1 Esiku limwe Yesus okwa li ta yalikana pehala lyonhumba. Nhyi a mana, umwe womaalongwa yaye okwa ti kuye, "Omwene, tulonga okuyalika nganhyi Yohanesa a longa aalongwa yaye."

2 Yesus okwa ti kuyo, "Nge amu yalikana tyeni,

‘Tate,

evina lyoye eyapuki na li yapulwe,

Ouhamba woe nawu uye. Ehalo lyoye nali wanifwe.

3 Tu pa okulya kwetu kwesiku kehe.

4 Tu vimina po eendjo vetu

nganhyi nase atu vimine po mba ya nyona kuse.

Ino tu fala momashongo.’"

5 Yesus okwa ti kaalongwa yaye, "Olye womunye e na kaume kaye, nge teuya kuye mokati kousiku ta ti, ‘Kaume kange, penge eemboloto nhatu, 6 shaanhyi kaume kange eya po, ndee kandina sha shokumu pa a lye.’ 7 Natu tye ngeno, kaume koye ngo ote ku yamukula e li meni ta ti, ‘Ino piyaaneka nge, omweelo owa pata nale, naamwange oya nangala pwaame. Ihandi vulu okupenduka ndi ku pe sha.’ 8 Andi mu lombwele, nge iha penduka, e ku pe eemboloto molwoukaume weni naye, oku na oku penduka e ku pe molwanhyi ino sholola okumwiindila."

9 "Onghee andi mu lombwele, Indileni, ndele ta mu pewa; kongeni ndele ta mu mono; kongholeni nomweelo otau yeululwa. 10 Oshonhyi kehe ngu ta indile ota pewa; nangu ta kongo ota mono; nangu ta konghola omweelo otaumu yeululilwa. 11 Omuvali olye womokati keni, nge omona nge te mu indile ohi, ote mu pe eyoka? 12 Nenge nge te mu indile eyi, ote mu pe ondje? 13 Hano nge nye mba mwaayi, ngeege omu shi ku pa oyana yeni oipewa oiwa, unene tuu Ho yeni womeulu, otaka yandja Omhepo Ondjapuki kumba taye mu indile."

14 Yesus okwa tamo omhepo ya kaka ya li ya fitika omulumenhu ondaka, ndee omhepo ya kaka nhyi ya za mo, omulumenhu omufitandaka okwa popya, nongudu yaanhu oya kumwa. 15 Yamwe yomuyo oya ti, "OBelsebul, omukulunhu weemhepo va kaka e mu pa eenghono voku tamo eemhepo va kaka."

16 Yamwe natango oye mu shonga noye mu pula, e ya ulikile eviviliko lyoku ulika kutya ota longifwa ku Kalunga komeulu. 17 Ndele Yesus nhyi a vibulula omavilaavilo yawo, okwa ti kuyo:, "Ka ku na ouhamba tawu vulu kwiilwifa muwowene shaanhyi otau hanauka po, ko kakuna eumbo ta li itopola mulyolyene, ota li hanauka po. 18 Hano nge Satana ote ilwifa ye mwene, ouhamba wae awu vulu okukala po ngeepi? Onda popya nhyi molwanhyi amu ti eenghono voku tamo eemhepo va kaka onde vi pewa ku Belsebul. 19 Nge nani ohandi temo eemhepo va kaka oha ndi longifwa kuBelsebul, yo oyana yeni otaye vi temo neenghono valye? Onghee hano ota ningi aapanguli yeni. 20 Ndele nge eemhepo va kaka andi vi temo neenghono vaKalunga, Ouhamba wa Kalunga oweya punye."

21 Nge omulumenhu omunanghono, e na oilwifo ya wana ta pahukile eumbo lyaye, eliko lyaye olya amenwa. 22 Ndele nge ta ponokelwa kuumwe ena eenghono e mu vule, ota sindwa ndele ta kufwa oilwifo yaye mbi a li eyi ineekela, ndee tei topolele po aanhu ooyakwawo.

23 Ngu ke li pamwe naame oku na ondubo naame, nangu iha ongele pamwe naame ota hanauna po.

24 "Nge omhepo ya kaka ta yi zi momunhu, otayi pumhauka moukukutu, ta yi kongo ehala lyoku vululukwa, ndele nge ina yi mona, otayi ti, ‘Andi shuna meumbo lyange mu nda zile.’ 25 Nanhyi ta yiimo, otayi hanga mwa yela nawa. 26 Ota yii nee, ndee ta yi ka konga eemhepo va kaka eenghwao heyali viivule mouyinai. Ota vuuya ndee tavi kala mo, nokukala kwomunhu ngo ota ku ningi okuyinai ku vule kwopetameko."

27 Mhanga a li ta popi nhyi, omukiinhu umwe mongudu yaanhu okwa ingiva ndee ta ti kuye, "Omukiinhu e ku vala ndee te ku nyamifa oye omunelao!"

