1 Malikia juku Sheba ejajowana kumanyikana kwaka bambu nkolongu Solomoni, kwa ndaba juku jongana kwaki na Bambu Sapanga, jajenda kwaka Solomoni ili kunndenga sukundaluki maswali gaganonwipi. 2 Jahika ku musi uku Yelusalemu koni jubii na bandu bingi pamu na ngamia yeyabiya itotwi hindu yeinungi ngani na madini ga zahabu pamu na nhupi na hindu yingi ya bei ngolongu. Nukulonge naku goti gagabii mu mwoju waki. 3 Najombi Solomoni anzibua maswali gaki goti gaandaluki, na ngaselabii lijambu lokapi lejwasindwa kunzibu. 4 Malikia juku Sheba jwasangii ngamaa pajamanya umanyi waka Solomoni na ejujibona nyumba jejabia jusengiki, 5 na kabee ejalinga posu jebaleta pamesa jaki, na namuna akakilongosi ba pai jaki ebatama pamesa, na namuna akaatumisi baki ebawatali sapi, na kabee ebabiya abaga hindu ya kunywa na matambiku gabu gukutinia gajabiya jutenda kupiya mu nyumba jaka Bambu Sapanga, jwasangii ngamaa.

6 Ndienu ampwagila bambu nkolongu Solomoni, "Kuneng'ane kwaku nu umanyi waku na majambu goti ganagajowana panabii ku nndema wangu ndi ga sakaka! 7 Lakini ngasenawesa kuhobale majambu haga mbaka enhikiki nukulinga na mweti. Kumbi ngase bambwagi hata nusu jaki, umanyi waku na mali gaku gapetiki majambu gabambwagila. 8 Apengiwi bandu baku! Na apengiwi akaatumisi baku baajema palongi jaku nu kujowanake umanyi waku kipindi soti! 9 Julumbalika Bambu Sapanga, Sapanga waku, jojugupai wehapa, jugubei mu kiteu su ubambu ukolongu wa Aizilaeli! Kwa ndaba Bambu Sapanga jwaapai Aizilaeli yaka yanga na mwisu, jugubei wehapa kuba wabambu nkolongu, ili guendalia kutunza malagalaki na wamboni."

10 Ndienu Malikia juku Sheba ampekia Solomoni zahabu kilu elupu nsesi nukupeta, na hindu yeinungi yingipi malibu ga bei ngolongu. Hindu yeinungi yingipi ngati yela yeandeti bambu nkolongu Solomoni ngaseiwaiki kupitii kabee.

11 Kabee sapwali ja meli yaka Hilamu yeyaleta zahabu kuhuma ku musi uku Ofili, yaleta mipendi jingipi junkongu nsandali na malibu ga bei ngolongu. 12 Najombi bambu nkolongu jijitumia mikongu ji misandali kuba mipengu mu Nyumba jaka Bambu Sapanga, na ja nyumba jaki na kwa ndaba jukulenganake ilimba na zeze ya bandu baajemba. Mipengu ju nkongu nsandali jingi ngati aje ngasejibonikini kabete mbaka lelenu.

13 Bambu nkolongu Solomoni ampekia Malikia juku Sheba kila sindu sejatokulia na sejwaloba, pamu na hindu yengi yeyuye Solomoni jaamua kumpeke kulengana na eayobali akabambu akolongu kuhenga. Ndienu Malikia juku Sheba jwakelabuka mu nndema waki pamu na atumisi baki.

14 Kila saka Solomoni bundetila zahabu kilu elupu ishilini na mbili. 15 Pamu naheyi jajopa kabee kodi kwa bandu baalomba nu kulombesa, kwa akabambu akolongu boti buku Alabia na akolongu bi mikoa juku Izilaeli.

16 Bambu nkolongu Solomoni jwalenganakia ngau mia mbili ya zahabu sukuponda, kila ngau jimu kutopa kwaki kwabiya kilu saba ja zahabu. 17 Jalenganakia ngau isoku soku mia tatu kwa zahabu jukuponda, kila ngau jabiya na kilu jimu na nusu, ndi bambu nkolongu jiibeka mu nyumba jimu jebijikema Nyumba jumu Kiholi suku Lebanoni.

18 Kabee bambu nkolongu jwalenganakia kiteu kikolongu sikibambu sekibii na manyelu, jwikipakia zahabu sapi. 19 Kiteu hesi sabiya na ngasi sita. Pandu panani paki pabiya paingaliwi upandi ukunyuma na sabiya na pandu pukujegamane maboku, na pandu poti pabeli pabiya ni imong'umong'u ya mahimba mabeli kila kimong'umong'u simu sajema upandi gongo na sengi upandi gongi ukujegame kuboku. 20 Kwabiya kabee ni imong'umong'u komi ni ibeli ya mahimba yeyabiya ijemiki, kila ngazi jimu yabiya ijemiki ibeli upandi ago nu upandi gongo. Kiteu su ubambu ukolongu ngati hesi ngasekiwaiki kulenganakewa mu ubambu wokapi gola.

21 Ikombi yoti yukunywele divai yaka bambu nkolongu Solomoni yabiya ya zahabu na yombu yoti yeyabiya mu nyumba ji Kiholi sa Lebanoni yabiya ya zahabu sapi. Ngasesabii sindu sealenganaki kwa madini ga feza ndaba madini ga feza ngasegabii na bei ngolongu ku kipindi hesi. 22 Kwa ndaba bambu nkolongu Solomoni jwabii na meli yingi yeyabia ijenda ku Talishishi pamu na meli yaka bambu nkolongu Hilamu, kila saka sa tatu yundetila Solomoni zahabu, na madini ga feza na manyelu ndembu na majani makolongu na masoku ni ijuni yebiikema Tausi.

23 Ndienu, bambu nkolongu Solomoni jwaapeta akabambu akolongu boti bupu nndema kwa kuba na mali gingi. 24 Bandu bupundema woti babiha na hamu jukunzende Solomoni ili kuubona umanyi yaki goguwe Bambu Sapanga antei kumpeke. 25 Kila jumu wabu anndetila nhupi ya yombu ya madini ga feza na zahabu ni ingobu na hindu yukunungi ya bei ngolongu yebiikema manemane na hindu yukukomane ngondu na falasi na nyumbu kila saka.

26 Solomoni jwakusanya magali gukuhutwa na falasi na baakwelale inyama heyi, jwabiya na magali ga falasi elupu jimu na nne na baakwelale inyama heyi babiya elupu komi na mbili babube jwaabeka mu misi jejibii na pandu pukubeke magali ga falasi na magali gangi jagabeka ku musi uku Yelusalemu. 27 Bambu nkolongu Solomoni jagahenga madini ga feza gabia gingi ngati pe malibu gangi gagayobaliki, ni imbau yunkongu mwelezi yabiya hingi ngati pe imbau imikongu ju nkoju jejimela mulutengu ju nhanga. 28 Solomoni jwalagalakia falasi kuhuma ku nndema uku Misili, nu kuhuma ku musi uku Kilikia kokuje bandu baki baalomba na baalombesa baalombasiya kwa bei ngolongu. 29 Ligali limu lukuhutwa kunndema uku Misili hoku babiya alomba kwa kilu saba ya madini ga feza na falasi jimu alomba kwa madini ga feza kilu ibeli. Babunhenge mahengu gukulomba nukulombesa baka bambu nkolongu apelika magali na falasi heyi kwaalombase akabambu akolongu boti bi milema ja Ahiti na Asilia.