1 Bambu nkolongu Solomoni jwaapai ngamaa akambomba biki geni. Ampala kamwali waka bambu nkolongu Falau, kabee jwaapala akambomba buku Moabu na buku Amoni na buku Edomu na Asidoni na Ahiti. 2 Akambomba bu nndema goguwe Bambu Sapanga jwaakanakia Aizilaeli koni jupwaga, "Mwaajuku akambomba kwabu wala bombi biitola akambomba kwinu, ndaba akambomba haba bankolua mwanganya mwiitumaki isapanga yabu." Hata ela Solomoni jwaapai ngamaa akambomba bi kigeni. 3 Solomoni jwabii na akambomba mia saba, boti babiya aka kamwali bikibambu na jabiya kabee na akambomba mia tatu bababia atumisi baki. Akambomba haba bunhenga Solomoni jujileka indele jaka Bambu Sapanga. 4 Solomoni pajabii nseja, akahanu baki bunkolua juitumakia isapanga yengi, wala ngase jwahengiki majambu gagunndengani Bambu Sapanga, Sapanga waki kabee, ngati atati baki Adaudi ebahenga. 5 Ndienu, Solomoni jwikitumakia kisapanga sa mbomba sa bandu buku Sidoni sebikikema Ashitaloti na akilumbalia kisapanga Moleki, kisapanga sesuse Aamoni pabikilumbalia kwabiya matondu kwaka Bambu Sapanga. 6 Henu, Solomoni jwahenga ubaja palongi jaka Bambu Sapanga, wala ngaseampwatiki Bambu Sapanga sapi ngati atati baki Adaudi ebahenga. 7 Panani jikitombi sesabii upandi golipiti lyoba uku musi wa Yelusalemu, Solomoni jupasenga pandu pukukimbali kisapanga sebikikema Kemoshi, sa bandu buku Moabu papupe Amohabu pababia akipiiki matambiku lihengu heli labia matondu kwaka Bambu Sapanga na kabee jasenga pandu pukumpiiki matambiku kisapanga Moleki sa bandu buku Amoni, lihengu heli labia matondu kwaka Bambu Sapanga 8 Kabee jwaasengila akaahanu baki boti bi kigeni pandu pukupogale ubani na pukupiiki matambiku isapanga yabu.

9 Ndienu, Bambu Sapanga, Sapanga jwa Aizilaeli, anhengila inyela Solomoni, kwa ndaba ngasejwaendali kundumbali Bambu Sapanga, Sapanga jwa Aizilaeli kanzika jaki, jojabiya ampiti mala pabeli, 10 hata ngati Bambu Sapanga andakalia jwiilumbali isapanga yengi, lakini Solomoni ngasejwapwatiki mihilu heji. 11 Ndienu Bambu Sapanga ampwagila Solomoni, "Kwa ndaba guamwi kuhenga ngati henugulagalaki, nu kulitunu lilaganu langu lenilihengiki na wehapa, nu kusindwa kupwata mihilu jangu nu kungana, sakaka isinugubalula ubambu wakuipandi ibeli nukumpeke jumwa kati ja atumisi baku. 12 Hata hela, kwa ndaba ja Atati baku Adaudi, ngahengi hela mu kutamaa kwaku, ilakini nagubalula ubambu hogu pajwiilongusa mwana waku. 13 Hata hela nganagubalu ubambu woti, lakini nandekila mwana waku bandu bi likabila limu, kwa ndaba juku ntumisi wangu Daudi, na kwa ndaba ja musi uku Yelusalemu goguwe nuguhagwi gubiya gwangu."

14 Bambu Sapanga anhenga Hadadi jojabii julukolu lwaka bambu nkolongu juku Edomu, kuba mbaja waka Solomoni. 15 Kipindi Daudi pajwabia ku Edomu, Yoabu jojwabii nkolongu wa alonda jwajenda hoku kwaataga Aizalaeli bababia baakomiki ku ngondu, ndaba Yoabu jwabia jwaakomiki akanalomi boti buku Edomu. 16 Yoabu na Aizilaeli boti batama hoku kwa miei sita, mbaka pajwajomula kwakoma akanalomi boti buku Edomu. 17 Lakini Hadadi jojwabii nkombu kipindi sela jwatilila ku nndema uku Misili pamu na bandu asokopi buku Edomu, akatumisi baatati baki. 18 Hadadi na ajaki bajenda kuhuma ku Midiani jwaajukua bandu bangi ku Palani, bajenda nabu mbaka ku Misili kwaka bambu nkolongu Falau. Najombi ampekia Hadadi nyumba, jwalagalakiya ampekia posu, na ampekiwa pandu pukutama. 19 Falau ampai ngamaa Hadadi, na ampekia nndamu waki nnuna waka malikia Tepenesi nhwanu waka Falau, Hadadi anzukua jubiya nhanu waki. 20 Nndongu uka malikia Tepenesi hoju ampapila Hadadi mwana joankema Genubati. Genubati jwakolila na bana bikibambu kwaka malikia Tapenesi mu nyumba jaka Falau, pamu na bana bikibambu.

21 Hadadi pajwabia ku misili jajowana kubanga Daudi na Yoabu nkolongu jwa akomana ngondu buku Izilaeli, akuwiki, ampwagila Falau, "Guneka muja kunndema wangu."

