1 Jabii mundu jumu kuhuma ku Lama, juku nndema wi itombi yuku Epulaimu, jojuwe ankemika Elikana mwana waka Yelohamu, nsoko waka Eliu najombi hoju jabia mwana waka Tou jojahumila mu lukolu lwaka Sufi. 2 Elikana jabia na akammbomba abeli, jumu ankemika Hana na jongi Penina. Penina jabii na bana, lakini Hana ngasejabii na bana. 3 Kila saka Elikana jubokika na bandu bu nyumba jaki kuhuma ku musi uku Lama nu kujenda ku musi uku Shilu. Jujendika hoku kunndumbali Bambu Sapanga nu kupia matambiku. Bana abeli baka Eli, Hofini na Finehasi babii agolu baka Bambu Sapanga. 4 Kila ekihika saka sukupia matambiku Elikana, jaapekia Penina na bana baki boti na aka kamwali baki kila jumu lipungu li inyama. 5 Lakini ampekia Hana mapungu gingi gi inyama ndaba ampai ngani, hata ngati Bambu Sapanga ngaseampeki bana. 6 Ndaba Bambu Sapanga jabiya ngaseampeki Hana bana, mmbomba nzaki jukubika jutenda kundongama. 7 Majambu gehaga gaendaliya kila saka. Kila Hana pajabiya jujenda mu nyumba jaka Bambu Sapanga, mmbomba nzaki jukubika anhengika juyoma mbaka jatenda kulela nukukana kula. 8 Elikana ndomi waki mala jingi anndalukiya, "Hana, boo ndaba jakii gutenda kulela? Ndaba jakii ngasegukula? Boo, ndaba jakii gubii nu usungu mmwoju jako? Boo, nepani nga naamboni kupeta bana komi akanalome?"

9 Lisoba limu pababia ajomulii kula na kunywa ku Shilu, Hana jatenda kujema. Kipindi sehesi nngolu Eli jabia jutemi pikiteu puluhuka ju mpengu gu nndyangu ju Nyumba jaka Bambu Sapanga.

10 Hana jabii nu usungu ngamaa. Pajabia anndoba Bambu Sapanga jabia jutenda kulela ku usungu. 11 Najombi jabeka lilaganu, kupwaaga, "Mwaa Bambu Sapanga Mwembii na Makili Goti, ana wakalingali usungu nkolongu guku ntumisi waku nu kungomboka nepani, wala wanzewa ntumisi waku nawehapa kumpeke mwana mwanalomi, ndienu mwana we hoju nampia kwaku Bambu Sapanga kwa masoba goti gukutama kwaki, wala ngajiimogi majunzu pamutu jaki."

12 Pajabiya juendalee kunndoba Bambu Sapanga, Eli anndingalakiya mundomu jaki. 13 Hana jabia juloba mmwoju jaki, milomu jaki jabiya jiitenda kuhinahina lakini sauti jaki ngasejajoanike. Eli jaholaliya jutei kulobe, 14 najombi ampwagila, "Wiendaliya kulobe mbaka lile? Kotuka kulobe divai."

15 Hana jajibua, "Ngaela bambu wangu, nepani numbomba jojubii nu usungu nkolongu. Nepani ngasengunywiki divai wala sindu sukulobe, ila ngubika nundandi Bambu Sapanga gagabii mmwoju jango. 16 Wiholale nepani numbomba mbaja. Kwi kipindi soti hesi nguba nunndoba ndaba jukuhangajika kwangu na mang'aliku gangu."

17 Ndienu Eli anzibua, "Nnzenda su lukwali, najombi Sapanga jwa Aizilaeli jugujangatiya gagunndobiki."

18 Hana japwaaga, "Noba nuntumisi waku wiiholale liya." Hana jaboka nukujenda kula posu na ngasejabiya kabee nu usungu.

19 Pulukela, Elikana nu nndongu waki bajumuka lukela ngani, baada jukunndumbali Bambu Sapanga, bakelubuka kunyumba jabu ku Lama. Elikana jagonila nu nhwanamundu Hana, najombi Bambu Sapanga jatenda kunkomboka. 20 Ndienu, Hana japata kitumbu nu kubeleka mwana mwanalomi. Hana ankema mwana we hoju Samweli, ndaba jaapwaga, "Mbatiki kuhuma kwaka Bambu Sapanga."

21 Elikana na alongu baki boti bajenda kabee ku Shilu kumpikii Bambu Sapanga matambiku ga kila saka nukutimisa lilaganu. 22 Hana ngasejapiti, ampwagila nndomi waki, "Mwana pajikotuka kujonga hapa ndi paniijenda, nannzukua nukumbeka palongi jaka Bambu Sapanga, najombi jiitama hoku kipindi soti."

23 Elikana nndomi waki ampwagila, "Henga leulibona laamboni ngani kwaku. Gutama pamba mbaka pawanndesa kujonga, Bambu Sapanga jugujangatiya kutimisa lilaganu laku." Ndienu, Hana jatama panyumba nukujongesa mwanamundu mbaka paandekesa kujonga.

24 Paandekisa mwana kujonga, Hana anzukua mwana jola, koni jwakona nsoku ahelahe, pamu na litoli la ng'ombi la yaka itatu, kilu tisa yu uwembi nu mpuku goalenganaki kwa ngosi gwa divai, najombi andeta mwana mu nyumba jaka Bambu Sapanga ku Shilu. 25 Ebabiya ajomwi kusinza katoli ka ng'ombi kala, bunndeta mwana kwaka nngolu Eli, 26 najombi Hana ampwagila nngolu Eli, "Wa bambu wangu, ne mbwaga sakaka bambu wangu, nepani ndi mmbomba jojabiya jujema palongi jaku nukunndoba Bambu Sapanga. 27 Nunndoba mwana jonzo najombi Bambu Sapanga jumbeki senunndobiki. 28 Ndienu numpeke Bambu Sapanga mwana jonzo. Ndaba kutama kwaki kwoti kwiibiya nupiiki kwaka Bambu Sapanga."

Ndienu nabombi bunndumbaliya Bambu Sapanga.