1 Egabia gapetiki masoba gingipi, mu saka sa tatu sanga kukuna iyula, Lilobi laka Bambu Sapanga lunhikila Eliya kupwaga, "Gujenda ukulilangia kwaka bambu nkolongu Ahabu, ni iyula jiikuna kabe pu nndema." 2 Ndienu, jwajenda kulilangi kwaka Ahabu.

Kipindi hesi kwabii ni inzala ngamaa ku nndema uku Samalia. 3 Ndi, Ahabu ankema Obadia jojabiya jojujemale nyumba jaka bambu nkolongu. Obadiya jwabiya mundu jojundumbali Bambu Sapanga ngani, 4 kipindi Yezebeli pajwabia jwaakoma alota baka Bambu Sapanga, Obadiya jwabiya jwaajukwi alota mia jimu jwaahiya hamusini hamusini mu makolu, jwabiya jwaapelake posu na masi. 5 Ndienu Ahabu ampwagila Obadia, "Gujenda mu nndema woti motubii tulosi na mumagomba pangi tuwesa kupata manyoi nukuilea inyama yitu ili yiikuwa." 6 Ndienu, babagana pandu punndema lukujenda ili awesa kugupete nndema woti, Ahabu jwajenda upandi gongo na Obadia jwajenda upandi gongi.

7 Obadia pajwabiya mwiindela, jwaketangana na Eliya na paammanya, japega magoti nukujinama mbaka pai nukupwaga, "Boo! Sakaka lee wehapa wa bambu wangu Eliya?"

8 Eliya anzibua! "Sakaka nepani Elia. Gujenda ukupwagila nkolongu waku kubanga nepani mi pani."

9 Obadiya japwaga, "Nepani ngosi kike hata gupala kungabisi kwaka bambu nkolongu Ahabu ili jungomaje? 10 Nugulapi kwi lihina laka Bambu Sapanga, Sapanga jojubii mwomi, nga bandu bu mu nndema hata gumu au ubambu ukolongu kokuje bambu nkolongu wangu ngasejuntumiki mundu kukutaputa. Kila kipindi bandu bunndema au ubambu pabapwaga kubanga ngasegubii hoku, Ahabu anhenga bambu nkolongu jwa hoku julapa kubanga ngase ammbwani. 11 Na sajenu, gupala nepani nyenda nukupwagila kubanga wehapa gubii pamba! 12 Ngase manyi Loho waka Bambu Sapanga jwiamua kugupeleka kwako ana nugulekiki pamba. Anambiti kumpwagi Ahabu kubanga gubii pamba, ana ngajwaguketane jwiitenda kungoma nepani. Hata hela nepani ntumisi waku nu nndumbali Bambu Sapanga tumbuka mu ukombu wangu. 13 Boo, ngasegumanyi le kipindi Yezebeli ejabiya jwaakoma alota baka Bambu Sapanga, nepani naahiiki alota mia jimu, naabeka amusini amusini mu makolo mabeli, na nabiya naapelake posu na mase? 14 Nasajenu gupwaga nyenda nukumpwagila nkolongu wangu kubanga Eliya jubii pamba! Ahabu jwiitenda kungoma."

15 Eliya ampwagila, "Nugulapi kwilihina laka Bambu Sapanga jwaakomana ngondu, jojutama na jonuntumaki. Lelenu niipitila palongi jaka bambu nkolongu."

16 Henu, Obadia jwajenda kwaka bambu nkolongu Ahabu, nukumpwagi majambu haga. Najombi Ahabu jajenda kuketangana na Eliya. 17 Ahabu eambona Eliya, japwaga, "Boo, wehapa ndi wewahenga bandu buku Izilaeli ang'alikaje?"

