Milagres de Jesus

Yesu ombwikya bontongo ba Bɛtɛsaida

22 Ango Yesu la baeki bande baiyisa ɔɔsɛngɛ ba Bɛtɛsaida, banto baelisa bontongo ɔmɔɔ ele Yesu la mboosɛya aokobole. 23 Yesu akemeli ongo bontongo o likasa, la mbɔɔtɔla aanja ba ɔsɛngɛ. Lonkinɛ, oochweli chweli lɔsɔi o baisɔ, la mboo kicheya bakasa la owuumboli: «Ɔmwɛna ekambwa ɛmɔɔ?» 24 Bontongo asakoli baisɔ la nɔnda: «Mwɛna banto, kinaki mbobaɛna wɛɛnte bete beta kɛndɛ.» 25 Yesu akichisa lonkinɛ bakasa aliko la baisɔ ba ongo onto; la ongo onto aiki, la mɛna bikambwa lailkuli phololo. 26 Laango Yesu aosimeli achu lande elulu, la: «Kuutolake lonkinɛ ɔɔsɛngɛ».

Yesu ombwikya eluma empokolo

31 Pa ango, Yesu mima lonkinɛ e wooni ba Tilo, mbetela e Sidoniya la mbutola boleka ba Eliya e Galilaya e wooni ba Dekapoli. 32 La, ba wɛɛlisa bonto ɔmɔɔ aiki eluma la aiki la likokoma, la basɛi Yesu awapheya bakasa.

33 Laango Yesu aopasisa ooloi baanto, la nchwa lande botandi inchɛ. Aili mpita yande waatɔi ba ongo onto la mboochwela lɔsɔi e lophita lande la mbookobola e lolemu. 34 Yesu aolisa baiso eliko, alɔndi la joi linɛnɛ: «Efatako nɔnda Liphwa wɛɛ!» 35 Kako nkango, batoi baongo onto bake ndiphwa, la lolemu lande loke ndipholama la oke manja nɔnda solo. 36 Yesu oasimeli batasimelake bonto bengo besao. Kinaki ŋango aasimbaki ndako, ko ŋango baphaphaki bako nchwa batabalaŋanya besako. 37 La banto basebalali ndeka; balɔndaki: «Bingo lalikuli bitakɛɛ Yesu bilende bɔlɔti: ombwikya bimpokolo mboka, la biluma nɔnda»!

Yesu ombo wiikya bontongo Balatimayɔ

46 Yesu la Baeki* bande baiyisa wɔɔsɛngɛ ba Yɛliko. Apasi bako woongo ɔsɛngɛ, boloi bɔmɔɔ baanto baalingiti. Bonto ɔmɔɔ aiki ontongo ataelelama Balatimayɔ, bɔna a Time, aiki atasɛlɛla e mpamba la mboka la nɔmbanɔmba. 47 Ango aoki ndako nte olende Yesu a Nasalɛti kataete, oke mbwikicha ataokoma la nɔnda: «Yesu Bɔna a Daudi, ɔmɛnɛlɛ ŋandi!» 48 Banto ike baophangwelaki nte akɔwɛ, kinaki, aphaphi lonkinɛ mbokoma la nkulu: «Bɔna a Daudi ɔmɛnɛlɛ ŋandi»!

49 Aliko la ingo, Yesu aemali la nɔnda: «Elela nyo ndako.» Baeleli lonkinɛ ongo ontongo la mboosimela: «Kekemala, emala wɛɛ, ombo koelela.» 50 Aoki ndako ŋamgo, kako nkango o phunbwe loango aphupholi esenda ende, la nchwela Yesu.

51 Yesu awuumboli: «Nke elanga wɛɛ nko kɛɛlɛ» ontongo owuuchisa: «Weekisi, kɛɛ nte m’mɛni lonkinɛ.» 52 La Yesu aosimeli: «Chwaka, lokani labɛ lombo koikya.» Kako nkango, ɔɛni lonkinɛ, la oolingiti Yesu.

Yesu ombwikya bontongo

35 Eleko Yesu asukameli bɔsɛngɛ ba Yeliko, atani bontongo ɔmɔɔ aiki atayale mpamba la mboka la nɔmba nɔmba. 36 Ongo bontongo aoki ndako boloi baanto bataete aumboli nte: «Kole nke»? 37 Banto bawuuchisa nte: «Yesu a Nasaleti ndako kataete». 38 La aoki ndako bingo, aokomi la nɔnda nte: «Yesu, Bɔna a Daudi, ɔmɛnɛlɛ ŋandi». 39 Bango banto baiki otamboka la Yesu baophangweli la baosimeli akɔwɛ. Kinaki ndako aphaphi mbokoma nte: «Bɔna a Daudi, ɔmɛnɛlɛ ŋandi»!

40 Ango Yesu aemali, aasimeli baweela ongo bontongo. Aiye ndako sukɛlɛ la Yesu, Yesu awuumboli nte: 41 «Alanga nko keele nke»? Ndako nte: «Bɔkɔta, mbɔkɔlɔmba m’mɛni lonkinɛ». 42 Ango Yesu aosimeli nte: «Ena lonkinɛ! Lokani labɛ lombokokakola»! 43 La kako nkango ongo bontongo aɛni lonkinɛ. Aolingiti Yesu o mboosakoya Kanamombe. Ango aɛni banto lalikuli bingo, la bako ŋango akɔ bakuchisa Kanamombe.

30 Baiyisa ango, batani bokilo ande la Simo atalale e likenge, la waale ba empoma; la basimelaki Yesu bongo bosao. 31 Laango, Yesu ochwe boleka ande, la mbookemela e likasa la mboweemaya. Kako nkango empoma ke opasi. Lonkinɛ, aikichisa ataalambela lilɛ ja ndɛ.

Yesu ombwikya oso nsuli

40 Luina lɔmɔɔ boso nsuli ɔmɔɔ aandi ele Yesu nkɔma balwe otamboka lande la mbooseya: «Iya olangake, aɔsɔna limbikya!» 41 Yesu awookeli ŋandi. Aosemboleli likasa, la mbookoola la mboosimela: «La langa wiike.» 42 Kako nkango, nsuli ke sili la aiki.

3 Weengo eleko, banto banɛi bawɛɛlisa Yesu bonto ɔmɔɔ a nɛngɛla. 4 Kinaki aliko la boloi, kotaika la namuna e mbowiyeya ka Yesu. Laango, batɛmɔli nsambe e lulu*. Mbɛlama laango aiki Yesu atayale. Bakichisaki likenge ingo ja lalelaki boso nɛngɛla. 5 Yesu aɛni lokani laɔ, laango ɔlɔndi la oso nɛngɛla: «Bɔna ami, njambi yabɛ imbosokolama».

