Milagres de Jesus

Yesu jaalamisa bangalinga abele

27 Yesu pajaboka pala, hejwabia mwiindela bangalinga abeli bunkagula koni bakajamaliya kwa makili, "Mwana waka Daudi, utubonila ikia."

28 Yesu ejajingala nkati, bangalinga abeli bala bunzendila, najombi jaalalukiya, "Boo, nnhobale lee nepani nhwesa kundamisa?"

Nabombi bajibua, "Ena Bambu."

29 Papuje Yesu jagusa mihu gabu, nukupwaga, "Kubia kwinu ngati enhobali." 30 Mihu gabu gatenda kulinga. Najombi Yesu jaakanakia suukali, "Mwampwagi mundu jokapi lijambu leheli."

31 Lakini bombi ebaboka, balandila majambu gaka Yesu pa ndema jela.

Yesu jwaalamisa banga linga abeli

29 Yesu na banafunzi baki pababia aboka kumusi uku Yeliko, nsambi wa bandu watenda kumpwata. 30 Kwabia na banga linga abeli atemi pulutengu lwi indela, na pabajowana Yesu jwabia jupeta pala, bajamalia, "Bambu, Mwana waka Daudi utubonila ikia!"

31 Nsambi wa bandu bala waalakalia nakaapwagi atama kinunu. Lakini bombi bajamalia ngani, "Bambo, Mwana waka Daudi utubonila ikia!"

32 Yesu jwajema, nakaakema nakaalaluki, "Boo, mpala nunhengila kike?"

33 Bunzibwa, "Bambu, tuloba mihu gitu galinga."

34 Yesu jwaabonila ikia, jwaagusa mihu gabu na apalapa bawesa kulinga nabombi nukumpwata.

Yesu andamisa mundu jwanga kulinga ku Betasaida

22 Yesu jahika ku Betisaida pamu na banafunzi baki. Bandu bundetila mundu jwanga kulinga, bundoba angusa ili andamisa. 23 Yesu ankamla kuboku mundu jwanga kulinga jola nuku mpeleka kunza ji kijiji. Anhunila imata, nukumbeke maboku, alapu anndalukyai, "Boo guwesa kukibona sindo sokape?"

24 Mundu we jola jwalinga kunani, nukupwaga, "Naabona bandu abonikana ngiti mikongu jejijenda."

25 Ndi Yesu ambekila kabee maboku. Najombi jatupa mihu, jwalama miugaki nukuwesa kukibona kilasindu sapi. 26 Yesu ampwagila jujenda kunyumba jaki anndagalakya, "Gwikelabuki kukijiji sela nakaapwagi bandu."

Yesu andamisa kimumuta jwanga kujoa

31 Yesu jaboka kundema uku Tilo, nukupetee ku Sidoni, nu kuhika ku nhanga uku Galilaya kupete kundema uku Dekapoli maana jaki musi kome. 32 Ndipala bundeta kwaka Yesu kimumuta jwanga kujoa, bundoba ambekila maboku ili andamisa. 33 Yesu amboa mundu hoju munsambi wa bandu nu kunzingii ngonzi mwamakutu, jwahuna imata mulungonzi lwaki nu kuungusa mululimi lwaka mundu jola. 34 Ndi jalinga kunani kwa mahundi kwaka Sapanga, japomula kwa makili nukupwaga, "Efata," maana jaki, "Hogukaje."

35 Apalapa mundu jola jawesa kujowana sapi nu kulongee sapi. 36 Yesu jaalagalakya bampwagi mundu jokapi lijambu lela. Lakini ngati ejalagalakya, ndi pabaendalya kulandi lijambu lelela. 37 Bandu basangii ngamaa nukupwaga, "Gajutei goa gaasapi. Jaatei hataa bandu banga kujoa ajogwana, naka kimumuta jwaawesisi alongila!"

Yesu andamisa mundu jumu jwanga kulinga jobunkema Batilomayo

46 Ndienu, bahika ku Yeliko, najombi Yesu pajabii juhuma kumusi we hogu koni jubii na banafunzi baki pamu nu nsambi wa bandu. Mundu jumu jwanga kulinga, jobunkema Batilimayo, mwana waka Timayo, jojabii jutemi mulutengu jindela, jakaloba. 47 Pajajowana Yesu juku Nazaleti jabii jupeta papu, jatumbulya kujamalii, "Yesu, mwana waka Daudi, gumonila ikia!"

48 Bandu bingi bundakalya jutama kinunu, lakini jombi jaendalya kujamalii, "Mwana waka Daudi, gumonila ikia."

49 Yesu jajema nukupwaga, "Munkema."

Ndienu bunkema jwanga kulinga we hoju nukumpwagi, "Wijogopa! Jema, jugukema."

50 Najombi jalekala kutali gungobu gwaki, jahomba kunani, nukumpwata Yesu.

51 Yesu andalukiya, "Boo gupala nuguhengila kike?" Jwanga linga we jola ampwagila.

"Mbola, nanoba nhwesa kulinga."

52 Yesu ampwagila, "Jendaje, kuhobale kwaku kugulamisi."

Apalapa, mundu jwanga kulinga we jola jwawesa nukulinga, nukunzengale Yesu mwiindela.

Yesu andamisa mundu jwanga kulinga

35 Yesu pajahegalya kuhika ku Yeliko, mundu jumu jwanga kulinga jwatemi pulutengu jiindela jakaloba. 36 Mundu jwanga linga we jola pajajoa nsambi wa bandu gutenda kupeta, jalalukiya, "Boo kibii kike?"

37 Bumpwagila, "Yesu juku Nazaleti jutenda kupeta."

38 Najombi jajamalya koni jakapwaaga, "Yesu, Mwana waka Daude, gumonila ikia!"

39 Bandu bababia andongulii andakalya nukupwagi tumbala, lakini jombi jaendalya kujamalii, "Yesu Mwana waka Daude, gumonila ikia!"

40 Yesu jajema, nakaapwagi bundeta mundu hoju pajajemiki jombi. Jwanga kulinga we jola hejwahegaliya pambipi, Yesu andalukiya, 41 "Gupala nu guhengila kike?"

Najombi japwaaga, "Bambu, mbala kulinga kabee."

42 Yesu ampwagila, "Linga! Kuhobale kwaku kugulamise."

43 Apalapa jwanga kulinga we jola jwatenda kulinga, ampwata Yesu koni akundumbaliya Sapanga: Bandu boa pababoona hela, nabombi bundumbaliya Sapanga.