18 Eliya anzibua ana, "Jojaahenga bandu buku Izilaeli apata mang'aliku nga nepani ndeka, ila wehapa na bandu bu lukolu lwa atati baku. Mwanganya mugalekiki malagalaki gaka Bambu Sapanga nu kuilumbali isapanga Baali. 19 Ndienu waakema bandu boti buku Izilaeli ahikaniya palongi jangu kukitombi suku Kalimeli. Nagwaaleta alota mia nnsesi na amusini bi isapanga Baali, na alota mia nnsesi bi kisapanga sa mbomba Ashela, baakula posu pa mesa jaka Malikia Yezebeli."

20 Ndienu, bambu nkolongu Ahabu jwaatuma bandu kunndema woti uku Izilaeli na kwaakema akalota boti bi kisapanga Baali kunani jikitombi suku Kalimeli. 21 Ndipala, Eliya jwaahegalia bandu boti nukwapwagi, "Mwiiendalia kuangajika mbaka lile? Ana Bambu Sapanga ndi Sapanga mupwata jwombi, lakini ana Baali ndi Sapanga, ndi mwapwata jwombi." Lakini bandu ngase bunzibwiki lilobi lokapi. 22 Ndienu Eliya jwaapwagila bandu, "Nepani kajika jangu ndi nu nndota waka Bambu Sapanga nenhigali, lakini alota bi kisapanga Baali abii mia nu nsesi na amusini. 23 Henu nndeta makambaku ga ng'ombi ibeli, akalota ba Baali ahagula ng'ombi jimu, nu kujisinza, bijisekulana ipandi ipandi nu kujibeka panani ja hanzu, bila kupambaki mwotu. Nanepani isinyukuwa ng'ombi jengi heji, isinijisinza nu kujibeka panani ja hanzu bila kupambaki mwotu. 24 Ndienu, bombi bakiloba kisapanga sabu, na nepani nandoba Bambu Sapanga. Sapanga jojijibua sukupambaki mwotu, hoju ndi Sapanga jwa sakaka."

Ndipala bandu boti bapwaga, "Enaa! Kubiya helahela."

25 Ndienu, Eliya jwaapwagila aka alota ba Baali, "Mwanganya ndi mwabingi, enu ndi ntumbulia. Mulihagulia likambaku limu la ng'ombi mujiandia nu kukiloba kisapanga sinu, lakini mwiipambaki mwotu." 26 Akalota bala bahagula ng'ombi jabu, bijiandia, nukukiloba kisapanga Baali tumbuka pulukela mbaka lyoba mutu, bahomba homba nukujonga jonga kuyongalota pandu pukupiiki matambiku pababiya alenganaki koni ajamali sukupwaga, "Mwaa Baali, utujowaniaje!" Lakini ngasejapiti sauti jokapi, wala ngajojajibwiki.

27 Ekwahika saa sita lyoba mutu, Eliya jatumbulia kwaaheka koni jupwaga, "Nndoba kwa sauti ngolongu ngani! Jombi si ndi sapanga! Pengi jubii mu mawasu makolongu, au jubii na mahengu gingi, au jutei kuboka! Au le jutei kugonela, kupalika munzumuwaje!" 28 Aka alota haba bajamaliya ngani, bilisekulana kwi mipanga na kisu, ngati hebayobali, mbaka baholula mwai. 29 Baendalia kujamali nu kuhenga ngati bandu babi na mangongu mbaka pakamii. Lakini mbaka kipindi sukupiya litambiku, ngajojaajibwiki wala jojaalingalia.

