1 Baada jaka Ehudi kuwa, Aizilaeli bahenga kabee kihakau palongi jaka Bambu Sapanga. 2 Ndienu Bambu Sapanga anzangatiya bambu nkolongu Jabini juku Kanani jaawesa jojwabia julongosa ku Hazoli. Nkolongu jwaakomana ngondu baki jwabia Sisela, jojwabia jutama ku Halosheti Hagoyimu. 3 Ndaba Jabini jwabia na magali mia tisa ga ngondu gukuhutwa na falasi, najombi jwabia jwaang'alisi Aizilaeli ku ukatili kwa yaka ishilini. Ndienu Aizilaeli bunndelila Bambu Sapanga jwaajangati.

4 Kipindi sehesi Debola nndota mmbomba nhwanu waka Lapidoti, ndi jojwabia jojutemu ku Izilaeli. 5 Debola jwabia jujenda kutama pai ju nkongu guntendi gowabii pikilanda ja musi uku Lama nuku Beseli mu nndema wi tutombi yuku Efulaimu. Nabombi Aizilaeli bahika kwaki ili jwaatemulia. 6 Lisoba limu Debola jwaatuma bunkema Balaki mwana waka Abinoamu kuhuma ku Kedeshi ku ndema uku Nafutali kola nu kumpwagi, "Bambu Sapanga, Sapanga jwa Izilaeli jugulagalaki, ‘Jenda ukajukua akanalomi elupu komi kuhuma ku Nafutali nuku Zabuloni nzenda ku kitombi suku Taboli. 7 Nankolua Sisela nkolongu jwa akomana ngondu baka Yabini pamu na magali gaki ga ngondu na akomana ngondu baki ahika mbaka kulosi lwa Kishoni ili akomana na wehapa, nanepani nagujangati kunhwesa.’ "

8 Balaki ampwagila, "Anagupiti pamu nanepani mbakanyendi, lakini ana ngagujendi pamu nanepani, nanepani nganyende."

9 Debola ampwagila, "Sakaka mbakanyendi pamu na wehapa, lakini ngawipati isima yokapi yukuwesa ndaba Bambu Sapanga anzangatiya mmbomba anhwesa Sisela." Ndi Debola jwajenda pamu na Balaki mbaka ku Kadeshi. 10 Balaki jwaakema akomana ngondu ba makabila gaka Nafutali na Zebuluni ku Kadeshi, bandu elupu komi batenda kumpwata. Debola jwajenda pamu najombi.

11 Kipindi hesi Hebeli, mundu ju lukolu lwa Akeni jaaleka Akeni ajaki nu kutama kutalinabombi. Akeni babia kibeleku saka Hobabu nndamu waka Musa. Hebeli jasenga lihema laki pambipi nu nkongu nkolongu gobugukema Nhaloni gogubii ku Zaananimu pambipi nuku Kadeshi.

12 Bandu bumpwagila Sisela kubanga Balaki mwana waka Abinoamu jukwei kitombi suku Taboli, 13 Sisela jwajukua magali gaki goa mia tisa gikisomasoma guhutwa na falasina bandu boha bababia pamu najombi, kutumbuli Halosheti Hagoyimu mbaka ku losi luku Kishoni.

14 Ndipala Debola ampwagila Balaki, "Jenda! Lende ndi lisoba lelule Bambu Sapanga juguhengiki gunhwesa Sisela. Boo! Bambu Sapanga ngasejugulonguli palongi jako?" Ndi Balaka jwahuluka kuhuma kukitombi suku Taboli koni bunzengale akomana ngondu elupu komi. 15 Kipindi Balaki paantukaliya Sisela ndienu Bambu Sapanga anhenga Sisela jubiya nu lujogopu na akomana ngondu baki boti palongi jaka Balaki ku upanga. Sisela jwaboka koni jubii na akomana ngondu baki nukutila kwa magolu. 16 Lakini Balaki jwaabenga akomana ngondu bala kwa magali mbaka ku Halosheti Hagoyimu na kwaakoma akomana ngondu boti baka Sisela ku upanga wala ngasejwabii hata nkomana ngondu hata jumu jojwahigali.

17 Lakini Sisela jwatila kwa magolu mbaka ku lihema laka Yaeli nhwanu waka Hebeli, mundu ju lukolu lwa Keni. Jahenga hela kwa ndaba kwabia nu ukosi kati jaka Yabini bambu nkolongu juku Hazoni nu lukolu lwaka Hebeli mundu juku Keni. 18 Yaeli jajenda kumpengana Siseli nukumpwagi, "Kalibu nkolongu wangu wala wiijogopa." Ndi Sisela jwajingala mu lihema laka Yaeli najombi anhyekalia libulangeti lelikendiki. 19 Ampwagila, "Mii na nywiita gupepa na gumbekia masi gakunywa." Ampekiya masiba badala ja masi nu kunhyekale kabee. 20 Ndienu Sisela ampwagila, "Jema mundyangu u lihema. Ana mundu jokapi juhikiki kunaluki, ‘Boo jubii mundu jokapi pambane?’ Wanzibua, ngasejubile."

21 "Sisela jabiya jusokiki koni jugosi lugonu, ndienu Yaeli nhwanu waka Hebeli, jwajukua kipanda si lihema, nukujuku nyondu mu kuboku kwaki nu kunhepe mbolimboli pajabiya jugoni. Jukipotalia kikongu sesela pamiu jaki sajingala mbaka puluombi najombi jwatenda kuwa. 22 Balaki pajabiya jutenda kupwatali Sisela, Yaeli jwapita kunza kumpengana. Ampwagila, hika nugulangia mundu jountaputa." Ndi bajingala nkati jilihema koni alongini, na ammbona Sisela jugoni homu koni juwii ni kipanda si lihema sabia ampoti pamiu jaki.

23 Ndienu lisoba lela Sapanga jajangatiya Aizilaeli kunhwesa Yabini, bambu nkolongu juku Kaanani. 24 Nu kutumbuli kipindi hesi Aizilaeli baendalia kuba na makili kupete Yabini bambu nkolongu juku Kaanani mbaka pabunkoma.