1 Apilisti ebabiya ajukwi kwa makili Lisanduku li Lilaganu, batotula kuhuma musi uku Ebenezeli mbaka musi wabu uku Ashidodi. 2 Ndienu bilipelika Lisanduku li Lilaganu kwaka Bambu Sapanga mu nyumba ji kisapanga wabu Dagoni nukulibeka pambipi nasu. 3 Kilabu jaki pulukela, bandu ba musi uku Ashidodi pabajumuka bikibona kimong'umong'u saka Dagoni kihabwiki lutumbu pai palongi ji Lisanduku laka Sapanga. Bikijemika kabee kimong'umong'u sa Dagoni nukukibeka kabee pandu jaki. 4 Lakini kilabu jaki pulukela pabajumuka, bikibona kabee kimong'umong'u sa Dagoni kihabwiki kabee kimutu pai palongi ji Lisanduku laka Bambu Sapanga, kimutu na magolu na maboku giki kimong'umong'u se hesi yoti yabia itunukini, sabiya kigoni pai pu luhuka ju nndyangu. Lahigali lipesi likimong'umong'u sa Dagoni pena. 5 Kwa ndaba heji agolu baka Dagoni na boti baajingi kunndumbali Dagoni ku Ashidodi, paajingi mu nyumba jaka Dagoni ngaseakanyati felemu ja nyumba jaka Dagoni mbaka lelenu.

6 Bambu Sapanga jaalapula ngamaa na kwaajogoo bandu buku Ashidodi. Jaalapula mbaka bandu bapambipi jabu, sa kwaalete ugonzu wa maputi. 7 Ndienu bandu buku Ashidodi, pabagabona majambu gagapatiki, bapwaaga, "Bambu Sapanga jwa Aizilaeli jutulapu ngani twepani ni kisapanga witu Dagoni. Ndienu Lisanduku li Lilaganu laka Bambu Sapanga ngaliwesi kutama kwitu." 8 Ndienu, baatuma bandu na kwaakusanya akolongu boti buku Pilisti na kwaalalukii, "Boo twiihenga kike ni Lisanduku laka Sapanga wa Aizilaele?"

Akolongu babu bajibua, "Lisanduku laka Sapanga juku Izilaeli heli mpelika ku Gati." Ndienu bilipelika ku musi uku Gati. 9 Lakini ebabia alipeliki ku Gati, Bambu Sapanga jugulapula musi we hogu, jwaleta lujogopu lukolongu ku musi, najaapula akanalomi ba musi we hogu, akakombu na aseja sakwaalete maputi. 10 Ndienu, bilipelika Lisanduku laka Sapanga heli ku musi uku Ekiloni. Lakini Lisanduku laka Sapanga heli palahika hoku, bandu ba musi we hogu bapega keleli, "Butuleti Lisanduku lende laka Sapanga wa Aizilaeli ili kutukoma twepani na bandu bitu." 11 Ndienu baatuma bandu na kwaakusanya akolongu buku Apilisti na kwaapwagi, "Nkelubua Lisanduku laka Sapanga wa Aizilaeli komwijukua, ili latukoma twepani pamu na bandu bitu." Bahenga hela ndaba kwabii nu lujogopu lukolongu mu musi gwoa ndaba Sapanga jabiya jaalapu ngamaa. 12 Bandu bingi batenda kuwa, na babahigali gaapata maputi mbaka kilelu sabu sahika kwi isapanga yabu ili yaajangatiya.