1 Baada ja kuwa kwaka Abimaleki, Tola mwana waka Pua nsokoo waka Dodo juku likabila laka Isakali, jwapitila kwaakombo Aizilaeli. Tola jwatama ku musi uku Shamili mu nndema ji itombi yuku Efulaimu. 2 Jwabia mundu kilongosi jukuamuli jwa Aizilaeli kwa yaka ishilini na tatu ndi jwatenda kuwa nu kutagwa ku Shamili.

3 Baada jaka Tola jwapitila Yaili juku Gileadi, nakuba kilongosi jukuamuli jwa Aizilaeli kwa yaka ishilini ni mibeli. 4 Yaili jwabia na bana banalomi selasini bababia ajende maponda selasini na bababia misi selasini ku nndema uku Gileadi, jejuje mbaka lelenu bijikema Hawoti Yaili yaani misi selasini yaka Yaili. 5 Yaili jwatenda kuwa nu kutagwa ku Kamoni.

6 Aizilaeli bahenga kabee uhakau palongi jaka Bambu Sapanga nu kutumaki Mabaali, Maashitaloti ni isapanga yuku Shamu jebijikema Silia nu yuku Sidoni na yuku Moabu na yuku Amoni na ya Afilisiti. Bunndeka Bambu Sapanga na wala ngase bunndumbalia kabee. 7 Inyela jaka Bambu Sapanga yaahikila Aizilaeli, najombi jaanhenga Afilisiti na Ahamoni jaawesa Aizilaeli. 8 Kwa yaka komi na nani haba baang'alisa na kwaabone Aizilaeli babatama ku Gileadi ku lieneu la Ahamoli upandi golipititi lyoba wa losi Yoludani munndema uku Gileadi. 9 Ahamoni nabombi balobuka losi Yoludani kukomana na makabila guku Yuda na Benjamini na Efulaimu. Nabombi Aizilaeli bapata mang'aliku ngamaa.

10 Ndi Aizilaeli bunndelila Bambu Sapanga koni bakapwaga, "Tuguhengi mahakau ndaba tugulekiki wehapa wa Bambu Sapanga witu nukutumaki Mabaali."

11 Najombi Bambu Sapanga jwaapwagila, "Boo, nengasenukombula kuhuma kwa Amisili na Aamoni na Ahamoli na Afilisiti? 12 Boo, nengasenukombula kuhuma kwa Asidoni na Aamaleki na Amidiani? Bandu haba bunng'alisa na mwanganya mwanelila nepani na nepani nunkombula pai ju ulongosi wabu. 13 Hata hela mwanganya ntei kuneka, nukutumaki isapanga yenge. Henu nga nunkombo kabete. 14 Nzendania mwikiilelila isapanga yemuihagwi. Muileka heyi yunkombula mu mang'aliku gino!"

15 Lakini Aizilaeli bumpwagila Bambu Sapanga, "Tuhengiki mahakau. Gutuhenga ngati hegupala, lakini tuguloba gutuhokula leleno." 16 Ndi biilekala kutali isapanga ikigeni, nukuntumaki kabee Bambu Sapanga. Bambu Sapanga ngasejwawesa kuendale kuhinakali pajwabona mang'aliku ga Aizilaeli.

17 Ahamoni bakusanyika pamu nukubeka kambi jabu ku Gileadi. Aizilaeli nabombi bakusanyika pamu nukubeka kambi jabu ku Mizipa. 18 Aizilaeli na aka kilongosi babu balalukania, "Nya jojwiitumbulia kukomana na Ahamoni? Jojwiihenga hela ndi jojwiibia kilongosi jwa bandu boti buku Gileadi."