1 Ndienu Apilisti baakusanya alonda babu ku Soku, musi gogubi ku Yuda, tayali kukukomana. Babeka kambi pandu pamu pabapakema ku Epesu Damimu pikilanda ja Soku nuku Azeka. 2 Sauli pamu na Aizilaeli bakusanyika, nu kupega kambi mu ligomba la Ela. Bilipanga kukomana na Apilisti. 3 Apilisti bajema pikitombi upandi gumu na Aizilaeli bajema pikitombi upandi gongi, pikilanda jabu kwabii ni ligomba.

4 Kuhuma mu likambi la Apilisti, japitila mundu jumu jobunkema Goliati jojubii nganganganga, mwenei jwa musi wa Gati. Ulasu waki wabiya guhegale kuba mita itatu. 5 Kumutu jawati kopia ja shaba, na dilii ja shaba jukulikengale mikoa pikigamba jejibii na kilu hamsini na sita. 6 Magolu gaki kabee gakabii na hindu yukulikenga ya shaba, mumabega gaki jatotwi nkoa wa shaba. 7 Mpini gu nkoa waki wakabii ngati mpengu goaloke, ni kimutu sunkoa waki sabia kilu saba. Ingau jaki jatotwi mundu jongi jojabii julonguli. 8 Goliati jajema na kwaapege keleli alonda buku Izilaeli, japwaaga, "Nhenga kyani pamba? Boo nhikiki kukomana ngondo? Nepani nu Mpilisti, mwanganya ndi mwaatumwa baka Sauli. Nhagula mundu jumu juhika kukomana na nepani. 9 Junhwesa nu kungoma, twepani twiibiya twaatumwa binu. Lakini ananunhwesiki nu kunkoma, mwanganya mwibiya mwaatumwa bitu." 10 Ndienu Mpilisti hoju jaendaliya kupwaaga, "Naapala alonda buku Izilaeli lisoba lende kumpia mundu jumu juhika kukomana na nepani." 11 Sauli pamu na alonda boti buku Izilaeli pabajoa malobi haga kuhuma kwa Apilisti, bahangajiki ngamaa nu kujogopa ngamaa.

12 Daudi jabiya mwana waka Yese, mundu juku Efulati kuhuma ku Betileemu nndema uku Yuda. Yese jabiya na bana nani akanalomi. Kipindi Sauli pajabii bambu nkolongu, Yese jabii nseja, mundu jojubii na yaka hingi. 13 Bana akolongu atatu baka Yese, Eliabu kibeleku su utumbuli na Abinadabu jojapwata Shama jwa tatu, babiya apiti pamu na Sauli kukomana. 14 Daudi ndi jojabii nsoku jwa boti. Bana boti atatu akolongu babiya apiti pamu na Sauli kukomana. 15 Hata ngati Daudi pukutumbuli jabia jujenda kipindi soti kwaka Sauli, jakelubuka kunyumba ku Betileemu kulima makondoo ga atati baki.

16 Kwa masoba alubaini, pulukela na pakamii, Mpilisti Goliati japitila pakwendu, jujemika na kwaalongama alonda buku Izilaeli.

17 Lisoba limu Yese ampwagila Daudi, "Apelakiya akaalongu baku mandotu kilu komi na mabumunda komi. Waapelakiya nnyata ku likambi. 18 Nu nndonda waki nkolongu ji kikundi sa alonda elupu mpelakiya ipandi komi ya mahuta ga masiba gagandiki gabagakema jibiini. Wakaalinga akalongu baku aendalee boo na henu winetila majambu gabu." 19 Kipindi sehesi bambu nkolongu Sauli, akaalongu baka Daudi na alonda boti buku Izilaeli babiya abii ku ligomba luku Ela, akomana ngondu na Apilisti.