Yesu andamisa mundu jwanga kulinga

1 Yesu pajabiya jupeta mwindela, ambona mundu jumu jojabii ngasejulinga toka kubelekwa kwaki. 2 Banafunzi baki bundalukiya, "Mbola, nya jojuhengiki mahakau mundu ajo au ahengo na amabu baki mbaka jubelikwi jwanga kulinga?"

3 Yesu japwaga, "Jonzo ngasejatei mahakau wala ahengo na amabu baki. Jwasaliwi jwangalinga ili makili gaka Sapanga gabonikana gakahengika mumaisa gaki. 4 Kipindi sakona lioba mutu tupalika kuhenga lihengu laka jola jojundumiki. Ndaba ikilu jiegali na nga mundu jojuwesa kuhenga lihengu laka jola jojundumiki. 5 Kipindi semi pundema nepani ndi unang’anu gupundema."

6 Pajajomula kupwaga haga, Yesu jahuna imata pai, jalenganakiya likandu, ampakia jwanga linga jola likandu mmiho. 7 Ampwajila, "Gujenga ukasamba masi ku kiliba sa Soloamu." Maana jilihina lende ndi "Joantumiki." Ndienu jajenda nukusamba, jakelubuka koni jakalinga.

2 Mundu jumu jojuleliki anzendila, anzinamia nukupwaga, "Bambu, ana gupai guwesa kunyambisa."

3 Yesu jwanyosha kuboku kwaki angusa mundu jojuleliki jola nukumpwagi, "Mbala gunyambisika." Apalapa mundu jola jatenda kulama. 4 Ndipala Yesu ampwagila mundu jola, "Jowania, wampwagi mundu jokapi, ila gujenda ukulilangia kwaka nngolu nkolongu na ukapia litambiku lejalagalakiya Musa, kwaalangi bandu gulamiki."

2 Bandu bangi bundetila mundu jojulei, babia angoniki pu mpandu. Yesu ejukubona kuhobale kwabu, ampwagila mundu jojulei jola, "Mwanango, hobaliyaje, mahakau gaku galekakiwi."

3 Abola bangi ba Malagalaki bapwaga mu mioju jabu, "Mundu hajo antondo Sapanga!"

4 Yesu jagamanyiki mawasu gabu, jalalukiya, "Ndaba jakii nhwasali ubaja mu mioju jino? 5 Laa lelipepwiki ngani, kupwaga, ‘Gulekakiwi mahakau gaku,’ au kupwaaga, ‘Jema gujendaje?’ 6 Lakini, nepani mbala mmanya Mwana waka Mundu jubii nu uwesu wakalekake bandu mahakau." Ndienu ampwagila mundu jojulei jola, "Jukua mpandu waku gujenda."

7 Mundu jola jajema nukujenda kunyumba jaki.

10 momuje kwabii na mundu jumu junu kuboku kokulei. Ndienu bandu andalukiya Yesu, "Boo, kujetakeka le kundamisa mundu Lisoba lu Kupomulela?" Bundalukiya hela ili apata indela jukuntaki.

11 Lakini Yesu ampwagila, "Boo, mundu boo kati jinu likondoo na lihabuki mlibomba Lisoba lu Kupomulela ngajitondabe kuboku kulipia? 12 Lakini mundu ndi jwa sapi kuliku likondoo! Henu, nga nhilu kuhenga majambu ga amboni Lisoba lu Kupomulela." 13 Ndipala ampwagila mundu jola, "Nyosa kuboku kwaku."

Janyosa kuboku, nakwombi kwalama na kuba ngati kongi kola.

30 Ndienu, akoanu baka Simoni babii agoni pikitanda alwala ngamaa. Ejahika pala Yesu bumpwagila lijambu laka nyongoo we hoju. 31 Ndienu Yesu anzendila nyongoo jola, ankamula kuboku. Nukuntondabee, na homa jejela jatenda kumboka. Ndi jwatumbuliya kuntelake posu.

Yesu andamisa mundu

40 Lisoba limwa mundu jumu jojuleliki anzendila Yesu, nukungungamali nukundoba, "Nagupai guwesa kunyambisa!"

41 Yesu ambonila ikia, nukumtondabee kuboku kwaki nukungusa nukupwaagi, "Mbala! Gunyambisika." 42 Apalapa, kuleleka kwaki kwatenda kukotoka, najombi jatenda kunyambisika.

3 Papuje mundu jumu jojulei bundeta kwaka Yesu koni buntotwi bandu nsesi. 4 Lakini ndaba ju nsambi wa bandu, ngasebawesiki kujingi nkate. Ndienu, bakwela panani ju nhagaa bahotula nhagaa nukunhulu jojulei we jola pikilanda ja bandu nukumbeka palongi jaka Yesu pamu nilipega laki. 5 Yesu ejukubona kuhobale kwabu, ampwagila mundu jojulei jola, "Mwanango, gulekakiwi mahakau gako."

6 Abola bangi ba malagalaki gaka Musa babia atamani papuje baholalya mmwoju jabu, 7 "Mundu we hoju juwesa boo kupwaga hela? Antondoo lee Sapanga! Nga mundu jojuwesa kulekake mahakau gaka mundu, kwaa Sapanga kajika jaki!"

8 Apalapa Yesu jikimanyiki sebaholalya, jaapwagila, "Ndaba jaki nholale hela mmyoju jino? 9 Lijambu boo lelipepwiki nakanopi, kumpwagi mundu jojulei hajo, ‘Gulekakiwi mahakau gaku,’ au kupwaga, ‘Jumuka! Jukua lipega laku gujenda’? 10 Nala, mbala mmanya ana Mwana waka Mundu jubii nu uwesu wa kwaalekake bandu mahakau gabu pundema." Ndii ampwagila mundu jojulei we jola, 11 "Nugupwaagi, jema, jukua lipega laku, gujenda kunyumba jaku!"

12 Bandu boa pababia atenda kundingali, mundu we jola jajumuka, jajukua lipega laki nu kuboka. Bandu boa batenda kusangaa koni andumbalii Sapanga koni bakapwaga, "Ngasituwahiki kulibona lijambu ngati ele!"

Yesu andamisa mundu jojulei kuboka

1 Yesu jajingala kabee mu nyumba jukuketangane Ayaudi, nu nkati je mola jwabii mundu jokulei kuboku. 2 Momuje, bandu bangi batenda kundingali jombi anndamisa mundu we jola Lisoba lu Kupomulela bapala apata ndela jukuntaki. 3 Yesu ampwagila mundu jokulei kuboku jola, "Hikaa palongi pamba." 4 Henu Jaalalukiya, "Boo sakaka lee Lisoba lu Kupomulela kuhenga lijambu la sape au lalyaa, kunzangatii mundu au kunhumisa? Kunhokoo mundu au kunkoma?"

