1 Ndienu, Apilisti bakomana ngondu na Aizilaeli. Aizilaeli batila palongi ja Apilisti na bangi baakoma mu kitombi suku Giliboa, bandu bangi buku Izilaeli pamu na bambu nkolongu Sauli na bana baki batenda kutila. 2 Apilisti ambenga Sauli na bana baki na kwaakoma, Yonasani na Abinadamu na Maliki Shua. 3 Ngondu jabiya ngolongu ngamaa pandu pajabii Sauli. Nabombi baahoma misali pabumbona bunndapula nukunhumisa ngamaa. 4 Sauli ampwagila mundu jojutoto hindu yukukomane, "Jukua upanga waku gunhosa ngua, ili bandu haba banga kuseku jandu binhosa upanga nukunongama." Lakini joantotuli hindu yukukomane ngasejalenga ndaba jajogopi ngamaa. Ndienu Sauli jahopula upanga waki mweni nukuguhabuki. 5 Jojutoto hindu yukukomane jola pajabona Sauli jukuwiki, kabee jahabukiya pu upanga waki, najombi jakuwa pamu na Sauli. 6 Ndienu Sauli jakuwa, na bana baki atatu na jojutoto hindu yukukomane na alonda baki boti bakuwa pamu lisoba alelale. 7 Nabombi Aizilaeli bababii upandi wa pili uligomba, na bangi babaii upandi golipiti lyoba wa losi lwa Yoludani pababona kubanga Aizilaeli atei kutila, najombi Sauli na bana baki atei kuwa, bahama misi jabu nukutila. Apilisti bajenda nukutama mu misi heji.

8 Kilabu jaki Apilisti pabajenda kujuku hindu ya bandu babakomiki bijikolila mitui jaka Sauli na bana baki atatu ku kitombi suku Giliboa. 9 Bunsekula Sauli kimutu nu kunhula hindu yaki yukukomane, nabombi baatuma bandu mu nndema goti wa Apilisti kulandi majambu mu nyumba ji imong'umong'u kati ja bandu babu. 10 Babeka hindu yabu yukokomane mu nyumba jaka kisapanga sa mmbomba sebikikema Maashitaloti nu kukonga yega jaki mu ukuta wa musi uku Beti Shani.

11 Bandu buku Yabeshi Gileadi pabajoa majambu ga Apilisti ebunhengi Sauli, 12 alonda boti baboka, bajenda kelukelu, baboa yega jaka Sauli na yega ja bana baki kuhuma ku lumatu luku Beti Shani, bahika naku mbaka ku Yabeshi nukutini kwa mwotu. 13 Ndienu, bajukua mahupa gabu nukujitaga pai ju nkongu gu mkwaju ku Yabeshi, nabombi bapunga kula posu masoba saba.