1 Abiya jatumbulia kulongosa ku nndema uku Yuda mu saka sa komi na nani su kulongosa kwaka Yelobuamu, mwana waka Nebati. 2 Jalongusa ku Yuda yaka itatu koni jubii ku musi uku Yelusalemu. Amabaki baakemika Amaaka jojwababia mwana waka Abisalomu. 3 Abiya jahenga mahakau agalaga gabahenga atati mundu, wala ngasejwabii jukuhobaleka kwaka Bambu Sapanga, Sapanga waki, ngati ebahenga ahoku baki Adaudi. 4 Pamu na haga, kwandaba jaka Daudi, Bambu Sapanga ampekia Abiya mwana, jojwiibiya bambu nkolongu pandu paki ku Musi uku Yelusalemu. 5 Bambu Sapanga jwahenga hela kwa ndaba Daudi jahengiki gaamboni palongi jaki na ngasejagakaniki malagalaki gaka Bambu Sapanga mu masoba gaki goti, ila pe majambu gaka Ulia, mundu juku Hiti. 6 Kwabii na ngondu kati jaka Lehobuamu na Yelobuamu kipindi soti sukutama kwaka Abiya. 7 Mahengu gangi goti gaka Abiya gajagahengiki gaandikwi mu Kitabu sa Ngombuke yaka Bambu Akolongu buku Yuda. Kwabiya na ngondu kati ja Abiya na Yelobuamu mu kutama kwabu.

8 Ndienu bambu nkolongu Abiya jatenda kuwa na buntanga ku musi waka Daudi na mwana mundu jobukema Asa jwabia bambu nkolongu badala ja atati baki.

9 Mu saka si ishilini su ulongosi waka Yelobuamu, bambu juku Izilaeli, bambu nkolongu Asa jatumbulia kulongosa ku Yuda. 10 Jwalongusa kwa yaka alubaini na moja. Ambuja baki baakemika Amaaka bababi mwana waka Abisalomu. 11 Bambu Asa jahenga majambu gagajetakeka palongi jaka Bambu Sapanga ngati ejahenga Daudi bababi ahoku baki. 12 Jaabenga mu nndema akanalomi baahenga ugoni sukugonalane beni na beni ili kuilumbali isapanga yabu, nukuiboa imong'umongu yela yebabiya akahoku baki biilenganaki. 13 Jwaaboa ambuja baki Maaka ulongosi wa kuba Malikia, ndaba balenganaki kimong'umong'u sa Ashela kisapanga sambomba, ndi Asa jukitunulana nu kukitiniya kimong'umong'u hesi mu ligomba la Kiduloni. 14 Lakini pandu panani pukupiiki matambiku isapanga ngasejupahalabini, hata hela jwombi jwabii na mwoju gukuhobaleka kwaka Bambu Sapanga mu kutama kwaki kwoti. 15 Jwiikelabua yombu yoti mu Nyumba jaka Bambu Sapanga yeyabiya ihimikwi na atati baki, pamu na yombu yaki mweni yela, yombu ya madini ga feza na yeilenganakiwi kwa madini ga zahabu na yombu yengi.