Lakini bombi ngasibapwagiki sindo. 5 Yesu jaalingaliya bandu boti kwi ingwinya nukugubona usungu ndaba mioju jabu ngasebapai anzangatya mundu jola. Ndipala ampwagila jojulei kuboku jola, "Nyosha kuboku!" Najombi ejanyosha kuboku kwaki kola kwatenda kulama.

Yesu andamisa mundu jojuleliki

12 Yesu ejabi musi gumu, kati ja misi ja hoku, jahika mundu jumu jojuleliki nhyega joti. Nngonzu we hoju eambona Yesu, jahabuka sukunzinamii, nukundoba Yesu, "Bambu, nagupai guwesa kunyambisa."

13 Yesu janyoosha kuboku, angusa nukupwaga, "Mbala! Gunyambisika!" Apalapa kuleleka kwatenda kumboka.

18 Apalapa bandu bangi bahika antogwi mundu jumu jojulei angoniki pu mpandu, bapala kunzingi nkati ili bummbeka palongi jaka Yesu. 19 Lakini ndaba ju nsambi wa bandu, ngasebawesiki kunzingi nkate. Ndienu, bakwela panani ju nhagaa bahotula lihotu likolongu punhagaa nukunhulu jojulei we jola pikilanda ja bandu nukumbeka palongi jaka Yesu pamu nilipega laki. 20 Yesu ejukubona kuhobale kwabu, ampwagila mundu jojulei, "Nkosiwango, gulekakiwi mahakau gako."

21 Abola ba malagalaki na Afalisayu batumbulya kulilaluki beni, "Boo, hajo mundu bo joantondo Sapanga? Nya jojuwesa kulekake bandu mahakao? Sapanga kajika jojuwesa kwaalekake bandu mahakau!"

22 Yesu jagamanyiki mawasu gabu, jaalalukya, "Nhwasali kike mmyoju jino? 23 Sa sekijojwiki, kupwaga, ‘Gulekakiwi mahakau,’ au kupwaga, ‘Jema gujendaje?’ 24 Ndienu, mbala mmanya Mwana waka Mundu jubi nuuwesu pundema ukulekake mahakau ga bandu." Papuje ampwagila mundu jojulei we jola, "Jema, jukua lipega laku gujenda kuyumba jaku."

25 Apalapa, mundu we jola jajema palongi jabu, jajukua lipega laki. Jajenda kunyumba jaki koni akundumbalya Sapanga.

Mundu junu kuboku kokulei

6 Lisoba lengi lu Kupomulela Yesu jajingala kubola mu Nyumba jukuketangane Ayaudi. Mu nyumba mola jabi mundu jojulei kuboku kwaki kwa malele. 7 Aka abola bangi Malagalaki na Afalisayu bapala apata kikopakale sukunkamuli Yesu. Henu babia andingali ngamaa ana andamisa mundu Lisoba lu Kupomulela. 8 Lakini Yesu jikimanyiki sebawasalya, ampwagila mundu jojulei kuboku jola, "Hika gujema pikilanda pamba." Mundu we jola jajema nukujenda kujema pikilanda. 9 Ndipala Yesu jaapwagila, "Nundaluki mwanganya, boo, mu Lisoba lu Kupomulela sapi le kuhenga lijambu la sapi au kuhenga lijambu lilyaa, kundamisa mundu au kunkoma?" 10 Jaalinga bandu boti bababi pala, ampwagila mundu we jola, "Nyoosa kuboku kwaku." Jahenga ngati Yesu eampwagila, nu kuboku kwaki kwatenda kulama.

Yesu andamisa ntumi juku nkolongu wa alonda juku Loma

1 Yesu pajajomula kupwaga majambu gala kwa bandu, jajenda ku Kapelinaumu. 2 Kokuje jabi nkolongu jumu jwa alonda makomi komi juku Loma, jojabi nu ntumi waki joampai ngani. Ntumi we hoju jutendika kulwala jahegalya kuwa. 3 Nkolongu we jola ejwajowana majambu gaka Yesu, jatuma aseja bakumu buku Uyaudi ajenda kundoba Yesu juhika kundamisa ntumi waki. 4 Ebahika kwaka Yesu bundobiki ngamaa, bapwaga, "Kye! Mundu hoju jupalika unzangatiya, 5 ndaba jombi jaapai bandu bitu najombi ndi jojutusengiki Nyumba jukuketangane Ayaudi."

6 Ndienu, Yesu jajenda pamu na bombi. Ejahegalya kuhika kunyumba jaka nkolongu hoju, nkolongu hoju jaatuma akakosi baki ampwagila Yesu, "Bambu, wing’alika kuika koni, ndaba nenga ngasembalika wenga kujingi nnyumba jango. 7 Ndaba nepani ngase mbalika hata kuhika kwako. Lakini pwaga pee lilobi, nu ntumi wa jwiitenda kulama. 8 Ndaba namweti kabee mipai ju ukolongu, mi na alonda pai jangu. Ana numpwagi jumu, ‘Jenda!’ Najombi jutenda kujenda, ana numpwagi jongi, ‘Hikaa!’ Najombi jutenda kuhika, ana numpwagi ntumi wangu, ‘Henga ase!’ Najombi jutenda kuhenga."

9 Yesu ejajoana ganiaga, jatenda kusangaa ndipala jugung’anumbukya nsambi wa bandu gogwabia gunzengalee, nukugupwagi, "Sakaka numpwaji ngasenumbweni mundu jwana hobale ngati jenze hata ku Izilaeli!"

10 Ndipala bandu be bala pabahika kunyumba juku nkolongu jwa alonda juku Loma bunketannya ntumi we jola julamiki.

11 Papuje jabii mmbomba jumu jojabii nikilombu sesundwalisa miaka komi na nane. Nngongu waki wabii gupendiki ngasejwabia juwesa kulinyosa. 12 Yesu paambona, ankema nuku mpwagi, "Nyongo gulamisiki ugonzu waku!" 13 Ndienu Yesu ambekila maboku gaki nyongo we jola nukundobe kwaka Sapanga, apalapa nngongu watenda kunyoka nuku tumbuli kundumbali Sapanga.

