1 Kipindi hesi, Abiya mwana waka bambu nkolongu Yelobuamu, jwabiya nngonzu. 2 Yelobuamu ampwagila nhanu waki, "Gujenda ukalikopakia kuba ngati wa mundu jongi, ili bandu biimanya ngati wehapa unhwanu uka bambu nkolongu nu kujenda ku musi uku Shilu kojutama nndota Ahiya jojapwaga kubanga nepani isimiya bambu nkolongu juku Izilaeli." 3 Gumpelakia mabumunda komi, na maandasi masokopi na busi lisupa limu. Jwombi jwagupwagila majambu gagampata mwana witu.

4 Ndienu, nhwanu waka bambu nkolongu Yelobuamu jwatenda kuboka, jwajenda ku Shilu kunyumba jaka Ahiya. Kipindi hesi, Ahiya ngasejuwesika kulinga sapi kwa ndaba jabii nseja. 5 Bambu Sapanga jwabiya ampwagi Ahiya kubanga nhwanu waka bambu nkolongu Yelobuamu jubii mwiindela, juhika kulaluki majambu gagampata mwanamundu ndaba jutenda kulwala, nanagu wannzibua ana na ana.

Nhwanu waka Yelobuamu pajwahika jilikopakia kuba mundu jongi. 6 Lakini Ahiya pajunzowana jujingi pu ndwangu, japwaaga, "Kalibu nkati nhwanu uka Yelobuamu. Lakini mbona wilikopake kuba wa mundu jonge? Mina majambu gaguge nga gamboni kwaku! 7 Gujenda ukupwagila bambu nkolongu Yelobuamu kubanga Bambu Sapanga, Sapanga jwa Aizilaeli, jupwaga ana, ‘Nuguhagwi wehapa pikilanda ja bandu, nu kuguhenga gubiya wa bambu nkolongu wa bandu bangu, Aizilaeli, 8 nugubalula ipandi ibeli ubambu ukolongu kuhuma mu lukolu lwaka Daudi, nukugupeke wehapa. Lakini wehapa ngasegubii ngati ntumisi wangu Daudi, jojabiya jupwata malagalaki gangu, na jagahenga ganugapala kwa mwoju waki woti. 9 Wehapa guhengiki majambu mabaja ngani kupeta akabambu akolongu boti babugulonguli. Wehapa gunhengiki nguba ni inyela ndaba gulenganaki isapanga yengi ni imong'umong'u yukuhugati nu kuneka nepani. 10 Kwa ndaba ji lijambu heli isineta ling'ai kulukolu lwaka Yelobuamu, isinunkoma kila mwana mwanalomi jwa mwisu kubelekwa, jukubi ntumwa au jwanga kuba ntumwa mu lukolu lwaka Yelobuamu mu nndema uku Izilaeli. Naatinia bandu bulukolu lwaka Yelobohamu boti ngati mundu eatini takataka mbaka ihoba tikitiki. 11 Jokapi jojubii mu lukolu lwaka Yelobuamu jojwiiwelila ku musi, jimbwa yiitenda kunkula, na jokapi jojwiiwelila kumigonda, ijuni yukunani yiitenda kunkula. Nepani Bambu Sapanga ndi nembwagiki.’"

12 Ndienu Ahiya ampwagila nhwanu uka Yelobuamu, "Enu gujumuka, gujenda kunyumba jaku. Egwiihika pe ku musi, mwana waku jwiitenda kuwa. 13 Bandu boti buku Izilalei biitenda kundele malelu nukuntaga. Ndaba jombi pe kajika jaki ndi jobantaga, ndaba jwombi pee mu lukolu lwaka Yelobuamu jojuhengiki majambu gaganengane nepani Bambu Sapanga, Sapanga jwa Aizilaeli. 14 Bambu Sapanga isijuhagula bambu nkolongu jongi jojwilongusa nndema uku Izilaeli jojaakomila ako bandu bi kibeleku saka Yelobuamu, hata henu lijambu heli litumbuli kupiti. 15 Eena, Bambu Sapanga jwaalapula bandu buku Izalaeli, nabombi biinyuka nyuka ngati manyai eganyuka panani ja masi kulosi. Jwammboa mu nndema wamboni gongo gojaapekia akahoku babu, nukumpesangana kutali, kwii ja losi luku Efulati ndaba munhengiki Bambu Sapanga jubiya ni inyela ndaba mulilenganaki imong'umongu ya Ashela, kisapanga sambomba. 16 Bambu Sapanga jaasoka Aizilaeli kwa ndaba ja mahakau gajahengiki Yelobuamu, na kwaahenga Azilaeli kabee ahenga mahakau."