28 Ndele Yesus okwa yamukula ta ti, "Eeno, ndele aanelao oyo mba taa uvu ohapu ya Kalunga ndee ta vulika kuyo."

29 Aanhu nhyi yemu ngudumanene, Yesus okwe ya lombwela ta ti, "Aanhu yopefimbo mha aayi. Oya hala oshikumwifaviviliko ndele ihaa pewa nande oshimwe kakele kunhyi shaJona. 30 Oshonhyi nganhyi omuhunganeki Jona a li eviviliko kAaninive, osho nghaa Omona womunhu ta kala eviviliko kepipi lyonganhyi. 31 Omukiinhu ohamba yokoumbuwanhu ota ka holoka mesiku lyepangulo, note ke mu pa ousama, oshonhyi ye okwa zile keeha vouyuni, a pwiikine eenduge va Salomo; ndele ngu e li mha okuvule Salomo. 32 Aaninive otaa ka holoka pamwe nanye mesiku lyepangulo, notaye ke mu pa ombevi, oshonhyi yo oye itevululifwa keuvifo lya Jona; ndele ngu e li mha okuvule Jona."

33 "Kaku na omunhu ta tema olamba ndee te yi tula kohi yoshimbale nenge teyi holeke, ndele ote yi tula koshikwatelwalamba, opo kehe ngu teya mo, a mone ouyelele. 34 Omeho yeni oyo olamba yolutu. Omeho yoe nge omandjolowele, nena olutu lwoe aluhe olu na ouyelele, ndele nge omeho yoe kaye na oundjolowele, olutu lwoe aluhe olwa uva omilaulu. 35 Kotoka hano ouyelele mbu uli mwooye uha ninge omilaulu. 36 Nge olutu lwoe olu na ouyele, no kalu na nande ombiga yimwe i li momilaulu, nena olutu aluhe ota lu yandja ouyelele ongolamba yeku minikila."

37 Yesus nhyi a mana oku popya, omufarisai umwe okwe mu pula a kalye pamwe naye, Yesus okwa ya ndee ta kala omutumba a lye. 38 Omufarisai okwa li a kumwa nhyi a mona Yesus ta li ine ikoha keenyala. 39 Ndele Omwene okwe mu lombwele ta ti, "Nye Aafalisai, ndishi ohamu koho oiyaha nomakopi kombada, ndele nye yene meni lyeni omwa uva onyanya nouyi. 40 Malayi nye! Kalunga ngu a shita kombada, haye nghaa a shita meni? 41 Yandjeni keehepele nhyi shili momakopi yeni, naayihe otayi kala ya kohoka."

42 "Oihuna kunye Aafalisai! Ohamu yandja kuKalunga oshitimulongo shoimbodi kaina oshilonga, ominta, noiziba, ndele ohamu vini ouyuuki nohole yaKalunga." Ayihe mbi omu na okwiininga, ndele ina vina ouyuuki nohole yaKalunga.

43 Oihuna kunye Aafalisai! Oshonhyi omu hole okukala omutumba koipundi yokomeho meeshinagoga nokukundilwa pomahala yomalandifilo. 44 "Oihuna nye! Shaanhyi omwa fa eembila kavi na omaviviliko, naanhu otaa ende kombada yavo ndele kaye shi shii."

45 Umwe womaalongimhango okwa ti ku Yesus: "Mulongi, omapopyo yoe otaye tu sifa ohoni."

46 Yesus okwa ti kuye, "Oihuna, nokunye aalongimhango! Oshonhyi ohamu twike omitengi omiviyu komapepe yaanhu, omhanga nye yene ihamu kumu ko nande onomunwe umwe." 47 "Oihuna! Oshonhyi ohamu tungu eembila vaahunganeki, yo oohokulu ye ya vipaa. 48 Hano nye omu na oumbagi nomwa itaela nhyi oohokulu ya ninga; oya vipaa aahunganeki ndee nye otamu ya tungile eembila. 49 Onghee hano ounongo wa Kalunga otawu ti, ‘Andi ya tumine aahunganeki naatumwa. Yamwe yomuyo otaye ya vipaa, nayamwe otaye ya monifa oihuna.’ 50 Onghee hano aanhu yopefimbo ndi, otaa ka handukilwa molwomavipao yaahunganeki oku za petameko lyouyuni. 51 Oku za nghaa kevipao lyaAbel fiyo okevipao lyaSakalia, ngu a vipaelwa pokati koaltali nehala eyapuki. Eeno, andi mu lombwele, aanhu yopefimbo ndi oye na ku handukilwa molwomavipao ngo.

52 "Oihuna, nye aalongimhango! Nhyi mwa kufa ko oshapi younongo, nye yene inamu yamo, ndele namba ya hala ku ya mo omwe ya keelela mo."

53 Yesus nhyi a fiya po ehala ndyo, aalongimhango nAafalisai oya tameka oku mu sheka noku mu pula omapulo kombiga yoinima oyindji. 54 Oya li hala okutala nge ota yemu mono ousama.