1 Ku Gileadi kwabii na nkomana ngondu jwana makili jobunkema Yefuta, mwana waka nyongo jumu jojutenda ugoni, atati baki bunkemika Gileadi. 2 Gileadi jwabia kabee na bana bangi kuku nhanu waki. Bana baka mmbomba hoju pababia akolongu bummbenga Yefuta kuhuma kunyumba, bumpwagila, "Wehapa ngasegubii na haki jukupata ulisi kuhuma kwa atati bitu ndaba wehapa wamwana ukumbomba jongi." 3 Ndi Yefuta jwaatila alongu baki nukujenda kutama ku nndema uku Tobu. Hoku bandu biliya bajongana najombi, bumpwata mu sapwali jaki.

4 Mwenikatai, bandu bi likabila la Ahamoni baalapula Aizilaeli. 5 Pakwapitila hela, aseja buku Gileadi bajenda kunndeta Yefuta kuhuma ku nndema uku Tobu, 6 bumpwagila, "Ika gutulongua mu ngondu jitu na Ahamoni."

7 Lakini Yefuta jwaapwagila aseja buku Geliadi, "Boo, nga mwanganya le mo mwanzukila mbaka mwamenga kunyumba ja atati bango? Ndaba jaki nhiki sajenu koni mbii mu mang'aliko?"

8 Aseja buku Gileadi bala bumpwagila, "Hena tugusukile lakini heno tugupwatiki ili gujenda natwepani kukomana na Ahamoni, na wehapa wiibia kilongosi witu na jwa bandu boti buki Gileadi."

9 Yefuta jwaapwagila aseja baka Gileadi, "Ana nngelabwi kunyumba nakakomana na Ahamoni na Bambu Sapanga junyangati kwaawesa, boo, mwijetakia lee nepani mia kilongosi wino?"

10 Aseja buku Gileadi bala bumpwagila Yefuta, "Bambu Sapanga jubona nukujowana gatulonge. Sakaka twiihenga ngati hegupwagiki." 11 Yefuta jwalongana na Aseja buku Gileadi na bandu bunhenga kuba kilongosi wabu nu nkomana ngondu nkolongu. Yefuta jwapwaga miilu jaki joti ku Misipa kola palongi jaka Bambu Sapanga.

12 Ndienu, Yefuta antuma mundu kwaka bambu nkolongu Amoni kumpwagi, "Gubi ni milomu boo, na twepani mbaka guika kunapu mu nndema wango?"

13 Bambu nkolongu jwa Amoni jwaajibwa bandu bala, "Aizilaeli pabahika ku Misili bajukua nndema jangu kutumbuli ku losi lwa Amoni mbaka ku losi lwa Yaboki na losi lwa Yoludani. Henu gungelabukia nndema we hogu ku lukwali."

14 Yefuta jwaatuma kabee bandu kwaka bambu nkolongu juku Amoni, 15 mukumpwagila, Yefuta jupwaga, Aizilaeli ngasebajukua nndema wa Amoabu wala nndema wa Aamoni. 16 Lakini Aizilaeli pabauma ku Misili, bapeta kulukoba bapetila ku nhanga uku Shamu nu kuhika ku Kadeshi. 17 Ndi Aizilaeli baatuma bandu kwaka bambu nkolongu juku Edomu kunndoba jwaalekakia kupeta mu nndema waki, lakini bambu nkolongu juku Edomu jwatenda kukana. Ndi bunndoba luusa bambu nkolongu juku Moabu najombi kabee jwatenda kukana. Ndi Aizilaeli baigalia ku Kadeshi. 18 Ndienu bajenda mu sapwali kuyongalota nndema uku Edomu nuku Moabu mbaka pabaika upandi golipiti lyoba guku Moabu, babeka kambi kwii ja losi Alinoni. Lakini ngasebajingi lieneu luku Moabu, ndaba losi Alinoni ndi gowabia mpaka guku Moabu. 19 Ndi Aizilaeli baatuma bandu kwaka bambu nkolongu Sioni juku Amoli ku Eshiboni bunndoba jwaalekakia kupeta mu nndema waki ajenda ku nndema jabu. 20 Lakini Sioni ngasejwaalekakia Aizilaeli apeta mu nndema jaki. Ndi Sioni jwaakema bandu baki boti nukubeka kambi ku Yaasa, nu kukomana na Aizilaeli. 21 Lakini Bambu Sapanga, Sapanga jwa Aizilaeli jwaajangatia Aizilaeli kunndapu bambu nkolongu Sioni na bandu baki. Ndienu Aizilaeli bijijukua nndema joti ja Aamoli bababia atama homu. 22 Bilijukua lieneu loti la Aamoli kutumbuli losi ja Amoni mbaka ku losi Yaboki na toka kulukoba upandi wa kolipiiti lyoba mbaka losi Yoludani upandi wa kolijingi lyoba. 23 Henu Bambu Sapanga, Sapanga jwa Aizilaeli jwaabenga Aamoli koni Aizilaeli atenda kulingali. Boo, ndaba jakii, gupala kutunyaga nndema wiito? 24 Boo, ngasekupalika kujuku sindu sejukupeki kisapanga waku Kemoshi? Lakini nndema wokapi goguwe Bambu Sapanga, Sapanga witu, jwaabengiki bandu baki nu kutupeke twepani, nndema hogu mali jito. 25 Boo, guwasali wehapa gubii na makili kupeta Balaki mwana waka Zipola jojwabi bambu nkolongu juku Moabu? Jombi ngase jwalosana na Aizilaeli wala kukomana nabu. 26 Kwa yaka mia tatu Aizilaeli pababia atama mu musi uku Eshiboni ni ijiji yaki na musi uku Aloeli ni ijiji yaki pamu na misi yoti yeibii pulutengu na losi Alinoni, ndaba jaki ngaseugukombwi musi wegola kipindi sehesi? 27 Nepani ngase ngosi sindu na ndi mana guhenga likosa pagunapu. Bambu Sapanga jojutemu lelenu jwiitenda kutemu kati ja Aizilaeli na Aamoni. 28 Lakini bambu nkolongu jwa Aamoni ngase jwagahengi lihengu malaobi ga bandu bajwaatumiki Yefuta.