6 Otema ba longo lulu kaiki nde Baekisi bamɔɔ ba Isaliya*. Baanjisa mbwiumbola waasolo baɔ. 7 «Aliko laanke ɔnɛ onto atalɔndɛ ŋaanɛ? Atatole Kanamombe! Nani aɔsɔna nsokola njambi ya onto, Kanamombe nɛmɛlɛ!» 8 Ango aei Yesu nte batakanya ŋango waasolo baɔ, aasimeli: «Aliko laanke bitakanya nyo waasolo banyo? 9 Ekambwa nke embosaliya, o nɔnda ele boso nɛngɛla: ‹Njambi yabɛ imbɔ sokolama› ao bɔlɔti nɔnda ‹Emala-wɛɛ, ɔsa likenge jabɛ la ɔkɛndɛ?› 10 Eeh bɔlɔti oka binɛ, Lemi Bɔna a Onto kole la nkulu ya nsokola njambi o wooni».

Laango Yesu ɔlɔndi la ongo aiki ombo lɛngɛla: 11 «Mbokosimela: Emala wɛɛ, kemela likenge jabɛ la utola kabɛ»!

12 Kako nkango, lonkinɛ bako lalikuli baolendaki, bonto omweemala, okemeli likenge jande la nchwa kande.

Ba sebalali bako lalikuli. Bakuchaki Kanamombe la nɔnda: «Totaenaka jɛ be ŋaanɛ»!

Yesu ombwikya bonto ɔmɔɔ wiina ba Sabato*

1 Pa ingo, Yesu aingeli lonkinɛ o lulu laa Saŋanelo Laayuda*. O longo lulu kaiki bonto ɔmɔɔ ɔnɛ aiki luambo lombo lɛngɛla. 2 Banto bango baolendaki Yesu mɛ aliko la mɛna iya aɔsɔna mbikya ongo onto luina la Sabato* aliko la mba luakwa la mboositaka.

3 La Yesu ɔlɔndi la oso nɛngɛla Luambo: «Emala wɛɛ, chwaka asamba banto.» 4 Lonkinɛ Yesu aumboli bango baiki ango otema ŋaanɛ: «Isaliya* yaso ya ɔsɔna nɔnda nkɛɛ bɔlɔti ao bobe wiina ba Sabato*? Ao njaka bonto ao mbo wiikya?» Kinaki koo nɔnda ekambwa. 5 Aliko la ingo, Yesu aalendi bako lalikuli la baiso ba nkɛlɛ, aliko la basolo baɔ baolo. Laango ɔlɔndi la oso nɛngɛla: «Sembola luambo labɛ» osemboli luambo lande la mbika kako nkango.

Yesu ombwikya oso nsuli

12 Laango, Yesu aiki ɔɔsɛngɛ ɔmɔɔ, bonto ɔmɔɔ boso nsuli bionge lalikuli awɛɛni, la ongo onto akwɛɛ ba nkukuku la alɔmbi ele Yesu: «Bɔkɔta, iya olangake aɔsɔna limbɔkya».

13 Yesu aosemboleli likasa, aokooli la nɔnda: «Mbolanga! Ɔkyama»! Kako nkango, engo nsuli kepasi ele ongo onto.

18 La banto baandi bata ɛmbɛ bonto ɔmɔɔ oso nɛngɛla, baonaki bolengo ba mbo wiila otema ba lulu la mbo kicheya otamboka la Yesu. 19 Kinaki, aliko la wiike ba anto koo mbɔsɔna mingela otema. Laango, bauleli eliko la nsambe * la ntɛmɔla nsambe mbelama laango aiki Yesu. La baokichisa la likenge jande, asamba boloi otamboka* la Yesu. 20 Ango Yesu aɛni ndako lokani laɔ, alɔndi la bɔkɔnu: «Keseka njambi yabɛ imbɔ sokolama». 21 Baekisi ba Isaliya* la Bafalisayɔ baanjisa mbwiumbola la nɔnda: «Ɔnɛ onto ole nani atatole Kanamombe*? Koo onto aɔsɔna nsokolela bonto njambi. Ila nɛmɛlɛ kanamombe*». 22 Yesu aei bakani baɔ la aasimeli: Nke etakanya nyo waasolo anyo? 23 Nke ele kɔɔlu nɔnda mbo kosokolela njambi aɔ nɔnda emala wɛɛ la nkɛnda? 24 Kinaki, mbo langa nte weeye nyo: Bɔna a Onto ole nde la nkulu ya nsokolela banto njambi e wooni. Laango asimeli oso nɛngɛla:*Emala wɛɛ, kemela likenge jabɛ, La chwaka e lulu labɛ. 25 La, kako nkango, oso nɛngɛla aemali otamboka laako lalikuli, okemeli likenge jande ja lalelaki ndako, la achwe e lulu lande la atakucha kanamombe*.

Yesu ambwikya bonto luina la Sabato*

6 Wiina onkinɛ ba Sabato*, Yesu aingeli otema Baasaŋanelo Baayuda*, aanjisa mbekya banto. Engo otema baango Basaŋanelo kaiki bonto ɔmɔɔ aiki ombo lɛngɛla loambo la loome. 7 Baekisi ba Isaliya* la Mafalisayɔ* balendaki Yesu ike nte baɛni iya aikya ongo onto luina la Sabato. Bakɛɛ ŋango, nte babaa bosao ba memalela omboo sitaka. 8 Kinaki, Yesu wiiki ombosila mbeya bamanya baɔ. Asimeli ongo bonto alɛngɛli loambo nte: «Emala la waande otamboka baanto lalikuli». Ongo onto aemali la achwe otamboka baanto.

9 Pa Yesu aasimeli bango Mafalisayɔ* la Baekisi ba Isaliya* nte: «Mbo kuumbola nyo: Nke ile Isaliya yaso ilangaka toyale tatakee luina la Sabato*? Nkɛɛ bɔlɔti aɔ bobe? Mbikya bonto aɔ mboo jaka»?

10 Yesu aalendi bako lalikuli, ango, asimeli ongo onto nte: «Sembola loambo labɛ». Alosemboli, kako nkango longo loambo laiki.