Yesu andamisa mundu nngonzu

1 Lisoba limu lu Kupomulela, Yesu jajenda kula posu ku nyumba jaka kilongosi jumu jwa Afalisayu, na bandu bababi pala batenda kunndingalaki ngamaa Yesu. 2 Mundu jumu jojubi nu ugonzu ukuimba nhyega jabii palongi jaka Yesu. 3 Yesu jaalalukiya abola bamalagalaki na Afalisayu, "Boo, Malagalaki gitu gatupwata gutupwagi tulamisa bandu mlisoba lu Kupomulela au ngasegutuluhuso?"

4 Lakini ngasebajibwiki sindo. Ndienu Yesu ankamula nngonzu jola nukundamisa nukunndeka jujenda.

Yesu jaalamisa bandu komi

11 Yesu pajabii mwindela kujenda ku Yelusalemu jwapetii mu mipaka juku Samalia nuku Galilaya. 12 Pajajingala mu kijiji simu, baketangini na bandu komi baa leliki, bajemiki sukutali, 13 bajamalya kwa sauti, "Yesu! Bambu! Utubonila ikia!"

14 Yesu ejaabona jaapwagila, "Nzendannya mukililangia kwaka agolu."

Pababi mwiindela bakajendaninya batenda kunyambisika. 15 Jumu wabu ejabona julamiki, jakelabukya kwaka Yesu, koni andumbali Sapanga suku jamalii. 16 Jililekala pai kulongi ja magolu gaka Yesu koni akunsengula. Mundu we hoju jabii juku Samalia. 17 Yesu jalalukya, "Boo, ngase mwalamiki lee mwa bandu kome? Boo bangi tisa bala abi kwako? 18 Boo, nga lee jongi jojukelabwiki ku ndumbali Sapanga ila nngeni jonzo pena?" 19 Ndienu Yesu ampwagila mundu jola, "Jumuka gujenda, kuhobale kwaku kugulamise."

Yesu andamisa nngonzu pilitanda

1 Pagapeta haga Yesu jajenda ku Yelusalemu ku tipati gangi ga Ayaudi. 2 Ku Yelusalemu kola, pambipi nu litanga lu kujingali pa musi gobugukema litanga lilikondoo labiya litanda likolongu la masi lebikikema kiebulania Betizata, litanda heli labiya ni indamba unhwano yunu ugolu. 3 Mwindamba ye mola batemi agonzu bingi, babi bangalinga na akilema na balei. 4 Boti babiya alendale masi gatimbulikana ndaba kila mala mtumi juku nani kwaka Sapanga jwahika kutimbu masi mlitanda. Mundu jokapi jojabi jwa kwanza kujingi mlitanda baada juntumi waka Sapanga kugatimbu masi, julamika ugonzu wokapi gojubinaku.* 5 Papuje jabii mundu jumu jojabii julehi muda wa yaka selasini na nane. 6 Yesu paambona nngonzu jola jugoni pala jamanyiki mundu jola jabii nngonzu jwa muda wa masoba gingi andalukiya, "Gupala lee kulama?"

7 Nngonzu jola ampwagila, "Bambu, nandi ngasemi na mundu jukunyingi mmasi kipindi masi egakuba agatimbwilini, kila enenga kujingi mundu jongi jundenda kunongule."

8 Yesu apwagila, "Jema ulitweka kipega saku gujenda." 9 Apalapa mundu jola jatenda kulama, jajukua, kipega saki nukutumbuli kujenda.

Lisoba le lela labiya Lisoba lu Kupomulela.

46 Ndienu Yesu jakelubuka kabee ku musi uku Kana gogubii ku Galilaya, pandu pajang’alumbua masi kuba divai. Kola jwabii kilongosi jwakabii na mwana nngonzu musi uku Kapelinaumu. 47 Kilongosi jola ejwajowana Yesu juhikiki ku Galilaya kuhuma ku Yudea, anzendila Yesu ahingamakiya jujenda akundamisa mwana waki jojabii lahilahi. 48 Yesu ampwagila, "Ana ngasembweni nginyuli na ndonduke ngauhobalele Sapanga."

49 Kilongosi jola ampwagila, "Bambo, nuguloba guhika kwangu kabula mwanawango ngasejuwile."

50 Yesu ampwagila, "Jenda pena mwana waku julamike!"

Mundu jola jaamua kuhobale lilobi laka Yesu lejwapwaga najombi jaamua kubuja. 51 Pajwabii mwindela jaketangana na atumisi baki bumpwajila, "Mwanawaku we mwomi!"

52 Jombi jalalukiya saa kike mwana wa pajatumbuliya kuba sapi, nabombi bumpwagila, "Jombi jalama saa saba lioba mutu." 53 Ndienu atati bala bakombuka muda ngati agolagola Yesu pabumpwajila, "Mwana waku julamike." Ndipala jombi na akakosi baki buhobaliya Yesu.

54 Heji ndi nginyuli jukusangasa ja pili jejahenga Yesu pajabiya juhuma ku Yudea jujenda ku Galilaya.

20 Mmbomba jumu jojuwe jabi nuugonzu ukujauka ku kipindi sa yaka komi ni ibeli, jahika munyuma jaka Yesu angusa lupeta lwi ingobu yaki. 21 Jilipwagila mmoju jaki, "Anangamwi pe ingobu yaki niitenda, kulama."

22 Yesu ejang’anumbuka jwatenda kummbona ampwagila, "Kamwali wangu ulikasa mwoju! Kuhobale kwaku kugulamise." Apalapa mbomba wejola jatenda kulama.

25 Kati jabu jabii mmbomba jumu jojubii nu ugonzu gukupita mwai kwa muda wa miaka komi ni mibele. 26 Mmbomba we oju jabia jung’aliki kwaka sing’anga bingi. Pamu jabia jujomwi mali gaki goa, ngasijapogalyaje jabia jijonzukeka kuba jiliya. 27 Mmbomba we hoju pajajoana Yesu jalamisa bandu, jilipekalakiya pu nsambi wa bandu kuhuma kunyuma, nukugusa ingobu jaka Yesu. 28 Jatenda hela, ndaba julipwagila mmwoju jaki, "Nanung’usiki tu ingobu yaki nibia namiki."

29 Apalapa kupita mwai we kwatenda kukotoka, najombi jilijoannya nhyega jaki julamike.

43 Muunsambi wa bandu gola, jwabi mmbomba jumu pikilanda ju unsambi wa bandu gola, jojuwe jwabi mmbomba junu ugonzu gukujahuka kwa miaka komi ni mibele, kabee jwabiya jutumi hindu yaki hingi kwaka sing’anga, nga mundu jojawesa kunndamisa. 44 Mmbomba we jola ampwata Yesu sumunyuma, nukugusa mu lupeta lwi ingobu yaki, apalapala ugonzu waki hukujahuka watenda kulama. 45 Yesu jalalukiya, "Kanono! Nya jojung’usike?"

