwe moshilando shawo.

4 Yosef okwa za muNasalet shomuGalilea, ndee ta yi ku Betelehem shomuYudea, mu ohamba David yali ya valelwa. Okwa ya ngho, shaanhyi okwa li omukwanezimo waDavid. 5 Okwa ya ekeinyolifa pamwe nomuyalekwa waye Malia, ngu ali meteelelo. 6 Mhanga yeli mu Betlehem, efimbo lya Malia lyokumona okaana olya fika, 7 nokwa vala osheeli shaye, okaana okamati. Okwe ka tonyena melapi, ndee teka tula metemba lyokulila oimuna, shaanhyi kayali ya mona ehala monduda yaayenda.

8 Moshitopolwa mo omwa li aasita taa lifa oimuna yao pomahala youlifilo. 9 Omuyengeli wOmwene okwe ye ihololela, neyavimo lyOmwene olye ya minikile noya li ya haluka unene. 10 Ndele omuyengeli okwa ti kuyo, "Inamu tila, ondemu etela Onghundana Oiwa, ndji tayi eta ehafo enene kaanhu ayehe. 11 Nena ndi, momukunda waDavid omwa valwa omuhupifi weni, Kilistus Omwene. 12 Nanhyi osho ashi ka kala eviviliko mu na okukoneka; Amu ka hanga okaana ka tonyenwa momalapi ka nangekwa metemba lyokulila oimuna."

13 Mehaluko, pomuyengeli opwa holokela ongudu onene yaayengeli yomeulu, taa hambelele Kalunga taa ti:

14 "Esimano olya Kalunga Wopombadambada,

nombili kombada yevu maanhu e ya panda!" 15 Ndele aayengeli nhyi ya shuna meulu, aasita oya lombwelafana ya ti, "Tu yeni ku Betlehem, tuka tale nhyi sha ningwa ko, nhyi twa hololelwa kOmwene."

16 Oya ya taa endelele noya hanga Malia naYosef nokaana ka nangala metemba lyokulila oimuna. 17 Nhyi aasita ya mona okaana, oya hepulula nhyi ya lombwelwa komuyengeli kombinga yokaana. 18 Naayehe mba yeshi uva oya li ya kumwa kunhyi ya hepululilwa kaasita. 19 Ndele Malia okwa vibulula ayihe mbi, nokwa kala e na omaipulo kombiga yayo ayihe, ndee okwa kala eyi siikilila momutima wae. 20 Aasita oya shuna taa hambelele nokusimaneka Kalunga nomaimbilo, mwaayihe mbi ya uva nambi ya mona; mbi ya li ike naana nganhyi omweengeli a popya.

21 Mesiku etihetatu, okaana oka pita etanda noka lukwa Yesus, evina ndi lya yandjwa komuyengeli omhanga inaka shitilwa mepunnda lyaina.

22 Oshitufi sheyelifo nhyi lyafika, nganhyi naana shali pamhango yaMoses, oya fala okaana kuYelusalema opo yeka yandjele Omwene. 23 Nganhyi sha shangwa momhango yOmwene kutya, "Kehe okaana kokamati kosheeli okena okuyapulilwa Omwene." 24 Oya ya, ndee taa yandja omayambo panghevi yomhango yOmwene, eenghuti mbali ile ounghutyona uyali. 25 Pefimbo ndyo, mu Yelusalema omwa li omulumenhu wevina Simeon. Okwa li omuyuuki nomutili Kalunga, ye okwa li e na omukumo wehupifo lyaIslaeli, nOmhepo Ondjapuki oye ya kombada yaye. 26 Okwa li a hololelwa kOmhepo Ondjapuki kutya iha si ina mona Kilistus Omwene. 27 Mewiliko lyOmhepo Ondjapuki, Simeon okwa ya kOtembeli. Aakulunhu nhyi ya eta mo okaana Yesus ya ninge nhyi sha ufwa komhango, 28 Simeon okwa hinda po okaana, ndee teka ukwata, ndee ta hambelele Kalunga ta ti,

29 "Omwene, paife owa wanifa euvaneko lyoye,

lekela nge hano, omupiya woe, ndiye nombili.