22 Lakini Falau andalukia, "Boo, gukosiki sindu bole mbaka gupala kubuja ku nndema wako?"

Najombi Hadadi ampembalakia sukupwaga, "Gunekakia pe nyendaje."

23 Sapanga anhenga kabe Lezoni mwana uka Eliada, jubiya mmbaja waka Solomoni. Lezoni jwabiya antiliki bambu waki, bambu Hadadezeli juku Soba. 24 Daudi ejabiya jaakomiki bandu buku Soba, Lezoni jwaakusanya bandu kuunda likundi lahuni, najombi ndi jwabiya kilongosi wabu. Ndienu bajenda ku Damasiko, nukugukamu musi nukugulongosa. 25 Lezoni jwabiya mmbaja wa Aizilaeli mu masoba goti gu ubambu uka Solomoni, anhengila ubaja ngani Solomoni ngati hejwahenga Hadadi. Ndienu Lezoni jwalongusa ku Silia koni jwaasuka ngamaa bandu Aizilaeli.

26 Yeleboamu mwana uka Nebati, jojabii jwilikabila la Efulaimu juku Seleda, ntumisi waka Solomoni, jojuwe amabu baki bababia mmbomba jo awii alami baki babaakemika Zelua, na kabee ankana bambu nkolongu. 27 Hela ndi Yeleboamu eankana bambu nkolongu Solomoni. Solomoni jwayelalia mabomba nukusenga ngasi yebiikema Milo, yeyajenda ku lumatu lwa musi uka Daudi, atati baki, 28 Yelobuamu jwabonikana kuba nkombu jojubii nganganganga na jojubii na makili. Ndienu Solomoni pajwabona kubanga nkombu hoju jukasana ngamaa kuhenga mahengu, ndi ambeka jubiya jujemale bandu baahenga lihengu sukulasimiswa lebabiya ahenga bandu bulukolu lwaka Josefu. 29 Lisoba limu Yelobuamu pajwabiya nsapwali kuhuma ku Yelusalemu, nndota jobunkema Ahiya juku Shilu jwaketanga naku mwiindela koni jubii kanzika. Ahiya jwabiya juweti ingobu inyai. Boti abeli babiya kanzika jabu kumigonda. 30 Ndienu, Ahiya jahula ingobu jaki inyai, nu kulijendulana ipandi komi ni ibeli, 31 ndienu, ampwagila Yelobuamu ana, "Ujukua ipandi komi, ndaba Bambu Sapanga, Sapanga jwa Aizilaeli, jupwaga anana, ‘Linga, nyenda kugubalulana ubambu ukolongu uka Solomoni nukumpeke mwanganya mwa bandu ba makabila komi.’ 32 Lakini jwombi nanndekila likabila limu kwa ndaba jaka Daudi ntumisi wangu, na kwa ndaba ja musi uku Yelusalemu gonugusagwi gubiya gwangu mu makabila goti ga Aizilaeli. 33 Niihenga hela ndaba Solomoni jutei kuneka, nukuilumbali isapanga ikigeni yebiikema Ashitaloti kisapanga sambomba sa bandu buku Sidoni ni kisapanga Kemoshi sa bandu buku Moabu ni kisapanga Moleki sa bandu buku Amoni. Solomoni junganiki nepani, nu kuhenga kihakau palongi jangu, wala ngasejwapwatiki mihilu jangu na malagalaki gangu ngati Daudi atati baki ebahenga. 34 Hata hela nganannyagi ubambu woti, ndaba nunhengiki jubia bambu nkolongu mu masoba gukutama kwaki kwoti kwa ndaba jaka Daudi ntumisi wangu jonabiya nunhagwi, na jombi jwapwatiki mihilu jangu na malagalaki gangu. 35 Lakini nannyaga mwana waki ubambu ukolongu hogu, na nepani nagupekia wehapa makabila komi. 36 Mwana waka Solomoni hoju nanndekila likabila limu, ili kipindi soti mu kibeleku sukuntumisi wangu Daudi jwiibiya mundu jojulongosa ku Yelusalemu, musi gonuhagula gubia pandu pangu pukunumbali. 37 Ndienu, wa Yelobuamu, naguhenga gubiya wa bambu nkolongu juku Izilaeli, nanagu wiilongusa kulengana na ewipala. 38 Ana guhengiki goti ganagulagalakia, ana gupwatiki ndela jangu nepani, nukuhenga gaamboni palongi jangu, su kupwata mihilu jangu na malagalaki gangu ngati ntumisi wa Daudi ejahenga, ndienu nepani niibiya na wehapa kipindi soti. Nakusengila lukolu lu ubambu lolwitama yaka yingi ngati enuhengila Daudi. 39 Ndienu kulengana na haga naang'alisa bana baka Daudi, lakini nga kipindi soti."

40 Kwa ndaba heji, Solomoni jwalenga kunkoma Yelobuamu, lakini Yelobuamu jwatilila ku Misili kuka bambu nkolongu Shishaki, jwatama hoku mbaka Solomoni pajwakuwa.

41 Majambu gangi gajahengiki Solomoni nu umanyi waki, goti gaandikwi mu kitabu sa mahengu gaka Solomoni. 42 Solomoni jwalongusa yaka alubaini mu nndema woti uku Izilaeli, koni jutama ku musi uku Yelusalemu 43 Ndienu, Solomoni jatenda kuwa, buntaga ku musi uka Daudi atati baki. Lehoboamu, mwana waka Solomoni, jwalongusa badala jaki.