1 Ntumi jukunani jwaboka ku Giligali kujenda ku Bokimu na kwaapwagi Aizilaeli, "Numpia mu nndema uku Misili nu kunndeta ku nndema gonaalagila akahoku binu sukulapa. Napwaaga ‘nga niitunu hata kulenga lilaganu langu lemei pamu na mwanganya. 2 Na mwanganya mwiihenga lilaganu na bandu bu nndema gongo ila mwiibombula mesa yukupiiki matambiku yabu.’ Lakini mwanganya ngase mwanyetaki nepani. Ndaba jaki nhengiki lijambu hele? 3 Henu numpwagi ana, nga naabengi kabe benei baatama mu nndema gongo aboka kwinu ila biibia kikobando kwinu, nanamu mwailumbalia isapanga yabu." 4 Ntumi jukunani pajwajomula kwaapwagi haga Aizilaeli boti, bandu haba batumbulia kulela sukujamali ngamaa. 5 Bapakema pandu pala Bokimu mana jaki kilelu. Nabombi bumpiikia Bambu Sapanga matambiku gukutinii.

6 Joshua jaatabuka Aizilaeli, kila jumu jwajenda pandu paki pabumpeki pabia paki.

7 Masoba goti Joshua pajabia mwomi, bandu buku Izilael baendalia kuntumaki Bambu Sapanga. Masobagoti gababia atama akakilongosi bababia ahigali na bababia bagabweni mahengu makolongu gaka Sapanga gajwaahengi Aizilaeli. 8 Joshua mwana waka Nuni, jojuwe ndi ntumisi waka Bambu Sapanga jwakuwa koni jubii na yaka mia jimu na komi. 9 Buntaga ku nndema waki, ku musi uku Timuna Helesiku mu nndema gogubi ni itombi juku Efulaimu ku kasikazini ku nndema uku Gaashi. 10 Kibeleku soti sela satei kuwa, ni kibeleku sesapwatila ngasesummanyiki Bambu Sapanga wala mahengu gaki gajwaahengi bandu buku Izilaeli.

11 Ndienu Aizilaeli bahenga majambu gilia palongi jaka Bambu Sapanga na kwiilumbambali isapanga yengi yebiikema Baali. 12 Bakotuka kunndumbali Bambu Sapanga, Sapanga wa atati babu, jojwabia jwaapiiki mu nndema uku Misili. Baamua kuipwata nu kuilumbali isapanga ndalindali yu nndema yeyaayongolota. Ndienu bunhenga Bambu Sapanga juyoma, 13 ndaba bunndeka jombi nu kundumbali Baali na Maashitoleti. 14 Ndienu Bambu Sapanga jaayomila bandu buku Izilaeli, kabee jwagaleka majangili gaanyaga mali gabu. Jwaakabisa kwa abaja babu babayongaliti na ngasebawesa kabee kwaalenda. 15 Kila pabajenda kukomana, Bambu Sapanga jakotuka kwaajangati kwa makili gaki na kwaalete mang'aliku ngati ejabiya jwaalakali na kwaalapi. Nabombi babia nu usungu nu kuhangajika ngamaa mioju jabu.

16 Ndienu Bambu Sapanga jaahaguliya baatemu babube baokua mu ulongosi wa bandu bababiya baanyagiki mali gabu. 17 Lakini ngasebaajowana hata aka kilongosi haba babaakema Ahamusi, sukundeka Sapanga nukulumbali isapanga yengi. Bang'anambuka nu kuileka indela yebabia apwata akahoku babu, yani indela yukuijetake miilu jaka Bambu Sapanga. 18 Kila kipindi Bambu Sapanga pajwaapekia mundu jukutemu Bambu Sapanga jwabia pamu na mundu hoju, najombi jwaahokula kuhuma mu ulonda wa abaja babu ku kipindi soka sejwabia punndema jojutemu jola. Bambu Sapanga jwaabonila ikia ndaba kulela kwabu ku usungu kwabia kutenda kwang'alisa na kwaajima sebapalika kupata. 19 Lakini kila jojutemu kipindi pajukuwa, bandu bakelabukia majambu gabu ga mwandi atamika su ubaja kupeta akatati babu. Biipwata isapanga yengi biitumakiya nukuigungamali wala ngasebakotwiki mahengu gabu gu ubaja. 20 Ndienu Sapanga jwaayomila ngamaa Aizilaeli nukupwaga, "Kwa ndaba bandu haba atunwii Lilaganu lenahenga na akatati babu na ngasebanyowani, 21 nepani nganaabengi bandu bu nndema gongo bajwaaleka Joshua kabula ja kuwa. 22 Naatumia bandu bi milema jengi heji kwaalenga Aizilaeli ili mona ana mbaka bijikelubuki indela jangu ngati akahoku babu au boo." 23 Ndienu Bambu Sapanga jwabia jwaaleka bandu bi milema jengi jela wala ngasejwaabenga kanyata wala ngasejajetaki Joshua jaawesa.