1 Esiku limwe lyEsabati, Yesus okwa li a ya a ka lya meumbo lyaumwe womaaleli Aafalisai. Aanhu oya li yemu kotokela. 2 Komeho yaye okwa li ku na omulumenhu a zida omaulu nomaako. 3 Yesus okwa pula aalongimhango nAafalisai, "Omhango oya pitika tuu oku eluva mesiku lyEsabati nenge ahawe?"

4 Ndele inaa yamukula sha. Yesus okwa kufa omulumenhu ngo, ndee temu yeluva, ndee temulombwele a ye. 5 Opo nee Yesus okwe ya lombwele ta ti, "Olye womunye ngeno e na omonamati nenge ongobe, ndee ta yi wile momufima, ihe yi hilimo molwanhyi omesiku lyEsabati?" 6 Yesus nhyi a popya nhyi, inaa vula oku mu yamukula.

7 Yesus okwa vibulula nghee aayenda yamwe yali taye ihoololele oipundi yasimana, onghee okwe ya lombwela eyele ta ti, 8 "Nge opu na ngu e ku hiya koshitufi shohango, ino kala omutumba koipundi yasimana, oshonhyi a shi vulika pu na umwe a hiwa, a simana e ku vule. 9 Omwiifani weni amuhe yaali ote ya, ndee teku lombwele ta ti, ‘Pa mukweni ngu ehala ndyo.’ Oto ka kala wa sa ohoni, molwanhyi ouna okuka kala omutumba kehala lyokonima. 10 Ndee nge owa hiwa, inda, ka kale omutumba kehala lyokonima, opo ngu e ku hiya nge te ya, oteku lombwele ta ti, ‘Kaume kange, ila nghu, kehala ndi oliwa.’ Nhyi ashi ku simanekifa momeho yaayenda ayehe. 11 Oshonhyi kehe omwiinenepeki ota shonopekwa, na kehe omwiishonopeki ota nenepekwa" 12 Opo nee Yesus okwa lombwela ngu e mu hiya ta ti, "Nge to teleke omuha nenge oulalelo, ino hiya ookaume koye nenge aamwanyoko nenge aakwanezimo lyoye nenge aashinda shoye mba aakengeli, yeke kwiifane wo, nomomukalo mbu otaeku futu munhyi weya ningila. 13 Ndele nge to ningi oitelekela, hiya eehepele, oitinhingili, oilema naaposi. 14 Oto yambekwa, shaanhyi kaye na sha shoku ku pa. Ndele oto ka futwa kuKalunga, efimbo ndi mba ya longa ouwa taa ka umuvwa kousi."

15 Wumwe womumba ya li poshililo nhyi e shi uva, okwa ti kuYesus, "Aanelao oyo mba taa ka lya poshililo mOuhamba waKalunga."

16 Yesus okwa ti ku ye, "Omulumenhu umwe okwa longekiva oshitufi oshinene, ndee ta hii aanhu oyendji. 17 Efimbo lyoshitufi nyi lya fika, okwa tuma omupiya wae a ka ifane aahiwa ta ti, ‘Ileni, ayihe oya longekivwa.’ 18 Ndele ayehe oya anya momukalo umwe. Wotango okwa ti komutumwa, ‘Ame opo nda landa epya, ondi na okuya ko, ndi ke li tale. Vimina nge po.’ 19 Mukwawo okwa ti komutumwa, ‘Onda landa oumutanda omulongo, ondi na oku ya ko, ndike u veule. Vimina nge po.’ 20 Wumwe natango okwa ti, ‘Ame opo nda hombola, ihandi vulu okuuya.’

21 "Omumati okwa shuna, ndele ta hokololele mwene wae ashihe. Omulumenhu mwene weumbo okwa handuka, ndele ta ti komupiya wae, ‘Endelela, inda keendjila nokomipandaida vomoshilando, ndee to eta eehepele noingudu, naaposi noilema.’ 22 Omupiya okwa ti, ‘Mwene wange, nhyi wa popya ondeshi ninga nale ndele natango omu na ehala.’ 23 Mwene weumbo okwa lombwela omupiya, ‘Inda keendjila nokeepate voshilongo, kondjifa aanhu yeuye, eumbo lyange li uve, 24 oshonhyi kape na nande oumwe womaalumenhu yenya ya ifanenwe taa makele oulalelo mbu.’

25 Nhyi eengudu eenene vali avi enda pamwe naYesus. Yesus okwa punguluka, ndele ta ti ku yo, 26 "Kehe ngu te ya kwaame, iha vulu okuninga omulongwa wange nge iha vibwa he nayina, omukiinhu wae noyana, aamwayina aalumenhu naakiinhu, ile omwenyo wae mwene nokuli. 27 Kehe ngu iha vulu okuhinda po omushiyakano wae, ndee ta landulange, iha vulu okuninga omulongwa wange.

28 "Nge oku na umwe e na evilaavilo lyokutunga ongulu, okuna tango okukala omutumba a yalule kutya otayi pula shi fike peni, ye a tale nge okuna oimaliwa ya wana okwiitunga siyo tayi pu. 29 Opo shiha ninge, nhyi a mana okutunga ekanghameno, nani ihaka vula ali okumana etungo alihe. Ndee ayehe mba taye shi mono, otaye ke mu yola, 30 taa ti, ‘Omulumenhu ngu okwa tameka etungo ndele ina vula ali oku li mana.’

31 "Nge ohamba yonhumba ta yii yi ka lwife ohamba onghwawo, oyi na okukala omutumba mhanga, yi vilavile nge otai vulu nghaa okukondjifa ngu te ya nomaovi omilongo mbali omhanga yo yi na ike aakwaita omaovi omulongo. 32 Nge iha vulu, ota tumu ko aatumwa kohamba onghwawo manga e li kokule, a indile ombili. 33 Sho osho nghaa, kaku na nande oumwe womunye ta vulu okuninga omulongwa wange, nge i na efa po ayihe e yi na."

34 "Omongwa omuwa, ndele nge owa hauka otau fingalekwa ali nashi? 35 Ihau opalele ali mevu ile mouhoho, ndee otau ekelwahi ike. Ngu e na omakutsi yokupwaikina, na uve ko!"