1 Bandu bi likabila la Efulaimu bunndalukia Gidioni, "Ndaba jaki gutuhenge hela? Ndaba jaki ngaseutukemiki pa wajenda kukomana na Amidiane?" Bunndaumua su ukali.

2 Lakini Gidioni jwaajibwa, "Majambu ganhengiki nepani nga sindu ngati ganhengiki mwanganya. Kisoku seahengiki akomana ngondu binu buku Efulaimu ndi kikolongu peta setuhengiki twepani twaakomana ngondu bu lukolu lwa Abiezeli. 3 Sapanga junzangati mwanganya kwaawesa akolongu buku Midiani, Olebu na Zeebu. Boo nepani nhengiki kii kikolongu kupeta mwanganya?" Gidioni pajwajomula kupwaaga haga, inyela yabu kwaki yatenda kukotoka.

4 Gidioni na ajaki mia tatu bahika ku Yoludani, nukulomboka. Hata ngati babia asokiki ngamaa, baendalia kwaapwatalia aka abaja babu. 5 Ndienu ebahika ku musi uku Sukoti jaapwagila, "Mpepa koku mwaapekia ajangu haba mabumunda ndaba asokiki ngamaa, nanepani nakona nhendale kwaapwatali aka bambu akolongu buku Midiani Zeba na Salumuna."

6 Lakini aka kilongosi buku Sukoti bunndalukia, "Ndaba jaki twaapekia posu alonda baku koni ngasemwawesiki Zeba na Salumuna?."

7 Gidioni jwapwaga, "Hena, lakini Bambu Sapanga pajinyangatiya kwaawesa Zeba na Salumuna, naijendulana nhyega jinu kwa mia yukulungweza na mia ya mbigili."

8 Kuhuma kola jwaajendila bandu buku Penueli, jwaaloba kwa namuna hajelajejela. Nabombi bandu ba musi uku Penueli bunzibua ngati hebunzibua bandu buku musi uku Sukoti. 9 Gidioni jwaapwagila, "Paniikelubuka kulukwali niibombula nnala wii gongo."

10 Kipindi hesi Zeba na Salimuna babia ku Kalikoli pamu na akaalonda babu, bandu elupu komi nu nhwanu babube ndi babaigalia kuhuma kwa alonda bu upandi golipiti lyoba, ndaba alonda laki jimu ni ishilini babia baakomiki. 11 Gidioni jwapwata indela ja bandu baajenda sapwali jejibii upandi wakolipiiti lyoba uku Noba nuku Yogubeha, jwaalapula alonda bala babube ngasebijiandi kukomana. 12 Aka bambu abeli buku Midiani babube ndi Zeba na Salumuna batei kutila, lakini Gidioni jwaapwatalia na kwaakamu na kwaahenga alonda babu boha abia ni kiholu kikolongu.

13 Ndienu, Gidioni mwana waka Yoashi jakelubuka kuhuma kungondu jwapeta mu kikwelu suku Helesi. 14 Ankamula nkombu jumu juku Sukoti nu kunndaluki mahina gaka kilongosi. Ndienu nkombu hoju anhandakia maina sabini gaka kilongosi baamanyakini nakanopi na aseja akolongu buku Sukoti, jumula bandu sabini na saba. 15 Gidioni jakelabuka kwa aka kilongosi buku musi uku Sukoti, nakwaapwagi, "Sinkomboka hemwandondula pamwapwaga, ‘Ndaba jaki twaapekia posu bandu baku baatondiki ngani nanamu mwakona ngasemunhwesiki Zeba na Salumuna?’ Henu nndinga Zeba na Salumuna ndi bamba." 16 Ndi jwaajukua akakilongosi ba musi hogu na kwaalapu kwa miha yukulungwenza na mbigili ili bandu buku Sukoti bilibola. 17 Kabee jwajenda ku musi uku Penueli nukugubombo nnala na kwaakoma bandu ba musi hogu.