Yesu ombwikya bokambi ɔmɔɔ

1 Asili Yesu nɔnda binɛ lalikuli asamba banto baolangaki, achwe ɔɔsɛngɛ ba Kapɛlɛnaumu. 2 Woongo ɔsɛngɛ, kaiki waiyolo ɔmɔɔ baakɔlɔbɔi, aiki la bokambi ande alangaki ndako ike. Ɔnɛ bokambi aiki nkɔna mɛ la mbwa. 3 Ɔnɛ waiyolo aakɔlɔbɔi aoki ndako besako be Yesu, aotomeli bekongo bɛmɔɔ Beayuda, bachu mbooseya aande mbikya bokambi ande. 4 Bengo bekongo aiye bako ele Yesu, ba ɔsɛi ike la nɔnda: Ɔnɛ waiyolo aakɔlɔbɔi asana mamolama, 5 aliko ndako olangaka wooni baso, lonkinɛ ndako katophikeli Basaŋanelo* baso. 6 Yesu achwe bolili laako. Ango aiki bako sukɛlɛ la mbiya e lulu la ongo waiyolo aakɔlɔbɔi, ongo waiyolo aakɔlɔbɔi, atomi biseka bende basimele Yesu nte: Simela nyo ndako nte ataijake wiina manda kami, aliko lemi phalasane ndako aingele e lulu lami. 7 Aliko laingo, mbwiyɛna nte lemi phalasane manda kande. Kinaki alɔndɛ too bosao bɔmɔɔ, la bokambi ami akondo ika. 8 Aliko lemi ŋango akɔ nende entina la baiyolo bami, la lemi njalaka la bakɔlɔbɔi entina lami; n’nɔndake la ɔmɔɔ: «Chwaka»! La ndako ochaaka, la iya n’nɔndake la ɔnkinɛ! «Aka»! La ndako akonoanda. La iya n’similake bokambi ami nte: «Kɛɛ ɛnɛ! La ndako ɔkɛɛka». 9 Ango aoki Yesu bingo, asebalali ike aliko la ongo waiyolo aakɔlɔbɔi. Ango atulwe la nɔnda la boloi baanto baolingitaki, aasimeli: Mbokosimela nyo nte koonga asamba wooni lalikuli ba Isilaɛli, ntaɛni bonto boso limanya linɛnɛ ja ŋaanɛ. 10 Bango banto batomami la ongo waiyolo baakɔlɔbɔi autoli bako e lulu, batani ongo bokambi ombosila mbika.

11 Waango Basaŋanelo* kaiki la wainto ɔmɔɔ aiki nkɔna. Ongo wainto aiki ɔmbɔ kɛɛ bilongi joomu la ɛnaanɛi atatumbyama la Bosombo bobe. Ongo Bosombo wiiki ombosila mboomuna bɔkɔngɔ, nende eiki ndako phaɔsɔna lonkinɛ nsembwa. 12 Eleko ɛwɛɛni Yesu, aweeleli, la mboosimela nte: «Lele! Ombwikyama waale baɛ». 13 Yesu aaphisa bakasa aliko lande. Kako nkango ongo wainto asembwe, la aanjisa nkucha Kanamombe.

Yesu ombwikya bɔkɔnu luina la Sabato*

1 Luina lɔmɔɔ la Sabato*, Yesu achwe ndɛ lilɛ e lulu la waiyolo ɔmɔɔ a Bafalisayɔ*. La banto baiki o longo lulu baolendaki ike nte baɛni nke ɛkɛɛ ndako. 2 Otamboka lande Yesu, kaiki bonto ɔmɔɔ aiki la waale ba mbulanga bionge. 3 Yesu abaumboli Baekisi ba Isaliya* la Bafalisayɔ* nte: «Isaliya* yaso iluusiyaka aɔ isimbaka mbikya bonto luina la Sabato*». 4 Kinaki, baikɔwɛli bii. Yesu akooli ongo bɔkɔnu, awiikisa, la aosimeli achu lande.

Yesu ombwikya baso nsuli joomu

11 Yesu aiki ndako ɛ lɔkɛndɔ nchwa ɛ Yɛlusalɛma, aeteli weelelo be wooni ba Samaliya la ba Galilaya. 12 Aingeli ndako ɔɔsɛngɛ bɔmɔɔ, baso nsuli joomu baandi nsaŋani lande. Baemali* bɔɔ lande, 13 la manja mbokoma nte: «Haa Weekisi, Yesu, ɔtɔɛnɛlɛ ŋandi»!

14 Eleko ɛbaɛni Yesu aasimeli nte: «Chwaka nyo lokoiyɛnya nyo ele Baeta atei**». Aiki bako batachu engo baiki baloko e mboka, baiki.

15 Ango ɔmɔɔ asamba bako aɛni nte ombwika, autoli ɔkɔngɔ atakucha Kanamombe* la jooi linɛnɛ. 16 Aiyoki anyɔi otamboka la bekolo be Yesu, la elongi ende eiye nende ɛ lɔmɔtu, aosakoisa. Ongo onto aiki nde Musamaliya*. 17 Ango Yesu alɔndi nte: «Onde, mbɔ baso nsuli joomu ko baikisami! Bango bankinɛ libwa bale ende? 18 Koo mɛnamwa onkinɛ asamba bako autoli nkucha Kanamombe*, ila too ɔnɛ ole ataika Muyuda»? 19 Pa aɔsimeli ɔnɛ Musamaliya nte: «Emala, wiichwele la bii. Lokani labɛ lombo kuikya».

25 Woongo boloi kaiki wainto ɔmɔɔ aiki la waale ba mpasa bekila bilongi joomu laiphee. 26 Ongo wainto aɛni toakola ike. Baingi ike ba wiingi koo mbika. La osusisha besanga bende lalikuli. Kinaki, ingo koo nkɛɛ ekambwa. Ila kɔweenyisa nde tosoya ike. 27 Aiki ata oke banto batalɔndɛ aliko la Yesu. Achwe lonkinɛ oo loi, ɔɔkɔngɔ ba Yesu la nkoola esenda ende. 28 La ailɔndɛlaki nɛmɛlɛ: "Iya nkoolake koonga bisenda bende, lakondo ika.'' 29 Kako nkango, bekila bende bike ntena, la aitani ombwika.

43 La woongo oloi kwiiki wainto ɔmɔɔ aiki la waale ba mpasa bekila ilango bilongi joomu laiphee. Wiiki ombo nsusha besanga bende lalikuli o baingi, kinaki koo ɔnɛ awiikisa. 44 Ɔnɛ wainto wiiki atalingita Yesu ɔɔkɔngɔ, akooli nsɔli e esenda e Yesu. Kako nkango waale bande ba mpasa bekila bosili. 45 Yesu aumbɔli: «Nani omonkoola»? Banto lalikuli batati. Ango Pɛtɛlɛ awuumboli: «Bɔkɔta, phaɛni bɔnɛ wiike baanto bambo kolɛnga la nkophika»? 46 Kinaki Yesu ɔlɔndi: «Kolende la onto onkooli, aliko mbooka nkulu yami imbopasa». 47 Ongo wainto aɛni ndako nte omboeyama, achwe eiki Yesu atasɔkɛ la wɔɔma. Akɔmi balwe otamboka bande. Alɔndi otamboka baanto lalikuli ɛnɛ ɛɔtomi aokoole Yesu la bolengo nke mbwiki ndako kako nkango. 48 Yesu aosimeli: «Bophoko ami, lokani labɛ lombo koikya. Chwaka bii».

