1 Ndienu, Daudi jatila kuhuma ku musi uku Nayoti ku Lama, jajenda mbaka kwaka Yonasani, ampwagila, "Nhengiki kike? Boo, likosa langu nepani kike? Naahengi atati baku kihakau bole mbaka apala kungoma?"

2 Yonasani jajibua, "Ngaela! Ngagukuwe! Linga, atati banguambwagi hindu yoti yeahenga kikubi sindu sokapi kikolongu au kisoku. Ndaba jakii anhiya alele? Ngaela ekwiibiya jene."

3 Lakini Daudi jalapa kupwaga, "Sakaka atati baku amanyiki sapi pena egummbai, na aholale kuguhiya lijambu leheli ili wiiyoma pabalihenga. Lakini, kwa namuna jokapi jela napa kwaka Bambu Sapanga jojubii mwomi, na wehapa egubii wa mwomi, ndaba nepani nhegali kuwa."

4 Yonasani ampwagila Daudi, "Sokapi sewakipala nhenga ngiti ndenda kuguhenge."

5 Daudi ampwagila, "Kilabu ndi tipati ja mwei kupita, nanepani kupalika kuba pamesa kula pamu na bambu nkolongu. Lakini neka, nakajoba ku litui mbaka pamalabu pakamii. 6 Atati baku ebakalinga ngasemii pakula posu, anabugulaluki majambu gangu, ndienu wakaapwagila, ‘Daudi junobiki ngamaa nunnzetakaliya jujenda ku musi jaki ku Betileemu, jakabiya mu matambiku ga kila saka pamu na alongu baki.’ 7 Ana gulibweni hale ndi laamboni, ndienu gumanya lijambu laki panani jangu ndi liliya. Ana ngahela ndi wiimanya mpangu waki kwangu nepani ndi guliya. 8 Ndienu guhengila ikia yaku ndaba guhengiki Lilaganu na Bambu Sapanga. Nanepani ntumisi waku, palongi jaka Bambu Sapanga. Lakini ana nhengiki likosa henu gungoma wehapa wamweti, ila wiimbeleka kwa atati baku anngoma."

9 Yonasani jaapwaaga, "Kotuka kuholale hela! Lakini anakwakabii ambwagi sindu sokapi atati bangu apala kugukoma wehapa, boo, nganukugupwagile?"

10 Daudi jalalukiya, "Kwibiya boo, ana atati baku bibiya bugupwagi su ukale?"

11 Yonasani annzibua, "Nhika tujenda ku litui!" Ndienu, batenda kujendane. 12 Yonasani ampwagila Daudi, "Bambu Sapanga, Sapanga jwa Izilaeli, nu jubiya mundu jojulingali nu kujoane. Kilabu au pamalabu, kipindi ngati senze naalalukiya atati bangu. Ana jagulongaliya malobi ga sapi niitenda kugupwagila. 13 Lakini ana atati bangu apala kugukoma na nepani ngasenugupwagi ili gujenda pandu patali pawibiya wa mwome, nala Bambu Sapanga jungoma. Bambu Sapanga nu jubiya pamu na wehapa ngati ejabiya pamu na atati bangu." 14 Ana niendaliya kuba na mwomi ndienu winangia upali wa sakaka waka Bambu Sapanga lakini ana nguwiki, 15 kabee wikotoka kwaatende uamboni akaalongu bangu sukuhobaleka masoba goti ganga na mwisu. Hata Bambu Sapanga pajaakoma tipitipi abaja baku kuhuma ku nndema, 16 ndienu Yonasani jahenga lilaganu na nyumba jaka Daudi jaapwaaga, "Bambu Sapanga jaakoma aka abaja baku."

17 Ndipala, Yonasani ampwagila Daudi julapa kulengana nu upali waki jombi Yonasani, ndaba ampai ngati ejilipala mweni. 18 Ndienu ampwagila Daudi, "Ndaba kilabu ndi tipati jukubonikana mwei, bandu biibona hotuhotu kubanga gubii, ndaba kiteu saku sibiya pangwendu. 19 Kabee pamalabu bandu bagukosa ngani. Lisoba le eli jenda pandu papuje wajoba kipindi lijambu lende palabii lakona, wakajoba pambipi ji lilibu luku Ezeli. 20 Nepani niihoma misali mitatu pulutengu ngati nikihoma sindu sengi. 21 Ndienu, naantuma ntumisi wangu jujenda kutaputa misali heji. Ngati ananumpwagi, ‘Linga misali haje jibii upandi waku hogu wajijukua,’ hoku kwibiya kulangi kubanga gubii wa mwomi, nanagu wiipitila kuhuma pandu pagujobiki, ndaba napa kwaka Bambu Sapanga jojubii mwomi, kubanga wibiya wa mwomi sanga kujogopa sokapi. 22 Lakini ananumpwaagi, ‘Linga mikoa jibii palongi jaku,’ hapa wiiboka, ndaba Bambu Sapanga jiibiya jupala kujenda kutali. 23 Kulengana na malagi gatubekanii, Bambu Sapanga jibiya ndi jojagabweni na jojajoini nukutuhenga twiijewa masoba goti ganga na mwisu."