29 Ndienu Loho jaka Bambu Sapanga junhikila Yefuta, najombi jwaboka kupete ku Gileadi nuku Manase nu kubuja ku Mizipa mu nndema uku Gileadi nu kuendale kujenda kukomana na Aamoni. 30 Yefuta anndagila Bambu Sapanga sukupwaga, "Ana wiinyangatia kwaawesa Aamoni, 31 nala jokapi jojwiipita kunza kuhuma mu nyumba jangu kuhika kumbengana paniibia ndenda kubuja baada ja kwaawesa Aamoni hoju jwiibia jwaku wehapa Bambu Sapanga. Hoju nakupiikia litambiku lu kutinii." 32 Ndienu Yefuta jalombuka losi jakomana na Amoni, najombi Bambu Sapanga jwaajangatiya kwaawesa Aamoni. 33 Jwaawesa ngamaa, jwakamula misi ishilini gagabia ku Aloeli pandu papabia payonguliti Miniti na Abeli Kelamimu. Ndienu Aizilaeli ebaawesa Ahamoni.

34 Yefuta pajakelubuka ku nyumba jaki ku Mizipa, kamwali waki jaboka koni jutogule ili kunzopa koni juona kang'oma nukuhina. Jabiya mwana jwakajika, ngasejabii na mwana mwanalomi wala kamwali jongi. 35 Paambona jajendula ingobu yaki, jatenda kulela, "Waa kamwali wangu! Guhengiki nguba mia ni kihola nu kusoka ngani mwoju jangu ndaba nhengiki lilaganu na Bambu Sapanga lelule nganhwesi kulitunu."

36 Anzibua, "Atati bangu gupiiki lilobi laku kwaka Sapanga. Gunhengila ngati egunndagila Sapanga, ndienu guhenga ngati ewalapa, ndaba Bambu Sapanga juguhengiki gwaawesa abaja baku Aamoni." 37 Najombi jaapwagila atati baki, "Noba nhengila lijambu hale. Nepani mbekiya miei mibeli ili kuyongolota kwiitombi kulele ukamwali wangu nepani na ajangu." 38 Atati baki bumpwagila, "Guwesa kujenda." Najombi andeka jujenda kwa miei mibeli. Ndienu jaboka pamu na akakamwali ajaki, najombi jugulelila ukamwali waki kwi itombi ndaba ngasejawasali ngati jiikuwa sanga kutoguleka. 39 Ejapeta miei jibeli jela jakelubuka kwa atati baki, Yefuta jahenga ngati ejabiya anndagi Bambu Sapanga. Kamwali we hoju jabiya ngasejuwai kugone na mwanalomi.

Na bandu buku Izilaeli bayobali ana, 40 kila saka akakamwali buku Izilaeli bajenda kunndele kwa masoba nsesi ili kunkomboka kamwali waka Yefuta hoju jojabii mundu juku Gileadi.