22 Laango Bɔkɔta ɔmɔɔ Baasaŋanelo Beayuda, aelelami Yailɔ aiye. Aɛni Yesu, aiyoki weekolo bende. 23 La aosɛi la membeleya la nɔnda: «Bophoko ami, okende sukɛlɛ la mbwa, aka mbɔlɔmbɛla aliko aike la ayale o luiko»!

24 Laango Yesu achwe la ndako. Bongo boloi boolingiti Yesu la mboo phika boleka lalikuli.

38 Baiyisa ele Yailo, Yesu atani bolupho ike aliko banto baiki batalele la mbokoma. 39 Oke mingela otema ba lulu la nɔnda: «Aliko laanke bilelo la bolupho? Bɔna atabu, kinaki andalale».

40 Kinaki baɔɔli Yesu, apasisa banto lalikuli anja, la aingeli e lulu engo eiki bojo ba bɔna la baeki bande basato, la isɛnde la nyɛŋende la bɔna. 41 Yesu akemeli bɔna o likasa la nɔnda; Talita kum ko nɔnda: «Bophoko mbokosimela emala!» 42 Kako nkango, Bophoko weemali la nkɛnda nɛmɛlɛ. Wiiki nde la bilongi joomu la iphee. Ango aɛni banto lalikuli bingo basebalali.

31 Yesu alɔndi lonkinɛ nte: Nani aɔsɔna lemi mbɛɛlamya la banto ba jooti ja lɛlɔ? La bambo elama la nani? 32 Balende bambo elama la bana bata yale bata elolelana boloi bɔmɔɔ la bonkinɛ nte:

Tombo kophomela nyo ŋɔma, kinaki koo kɛnya nyo!

Lɔnkinɛ tombo koembela nyo bɛkɛlwa be lotoko, kinaki koo ndela nyo!

33 «Aliko eleko eandi Yɔani oso mbatisa, ataika atale kitumbula la nywa difai, la nyo aiki nyo atalɔndɛ nte: ‹Olende la bosombo› 34 Eleko lemi Bɔna a Onto mbwiiya ndɛ la nywa, la nyo andalɔndɛ nyo nte: ‹Lenda nyo! Ɔnɛ onto olende bolei lonkinɛ bolɛwi, lɔnkinɛ keseka ke baso ngɛja kɔdi, la boso njambi›! 35 Kinaki, limanya ja Kanamombe* jataeyama njala sɔlɔ o bango lalikuli bata wiimeya».

Yesu ombotikela wainto ɔmɔɔ

36 Mufalisayɔ* ɔmɔɔ, aeleli Yesu nte aande ndɛ lilɛ e lulu lande. Yesu aingeli e lulu la ongo Mufalisayɔ*, ayali ndɛ lilɛ. 37 La woongo, ɔɔsɛngɛ kwiki la wainto ɔmɔɔ oso njambi. Ongo wainto aoki ndako nte Yesu olende e lulu la ongo Mufalisayɔ*, aingeli engo, ole la lintupa ja bauta ba limbala ja lisombi joolo.

41 Ango kwiiki waiyolo ɔmɔɔ Baasaŋanelo aelelamaki Yailo. Aiye la nkɔma balwe otamboka ba bekolo be Yesu. Asɛi Yesu ike nte aingele kande. 42 Aliko bophoko ande wiiki nkɔna ike. Wiiki bɔna ɔmɔɔ, oso bilongi joomu la biphee.

Eleko Yesu aiki atachu ka Yailo, banto baiki bata ophike beleka lalikuli.

49 Ango aiki Yesu oloko atalɔndɛ, kwiiye bonto ɔmɔɔ aime ele wiyolo Yailo. Aosimeli: «Waiyolo, bophoko abɛ ombobwa! Ko ɛnyake lonkinɛ weekisi»! 50 Aoki Yesu bingo, asimeli Yailo: «Kolawake; imeya too, bophoko abɛ landako akondo ika».

51 Yesu aiye ndako o lulu la Yailo, koo mimeya bonto aingele kaama kamɔɔ lande, ila Pɛtɛlɛ la Yɔani la Yakɔbɔ la baoti ba ongo bophoko. 52 Banto lalikuli baiki e lotoko la batalele aliko la ongo bɔna. Kinaki Yesu aasimeli: «Kolelake nyo, aliko bɔna atabu, kinaki andalale too»! 53 La bako ba wɔɔli aliko baeyi nte ongo bɔna ombosila mbwa. 54 Kinaki Yesu akemeli ongo bophoko o likasa alɔndi: «Bɔna, emwa»! 55 La kako nkango weemwe la aemali. Yesu aasimeli ba wɔɔya bɔna lilɛ. 56 Baoti bande basebalali ike. Kinaki Yesu aasimeli batasimelake bonto besao lalikuli bingo bi kɛɛmi.

37 La ɛna lɔphɛpho lɔmɔɔ loolo laandi, ɛtɛmbɔ ke tekyaki kyombo iloko yaingelaki otema ba kyombo, nende ango aiki iloko yataole e kyombo. 38 Weengo eleko Yesu alalaki ilɔ ɔɔkɔngɔ ba kyombo, la bɔtɛ atakicha eliko la monga.

Baeki bande ba weemoli la mboosimela: «Weekisi, takondo bwa: inɛ phayata kosimela ekambwa?» 39 Yesu aemwe, aphangweli lɔphɛphɔ la nɔnda la Eliya: «Kɔwa wɛɛ!» Laango lɔphɛphɔ la kɔwi la Eliya laiki nde bii!.

40 Lonkinɛ, Yesu aumboli baeki* bande: «Aliko laanke ole nyo la wɔɔma? Hapha nyo la lokani lami?» 41 Kinaki baeki baiki la wɔɔma.

Aliko la ingo baanjisa mbuimbola asamba bako: «Bampame! Ɔnɛ onto ole nani? Ɔnɛ nende lɔphɛphɔ la iloko yata wooke»!

35 Kaiki nde likɔlɔ, baeki ba Yesu ba osimeli: «Bɔkɔta, bombo elekwa la engo kaama kolende bɔɔ. 36 Toma bango anto bachu e nkombo la bɛsɛngɛ bele mɛmɛ nsomba lilɛ!» 37 Yesu oke mbobaucheya: «Ɔya nyo bako lilɛ»! Kinaki bake mboumbola: «Atalange-wɛɛ nte to pashe miya iphee ya besanga* miya iphee: yaiki nde besanga bɛmbɔya bokambi o ŋɔndɔ esambaele. Aliko la nsomba bitumbula la mbɔ baɔya ya ndɛ»?