17 Ndienu, nhwanu waka Yelobuamu jwatenda kuboka, jajenda mbaka ku musi uku Tiliza. Ejahika pe pundwingu mwana jatenda kuwa. 18 Bandu boti buku Izilaeli buntaga na batenda kundele ngati ejapwaga Bambu Sapanga, sukupete nndota jobunkema Ahiya, ntumisi waki.

19 Mahengu gangi gaka bambu nkolongu Yelobuamu, na namuna ejakomana ngondu na namuna ejalongusa, goti gaandikwi mu Kitabu sa ngombuke ya aka Bambu akolongu buku Izilaeli. 20 Yelobuamu jwalongusa kwa yaka ishilini ni mibeli, na jatenda kuwa, na mwana waki jobukema Nadabu jabia bambu nkolongu badala ja atati baki.

21 Lehobuamu mwana waka Solomoni, jwabiya na yaka alubaini na moja pabunhimika kuba bambu nkolongu juku Yuda. Najombi jalongusa nndema uku Yuda yaka komi na saba, koni jubii ku musi uku Yelusalemu, musi goguwe Bambu Sapanga jwabia juguhagwi kuhuma mu makabila goti ga Aizilaeli bunndumbali homu. Amabu baki Lehobuamu babiya baakema Anaama kuhumi ku nndema uku Amoni.

22 Bandu buku Yuda bahenga majambu mabaja palongi jaka Bambu Sapanga. Bunhenga jubiya ni inyela kwa ndaba ja mahakau gabu gabahengiki, mahakau gabu gabiya gingi kupeta gaahengiki akahoku babu. 23 Bililenganakia kabee pandu pukulumbali, ni minala jukupiiki matambiku ni imong'umong'u ya Ashela, kila panani jikitombi kilasu na kila pai ju nkongu gogubii na mahamba mabei. 24 Kabee kwabiya na akanalomi mu nndema uku Yuda babia agonalane beni kwa beni mu nndema ili kuilumbali imong'umong'u yabu, bandu bahenga majambu gukusukisa gababiya ahenga bandu banga Ayahudi babube Bambu Sapanga jabiya jaabengiki kabula Aizalaeli ngaseajingi mundema uku Kanani.

25 Mu saka su nhwanu sukulongosa kwaki Lehobuamu, bambu nkolongu Shishaki juku Misili, jugulapula musi uku Yelusalemu, 26 jwajukua kila sindu seabei mu kikoku sa Nyumba jaka Bambu Sapanga, na yebiibei nnyumba jaka bambu nkolongu jajukua kila sindu, pamu na hindu yukukomane ngau yoti ya zahabu yejabiya julenganaki bambu nkolongu Solomoni. 27 Ndienu, bambu nkolongu Lehobuamu jwalenganakia ngau ya shaba nakwaapeke alonda ba nnyumba jaka bambu nkolongu. 28 Kila kipindi bambu nkolongu pajujendika ku nyumba jaka Bambu Sapanga, alonda atotula ngau heyi na mwenikatai atendika kuikelabu mu sumba su ulonda.

29 Mahengu gangi goti gaka bambu nkolongu Lehobuamu, gajagahengiki gaandikwi mu Kitabu sa Ngombuke yaka bambu akolongu buku Yuda. 30 Kambeli kambeli kwabiya na ngondu kati jaka bambu nkolongu Lehobuamu na bambu nkolongu Yelobuamu. 31 Najombi Lehobuamu jatenda kuwa na buntaga mu matenge ga akatati baki, mu musi waka Daudi. Amabu baki baakemika Naama kuhuma likabila la Amoni, na Abiya mwana waka Lehoboamu jabia bambu nkolongu badala jaki.