Bandu boka batenda kukana. Petili japwaaga, "Bambu, nsambi wa bandu guguyongalwiti nukuguhinya."

46 Lakini Yesu japwaga, "Nemanyiki mundu jutei kung’usa, ndaba nilijowani makili gangu gandei kumbita." 47 Mmbomba jola pajilibona ngasejuwesa kulihiya, japitila koni jakabagaja sukujogopa. Jililekala pamagolu gaka Yesu. Ndipala japwaga pa bandu boha ndaba jukugusa ingobu jaka Yesu nu kulama. 48 Yesu ampwagila mmbomba jola, "Kamwali wango, kuhobale kwaku kugulamise. Gujenda sulukwali."

Kamwali jojuwii na nyongoo jumu

18 Yesu pajabiya jupwaga haga, kilongosi jumu Nhyahudi jwahika, anzinamiya nukupwaga, "Kamwali wangu juwii hesajeno, lakini gupepa koku, guhika kumbeke kuboku ili julama." 19 Yesu jajumuka nukumpwata na banafunzi baki batenda kupwata.

23 Ndipala Yesu jajingala mu nyumba jaka kilongosi jola. Na ejaabona bandu ajemba mapenenga na bandu bingi atenda kulobalake, 24 jaapwagila, "Mpitaniya kunza! Kamwali jonzo ngasejakuhike, ila jutei kugone pena." Lakini bombi batenda kunheka. 25 Lakini bandu pababiya baapiiki kunza, Yesu jajingala nkati ankamula kuboku kamwali jola, apalapa najombi jatenda kujema.

22 Papuje jahika mundu jumwa kilongosi jwa nyumba jukuketangane Ayaudi joankema Yailo. Ejumbona Yesu, ahegalya nu kungungamali, 23 andoba ngamaa koni jwakapwaga, "Kamwali wa nsoku jubii lailai. Gupepa koku tumboka, ukumbekila maboku gaku julama."

24 Ndipala, Yesu jaboka pamwa nabu. Bandu bingi ngamaa batenda kunzengale, babia atenda kuhinyahinya.

38 Hebahika kunyumba jaka kilongosi jwa nyumba jukuketangane Ayaudi jaka Yailo, Yesu jajoana atenda kujobalane, na bandu bakalela na malobalake gingi. 39 Ejajingala nkati, jaapwagila, "Ndaba jakii nntenda kujobalane nu kulela? Kamwali ngasijuwile jutei kugone pena."

40 Lakini bombi batenda kun’heka. Jaamua kapia boti kunza, jajukua amabu na ahengo baka kamwali we naaka banafunzi baki atatu, bajingala kusumba kojabii jugoni kamwali we. 41 Ndienu ankamula mukuboku nukumpwagi, "Talita kumi," maana jaki, "Wakamwali, nugupwagi gujumka!"

42 Apalapa kamwali jajema nukutumbuka kujenda. Kamwali we jabii na miaka komi ni mibele. Hapa ndi bandu basangia ngamaa.

31 Yesu jaendaliya kupwaga, "Boo! Bandu bikibeleku senze alengana na kike? Alengana na sindu bole? 32 Alengana ngati bana baabii kugulio. Akemana beni na beni. ‘Tunzembi mapenenga, lakini ngasemwahiniki! Tunzembi mihambu ja malelu, lakini ngasemwaleile!’ 33 Ndaba Yohana Mmbatisa jahikiki, jukubika jupunga kula wala ngase jukunywikaje, nanamu mwapwaga, ‘Yohana jubi ni ilombu!’ 34 Mwana waka Mundu juhikiki, jukula na kunywa, nanamu mpwaga, ‘Mundu jonzo jukula ngamaa na julobe ngamaa, nkosi jwa bandu baajopa kodi na baabi na mahakau!’ 35 Lakini malangu gaka Sapanga galangi sakaka kwa bandu boka babunzetaki."

Yesu munyumba jaka Simoni mfalisayu

36 Mfalisayo jumu ankokiki Yesu kula posu ja pakamii kunyumba jaki. Yesu jajingala ku nyumba jaka Mfalisayu we hoju, nukutama kula posu. 37 Pa musi je pala jabii nyongo jumu jwana mahakau. Ejwajowana Yesu jukula mu nyumba jaka Mfalisayu hoju, mmbomba jahika nilisupa lebalenganaki kwa malibu ga alabasita lelabii na mahuta gaganungii sapi.

41 Ndienu jahika mundu jumu joakema Yailo, jojabii kilongosi jwa nyumba jukuketangane Ayaudi. Jililekala mwamagolu gaka Yesu, andoba jujenda kunyumba jaki, 42 ndaba kamwali waki wa kajika, jwana yaka komi ni mibele, jwabiya juhegale kuwa.

Yesu ejwabiya jutenda kujenda, nsambi wa bandu gwatenda kunhinya pandi yoka.

49 Yesu pajabiya jakoni jakalongela, jahika ntenga kuhuma ku nyumba jaka Yailo. Ampwagila Yailo, "Kamwali waku juwile, ndaba jaki kunsumbu Mmbola?"

50 Lakini Yesu ejwajowana ganiaga apwagila Yailo, "Gwijogopa, we guhobaliya pena, na mwana waku mbaka julame."

51 Yesu pajahika kunyumba jaka Yailo, jaakana bandu biijingi nkati pamu najombi ila ajingala pe Petili na Yohana na Yakobu na amabu na ahengo baka kamwali we jola. 52 Bandu boka babiya bakalela nukulobalake ndaba jaka kamwali jola. Lakini Yesu jaapwagila, "Mwilela, ndaba kamwali ngase juwile ila jutei kugone pee."

53 Bandu boti bunheka Yesu ndaba babia amanyiki kamwali jola juwii. 54 Ndipala Yesu ankamula kuboku kamwali jola nukumpwaagi, "Mwanango, jumuka!" 55 Kamwali jola womi waki unkelubukiya kabee, apalapa jatenda kujumuka. Ndipala Yesu jaaloba bumpekia posu kamwali. 56 Ahengo na amabu baki basangii ngamaa, lakini Yesu jaakanakiya bampwagi mundu jokapi sekipitii.