16 Bambu nkolongu Asa juku Yuda na bambu nkolongu Baasha juku Izilaeli, babiya mu ngondu kipindi soti mu ulongosi wabu. 17 Baasha, bambu nkolongu juku Izilaeli jugulapula nndema guku Yuda nu kutumbuli kusenga lumatu mu musi wa Lama, ili juwesa kumpengale mundu jokapi jwiiboka wala kujingi mu nndema goguwe Asa bambu nkolongu juku Yuda jwabiya julongosa, 18 Ndienu bambu nkolongu Asa jajukua madini ga feza na madini ga zahabu goti gagahigali mu kikoku sa Nyumba jaka Bambu Sapanga na mu nyumba jaka bambu nkolongu. Jwiipia na jwaapekia akatumisi baki, jwaatuma ku Damasiko kwaka bambu nkolongu Beni Hadadi jojabii mwana waka Tabilimoni, nsokoo waka Hezioni bambu nkolongu juku Silia, jojabiya julongosa ku Damasiko kupwaaga, 19 "Tujetangania wehapa na nepani ngati ebahenga atati bangu na atati baku, linga nuguleti madini ga feza na madini ga zahabu, na gukotuka kujetangana na bambu nkolongu Baasha juku Izilaeli, ili juboka munndema wango." 20 Ndienu Beni Hadadi jwilijetakia lilobi laka bambu nkolongu Asa, jwaatuma aka kilongosi baakomana ngondu baki, na akomana kondu baki kujenda kujilapu misi juku Izilaeli. Bugukamula musi wa Iyoni nuku Dani nuku Abeli Beti Maaka pandu papabii pambipi nu nhanga uku Galilaya nu nndema woti uku Nafutali. 21 Bambu nkolongu Baasha ejajowana haga jwakotuka kugusenga musi uku Lama jakelubuka ku musi wa Tiliza.

22 Ndienu bambu nkolongu Asa jwaalandila bandu boti buku Yuda, sanga kunndeka hata mundu jumu, ili bagaboa malibu goti ni imbau kuhuma ku musi wa Lama yeyabiya jutumii bambu nkolongu Baasha juku Izilaeli. Bambu nkolongu Asa jwiitumia hindu heyi kusenge musi wa Geba gogubii ku Benjamini na musi uku Mizipa.

23 Majambu goti gajahengiki Asa mu ulongosi waki, kuwesa kwaki nu kusenga misi, goti gaandikwi mu Kitabu sa Ngombuke yaka Bambu Akolongu buku Yuda. Lakini mu kipindi sukusejeka kwaki, Asa jalwala ugonzu wa magolu. 24 Ndienu Asa jwatenda kuwa, buntaga mu matenge gi kibambu mu musi waka Daudi najombi mwana waki Yehoshafati jabiya bambu nkolongu badala paki.

25 Mu saka sa pili su ulongosi waka Asa ku Yuda, Nadabu, mwana waka Yelobuamu, jwatumbulia kulongosa ku nndema uku Izilaeli. Najombi jwalongusa kwa yaka ibeli. 26 Nadabu jahenga majambu mabaja palongi jaka Bambu Sapanga, ngati ebahenga atati baki babaahenga Aizilaeli ahenga mahakau.

27 Baasha mwana waka Ahiya, julikabila la Isakali, ampangila majambu mabaja Nadabu. Kipindi Nadabu pajugujobalia musi uku Gibetoni gowabii wa Afilisiti, 28 Baasha antukalia nu kunkoma Nadabu mu saka sa tatu su ubambu ukolongu waka Asa juku Yuda, najwombi Bahasha jwakuba bambu nkolongu badala jaki. 29 Ejatumbulia pe kulongosa, Baasha jaakoma bandu boti bu lukolu lwaka Yelobuamu, kulengana ni lilobi laka Bambu Sapanga lejapwaga kupete ntumisi waki Ahiya ku musi uku Shilu. 30 Lijambu heli lahengika ndaba Yelobuamu jwahengiki mahakau gagahenga Aizilaeli ahenga mahakau. Lijambu heli luhenga Bambu Sapanga jubiya ninyela ngani.

31 Mahengu gangi goti gaka Nadabu na majambu gangi goti gajahengiki, gaandikwi mu Kitabu sa Ngombuke yaka Bambu Akolongu buku Izilaeli. 32 Bambu nkolongu Asa juku Yuda na bambu nkolongu Baasha juku Izilaeli babia na ngondu kipindi soti su ulongosi wabu.

33 Mu saka sa tatu su ulongosi waka Asa bambu nkolongu juku Yuda, Baasha mwana waka Ahiya, jwatumbulia kulongosa ku Izilaeli kuhumi ku Tiliza. Jwalongusa kwa yaka ishilini nu nnsesi. 34 Baasha jatenda mahakau palongi jaka Bambu Sapanga ngati agalaga gajahenga Yelobuamu, na kwaahenga bandu buku Izilaeli ahenga mahakau.