38 Yesu abaumboli: «Ole nyo la bitumbula binga? Chwaka nyo lokolende.» Ango aɛni bako, baosimeli nte: «Tolende la bitumbula bitano, la lonkinɛ nsɛ iphee.» 39 Laango Yesu abaɔyisa isaliya basɛlɛlɛ bako lalikuli, wee loi waalilo. 40 Banto bake n’sɛlɛla boloi ba miya ɛmɔɔ miya ɛmɔɔ la boloi ba baomu batanobatano. 41 Lonkinɛ Yesu akemeli bingo bitumbula bitano la ingo n’see iphee. Aolisa baiso eliko la nkucha Kanamombe. Oke ntena bitumbula la mbɔya baeki bande. Aliko la mphaka ele banto lalikuli. La ingo nsee iphee ophaki waanto lalikuli. 42 Banto lalikuli bale la jiimbi. 43 Ango akɔngi Baeki bingo biteni be bitumbula la be nsee ya tikali, beoli biphaka joomu la iphee. 44 Bango bampame bale bingo bitumbula baiki wiike baanto elefu itano.

48 Oke mena nte baeki bande baiki la tosoya ta nduwa, aliko la lɔphɛphɔ nphupha boleka baɔ; o likɛɛlɔ, Yesu oke nchwa boleka baɔ atakende eliko la iloko, la aoni mbwa tanda. 49 Ango awɛɛni baeki atakɛndɛ eliko ja iloko. Bakanyaki nte olende Boyombi la baokomi, 50 Ango bako lalikuli bawɛɛni, bake mba wɔɔma.

Kinaki, kako nkango, Yesu oke mbwasimela: «Kekemala nyo, lemi ongo, kolɔwake nyo!  51 Lonkinɛ auleli o kengo Kyombo la lɔphɛphɔ loke ntena. Baeki bake nsebalala,

Yesu ombolesha banto elefu inɛi

1 Weengo eleko, boloi bɔmɔɔ bɔnɛnɛ bosaŋani lonkinɛ. Ŋango wiiki bako koo lilɛ ja ndɛ, Yesu aeleli baeki bande la mbwasimela: 2 «Mwɛnɛla banɛ banto ŋandi, aliko bakɛndi lami biina esato la koo lonkinɛ lilɛ ja ndɛ. 3 Iya mbwa tomake kaɔ koo ndɛ bakondo ena e mboka, aliko la botala, aliko ike asamba bako baimi bɔɔ.» 4 Baeki bande bauchisa: «Ende ebaema ekambwa ɛndesha banɛ banto, anɛ aleiso oosowe?» 5 Yesu abaumboli: «Ole nyo la bitumbula binga?» Bauchisa «Esamnbaele».

6 Laango Yesu aɔyisa banto luusa la njala anyɔi. Lonkinɛ ombo kemela bengo bitumbula esambaele, oke nsakoya Kanamombe. Lonkinɛ aeteni la abaɔyisa baeki bande o mbwaphakela bako lalikuli. Ŋango nde baiki kako. 7 Baiki lonkinɛ la tose tɔnchɛ. Yesu o sakoisa Kanamombe lonkinɛ aliko la ingo nse la nɔnda o baeki bande ba phakele lonkinɛ banto. 8 Kila onto ale o jiimbi jande. Baeki bakɔngi biphaka esambaele fua, la biteni bechikali. 9 Laango kaiki nde ilango banto elefu inɛi.

Lonkinɛ Yesu aalaki,

Yesu ombo kɔmɛla bote

12 Wiina onkinɛ, Yesu la Baeki* bande aimaki bako e Bɛtaniya Yesu aoki botala. 13 Aɛni bɔɔ bote bɔmɔɔ ba mutini, la ochwe nenda iya atana biuma. Kinaki, ango aiki ndako sukɛlɛ la ongo bote otani ntiti ntoo. Aliko kotaika eleko ende e mbota biuma. 14 Laango Yesu akɔmɛli bongo bote la nɔnda: «Manja lɛlɔ, koo onto alɛɛ lonkinɛ jɛ biuma bɛbɛ!» La baeki bawookaki.

Lokani la Maɔmbi

20 La mpendu kɛmɛlɛ, Yesu la Baeki* bande, o mbeta e mboka, baɛni bongo bote ba mutini bomooma nende weejo. 21 Laango, Pɛtɛlɛ okanyisa bingo Yesu akɔmɛli bongo bote la mboosimela: «Weekisi, lenda! Bote bo mutini bokɔmɛli wɛɛ bo mooma lalikuli».

22 Laango Yesu ɔlɔndi la Baeki* bande: «Yala nyo la lokani ele Kanamombe*! 23 Mbokosimela nyo sɔlɔ, bonto aɔsɔna nɔnda la okondi: ‹Phikwa la wiyoke o wango.› La iya apha la mashaka e lisolo jande, kinaki, aimeyake nte bilɔndi ndako biiyaki, bikondo wiyelaka. 24 Aliko laingo, mbokosimela nyo: ango atalɔmbɛ nyo ele Kanamombe*, aliko la ɛkambwa ɛmɔɔ, imeya nyo nte ombosila nyo keba, la ango akondo ɔyama.

25 «La ango ayala nyo atalɔmbe Kanamombe*, la ole nyo la bosao la onto ɔmɔɔ, sokola nyo obi. Lonkinɛ nte isɛ nyo, ole e loola akosokolele nyo bobe bokɛisa nyo.

Yesu ɔmbɔ sɔna Baeki batango

1 Kaiki luina lɔmɔɔ, Yesu aiki ataemala ɔɔkɔngɛ ba wango ba Gɛnɛsalɛti*, la banto ike baanjisa mboo phika, aliko baonaki mboka besao be Kanamombe*. 2 Aɛni biɔmbɔ biphee ɔɔkɔngɛ ba wango. Balɔwi baiki batapase otema baiki bata ɔkya bɛtɛi bɛɔ. 3 Yesu auleli ɔ kɛmɔɔ kiiki ango. Kengo kyɔmbɔ kiiki ke Simo. Yesu aosimeli nte asɛmɛya e wango, bɔɔ inchɛ la ɔkɔngɛ. Ayali o kengo kyɔmbɔ la njala ataekya banto.