20 Kilabu jaki Daudi jajumuka lukela ngani jagaleka makondoo anndekila jojulima. Jajukua posu nu kujenda ngati atati baki Yese ebabiya bunndagalaki. Ejabia mu likambi la Aizilaeli, jaaketaninya atenda kulipanga pandu pabu pukukomana babiya ajemba miambu jukugangamalisana mioju kukukomana. 21 Alonda buku Izilaeli na alonda ba Apilisti bilipangiki kukomana ngondu, alonda babiya ahegalane ili kukomana. 22 Daudi ankabisa posu mundu jojutunza misigu, jaabutukiya alonda, nukujenda kwaalamuki akaalongu mundu. 23 Ejabiya julongee nabu, Goliati Mpilisti jojubii nganganganga kuhuma ku Gati japitila palongi ja alonda buku Izilaeli ngati ejayobali. Najombi Daudi anzoanaki sapi ngamaa. 24 Aizilaeli pabummbona Goliati batenda kutila nukujogopa ngamaa. 25 Bapwaganinya, "Boo, bumbweni mundu jola jojapitalile? Kyee sakaka jupiti kwaalongama Aizilaeli. Bambu nkolongu Sauli ampekiya mali gingi mundu jokapi joakoma mundu hajo. Kupeta goti haga antogulisa kamwali waki jubiya nhwana mundu. Kabee, bandu ba atati baki bibiya alekakiwi na ngabiilepi kode."

26 Daudi jaalalukiya bandu bababii pambipi nabu, "Boo, mundu joankoma Mpilisti hajo nukujikomboo Izilaeli kulengana ni iyoni haye banhengila kyane? Nya Mpilisti hoju jwanga kusekuliwa jandu juwesa boo kwaatondo alonda baka Sapanga jojubii mwome?" 27 Bandu bumpwagila ana eapwagiki pu utumbuli kupete mundu joankoma Goliati.

28 Lakini Eliabu kaka nkolongu waka Daudi pajajoa Daudi jakalongila na bandu, anyomila Daudi nu kupwaaga, "Ndaba jakii kuhika kongone? Boo, makondoo masokopi gala gunndeki nyanye ku lukoba kola? Manyiki wehapa gubii ni ing'omu nugunzanza. Guhiki pe kulingali ngondu."

29 Daudi jajibua, "Henu nndei kike? Boo ngasembalika lee hata kulaluki pena?" 30 Daudi anng'anambukiya mundu jongi nukunndaluki kabee lijambu alela, na kila joanndalukiya japata lijibu alelale.

31 Bandu bangi babunzoa Daudi ejaapwaaga, bajenda kumpwagi Sauli. Najombi Sauli jaalagalakiya bunkema. 32 Daudi ampwagila Sauli, "Mundu jokapi jwihangajika mmwoju jaki kupete Mpilisti hajo. Nepani ntumisi waku ngiti nyenda kukomana naku."

33 Sauli ampwagila Daudi, "Wehapa ngaguwesi kujenda kukomana naku Mpilisti jolajola. Wehapa gu nkombu unsoku pena, lakini mundu hajo jubii mu kukomana ngondu tumbuka pu ukombu waki."

34 Daudi ampwagila Sauli, "Nepani ntumisi waku nyobali kulima makondoo ga atati bangu. Kila lihimba au kinyama sebikikema dubu ejihika kukamuu makondoo, 35 nepani nilikagula nukukomana naku, nukulioko likondoo mu nndomu jaki. Ana lihimba au kinyama sebikikema dubu analipala kungoma nepani ngamula nhingu jaki, nukulihabu pai nu kulikoma. 36 Nepani ntumisi waku ngomiki mahimba gingipi ni kinyama sakikema dubu hingipi. Henu hata mpilisti jwanga kunseku jandu hajo, jojuwe jaalongama alonda baka Sapanga jojubii mwomi, jibiya ngati haba. 37 Bambu Sapanga jojunhokwi muyobu ya mahimba na dubu, jiinhokua kuhuma kuku Npilisti hajo."

Sauli ampwagila, "Jenda najombi Bambu Sapanga jubiya pamu na wehapa." 38 Sauli anhwatika Daudi ingobu yaki yukukomane, anhwatika na kopia jaki ja shaba kumutu ni likoti laki lukuyekale pi kigamba. 39 Daudi jabopula upanga waka Sauli, jalenga kujenda, lakini jatenda kusindwa ndaba ngasejiiyobali ingobu ngati heyi. Ampwagila Sauli, "Nganhwesi kujenda kukomana koni nhweti ingobu yenze, ndaba nepani ngaseniiyobali." Ndienu jatenda kuhula. 40 Daudi jajukua ndonga jaki mukuboku, jahagula malibu nhwanu ga sapi kuhuma mu kalosi, jagajegala mukapuku kaki kukulimi. Kombeo jaki mu kuboku jaki, jatumbuliya kunzende Goliati mundu juku Filisti.

