1 Eyapeta yaka mia nsesi na semanini toka Aizilaeli pababoka ku Misili, Solomoni jatumbulia kusenge Nyumba jaka Sapanga. Hesi sabiya saka su nnsesi su ulongosi waka Solomoni mu nndema uku Izilaeli na hogu wabiya mwei wa pili lihina lengi bugukema mwei wa Zifu. 2 Nyumba heji, jejuje bambu nkolongu Solomoni ansengila Bambu Sapanga jabiya nu ulasu wa meta ishilini na saba, nu upana wa meta tisa, nu ulasu kujenda kunani wabiya meta kumi na tatu na nusu. 3 Sengu ja jumba heji jabia nu ulasu wa meta komi nu upana waki wabia meta nhwanu. 4 Jijibekila Nyumba jaka Bambu Sapanga heji madilisha, kila lidilisha labiya lipana su nkati na sakunza labiya lipepandau. 5 Jwalenganakia yumba mulutengu kujiyongalota Nyumba joti jaka Bambu Sapanga, ili jikamulana na nyumba joti. 6 Yumba ya pai mu yumba yejabiya jujonzuki yela, yabiya nu upana wa meta ibeli na lobu, na yumba yuku nani yeyapwata sabiya nu upana wa meta ibeli na lobo tatu, na yumba yukunani ngani yabiya nu upana wa meta itatu. Yumba yukunani heyi yabiya ngaseilengine ipemu yaki yu upana, ndaba Solomoni jwabiya jupungisi kidogu lumatu lwa kunza kuyongalota nyumba, ili nguzo jiikamulana nu lumatu.

7 Kipindi pababia aendelee kusenga Nyumba jaka Bambu Sapanga, ngasekwajowaniki sauti ja nyundu wala sindu sokapi sikisomasoma pababia atenda kusenga, ndaba basenga kwa malibu gaabasiki toka kobagajukua.

8 Ndyangu gu kujingalii nsumba sa pai wabiya upandi ukusini ja nyumba, nkati kwabiya na ngazi ili bandu awesa kukwele ku sumba sukunani na sumba sukunani ngani. 9 Ndienu, Solomoni jwasenga nyumba heji na jatenda kujomoka. Nhaga wa Nyumba jaka Bambu Sapanga heji babiya alenganake kwi imbau i mikongu ji mielezi. 10 Bambu nkolongu Solomoni jwasenga yumba mulutengu ja Nyumba jaka Bambu Sapanga joti. Yumba heyi yabiya nu ulasu ukujenda kunani wa meta ibeli na lobu kila sumba sa pai na sapani na sa tatu nayombi yabiya ilombakini na nyumba kwa maboliti gi mikongu mielezi.

11 Ndienu malobi gaka Bambu Sapanga gunhikila bambu nkolongu Solomoni kubanga, 12 "Kwa majambu ga nyumba jenze jegusenga, ana gujetaki malagalaki gangu ni mihilu jangu nanepani ngiti nuguhengila majambu goti ganaalagila atati baku Adaudi. 13 Nepani niitamaa pikilanda ja mwa bandu buku Izilaeli nkati ja Nyumba jegusenga na nganaaleki hata kulenga."

14 Ndipala Solomoni jwijisenga Nyumba jaka Sapanga nukujijomule.

15 Upandi gu nkati ulumatu lwa nyumba heji juguyekalia kwi imbau yi mikongu ji mielezi, kuhumi pai mbaka mu lupendi lu munhaga, na pai japatandiki imbau yi mikongu ji mibeloshi. 16 Sumba su nkati, sebikikema Pandu pa Sapi Ngani, sabia bikisengiki pandu punnyuma ja Nyumba jaka Sapanga. Babiya bikisengiki sukutumii imbau yi mikongu ji mielezi kutumbuli pai mbaka kwi ligolu, nu ulasu waki sabiya meta tisa. 17 Sumba sesabii palongi ja Pandu pa Sapi Ngani, jabiya nu ulasu wa meta komi na nani. 18 Imbau yi mikongu mielezi yeyabiya iyekali lumatu lwa nyumba sunkati yabiya biipambiki sukusola maua gagalengana na mongu na maua gagajanduli. Kila pandu pabiya payekaliwi kwi imbau yi mikongu ji mielezi, wala nga lilibu lokapi lelabonikana.