4 Ango asili ndako mbekya, asimeli Simo nte: «Sɛmeya kyɔmbɔ ele iloko, linjanyo bɛtɛi bɛnyo wiiloko, aliko o jake nyo nse». 5 Simo auchisa: «Bɔkɔta, tombo lɔwa lɛlɔ bocho lalikuli koo mba ekambwa. Kinaki, ŋaanɛ wɛɛ kɔmbɔ lɔnda lakondo oka lonkinɛ bɔtɛi e losi». 6 Pa nsila mboka bɔtɛi e losi, ba jaki nsee ike, nende ango aiki bɛtɛi bɛɔ beke betaate. 7 Baeleli baina labɔ baiki e kenkinɛ kyɔmbɔ, baande mbo baamola. Baandi baojisa biɔmbɔ beko biphee la nse ilango biɔmbɔ bilinde. 8 Simo Pɛtɛlɛ aɛni ndako ŋango, akɔmeli Yesu balwe la nɔnda nte: «Pasa otamboka lami, ee Bɔkɔta aliko lemi nende boso njambi»! 9 Kwiki ŋaanɛ, aliko Simo la baina lande, basebalali ike la mɛna nse ya jaki bako. 10 Ŋango ako, Yakɔbɔ la Yɔani bana ba Sebedayɔ baiki baina lande basɔkɔli ba nse. Yesu asimeli Simo: «Kolawake; manja lɛlɔ akondo yala bɔsɔkɔli baanto». 11 Baɛlisa kyɔmbɔ wɔɔ kɔngɛ, bachiki bikambwa lalikuli la ningita Yesu.

Yesu ombo simba ɛtɛmbɔ

22 Luina lɔmɔɔ, Yesu auleli ɛ Kyɔmbɔ la baeki bande, aasimeli nte: «Tosaphwe wango nende boleka bonkinɛ». La bachwe.

23 Aiki bako batakɛndɛ, Yesu aoki ilɔ, alali. Kako nkango Ɛtɛmbɔ eolo keanjisa ndupha iloko la wango. Iloko yaanjisa mingela ɔ Kyɔmbɔ, baiki o libweelo. 24 Baeki* bachwe memola Yesu, la mboosimela: «Weekisi! Weekisi! Tombobwa»!

Yesu aemwe, la mpangwela ike longo lɔphɛphɔ la ɛtɛmbɔ, la bɛkɔwi la kaiki bii nɛnɛ. 25 Pa Yesu aumboli baeki bande nte: «Lokani lanyo lole ende»? Kinaki bako ba sebalali la ndawa la nsimelana: «Ɔnɛ ole nani, nende lɔphɛphɔ la ɛtɛmbɔ lota wooke»?

Yesu ombo simba ɛtɛmbɔ

22 Luina lɔmɔɔ, Yesu auleli ɛ Kyɔmbɔ la baeki bande, aasimeli nte: «Tosaphwe wango nende boleka bonkinɛ». La bachwe.

23 Aiki bako batakɛndɛ, Yesu aoki ilɔ, alali. Kako nkango Ɛtɛmbɔ eolo keanjisa ndupha iloko la wango. Iloko yaanjisa mingela ɔ Kyɔmbɔ, baiki o libweelo. 24 Baeki* bachwe memola Yesu, la mboosimela: «Weekisi! Weekisi! Tombobwa»!

Yesu aemwe, la mpangwela ike longo lɔphɛphɔ la ɛtɛmbɔ, la bɛkɔwi la kaiki bii nɛnɛ. 25 Pa Yesu aumboli baeki bande nte: «Lokani lanyo lole ende»? Kinaki bako ba sebalali la ndawa la nsimelana: «Ɔnɛ ole nani, nende lɔphɛphɔ la ɛtɛmbɔ lota wooke»?

Yesu ombwita bosombo bobe ele onto

26 Ɔkɔngɔ laango, Yesu la baeki bande basaphwe wango, baemali o wooni ba Wagelasi boleka bɔnkinɛ ba wooni ba Galilaya.

12 Aiki kako likɔlɔ, bango bakɛndi* joomu laaphee baochweli, baosimeli: «Bɔkɔta anɛ tolende bɔɔ la banto. Wiingo simela banto bachu wɛɛsɛngɛ la tɔsɛngɛ ta sukɛlɛ, baibaele lilɛ la kaama ka ndala». 13 Kinaki Yesu aasimeli: «Nyo ɔya nyo bako lilɛ». La bako bawuuchisa: «Tapha la lilɛ ila too bitumbula bitano la nsee iphee. Andalange tochu mbwasombela banɛ banto lalikuli lilɛ»? 14 [Ango baiki ba mpame, ilango 5,000.]

Laango, Yesu asimeli baeki bande: «Simela nyo banto bayale o beloi beanto baomu atano atano». 15 Baeki bakee wɛɛnte ŋango Yesu aasimeli, baakichisa banto lalikuli. 16 Pa Yesu aɔsi bingo bitumbula bitano la ingo nsee iphee, aulisa baiso eliko, achweli bochwako, abikeloli aɔyisa baeki bande aliko baphakele banto. 17 Banto lalikuli bale nende o jiimbi. Baeki bakɔngi bingo bichikalaki, baojisa biphaka joomu la iphee.

23 Atanemwe otema Baasanganelo baɔ* bonto ɔmɔɔ aiki la bosombo bobe. Kako nkango aokomi: 24 «Kole nke asamba iso la wɛɛ, Yesu a Nasaleti? Waandi nde aliko la ntojaka? Latakoeye Bɔlɔti! Wɛɛ olende Lɔɛlɔ ɔnɛ atomi Kanamombe»!

25 Yesu aopangweli la nkulu ongo bosombo la nɔnda: «Kɔwa wɛɛ, la pasa ele ɔnɛ onto.» 26 La ongo bosombo bobe opasi ongo bonto la mbɔɔtɛkya la nkulu la mpasa ataokoma.

Yesu ombwikya oso Basombo babe

1 Ango Yesu la baeki bande ba saphwaki eliya e Galilaya. Baiye o wooni ba Gelaseni. 2 Yesu apasi e Kyombo, kako nkango, bonto ɔmɔɔ aimaki weebeli e baombo la manda mboosaŋanya. Ongo bonto aiki la basombo babe. 3 La wiiki atayale atei ba baombo. Koo onto ɔnɛ asana mbookemela la mbɔɔlɛma koonga la munyɔlɔlɔ bɔmɔɔ; 4 Aliko kila wiina banto baɔlɛmaki mbolo wee kolo la minyɔlɔlɔ waakasa, atenaki minyɔlɔlɔ la nkelola ingo mbolo. Koo bonto aiki la nkulu ya mbɔɔlɛmbya. 5 Ongo bonto aaŋangaki bocho la yaani, o baombo la bɛɔkɔ, la ata okoma la mbwi yɔtaya nɛmɛlɛ la abwɛ. 6 Ango aɛni ndako Yesu bɔɔ; achwe loango, nkɔma balwe otamboka lande, 7 La aokomi la nkulu: «Yesu atalange nke, Bɔna a Onto ole eliko bɔɔ? Mbokolɔmba elokombo, la Kanamombe, konduwanyake!» 8 Ongo bonto alɔndi ingo aliko Yesu aosimelaki: «Bosombo bobe pasa ele ɔnɛ bonto!» 9 Pa Yesu auumboli ongo bonto: «Lokombo labɛ nani?» Auchisa: «Lokombo lami ike»,* legion ko nɔnda ike, aliko tolende ike. 10 La ongo a memeyaki nseya Yesu ataitake basombo babe anja la bongo booni.