Kua kwaka Lazalu

1 Mundu jumu jobunkema Lazalu, mwenei juku Betania, jwabii nngonzu. Betania sabi kijiji sejutamika Malia nu nndombu waki Maluta. 2 Malia ndi joampakia Bambu mahuta gaganungi mumagolu gaki nukunhungu na majunzu gaki. Kaka waka Malia joakemika Lazalu ndi jojwabia jutenda kulwala. 3 Ndienu, Malia na Maluta baatuma malobi kwaka Yesu kupwaga, "Bambo, nkosi waku jutenda kulwala!"

4 Yesu pajwajogwa jwapwaga, "Ugonzu hogu nga gukukoma ila guhikiki ndaba guleta ulumbi kwaka Sapanga, julwala ili kupete ugonzu wee hogu Mwana waka Sapanga julumbalika."

5 Yesu jwaapai ngamaa Maluta na Malia na kaka wabu Lazalu. 6 Pajapata malobi gu ugonzu waka Lazalu, Yesu jwaendalia kutama koku kwa masoba gangi mabeli. 7 Ndi jaapwagila banafunzi baki, "Tujendaniya kabee ku musi uku Yudea!"

8 Banafunzi bumpwagila, "Mbola, kipetiki kipindi pe kisokopi toka Ayaudi pabapala kugukoma kwa malibu, gupala kabee kujenda koko kabee?"

9 Yesu jwaajibwa, "Boo, masaa ga lyoba mutu nga komi na mabeli pee? Mundu hejujenda lyobamutu ngajuwesi kulikobando ndaba jugubona unang’anu upundema goni. 10 Lakini mundu na jujenda ikilu jutenda kulikobando, ndaba ikilu ngasekukuba nunang’ano." 11 Yesu pajwajomula kupwaga malobi gala, jwaapwagila, "Nkosi witu Lazalu jutei kugonela, lakini nepani niijenda kunnzumu."

12 Banafunzi baki bumpwagila, "Bambo, ana jutei kugone pee mbaka julame."

13 Bombi bawasalya jupwagiki jugosi lugonu, lakini Yesu jwabi julongale Lazalu jutei kuwa. 14 Ndi, Yesu jwaapwagila hotuhotu, "Lazalu jutei kuwa,

Yesu jagalakali majeba

23 Yesu pajajingala munhwatu banafunzi baki batenda kumpwata. 24 Apalapa, gapitila majeba makolongu munhanga na masi gatumbuliya kuguyekale nhwatu. Lakini Yesu jabiya jugosi lugonu. 25 Banafunzi baki bunzendila, bunzumua nukupwaaga, "Bambu, utuokuaje tutenda kuwa!"

26 Lakini Yesu jwaapwagila, "Mwabandu bini lihobale lisokopi mwanganya, ndaba jaki ntenda kujogopa?" Ndienu, jajumuka jagalakaliya majeba makolongu gala nu nhanga gola gwatuli nuu.

27 Banafunzi baki basangi nukupwaga, "Jonioju we mundu bole? Hata unhwai na majeba gatenda kunzoanela!"

15 Ekwahika pakamii, banafunzi baki bunzengaliya, bumpwagila, "Pandu pamba pulukoba, na lyoba lijingi, waleka bandu abokannya ili bakalomba posu mwijiji."

16 Yesu jaapwagila, "Lakini nga lasima kuboka, mwanganya mwabeti mwaapekia poso."

17 Lakini bombi bapwagila, "Tubii na mabumunda nwanu na homba ibeli pena."

18 Yesu jaapwagila, "Nnetila pambane." 19 Jalagalakiya bandu atamannya pai pamanyoi. Jajukua mabumunda gala nhwanu na homba ibeli yela, jalinga kunani kwaka Sapanga, nukunsengula Sapanga. Jasekula mabumunda gala nakaapeke banafunzi baki nabombi babagila bandu. 20 Bandu boti bakula, nukutupi. Ndipala banafunzi batondula ipandi ya posu yeyaigali, batwelakiya itonga komi ni ibeli. 21 Akanalomi babakuliki baiki elupu unhwano bila kabalanga aka mbomba na bana.

25 Ekwahegaliya kusa, Yesu jaajendila banafunzi baki koni jubii panani ja masi.

Yesu jwaapeke posu nsambi gongi wa bandu

32 Yesu jaakema banafunzi baki nukupwaga, "Naabone ikia bandu haba, ndaba abii na nepani kwa masoba matatu, na ngaseabi na poso. Ngasembala kwaaleka ajenda bila kula ndaba awesa kuhinduka mwiindela ninzala."

33 Banafunzi baki bundalukiya, "Pamba tubi kulungwenza, twiipata kwaa posu jukutupi bandu bingi ana?"

34 Yesu japwaga, "Mmbi na mabumunda galenga?"

Bajibwa, "Saba nutuhomba tusokopi tusokutusoku."

35 Yesu jwalagalakya banafunzi baki baapwagila bandu atama pai. 36 Jwajukua mabumunda gala nutuomba tola, ansengula Sapanga nu kunuku, nakwaapeke banafunzi baki nabombi baabagila bandu. 37 Boti bakula nukutupi. Ndienu banafunzi baki batondula ipandi yeiigali, batwelakia itonga saba yeyatweli posu jejahigali. 38 Babakula babia akanalomi elupu nsesi bila kwaabalanga aka mbomba na bana.

Kulepa kodi ja Nyumba jaka Sapanga

24 Yesu na banafunzi baki pabahika ku Kapelinaumu, bandu bababia ajopa kodi Nyumba jaka Sapanga bunzendila Petili nukundaluki, "Boo, mbola waku julepa kodi ja Nyumba jaka Sapanga?"

25 Petili jwajibua, "Helo, julepa."

Petili pajwajingala mu nyumba, kabula ngasejupwajiki lilobi, Yesu jatumbuliya kumpwagi, "Wa Simoni gubona boo? Aka bambu akolongu bupunndema ajopa ushulu na kodi kuhuma kwaka nyane? Kuhuma kwa benei au kwa agene?"

26 Petili jwajibwa, "Kuhuma kwa ageni."

Yesu jwapwaga, "Gupwajiki sapi, benei ngaseapalika kulepa. 27 Lakini ngasetupalika kwaajege inyela bandu haba. Jenda kunhanga, wakalekala ndoana jaku, na homba ja kwanza jegulonguli kulopo, ukananungula nndomu waki ndipala ukijiketaniya lupija nkati. Wiijukua lupija lola ili wakaalepa kodi jaku na kodi jango."