18 Ndienu jwaalalukia Zeba na Salumuna, bandu bamwaakoma ku Taboli babia bandu bole? Bunzibua, "Balengana na wehapa ndaba babonikana ngati bana baka bambu nkolongu."

19 Najombi jwaapwagila, "Haba babia akaalongu bango, bana ba amabu bango bukumeleka. Napa kwaka Bambu Sapanga jojubii mwomi ana mwakaalei bomi na nepani nukunndeka mwanganya mwabomi." 20 Ndienu ampwagila mwana waki jojatumbula kusaliwa jobunkema Yeteli, "Jenda wakaakoma." Lakini Yeteli jwajogupa kuhopo upanga waki ndaba jwabia jwakona nkombu nsoku.

21 Ndienu Zeba na Salumuna bapwaga, "Tukoma wamwete, ndaba lenieli ndi lihengu laka mwanahota." Gidioni jwaakoma mweni nukujuku mapambu gabu gagabia mu hingu ja ngamia yabu.

22 Ndipala Aizilaeli bumpwagila Gidioni, "Wehapa gubia ukilongosi witu na baada jaku wehapa jatulongusa mwana waku nu nsokoo waku ndaba wehapa gutugombwi kuhuma kwa Amidiani."

23 Gidioni jwaajibwa "Nepani nganiikubi kilongosi winu wala mwana wangu nga jiikubi kilongosi wino. Ila Bambu Sapanga ndi jojwiibia kilongosi wii." 24 Ndienu jwaapwagila, "Mbala kumpwagi sindu simu, noba kila jumu wii jumbekia ndolosa ya zahabu yejunyagiki." Amidiani bala ndaba babia ngati Aishimaeli na bandu bangi bayobali kuwata hindu ya zahabu. 25 Bandu bunzibua, "Twakupekia sukukupala twabee." Batandika ingobu na kila jumu jwalekala ndolosa ya zaabu yebabia biinyagiki ku ngondu. 26 Kutopa kwa hindu ya zaabu yoti yejapala bumpekia kwabia kilu ishilini. Hindu yengi yejwajopa yabia ndolosa ya madini ga feza ni ingobu ya zambalau yebawata aka bambu akolongu buku Midiani ni mikupu jejabia mu nhingu ja ngamia wabu. 27 Gidioni jwiitumia hindu hei kulenganake kimong'umong'u sesuse jukibeka mu musi waki uku Ofula. Aizilaeli boti bajenda kola kukilumbali. Kimong'umong'u hesi saika kuba ntaba kwaka Gidioni na ajaki. 28 Ndi Amidiani basindwa palongi ja Aizilaeli na ngasebabia bandu bukujogopwa kabee. Ndienu bandu buku Izilaeli babia nu lukwali kwa yaka alubaini kipindi Gidioni pajwabia mwomi.

29 Gidioni yaani Yelubaali mwana waka Yoashi jwabuja kunyumba jaki nu kutama hoku. 30 Gidioni jwabia na bana sabini akanalomi ndaba jwajukwii akambomba bingi. 31 Jwabia ni libangu ku Shekemu lelumbelakia mwana mwanalomi, liina laki Abimeleki. 32 Gidioni mwana waka Yoashi jwakuwa koni jubii na yaka yingi ngamaa, buntaga mu litenge laka Yoashi atati baki mu musi uku Ofula wa Abiezeli.

33 Baada ja kuwa kwaka Gidioni Aizilaeli biikelabukia kabee isapanga Baali nu kuilumbali. Bunhenga Baali Beliti kuba sapanga wabu. 34 Aizilaeli bunzegwa Bambu Sapanga, Sapanga wabu, jojwaakombula kuhuma kwa abaja babu bingi babaayonguluta kila upandi. 35 Lakini ngasebahengi majambu gaamboni bana baka Yelubaali yaani Gidioni hatangati jahengi gaamboni Aizilaeli.