11 Ango kaama kaiki nde boloi bɔmɔɔ ba nsombo balɛɛki sukɛlɛ la bokondi ɔmɔɔ. 12 Basombo bachwaki la maɔmbi baɔ ele Yesu: «Ototome o nsombo, ɔtɔya loosa tuingele kaɔ!» 13 Yesu abaɔyisa loosa. La bango basombo babe bapasi ele ongo bonto la baingeli wiingo nsombo. Boloi lalikuli baiyoki e eliya la babwe. Baiki ilango elefu iphee. 14 Pa bango banto baiki batachunge nsombo bachwe ntɔla besako e wooni la bɛsɛngɛ baandi mɛna bingo beeti.

11 Nyo, olɔndaka nyo nte bonto aɔsɔna nɔnda la isɛnde aɔ nyɛŋɛnde nte: ‹Engo eoni lemi nkɔya kekende Kolobani Ko nɔnda mbosila mphakela Kanamombe.›  12 Okɛɛ ŋango, oke nyo simbaka onto ataɔyake isɛnde la nyɛŋɛnde ekambwa. 13 Wiingo bolengo, ombokila nyo isaliya ya besao be Kanamombe aliko la isaliya yaankɛnyo yata ekya nyo. La atakɛɛ nyo bikambwa ike binkinɛ bile kɛlikɛli la ingo».

Bikambwa binɛ bikichaka bonto bobe.

14 Pa ingo, Yesu weeleli lonkinɛ boloi baanto la nɔnda: «Ombo kee nyo bɔlɔti, nyo lalikuli, la weeye nyo binɛ: 15 Koo ɛnɛ eingelaka otema ba onto mima anja ekichaka bonto bobe. Kinaki ɛnɛ eimaka o onto, ekichaka bonto bobe.

Wainto ɔmɔɔ apha Muyuda ombo imeya Yesu

24 Yesu apasi ango kaama la achwe boleka ba bɔsɛngɛ ba Tilo. Aingeli e lulu lɔmɔɔ, kinaki koo nanga banto baeye nte wiiki ango, kinaki phasane njala ataisama.

25 Pa ingo, wainto ɔmɔɔ, aiki la bophoko ande aiki la basombo babe, aoki ndako besako be Yesu; la aandi mbwiyoka weekolo be Yesu. 26 Ongo wainto phaiki Muyuda, kinaki aiki Mugiliki aotami ɔɔsɛngɛ ba Feniki o booni ba Siliya. Asɛi Yesu aite bosombo bobe ele bophoko ande.

27 Kinaki Yesu aosimeli: «Lɛla obi bana bale lilɛ la jiimbi; Aliko kaphabɔlɔti nkemela lilɛ ja bana la mbokela mbwa.» 28 Wainto auchisa: «Sɔlɔ, weekisi, koonga mbwa, balɛɛka bompusi bongo bokwaka ɛntina la mesa bana bakwɛyaka».

29 Laango, Yesu awuuchisa: «Aliko la ingo mbuchɛyama, aɔsɔna mbutola kaɛ: Bosombo bobe ombopasa bophoko abe».

30 Autoli ndako e lulu lande, atani bɔna ande ombosembwa e likenge: la bosombo bobe aiki ombosila mboopasa.

17 Kinaki bonto ɔmɔɔ asamba boloi abuchisa: «Weekisi, nkwɛlisa bɔna ami, aliko ombo luana la bosombo ɔmɔɔ bobe, la bongo bosombo bombo okicha eluma. 18 Bosombo bata okemela kaama lalikuli, atabooke anyɔi, bɔna atapase lɔfulɔ woonywa. Lonkinɛ nkɛkɛtanya bainyo, la bionge nsenetala. La, lɔmbi ele baeki* babɛ baite bongo bosombo, kinaki koo mbɔsɔna»!

19 Yesu aasimeli: «Nyo banto ba lɛlɔ apha nyo la lokani! Biina benga, lonkinɛ beyala lemi lanyo? Eleko enga lonkinɛ esana lemi nkɔɛmba nyo? Oweela nyo ongo bɔna»!

20 Bawɛɛlisa, ango bosombo aɛni Yesu, oke mbɔɔ sɔkyasɔkya bɔna lankulu; la mbɔɔkwɛɛya e lɔmɔtu, oke mbeleŋanambeleŋana la mpasa lɔfulɔ woonya.

21 Yesu aumboli isɛnde la bɔna: «Ndeka biina inga bimbo wiiyela binɛ?» La isɛnde auchisa: «Manja wɔɔkɛnda bande. 22 La kila wiina ɔnɛ bosombo, mbo wookaka wiiya la wiiloko mona nte aojake. Iya alanga otookele ŋandi la waande ntokakola»!

23 Yesu awuuchisa: «Aliko laanke ombo lɔnda nyo nte iya aɔsɔna, lalikuli besana ele ongo ole la lokani.» 24 Kako nkango, Isɛnde la bɔna aokomi: «Mbwimeya, kinaki omamole lokani lami lokokyame».

25 Yesu mɛna boloi baanto manda mɛ laako; laango, aphangweli bosombo bobe la mboosimela: «Wɛɛ bosombo eluma la epokoto: Pasa ele ɔnɛ bɔna la kuutolake lonkinɛ jɛ ele ndako»! 26 Bongo bosombo aokomi, la nsɔkya bɔna la nkulu, la mpasa. Ongo bɔna wɛɛnamwi wɛɛnte bojo, banto ike baanjisa nɔnda nte: «Ombo bwa». 27 Kinaki Yesu aokemeli o likasa, oke mbowemaya la bɔna aemali.

Yesu ombwikya bakɔnu ike

38 Laango Yesu apasi waango Basaŋanelo*, achwe e lulu la Simo. Wainto ɔmɔɔ bokilo ande la Simo, aiki la empoma yoolo, baosimeli a wiikya. 39 La Yesu aandi, aemali sukɛlɛ lande, aphangweli engo empoma la engo empoma keotiki. Kako nkango, ongo wainto aemali la mbwakambela.

