1 Lisoba limu Samusoni jwahelala kujenda ku Timuna kokuje jwabia ammbweni mmbomba jumu Nfilisiti. 2 Pajwakelabuka kunyumba jwaapwagila ahengo na anyongo baki, "Nummbweni mbomba jumu Nfilisiti ku Timuna. Mwakanyukukiya jubia nhwanu wango."

3 Lakini atati na anyongo baki baapwaga, "Boo, ngasejubii mmbomba jokapi kati ja alongu baku au kwa bandu bangi mbaka gujenda ukajukua mmbomba kwa Afilisitije banga kummanya Sapanga?"

Lakini Samusoni jwaapwagila atati baki, "Nnyukukiya mmbomba hoju ndaba numpai ngamaa."

4 Ahengo baki na anyongo baki ngasebamanyiki kubanga hogu gwabia mpangu waka Bambu Sapanga gukutaputa indela jakwaalapu Afilisiti. Kipindi sehesi Afilisti babia balongosa koni baang'alisa Aizilaeli.

5 Samusoni na ahengo na anyongo baki baboka kujenda ku Timuna. Pabahika ku matui gi mizabibu, kahimba kamu kumpitila nu kuntulami Samusoni. 6 Ndi Loho jaka Bambu Sapanga junhenga Samusoni jubiya na makili, nukukapapu kahimba haka ngati mundu hejupapu kambui. Najombi Samusoni ngasejwaapwagila ahengo na anyongo baki lijambu heli.

7 Ndi jwahelala kujenda ku Timuna na Samsoni jwajenda kulonge na kamwali jola na kamwali jola anndengani ngamaa Samusoni. 8 Baada ja masoba kidogu jwakelabuka kabe ku Timuna kunnzuku kamwali jola. Pajwabia mu inndela jwagobuka pulutengu kugulingali ntui gwilihimba lela kumbi kwabia ni inzusi na busi nkati jaki. 9 Ndi jwapakula busi kwa maboku gaki ndi jwabia jukula busi gola koni juendale na sapwali jaki. Pajwakelabuka kwa Ahengo na anyongo baki jwaapeki busi kidogu nabombi batenda kula. Lakini ngase jwaapwagila ana jwapia busi wegola nkati ji liimba leliwii.

10 Ndienu, Atati baki bajenda kunyumba jaka kamwali we jola, najombi Samusoni jwahenga matola akolakopla ngati hebayobali kuhenga akakombu kipindi sehesi. 11 Afilisiti pabummbona Samusoni bunndetila aka kombu ajaki selasini atama pamu najombi. 12 Samusoni jwaapwagila, "Nunndaluki sindu. Ana nhwesiki kupwaaga maana ja sindu hesi mu masoba saba sa matola ja ndoa nampekia ingobu ya sapi nhuu selasini ni ingobu yengi selasini ya matola. 13 Lakini ana nsindwiki kutegu, mwanganya mwiimbekia ingobu selasini ihuu yeinyambiki ni ingobu selasini ya matola, Nabombi bumpwagila tupwagila sindu hesi ili tukijowana."

14 Samusoni jwaapwagila,

"Nkati ja jojukula, japita posu,

kwa jojubii na makili sapita sindu sekinoga."

Gapeta masoba matatu aka kombu bala ngasebawesa kupwaga maana ja sindu sela.

15 Lisoba lu nsesi bumpwagila nhwanu waka Samusoni, "Mpembalakia nndomi waku ili jutupwagila mana ja sindu sela, ana ngahela twagujosa mwotu wehapa na bandu ba nyumba ja atati baku. Boo, mutukoka tuhika pani ili mutunyaga mali gito?"

16 Nhwanu waka Samusoni anzendila Samusoni, koni maholi gatenda kumpita nu kumpwagi, "Sakaka gutenda kunzuki, ngasegumbala hata kidogu. Gwalaluki sindu alongu baa na ngasegumbeki maana jake."

Samusoni anzibua, "Nepani ngasenaapwagi hata ahengo na anyongo bango. Henu niiwesa boo kugupwagi wehapa.?" 17 Lakini jwaendalia kulela ku kipindi soti sesahigali mu masoba saba ga matola ga ndoa. Lisoba la saba Samusoni ampwagila nhwanu waki sindu sela ndaba jwaendalia kunndobalake ngamaa. Nhwanu waki jwajenda nyata kwaapwagi alongu baki. 18 Lisoba la saba kabula ja lioba kujingi, akakombu bala bumpwagila Samusoni,

"Sindu boo, sekinogiki kupeta busi?

Nya jojubii na makili kupeta liimba?" Samusoni jwajibua,

"Ana ngamunkongiki nsumba wangu,

nga mwakawesiki kukimanya sindu hesi."

19 Ndienu Loho waka Bambu Sapanga junhenga Samusoni kuba na makili najombi jwajenda ku musi uku Ashikiloni na kwaakoma bandu selasini, ndi jwajukua ingobu ya sapi ya matola na kwaapeke babapwaga mana ja sindu sela. Ndi jwaboka jwajenda kunyumba ja atati na anyongo baki koni jubii niinyela ngani. 20 Ndienu bumpekia nhwanu waka Samusoni, nkombu jumu jojwabia nkosi waka Samusoni joanzemalia kipindi sukunzuku mmbomba.