41 Mpilisti jola jatumbuliya kunzende Daudi, na jombi jojutoto ingau jaki jubii palongi jaki. 42 Mpilisti jola pajalinga nu kunndingalii sapi Daudi, jatenda kunndongama, ndaba Daudi jabiya nkombu pena, jojubii na yega ja sapi na jojunyambiki. 43 Goliati anndalukiya Daudi, "Henu nndonga heji ndi ja kike? Guholale nepani ndi jimbwa mbaka kunhiki na nndonga?" Nplisti hoju anndapila Daudi kwaka isapanga yaki. 44 Npilisti ampwagila Daudi, "Nhika kwangu! Yega jaku naipekiya ijuni yu nnani ni inyama yu mukioli!"

45 Lakini Daudi ampwagila Goliati, "Wehapa gunhiki nepani ku upanga nu nkoa na simi. Lakini nepani nuguhiki wehapa ku uwesu waka Bambu Sapanga jwa alonda. Sapanga jwa alonda buku Izilaeli, jojuwe wehapa watenda kuntondo. 46 Lisoba la lelenu, Bambu Sapanga ngiti junyangatiya nuguwesa. Nagulekala pai, nagusekula kimutu saku, na yega ya alonda ba Apilisti naapekiya ijuni yu nnani ni inyama imwikioli. Ndienu nndema gwoti pagwiimanya jubii Sapanga jwa Aizilaeli. 47 Bandu boti babakusanyiki pamba lelenu, biimanya ana Bambu Sapanga ngasejupalika kuba ni mikoa wala simi ili kwaokoa bandu. Heji ndi ngondu jaka Bambu Sapanga, najombi jaanhenga mwanganya mwaawesa."

48 Goliati jatumbuliya kabee kunzendee Daudi. Daudi jabutuka imbelu kujenda mu nstali gukukomana ngondu ili kulapula. 49 Jajingia kuboku kwaki mu mpuku waki, japia lilibu limu jalekala kombeu jaki, anndapula Goliati pamiu jaki, lilibu lajendula pamiu jaka Goliati nu kukaju kimutu. Goliati jahabuka pai sumunyuma. 50 Ndienu Daudi eanhwesa Goliati ku likombeu laki ni lilibu. Anndapula Npilisti jola nu kunkoma. Daudi ngasejabii nu upanga wokapi mu kuboku jaki. 51 Ndienu Daudi, jajombatika imbelu jajema panani jaka Goliati, jaholumula upanga waka Goliati gowabi mu nhaku waki, ankoma Goliati sukunseku umutu waki.

Apilisti pababona nkolongu wabu bunkomiki, batilaninya imbelu. 52 Ndienu, bandu buku Izilaeli na bandu buku Yuda pabatumbuliya kupega keleli yu kuwesa, baapwataliya Apilisti mbaka ku Gati, mu nndayangu uku Ekiloni hata Apilisti babaalimingi ku ngondu baenii ngamaa tumbuka mwiindela ku Shaalimu mbaka ku Gati nuku Ekiloni. 53 Aizilaeli pabapita kwaapwatali Apilisti, banyaga kila sindu sesabii mu likambi labu. 54 Daudi jajukua kimutu saka Goliati, Npilisti jikipelika ku musi uku Yelusalemu. Lakini hindu yukukomane yaka Goliati jiibeka mu lihema laki.

55 Sauli paammbona Daudi jujenda kukomana nu Npilisti Goliati, anndalukiya Abineli, nndonda nkolongu jwa alonda baki, "Abineli, hajo mwana waka nyane?"

Abineli jajibua, "Bambu nkolongu ngati egutama nepani ngakumanya."

56 Bambu nkolongu Sauli anndalukiya, "Henu lalukiya jonioju we mwana waka nyanye."

57 Apalapa Daudi pajakelubuka baada jukunkoma Goliati, Abineli anzukua nukumpeleka kwaka Sauli. Kipindi sehesi Daudi jabiya jakona jutotwi kimutu saka Goliati mu kuboku jaki. 58 Sauli anndalukiya Daudi, "Nkombu, wehapa wa mwana waka nyanye?"

Daudi jajibua, "Nepani mwana waka ntumisi Yese, kuhuma ku musi uku Betileemu."