1 Kipindi hesi kwakabi na mundu jumu juku nndema ututombi gogubi ku Efulaimu jobunkema Mika. 2 Lisoba limu jwaapwagila amabu baki, "Mwaa amabu nunzoana mugunndigi mbamba mundu jojajibiki ipandi elupu jimu na mia jimu ya madini ga feza, nepani ndi nenajibiki hipandi yeyela minaku nepani."

Amabu baki bapwaaga, "Mwanangu, Bambu Sapanga jugupengila." 3 Mika jwaakelabukia amabu baki ipandi elupu jimu na mia jimu ja madini ga feza gala. Amabu baki baapwaga, ili yaambamba yembiiki yagupata, madini ga feza ganga niipia kwaka Bambu Sapanga na ili kulenganake imong'umong'u yukubasa nukumamatiki madini ga feza kwa ndaba jaku. Ndienu niibia ngati nugukelabuki wehapa ipandi heyi ya madini ga feza. 4 Mika pajwaakelabukia amabu baki madini ga feza haga, amabu baki bajukua ipandi mia ibeli ya madini ga feza numkupeke pundi najombi jwabasa imong'umong'u yukubasa nukuimamatika madini ga feza. Kimong'umong'u hesi bikibeka nkati ja nyumba jaka Mika.

5 Ndienu Mika jwabia na pandu paki pukukilumbali kisapanga. Jwalenganaki kizibau saku nngolu wiisapanga yaki ni imong'umong'u, nu kunhenga mwana jumu kati ja bana baki kuba nngolu wii isapanga yaki. 6 Masoba gegala ngasebabii na bambu nkolongu mu nndema uku Izilaeli. Kila mundu jwahenga sokapi sejukibona kuba saamboni.

7 Masoba agalaga jwabia nkombu jumu Nndawi ku musi uku Betelehemu mu nndema uku Yuda. 8 Nkombu hoju jwaboka ku musi uku Betelehemu mu nndema uku Yuda nukujenda kutaputa pandu pangi pukutama. Mu sapwali jaki jwahika ku nyumba jaka Mika mu nndema ututombi uku Efulaimu. 9 Mika anndalukia, "Guhumiki kwako?" Najombi jwajibwa, nepani nu Nndawi kuhuma musi uku Betelehemu mu nnndema uku Yuda. Nandaputa pandu pukutama.

10 Mika ampwagila, "Gutama pamu na nepane gubia kwangu ngati atati nu nngolu wango. Nagulepa ipandi komi ya madini ga feza kila saka na kila segupala kwa ndaba jukutama kwaku." 11 Nndawi jola jatenda kujetakela, na jwatama kola na kuba ngati jumu jwa bana baka Mika. 12 Najombi Mika anhimika nkombu jola kuba nngolu waki na jombi jatama kunyumba jaka Mika. 13 Ndi jwapwaga, "Henu manya Bambu Sapanga jihengila gaamboni, ndaba jumbeki Nndawi hajo jubia ngati nngolu wangu."