24 Ndienu, Daudi jajoba mu litui. Kipindi sa matola gukubonikana mwei, bambu nkolongu Sauli jatama pamesa kula. 25 Ngati ebayobali, bambu nkolongu jutama pi kiteu saki sekibii pambipi pu lumatu. Yonasani jatama sukulingalani na bambu nkolongu na Abineli jatama pambipi na bambu nkolongu. Lakini pandu paka Daudi pajabiya jutama nganamundu. 26 Lisoba heli Sauli ngasejapwaga lijambu lokapi, ndaba jaholaliya kubanga kwa pangi Daudi sumpatiki sindu sensunhenga jiijetakeka kunndumbali Sapanga au pengi sunhengiki jiihika mu matola haga. 27 Lisoba la pili, baada jukupeta matola jukubonikana mwei, kabee pandu paka Daudi pabiya kabe nganamundu. Sauli anndalukiya mwana waki Yonasani. "Ndaba jakii Daudi mwana waka Yese, ngasejahiki kula posu, lisu na lelenu?"

28 Yonasani annzibua Sauli, "Janobiki ngamaa nyetakaliya jujenda ku Betilehemu. 29 Jambwagila, ‘Nyetakaliya kwa alongu bangu ndaba ahenga lihengu lukupia litambiku ku musi, nu nndongu wangu jupai mia. Ana gunyetakali nyenda kwa alongu bangu.’ Ndienu mana ngasejubii pa kula posu na twepani saka bambu nkolongu."

30 Papuje Sauli jabiya ni inyela kupete kwaka Yonasani, ampwagila, "Mwana waka mmbomba juliya na jojubii ni kihakau wehapa! Manyiki ana gunhangwi mwana waka Yese kwi iyoni yaku wamwete, na kwaapoa iyoni anyongo baku! 31 Boo, ngasegumanyiki ana Daudi pajibiya mwomi, wehapa ngawiwesi kupata napwasi ja kuba wa bambu nkolongu wu nndema gongo? Ndienu jenda gukunndeta kwangu, ndaba kupalika jukomika."

32 Yonasani jaalalukiya, "Ndaba jaki gupala kunkoma? Juhengiki kike?"

33 Lakini Sauli apalapa anndekaliya Yonasani nkoa ili ankoma. Najombi Yonasani jamanya kubanga atati baki babiya apangi kunkoma Daudi. 34 Papuje Yonasani, koni juyomiki ngamaa, jaboka pa mesa nnyata, wala ngasejakula posu jokapi lisoba la pili heli la matola gukubonikana mwei. Yonasani jayomiki ngamaa ndaba atati baki babiya atondwi ndaba ja majambu gaka Daudi. 35 Pulukela jaki, Yonasani jajenda ku litui, kuketangana na Daudi ngati ebatabukana. Jajenda hoku nu nkombu jumu mwanalomi. 36 Pajahika ampwagila nkombu waki, "Butuka wakataputa misali jenakahoma." Nkombu jola pajabiya jutenda kubutuka, Yonasani jahoma misali palongi jaki. 37 Nkombu jola pajahika pandu misali pajihabuki, Yonasani ankema, "Nsali gubii palongi jaku. 38 Henga nnyata na wiijema pandu hapa pena." Nkombu jola jakusanya misali joti nukujenda kwaka bambu waki. 39 Lakini nkombu jola ngasejamanyiki sokapi kupete lihengu lelela. Babamanyiki ndi Yonasani na Daudi pena. 40 Yonasani ankabisa nkombu jola hindu yukukomane nukumpwagi, "Jenda ku musi."

41 Apalapa nkombu jola ejabiya juboi. Daudi jajumuka nu kuboka pandu pajajobiki pambipi ni lilundu la malibu. Jajinama pai kwi isima mala patatu palongi jaka Yonasani. Boti abeli, Daudi na Yonasani, batenda kujobatane nu kulela. Daudi jalela nakanopi kupeta Yonasani. 42 Ndienu Yonasani ampwagila Daudi, "Jenda ku lukwali. Tulapiki twaboti ku liina laka Bambu Sapanga, kuba Bambu Sapanga jubiya jojagabweni nukugajoana majambu kati jitu masoba goti ganga na mwisu, na kati ji ibeleku yangu masoba goti ganga na mwisu." Daudi jajumuka nu kujenda kwaki, najombi Yonasani jakelubuka ku musi.