Yesu jugulapi mbamba nkongu gu ntini

18 Pulukela ngani Yesu pajwabi jubuja ku musi, jummbina inzala. 19 Juubona nkongu wu ntini gumu pulutengu jiindela, juujendila lakini juuketanya ngasegubi na sokape ila pe mahamba matopu. Ndii juupwagila, "Wiibeleka kabee matunda masoba goti!" Apalapa nkongu wo ntini gola gwatenda kunyala.

20 Banafunzi pababona basangi nukupwaga, "Nkongu ago gunyaliki boo nyatanyata?"

21 Yesu jwapwaga, "Numpwagi sakaka, ana mwikuba ni lihobale bila lujogopu, unhuwesa kuhenga nga pe seehengiki mu nkongu ago pena, ila hata na mukipwagi kitombi ase, ‘Tupuka ulilekala munhanga,’ kwiihengika ahelahela. 22 Ana mbi nilihobale, sokapi semwiloba kwaka Sapanga mwiitenda kupata."

37 Ndienu sasuma kimbonga kikolongu, na majeba kutumbuli kugukanga nhwatu we gola, nunhwatu gola gwatumbulya kutwele masi. 38 Yesu jabii kunyuma junhwatu, jagoni panani ju ntoo. Banafunzi baki bunzumua nukumpwagi, "Mbola, ngasegubona lee usungu etukuwa!"

39 Jajumuka nu kukilakali kimbonga se sela, nakagalakali majeba guku nhanga ge gala japwaga, "Tama kinunu!" Ndipala kimbonga se sela satenda kukotoka, ndienu kwabia nuu. 40 Ndienu, Yesu jaapwagila banafunzi baki, "Ndaba jakii ntenda kujogopa? Mwakona lee ngase nhobalela?"

41 Nabombi babia ajogopa ngamaa. Babia alaluana, "Jonioju we nya eno? Mbaka kimbonga na majeba gatenda kunzowanela?"

35 Pakamii ekwahika, banafunzi bunzendila Yesu, nukumpwagi, "Pandu je pani pulukoba, na sajenu kutenda kupilila. 36 Nambanga, waatabuka bandu be haba ajendannya mwamatui nu kwiijiji ya pambipi, bakalomba posu."

37 Lakini Yesu jaapwagila, "Mwapekya mwanganya posu."

Na bombi bundalukiya, "Boo, twapekya kike? Tupalika tuhenga mahengu kwa miehi jingi ili tupata lupija lukulombe posu ja bandu boti haba."

38 Yesu jalalukiya, "Mmbii na mabumunda malenga? Nzendannya mwakalinga."

Pababia alingiki, bumpwagila, "Gabii mabumunda nhwano na homba ibele."

39 Ndienu Yesu jalagalakya banafunzi baki, baatamika bandu boa malundu ga bandu pamanyonyoli. 40 Na bombi batama malundu ga bandu makomi komi na makomi nu nhwano. 41 Ndipala Yesu jajukua mabumunda nhwanu na homba ibeli ye yela, jalingaliya kunani kwa mahundi, jagapengaliya, nukunuku mabumunda, japekiya banafunzi baki babagila bandu. Na homba ye yela jabagila boti. 42 Bandu boa bakula, nukutupila. 43 Batondula posu yeyaigali ya mabumunda na homba batwelakiya hiitonga komi ni ibele. 44 Nababa kula be mabumunda ge gala babia akanalomi elupu nhwanu.

48 Apalapa, jaabona banafunzi baki bakaangijika kukwabu masi, ndaba je nhwai wabia gutenda kwapengale. Ekwabia lukela, Yesu jaajendila banafunzi baki koni jakajenda panani ja masi, japala ngati kwaapeta. 49 Lakini pabumbona jujenda panani ja mase, bahambukya lihoka, batenda kujamali. 50 Ndaba boa pabumbona bajogipi ngamaa.

Apalapa Yesu jalongila nabu, "Nabi nepane! Mwijogopa! Ntama nuu." 51 Ndi jakwela munhwatu mobabii, nu nhwai gwatenda kukotoka. Nabombi basangii ngamaa,

Yesu jalea posu bandu elupu nnsesi

1 Masoba gala, nsambi wa bandu waketangini kabee, na ngasebabii na posu. Ndienu Yesu jaakema banafunzi baki, nakaapwaagi, 2 "Naabonee ikia bandu haba ndaba abii nane masoba matatu, wala ngaseabii na posu. 3 Ana naalei ajendannya kunyumba, koni abii ni inzala biinduka mwiindela, ndaba bangi ahumiki kutali."

4 Banafunzi baki bundalukya, "Pamba jee pulukoba twiipata kwaa mabumunda gukutupii bandu boa haba?"

5 Yesu jaalalukya, "Boo mmbii na mabumunda malenga?"

Nabombi bapwaaga, "Saba."

6 Ndipala, jaamulisa bandu atama pai. Jwajukua mabumunda saba gala, ansengula Sapanga, nukuseku, nakaapekee banafunzi baki baabagila bandu, nabombi batenda kwaabagii. 7 Babii kabee na homba isokuisoku. Yesu ansengula Sapanga, na kwaamulisa baabagila kabee bandu. 8 Bandu bakula, nukutupi. Banafunzi baki bakusanya ilebi yeyahigali batwelakya itonga saba. 9 Nabombi babalii mabumunda babii ngati bandu makomi nnsesi komi. Ndipala Yesu jwaamua kwaatabuka,

Yesu juguliga nkongu nkoju

12 Kilabu jaki, pababia ahuma ku Betania, Yesu jummbina inzala. 13 Ndienu, jugubona sukutali nkongu wu ntini wana mahamba gingi. Jugujendila jugubona ana gubii nili tunda lokapi. Pajuguhikila, juguketanya ngasegubii ni litunda lokapi ila mahamba matopu, ndaba ngasiwabia muda hukupapa. 14 Papuje jugupwagila nkoju we gola, "Kutumbuka leleno nga mundu jojikula matunda gaku kabee."

Nabombi banafunzi baki bajoa malobi ge haga.

Mabolee gunkongu gogunyalike

20 Lukela ngani, pababia atenda kupeta bugubona nkoju we gola gunyaliki ngani, kuhumi mikega mbaka kulubekubeku. 21 Petili jugukombuka, ampwagila Yesu, "Mbola, linga! Nkongu we gola gouguligila, gunyalike!"

