1 Kipindi se hesi Apilisiti baketangana pamu ili bakakomana na Aizilaeli. Aizilaeli babeka likambi labu ku Ebenezeli na Apilisti babeka likambi labu ku Afeka. 2 Alonda ba Apilisti baaalapula Aizilaeli na ebabiya atenda kukomana, Aizilaeli batenda kusindwa na bandu elupu nsesi batenda kukomeka mu lubanza lwa ngondu. 3 Kipindi pababiya akelabuka mu likambi, aseja buku Izilaeli balaluana, "Ndaba jakii Bambu Sapanga jwaalei Apilisti atuwesa leleno? Tuleta Lisanduku li Lilaganu laka Bambu Sapanga kuhuma ku Shilu ili awesa kujenda pamu na twepani nu kutuokoa kuhuma kwa abaja bitu." 4 Ndienu baatuma bandu kujenda ku Shilu, nabombi bajukua Lisanduku li Lilaganu laka Bambu Sapanga Jwana Makili goti, jojutama pi kiteu saki sa mwandi kati ji iumbi yeibii na mapapati. Nabombi bana abeli bala baka Eli Hofini na Finehasi bababii pamu ni Lisanduku li Lilaganu laka Bambu Sapanga.

5 Kipindi Lisanduku li Lilaganu palahika ku likambi, Aizilaeli boti bapega keleli kwa sauti ngolongu hata luombi lwatenda kubagaja. 6 Apilisti pabajoa kujamalii kwabu baalalukiya, "Boo, keleli haye yoti mu likambi la Aebulania ibii na mana bole?" Pabamanya kubanga Lisanduku li Lilaganu laka Bambu Sapanga labiya lihikiki mu likambi la Aizilaeli, 7 Apilisti batenda kujogopa bapwaaga, "Isapanga ijingii mu likambi labu. Mwisitukiboni! Ndaba ngaseliwaiki kupitii lijambu ngati hale. 8 Mwisitukiboni! Nya jojiwesa kutuoko kuhuma mu maboku mwi isapanga yana makile? Heyi ndi isapanga yeyaakoma Amisili kwa kila aina na kukomana ku lukoba. 9 Ndienu Apilisti muligangamalisa mwoju. Mmbia mommbii nganganganga ili mwiikuba mwaatumwa ba Aebulania ngati ebabii atumwa bitu. Mmbia nganganganga ngati akanalomi nu kukomana."

10 Ndienu Apilisti batenda kukomana naku sanalomi, Aizilaeli basidwa na kila mundu jakelubuka kunyumba jaki. Lisoba leheli bandu bingi batenda kukomeka, Aizilaeli bababiya ajenda kwa magolu bahiki elupu selasini batenda kuwa. 11 Lisanduku li Lilaganu batenda kujukuu kwa makili na Apilisti na bana abeli baka Eli babube ndi Hofini na Finehasi batenda kukomeka.

12 Lisoba alelalela mndonda jumu jukuhuma likabila laka Benjamini jabutuka kuhuma ku nstali wa palongi nukukomana mbaka ku Shilo koni ingobu yaki ijendukini koni jubii nu luombi mu umutu. 13 Eli jabiya ni kiholu ndaba ji Lisanduku li Lilaganu, jabiya jutemi pi kiteu saki, mulutengu ji indela koni julingalii. Mundu jola pajahika ku musi nukulandi majambu haga, bandu ba misi joa balela kwa sauti ngolongu. 14 Eli pajajoa kwa sauti ji kilelo, jalalukiya, "Keleli haye ndi ya kike?" Nndonda jola jajenda nnyata kwaka Eli ili kumpwagi majambu ge haga. 15 Kipindi sehesi, Eli jabiya na yaka tisini na nani na miu gaki gabiya gansegalinga kabee. 16 Mundu jola ampwagila Eli, "Nepani nhuma kukukomana sajenu, ndiliki kuhuma kukukomana lelenu."

Eli anndalukiya, "Mwana wangu majambu ge hoku gabi bole?"

17 Nndonda jojabiya juletiki majambu jola japwaaga, "Aizilaeli baatiliki Apilisti. Kabee bandu bingi baakomiki ngamaa kati ja Aizilaeli. Na bana baku boti abeli Hofini na Fineasi baakomiki, na Apilisti ajukwii Lisanduku li Lilaganu laka Sapanga."

18 Mundu hoju pajalogula pee Lisanduku li Lilaganu laka Sapanga, Eli jahabuka pai kuhuma pikiteu saki pulutengu ju ndyangu, Eli pajabiya juhabwiki hela hingu jaki jabiya jitunwiki ndaba jabiya nseja ngamaa na jabiya nneni, najombi jatenda kuwa. Eli jabiya mundu jojutemu ku Izilaeli kwa yaka alubaini.

19 Kabee kwapitila ana, nkowani waka Eli yani nhwanu waka Finehasi, kipindi sehesi jabiya jubii ni kitumbu, na masoba gaki gu kujipungua gabiya gaegalii. Pajajoa ana Lisanduku li Lilaganu laka Sapanga atei kulijuku na akowanu baki, hata nu nndomi waki jutei kuwa, masoba gaki gukupapa gabiya gahegali pajajoa haga jatenda kupapa lakini jabiya nu usungu nkolongu. 20 Ndienu, pajabia jutenda kuwa, akammbomba bababia atenda kunzangatii bumpwagila, "Wijogopa ndaba gujipungwi mwana mwanalomi." Lakini jombi ngasejajibua lilobi, wala ngasejajoaninya. 21 Najombi ankema mwana waki Ikabodi mana jaki, "Ulumbii waka Sapanga atei kuguboa ku Izilaeli," jabiya na mana ji Lisanduku li Lilaganu labiya alinyagiki, kabee akowanu baki nu nndomi waki boti akuwaiki. 22 Japwaaga, "Ulumbi waka Sapanga guboi ku Izilaeli ndaba Lisanduku li Lilaganu laka Bambu Sapanga atei kulijuku."