30 Ndienu, Eliya jwaapwagila bandu, "Nhegalia pambipi na nepani." Bombi batenda kuhegalela. Ndipala Eliya jasenga kabee mesa ja malibu jukupiiki matambiku jejabi abombwi. 31 Eliya jajukuwa malibu komi na mabeli, kulengana na mahina ga makabila ga Aizilaeli gagabiya baapeki bana baka Yakobu, jojuwe ndi lunhikila lilobi laka Bambu Sapanga kupwaga, "Kutumbuli lelenu lihina laku nagukema wa Izilaeli." 32 Kwa malibu haga, Eliya ansengila Bambu Sapanga mesa ja malibu jukupiiki matambiku, jwahemba nkoka kuyongalota mesa ja malibu jukupiiki matambiku heji, nkoka goguwesa kujege ngati lita selasini ya masi. 33 Ndienu jwiipanga nhanzu sapi, jwasekulana ng'ombi jela ipandi ipandi, nu kuibeka panani ja nhanzu. Ndipala jwaapwagila bandu, "Ntwelakia masi mapipa nsesi nu kujiti panani jilitambiku lukutinii heli panani ja nhanzu." Nabombi batenda hela. 34 Ndienu jwaapwagila, "Nkelubukia kabee." Nabombi bahenga helahe mala ja pili. Najombi jwaapwagila, "Nhenga hela kabee mala ja tatu." Nabombi bahenga helahe. 35 Masi gasembalika pai kuyongalota mesa ja malibu jukupiiki matambiku heji, mbaka gatwelala mu nkoka na gatenda kujitikana.

36 Ekwahika pakamii, kipindi sukupiya matambiku, nndota Eliya jwahegalia pa mesa ja malibu jukupiiki matambiku, andoba Bambu Sapanga kupwaga, "Mwaa Bambu Sapanga, Sapanga waka Abulahamu na Isaka na Yakobu, waalangiya bandu lelenu kubanga wehapa ndi Sapanga jwa Aizilaeli, nukubanga nepani ndi ntumisi waku nhengiki majambu haga kwa malagalaki gaku. 37 Gunyibua nepani, mwaa Bambu Sapanga, gunyibua ili bandu bamba amanya wehapa Bambu Sapanga ndi wa Sapanga, na wegung'anambu mioju jabu jugukelubukia wehapa."

38 Apalapa, mwotu waka Bambu Sapanga wahuluka kuhuma kunani nu kutini litambiku lela, na nhanzu na malibu nu luhombi nu kugajomalesa masi gumu nkoka goti. 39 Bandu boti ebagabona haga, bapega magoti nukujinama mbaka pai nu kupwaga, "Bambu Sapanga ndi Sapanga, Bambu Sapanga ndi Sapanga!"

40 Ndienu Eliya Jwaapwagila bandu, "Mwaakamula akalota boti bikisapanga Baali. Mwandeka hata jumu wabu jutila!" Ndipala bandu baakamula boti, najombi Eliya jwaapelika pakalosi ka Kishoni, nakwaakoma hoku.

41 Baada ja majambu haga, Eliya ampwagila bambu nkolongu Ahabu, "Jenda kakula na ukakunywa, ndaba nukujowana kulundami kwiiyula." 42 Ndienu, Ahabu jwajenda kula na kunywa, najombi Eliya jwakwela kukitombi sa Kalimeli, na hoku japega magoti nukujinama mbaka pai nu kubeka pamiu jaki pikilanda ja magoti gaki. 43 Ndienu apwagila ntumisi waki, "Gujenda ukalingalia upandi guku nhanga."

Ntumisi jola jatenda kujenda, kulingali, najakelabuka kumpwagi, "Ngase kibii sindo." Eliya ampwagila, "Gujenda kabee mbaka mala saba." 44 Mala ja saba, ntumisi jola jakelabuka nu kupwaga, "Nilibona lihundi lisoku ngati kiganza saka mundu kihuma ku nhanga."

Eliya ampwagila, "Jenda ukumpwagila bambu nkolongu Ahabu julihandia ligali laki lukuhutwa, juhelala ili iyula jampengalela."

45 Esapeta kipindi kisokopi kunani kwatandagana mahundi gingi, na gwapoga nhwai, ndi jakuna iyula ngolongu. Najombi bambu nkolongu Ahabu jwakwela ligali laki lukuhutwa, jwabuja ku Yezeleli. 46 Makili gaka Bambu Sapanga gunzingala Eliya, najombi julikasa, jwajombatika nu kundongule Ahabu kujingi ku musi uku Yezeleli.