22 Yesu ampwagila, "Munhobalya Sapanga. 23 Numpwagi sakaka, mundu najikipwagi kitombi ase, ‘Tupuka ukililekala munhanga,’ Bila kujogopa mmyoju jaki, ila anajuhobali majambu goka gajupwagiki gahengeka, sakaka litenda kuhengeka kupete Sapanga. 24 Henu numpwagii, pansali nukuloba sindu, nhobaliya oti mukijopiki, nanamu mwitenda kupata. 25 Panzema kusali, nukuloba sindu, mundekakya kila mundu jojunkosii sokapi, na Atati binu bababii kunani bandekakiya mahakau gino.

Yesu jaakema banafunzi bu uhwanzu

1 Lisoba limu, Yesu jabiya jujemiki pulutengu juhanga uku Genesaleti na papuje bandu batei kuntwelale koni babiya anyongaliti, bajoannya Lilobi laka Sapanga. 2 Jijibona minhwatu jibeli mulutengu ju nhanga, jebijileka alobo homba bababia abokani apiti kutabulana ilepa yabu. 3 Yesu jajingala munhwatu gumu waka Simoni, ampwagila Simoni juhegakya nhwatu kuhuma mulutengu ju nhanga mbaka mmasi. Ndipala jatama pai nukugubola nsambi wa bandu koni jubi munhwatu.

4 Pajajomula kubola, ampwagila Simoni, "Gukanga nhwatu we hogu mbaka papanyoliki ndienu wakalekala ilepa yaku mmasi gulopua homba."

5 Simoni ampwagila, "Bambu! Tuhengiki lihengu likolongu le heli kelukelu bila kupata sindu sokapi. Lakini ndaba gupwagi wehapa, nyenda kuleke ilepa mmasi." 6 Balekala ilepa yabu mmasi na balopwi homba hingi ngamaa, mbaka ilepa yabu yatumbulya kujenduka. 7 Henu baakema ajabu bababi mu nhwatu gongi ahika kwaajangati. Bahika, batwelakiya minhwatu joti mibeli homba mbaki yapala kuhobe mmasi. 8 Simoni Petili ejagabona ganiaga, ampegila magoti Yesu koni jakapwaga, "Bambu boka palongi jangu ndaba nepani mii na mahakau!"

9 Simoni pamu na ajaki boa basangia ndaba ja homba hingi yebalopula. 10 Yakobu na Yohana bana baka Zebedayu, bababii aloi ajaki Simoni batenda kusangaa ahelahe. Yesu ampwagila Simoni, "Wijogopa, tumbuka sajenu nukuendele nagutenda gubia waaleta bandu kwangu ngati ewabii gulobo homba nukupeleka kunyumba."

11 Ndienu, pabaleta pe minhwatu jela pulutengu ju nhanga, bagaleka goti, nukunzengale Yesu.

Yesu julakali majeba gatulia

22 Lisoba limwa Yesu jakwela munhwatu pamwa na banafunzi baki na kwaapwagi, "Tulombuka tujenda kwii junhanga." Ndipala, batumbulya sapwali. 23 Ebabiya mwindela, Yesu jagosila lugonu. Apalapa kimbonga kikolongu satumbuka kupoga mu nhanga, masi gatumbuka kujingi nkati ju unwatu, boti baegaliya kuwa. 24 Banafunzi bunzendila Yesu nukunzumu nu kumpwaji, "Bambo, Bambo! Tutenda kuwa!"

Yesu jajumuka nu kukilakali kimbonga se sela na majeba ga masi, nayombi yatenda kukotoka. Nunhanga watulia nuuu. 25 Ndienu Yesu jaalalukiya banafunzi baki, "Kuobale kwii kubi kwako?"

Lakini bombi basangii, bajogopa koni bakapwaganya, "Boo! Jonujuwe nyanye? Mbaka jikilakali kimbonga na majeba nayombi itenda kunzowanela!"

Yesu julakali majeba gatulia

22 Lisoba limwa Yesu jakwela munhwatu pamwa na banafunzi baki na kwaapwagi, "Tulombuka tujenda kwii junhanga." Ndipala, batumbulya sapwali. 23 Ebabiya mwindela, Yesu jagosila lugonu. Apalapa kimbonga kikolongu satumbuka kupoga mu nhanga, masi gatumbuka kujingi nkati ju unwatu, boti baegaliya kuwa. 24 Banafunzi bunzendila Yesu nukunzumu nu kumpwaji, "Bambo, Bambo! Tutenda kuwa!"

Yesu jajumuka nu kukilakali kimbonga se sela na majeba ga masi, nayombi yatenda kukotoka. Nunhanga watulia nuuu. 25 Ndienu Yesu jaalalukiya banafunzi baki, "Kuobale kwii kubi kwako?"

Lakini bombi basangii, bajogopa koni bakapwaganya, "Boo! Jonujuwe nyanye? Mbaka jikilakali kimbonga na majeba nayombi itenda kunzowanela!"

Yesu andamisa mundu jwinikilombu

26 Yesu na banafunzi baki baendaliya na sapwali, bahika kumbwani uku nndema uku Gelasi, jejibii kwii junhanga uku Galilaya.

12 Palajingala lyoba, banafunzi komi na abeli bala bunzendila Yesu nukumpwagi, "Waapwagila bandu haba ajendaninnya kwijiji ya pambipi na kwamatui bakataputa posu na pandu pukugone, ndaba pamba je pulungwenza."

13 Lakini Yesu jaapwagila, "Mwaapekia mwanganya poso akulaje."

Nabombi bunzibua, "Twepani tubii na mabumunda unhwano na homba ibele pena. Boo gupala lee tujenda twabeti twakaalombila posu bandu behaba?" 14 Papuje babii akanalomi ngati elupu unhwano.

Yesu jaapwagila banafunzi baki, "Mwapwagila bandu beaba atama malundumalundu ga bandu makomi nhwanu."

15 Banafunzi baki batenda ngati ejaapwagila, na bandu boti batama pai. 16 Ndipala Yesu jajukua mabumunda unhwanu na homba ibeli yela, jalingalya kunani kwaka Sapanga kwaka Sapanga, nukuipengee. Ndienu janukula mabumunda nahomba, nakaapeke banafunzi baki baabagila bandu. 17 Bandu boha bakula, nukutupi. Na banafunzi baki batondwi makombu gagaigali itonga yeyatweli komi ni ibeli.

Bandu atogule ndoa ku Musi uku Kana

1 Lisoba la tatu kwabia nu kutogule ndoa ku Musi uku Kana, ku nkoa uku Galilaya. Amabaka Yesu nabombi babii, 2 najombi Yesu babii bunkokiki ku kutogule ndoa pamu na banafunzi baki. 3 Divai ejajomuka, amabaka Yesu bumpwagila, "Ngaseabi na divai!"