19 Pandu pu nkati ngani ja Nyumba jaka Bambu Sapanga heji, Solomoni jwalenganaki sumba sapakazika papuje ndi Lisanduku li Lilaganu laka Bambu Sapanga pa bilibeka. 20 Sumba hesi ndi sabiya nu ulasu wa meta tisa nu upana wa meta tisa nu ulasu waki kujenda kunani meta tisa, nasombi bikipambiki kwa zahabu ja sapi. Kabee jalenganaki pandu pukupiiki matambiku kwi imbau yi mikongu ji mielezi. 21 Solomoni jupakilama kwa madini ga zahabu ja sapi pandu pu nkati ja nyumba, na palongi ja sumba su nkati jwalenganakia mikupu nu jwijihatambula mikupu ja madini ga zahabu heji kuhumi upandi gongo mbaka upandi wa pili wa sumba su nkati hesi, sesabiya apambiki sukutumii madini ga zahabu. 22 Nyumba joti su nkati jijikilimi kwa zahabu, kabee jakilima mesa joti jukupiiki matambiku papabi mu sumba su nkati ngani jakilima kwa madini ga zahabu.

23 Jwalenganikia sukutumi imbau yunkongu gu nzeituni imong'umong'u yi iumbi ibeli yeibii na mapapati, kila kimong'ung'u sabiya nu ulasu ukujenda kunani meta nsesi na nusu, jwiibeka mu sumba su nkati ngani. 24 Kila lipapati labiya nu ulasu wa meta ibeli na nusu, ndienu ulasu kuhuma mu lipapati limu mbaka mu lipapati langi wabiya meta nhwanu, 25 Kiumbi sengi mapapati gaki gabiya nu ulasu wa meta nhwanu, iumbi yoti ibeli yabiya ni ipemu yelaye ni liumbu lelale. 26 Ulasu wi kiumbi jumu wabiya meta nhwanu, nu ulasu ukiumbi sengi sela wabiya agolago. 27 Imong'umong'u heyi yabiya ilengini, mapapati gaki gagahatambwiki. Lipapati likimong'umong'u simu lagusa lumatu lumu ni lipapati lengi lagusa lumatu lwa pili, koni gangi gagusini pikilanda ja sumba. 28 Imong'umong'u heyi jwakilama kwa madini ga zahabu.

29 Lumatu lwa kunza nu nkati kila sumba julupambiki sukusola iumbi yeibii na mapapati, mikongu mitendi na maua gagajanduli. 30 Kabee pai ja yumba ja Nyumba jaka Sapanga yunkati na ya kunza jakilimi kwa madini ga zahabu.

31 Sukujingii mu sumba su nkati jalenganaki milyangu sukutumi imbau yu nkongu gu nzeituni. Kujingi mu sumba su nkati ngani pelemu ju ndyangu yalenganakiya liumbu la kona nhwanu. 32 Mu milyangu mibeli ji mikongu ji mizeituni, jwiisola iyumbi yeibi na mapapati ni mitendi na maua gagajanduli, jwijikilima imbau heji ni misolu heji sukutumii zahabu ja sapi. 33 Ndienu jwalenganakia kabee pelemu gogubi na kona nsesi gukujingalia pa sengu. Pelemu ju ndyangu hogu jalenganakiya ku mikongu ji mizeituni. 34 Kwabiya ni milyangu jibeli jejawesa kutulika jejabia alenganaki sukutumii imbau yunkongu gu mibeloshi, na kila gumu gwabiya na bawaba yeyawesa kuguhenga guhogoka kila kipandi panani ja sengi. 35 Panani ji milyangu heji, basola nsolu wi iumbi yeibii na mapapati ni mitendi na maua gagajanduli, jwijipamba sapi misolu heji sukutumii zahabu ja sapi.

36 Jwasenga ukumbi unkati goguwe lumatu lwaki lwabiya na safu itatu ya malibu gaabasiki na limwa la boliti yu nkongu mwelezi yealembiki sapi.

37 Nsingi wa nyumba jaka Bambu Sapanga Solomoni jasenga mu saka su nsesi mu ulongosi waki mwei gu nhwanu gobugukema mwei wa zifu. 38 Nyumba jaka Bambu Sapanga jajomuka kusenga mwei wa nani liina lengi agukema buli mu saka sa komi na moja ukulongosa ejalagalakiya bambu nkolongu Solomoni. Ndienu Solomoni jatumia yaka saba kusenga nu kujomule Nyumba jaka Bambu Sapanga.