30 Oshonhyi onda mona ehupifo nomeho yange,

31 ndi wa longekiva momeho yaanhu ayehe.

32 Ouyelele wokuhololamo ehalo lyoye kaanhu mba kaye shi Aayuuda,

nesimano lyaanhu yoe Aaislaeli."

33 He naina oya li ya kuminwa eehapu vi Simeon a popya. 34 Simeon okwe ya yambeka, ndee ta ti ku Malia, "Okaana ngha oka tulwa po kuKalunga, okupundukifa nokuyambula po oyendji yomAaislaeli. Oko eviviliko lya za kuKalunga, ndele oyendji ihaye ke mu tambula, 35 oiholekwa momitima voyendji otayi ke ya pouyelele, omitima veni avi ka kala noluhovi olunene, vafa va tuwa neonga lyatwa." 36 Okwa li kuna omuhunganeki omuselekavi a kulupa unene wevina Anna, omona waFanuel womezimo lyaAsel. Okwa hombolwa ndee ta kala nomulumenhu wae oule weevula heyali, nomusamane okwa hulako. 37 Siyo oshonhyi ena eevula omilongo hetatu nane, okwa kala natango omuselekavi. Efimbo alihe okwa kala motembeli, te inyongamene ye teivilike oikulya nokuyalikana ousiku nomutenya. 38 Pefimbo olyo tuu ndyo, okwe ya po, ndee ta tameke okuhambelela Kalunga, ndee ta hokolola okaana kwaayehe mba ya li ya teelela ehupifo lya Yelusalema.

39 Nhyi Yosef na Malia ya wanifapo ayihe pamhango yOmwene, oya shuna ku Nasalet kondoolopa yao ku Galilea. 40 Okaana oka koka, ndee a ka pama pamhepo, a ka uvifwa nounongo, nesilonghenda lyaKalunga olya kala kombada yako.

41 Aakulunhu yaYesus oya li haa yi kuYelusalema, kehe ovula koshitufi shOpaasa. 42 Yesus nhyi a wanifa eevula omulongo nambali, oya ya naye koshitufi nganhyi hashi ningwa aluhe. 43 Oshitufi nhyi shapwa, aakulunhu oya shuna keumbo, ndele okamati Yesus oka saala muYelusalema. Aakulunhu oya li kaye shi shii kutya oku li peni. 44 Oya kala taye ipula kutya oku li mongudu yaayendi siyo ya enda ko oshinano shesiku limwe. Oya tameka taye mu kongo maapambelele nomaashiikile. 45 Nhyi inaye mu mona, oyaalukila kuYerusalem yemu konge. 46 Konima yomasiku yatatu oye mu mona, ya hanga e li mEumbo lyaKalunga e li naalongi Aayuda, teya pwaikine ye teya pula omapulo. 47 Ayehe mba ya li yemu pwaikina oya kuminwa eendunge nomayamukulo yaye. 48 Aakulunhu yaye nhyi yemu mona, oya li ya kumwa, naina okwa ti, "Mumwange, oshishi wetu ninga ngaanghyi? Se naho otweku konga notwa kala twa limbililwa." 49 Yesus okwe ya yamukula a ti, "Omwa kongela nge shi? Kamushi shii nani kutya ondina okukala mEumbo lyaTate?" 50 Ndele kaya li ye uvite kutya okwa hala kutya shi.

51 Opo nee Yesus okwa shuna pamwe nayo kuNasalet, nokwa kala ta vulika kuyo. Yina okwa pungula oinima ayihe mbyo momutima wae. 52 Yesus okwa koka palutu nomeenduge, ndee ta hokiwa kuKalunga nokaanhu.