27 Yesu aiki atakitela ɔ kyɔmbɔ, bonto ɔmɔɔ a ongo ɔsɛngɛ aandi sukɛlɛ la ndako. Ɔnɛ onto wiiki la basombo babe. Biina ike, ongo koo ndɔtaka lonkinɛ bisenda, kinaki ayalaki too o baombo. 28 Aɛni ndako Yesu, aiyoki anyɔi otamboka lande alɔndi la joi linɛnɛ: «Wɛɛ, Yesu Bɔna a Kanamombe* ole eliko lalikuli, atamone laanke? Mbokoseya ko ntumbyake»! 29 Ɔlɔndi ŋango aliko Yesu wiiki atasimela ongo bosombo bobe aopase. Ongo bosombo bobe wiiki etaokemela ɔnɛ onto biina lalikuli. Lonkinɛ koonga banto baɔlɛmi bekolo la bakasa la minyɔlɔlɔ o mboochunga, kinaki wiiki ataitena tena too. Lonkinɛ ongo bosombo bobe wiiki atawɛɛmbɛ eiki koo anto.

30 La Yesu awuumboli: «Lokombo labɛ nani»? Aliko wiiki ombokemelama la basombo babe ike. 31 Bango basombo basɛi Yesu ataatɔlake e liphuku litale.

32 Kaama kango kaiki la boloi bɔnɛnɛ ba nsombo yaiki yatale weekondi. Bango basombo babe baosɛi ike Yesu abaɔya luusa la mingela wiingo nsombo. La Yesu abaɔyisa luusa. 33 Aliko la ingo, bango basombo babe bapasi ele ongo onto, la baingeli wiingo nsombo. La bakiteli e wango la nkilimwa la ninda.

34 Bango bachungi baɛni bingo lalikuli be paseli. Balawi wɛɛsɛngɛ la tɔsɛngɛ tɔnchɛ nsimela banto bengo besako. 35 Banto baandi mɛna bepaseli. La bako baiye kaama kaiki Yesu, batani ongo onto apashemi basombo babe, atayale weekolo be Yesu, ole ɔmbɔlɔta bisenda la ole la limanya. Bango banto balawi.

27 Mbokosimela nyo sɔlɔ: kolende la bankinɛ anɛ phaabu otamboka iya bataɛni ekeleka e Kanamombe».

Yesu ombo tulola iima

28 O biina ɛnaanɛi pa Yesu nɔnda bengo besao, okemeli Pɛtɛlɛ la Yɔani la Yakɔbɔ auleli la bako ɛ bɔɔkɔ nɔmba Kanamombe*. 29 Wiiki atalɔmbɛ, iima ende etulwe, la esenda eandi ɛɛlɔ la mbɛla pɛɛ. 30,31 Weengo ekowa, kopaseli ba mpame ba phee baoli la bokuchu, Musa la Eliya. Bango ba mpame baiki bata ɔmbɔla la Yesu aliko la libwelo jande jaanda anɛ kasende engo Yɛlusalɛma.

32 Eleko engo, Pɛtɛlɛ la baina lande baiki bambo ɔsɔnama la ilɔ nende ango aemwe bako. Baɛni bokuchu ba Yesu, ba baɛni la bango baphee baiki bamoemala kaama kamɔɔ lande. 33 Laango banɛ ba mpame ba phee, baaŋani la Yesu, Pɛtɛlɛ asimeli Yesu: «Bɔkɔta, kolende bɔlɔti iso njala anɛ. Tophike balɔmbɛ basato: kɛmɔɔ kɛbɛ, kɛnkinɛ ke Musa la kɛnkinɛ ke Eliya». Kinaki Pɛtɛlɛ koombeya ɛnɛ ɛ lɔndaki ndako.

38 O bongo boloi, bonto ɔmɔɔ aokomi la joi linɛnɛ, la nɔnda: «Weekisi! Mbokoseya o nendele ɔnɛ bɔna ami ɔmɔɔ! 39 Basombo babe balende, bataokemela, kako nkango batawookomya, bataɔtɛkya la mbɔɔkwɛya biunkunya la mboopasha lɔfulɔ woonywa. Bango basombo babe phaosanjiya loango la mboo tumbya ike. 40 N’nɔmbi baeki baɛ baopasha bako, kinaki koo mbɔsɔna».

41 Laango Yesu alɔndi: «Nyo banto ba bɛnɛ biina apha nyo la lokani, lonkinɛ olende nyo babe ike. Njalaki lanyo la nkooka nyo nende luina nke»? Pa aosimeli ongo onto: «Ombela ongo bɔna abɛ anɛ».

42 Eleko iiki ongo bɔna atachu ele Yesu, kako nkango bango basombo babe baɔkwɛisa anyɔi la mbɔɔsɔkya. Kinaki, Yesu aphangweli ongo bosombo bobe la ndako aopasi aiki. Yesu auchisa ongo bɔna la mbɔwɔya isɛnde. 43 Banto lalikuli ba sebalali ike ɔ mɛna nkulu nɛnɛ ya Kanamombe*.

Yesu ɔmbɔ lɔnda lonkinɛ aliko la libweelo jande

Eleko bango banto lalikuli baiki baloko batasebalala aliko la bikambwa lalikuli biiki Yesu atakee, asimeli baeki bande nte:

Yesu la Belisebuli

14 Luina lɔmɔɔ Yesu wiiki ataite bosombo bobe iiki itaokicha bonto ɔmɔɔ eluma. Eleko eopasi ongo osombo, kako nkango aanjisa nɔnda. La boloi baanto baiki ango ba sebalali.

50 Ɔmɔɔ abɔ kako nkango ateni bokambi awaiyolo a baeta atei litoi ja loome. 51 Kinaki Yesu alɔndi nte: «Sanjiya nyo ŋango»! Akooli litoi ja ongo onto, la awiikisa.

24 Bango baeki* ba Yɔani bautoli. Yesu aanjisa nsimela boloi baanto besao aliko la Yɔani nɔnda: Achwe nyo nenda ekambwa nke engo woosowe*? Onde, achwe nyo mɛna litɛtɛ ja tɛkyamaki la lɔphɛphɔ? Jɛ! 25 Iya jɛ, ochwe nyo mɛna nke? Bonto alɔti bisenda bilɔti? Jɛ! Kinaki, baso ndɔta bisenda be nombo bayalaka la luiko lɔlɔti, bayalaka nde o lulu la Bɔkɔta. 26 Laango, onsimele nyo, achwe nyo nenda nke? Mɛna wɛɛni*? Ole! Mbokosimela nyo nte aiki wɛɛni*, lonkinɛ aiki omboleka wɛɛni. 27 Ongo Yɔani ko Lɔɔsi Lɔɛlɔ lɔmbɔlɔnda aliko lande nte:

Oka nyo! Lemi mbotoma bokambi ami akotangolele*,

aliko akɔlɔngɔsɔlɛlɛ mboka.