1 Ndienu Debola na Balaki mwana waka Abinoamu bajemba nhwambu gongo lisoba heli,

2 Akakilongosi buku Izilaeli baalongua bandu babu kujenda kukomana ku ngondu,

bandu biliboa sukupala beni,

munsengula Bambu Sapanga!

3 Mwakabambu akolongu nzoania!

Mwaka akolongu nzowanakiya!

Nanzembila Bambu Sapanga,

ku miambu nanzembila Bambu Sapanga, Sapanga jwa Aizilaeli.

4 Mwaa Bambu Sapanga pawahuma ku nndema uku Seili,

pawahelala mu migonda juku Edomu,

nndema watenda kubagaja nu kunani kwatenda kwakuna iyula,

ena maundi gajitala masi.

5 Itombi yabagaja palongi jaka Bambu Sapanga,

hata kitombi suku Sinai sela,

palongi jaku Bambu Sapanga,

Sapanga juku Izilaeli.

6 Mu masoba gajwabii Shamugali mwana waka Anati,

na masoba gaka Yaeli,

indela ngolongu ngasebapeta bandu,

bandu bapeta mwi indela yu mwioli.

7 Bandu baalema ngasebabi, mu nndema uku Izilaeli,

mbaka panapitila nepani Debola,

nenabii ngati amabu buku Izilaeli.

8 Aizilaeli bahagula kuilumbali isapanga yengi

ndi kwapitila ngondu mu nndema.

Lakini ngasejabonakini mundu hata jumu jojubii na ngau wala nkoa,

kati ja akomana ngondu elupu alubaini buku Izilaeli.

9 Naapeke isima akolongu buku Izilaeli

babilipia kwamoju ukupla beni pikilanda ja bandu,

munsengula Bambu Sapanga!

10 "Mwaabandu ndandila majambu mwenkwela maponda mahuu,

mwabandu mwentami matandiku gabei ngolongu mu maponda haga

nndandila lijambu hele mwanganya mwenzenda mwi indela kwamagolu.

11 Mwaajoanianya baajemba miambu baabi ku iliba ya masi,

ajemba kulandi mahengu makolongu gajahengiki Bambu Sapanga,

Alandi namuna Aizilaeli hebaawesiki abaja babu.

Ndienu bandu baka Bambu Sapanga bajenda mu matanga ga musi.

12 Jumuka, jumuka Debola!

Jumuka! Jumuka gujemba nhambu!

Jumuka, Balaki mwana waka Abinoamu,

waajukua bandu baku bawaakamwi kwamakili kungondu.

13 Bandu baahobaleka bahelela kwaaka aka kilongosi babu,

bandu baka Bambu Sapanga bakelabuka,

ili kukomana na abaja babu.

14 Bahika bandu kuhuma ku Efulaimu, babube kibeleku sa Aamaleki

bajengaliya alongu babu Abenjamini.

Kuhuma ku Makili bahuluka akakilongosi baakomana ngondu,

na kuhuma ku Zebuloni bahika akakilongosi akolongu.

15 Akolongu baka Isakali babia pamu na Debola,

bandu baka Isakali jwabia pamu na Balaki,

baampwata imbelu mbaka kuligomba,

Lakini likabila laka Leobeni latenda kubaganika,

mioju jabu jabii nu kulilalukilaluki.

16 Boo, ndaba jakii bahigalii munyuma mwisisi ya makondoo?

Boo, kujowane lee sauti ja pelembe?

Lakini likabila laka Lubeni latenda kubaganika,

mioju jabu jabii nu kulilalukilaluki.

17 Bandu bi likabila la Gileadi latama kwii ja Yoludani.

Boo, ndaba jakii mwabandu bi likabila la Dani nhigali mu meli jino?

Bandu bi likabila la Asheli lahigalia ku kumbwani ju nhanga.

Batemi pajijema meli.

18 Bandu bi likabila la Zebuloni,

babi tayali kuwa.

Hata bandu bi likabila la Nafutali nabombi babia tayali hata kuwa mututombi twa matui.

19 Ku Taanaki pambipi na kalosi kuku Megido,

akabambu akolongu bahika nukukomana,

akabambu buku Kaanani batenda kukomana,

lakini ngasebajukwi madini ga feza.

20 Yabia ngati ndondu kuhuma kunani kwaka Sapanga yajangatia kukomana,

yapwata indela yabu, nukomana na Sisela.

21 Kikoka sa masi ga losi uku Kishoni saajolalia na kwaaleke kutali, losi lwa pamwandi

ena kikoka kikali sa losi Kishoni.

Nepani, niendalia kujenda kulongi kwa makili!

22 Falasi yaka Sisela yatila koni ipaga ya falasi yeibii na makili yatenda kutung'unda pai,

yatung'unda kwa makili payabiya itenda kutila.

23 Ntumi jukunani jwaka Bambu Sapanga jupwaga ana,

‘Mugulapila yaambamba musi uku Melosi,

mwaalapila yaambamba bandu baki su ukali,

ndaba ngasebaika kunzangati Bambu Sapanga

ngasebunzangati Bambu Sapanga kupete baabi na makili haba’.

24 Yaeli jupata isima kupeta akambomba boti,

Yaeli nhwanu waka Hebeli, mundu juku Keni.

Ena jupengiwi kupeta akambomba boti,

baatama mu mahema.

25 Sisela anndoba masi najombi ampekia masiba,

anndetila masiba gagakendiki mu libakuli li isima.

26 Ku kuboku kumu jwakamula kikongu si lihema,

nuku kuboku kwaki kwa malele nyondu jaka pundi,

ankomangaliya Sisela kimutu,

antunula pamiu jaki.

27 Sisela jwajinama, nukuabuka,

jwagonila nuu mu magolu gaka Yaeli.

Mumagolu gaki jatenda kuhabuka,

ndi jaabuka pai nakuwa!

28 Amabaka Sisela balingalia mu lindilisa

balingalia nukulela,

‘Ndaba jakii, ligali laki litei kuselewa?

Mbona kulundami kwi ligali laki kuseliwi kujowaneka?’

29 Lijibu julipata kwaaka mbomba baabi ni isima,

Jakelabukiya kulipwagi malobi haga.

30 ‘Boo, ataputa lee hindu yeenyagiki nu kubagana?

mmbomba jumu au abeli kwa kila mundu,

ingobu jealenganaki kwa mangoma gi makondoo ga langi ndaba jaka Sisela kuba hindu yukunyaga.

Ingobu ja sufu jealembiki,

ni mikupu mibeli jejinyambiki jukuwata hingu jangu!’

31 Mwaa Bambu Sapanga abaja baku boti akuwaje!

Lakini akosi baku abia ngati lioba,

palipita kwa mwanga waki!"

Nagombi nndema wabia nu lukwali kwa yaka alubaini.