1 Daudi jaboka ku Gati jatilila mu likolu pambipi na musi wa Adulamu. Aka abeli baki na alongu baki bangi pabajoa ana jubii hapa, boti bajenda kujongana naku. 2 Bandu boti babalimbalakiya au babaii na madeni, au bababia ngaseagupai ulongosi waka Sauli babiya pamu na Daudi. Jumula boti babiya bandu mia nsesi, najombi jabiya kilongosi wabu.

3 Kuhuma hoku, Daudi jajenda mbaka ku Mizipa nndema uku Moabu. "Ampwagila Bambu nkolongu juku Moabu, waaloba atati bangu na anyongo bangu atama pamba kwaku mbaka pannimanya Sapanga jinhengila kike." 4 Ndienu, Daudi jaaleka ahengo na anyongo atama na bambu nkolongu juku Moabu nabombi batama hoku kipindi soti Daudi sejabii jujobiki mu likolu.

5 Ndienu nndota Gadi ampwagila Daudi, "Wiitama pamba, boka mala jimu gujenda mu nndema wa Yuda." Ndienu Daudi jaboka nukujenda ku kitengu sa Heleti gogubii ku Yuda.

6 Lisoba limu Sauli jabii ku Gibea, jatama pai ju nkongu gunkwaju pi kitombi, koni jubii nu nkoa waki mu kuboku na atumisi baki babiya ajemiki pulutengu jaki. Ndienu bumpwagila ana Daudi na bandu baki abonakini. 7 Najombi Sauli jaapwagila atumisi baki, "Henu mwanganya mwabandu bi likabila laka Benjamini nyoaninya, boo, nholale Daudi mwana waka Yese ampekiya kila jumu wii litui na matui gi mizabibu? Au boo nholale anhenga kila jumu wii jubia nkolongu jwa maelupu au nkolongu jwa alonda bake? 8 Ndaba jakii mwanganya mwaboti nhenga mpangu gukung'anambuka? Ngakuba hata jumu winu jojumbwagi majambu ganga, kubanga mwana wangu jujetangani na mwana waka Yese. Kabee ndaba jaki ngakuba mundu hata jumu kati jinu jojumone ikia nukumbwagi kubanga Daudi jumu kati ja bandu bangu jutaputa napwasi jukungoma ngati ekubii lelenu?"

9 Ndienu Doegi mundu juku Edomu jojuwe jabiya jutei kujema pambipi na atumisi baka Sauli japwaaga, "Nummbona mwana waka Yese pajabiya juhikiki ku Nobu kwaka nngolu Ahimaleki mwana waka Ahitubu. 10 Ahimaleki anndobila Daudi kwaka Bambu Sapanga, kabee ampekiya posu nu upanga waka Npilisti Goliati."

11 Bambu nkolongu Sauli jaatuma bandu kwaka nngolu Ahimaleki mwana waka Ahitubu bukunkema, pamu na bandu boti ba alongu ba atati baki babube babiya agolu ku Nobu. Boti bunzendila bambu nkolongu Sauli. 12 Sauli japwaaga, "Ndienu gujoaninya wehapa wa mwana waka Ahitubu."

Ahimaleki jajibua, "Hena bambu ndenda kugujoane."

13 Sauli ampwagila, "Ndaba jakii wehapa na Daudi mwana waka Yese, nhengiki mpangu ukung'ambuka nenga ili kunngoma? Ndaba jakii gumpekiya mabumunda nu upanga, kabee nukunndobe kwaka Sapanga? Ndaba lelenu jutei kung'anambuka nu jutenda kunyobale."

14 Ahimaleki jajibua, "Kati ja atumisi baku, Daudi ndi kilongosi jojuhobaleka kupete boti. Jombi ndi nkoanu waku wehapa wa bambu nkolongu, nkolongu ju likundi la alonda baku babugulenda na antende isima kupeta boti panyumba jaku. 15 Lelenu nga mala ju utumbuli kunndoba Sapanga lijambu kwa ndaba jaki. Boo sajenu ndi nhengiki kihakau kunndoba Sapanga kwa ndaba jake? Ngahela hata kasopi. Bambu nkolongu wiindemu nepani wala mundu jokapi kati alongu bangu kupete hongu heji. Nepani nu ntumisi waku, ngasemanyiki sindu sokapi, sekiendale kupete lijambu heli."

16 Lakini bambu nkolongu Sauli ampwagila, "Ahimeleki, kye ngiti gutenda kuwa wehapa na bandu bu munyumba ja ahengo baku." 17 Sauli jaapwagila alonda babiya ajemiki pulutengu jaki, "Nng'anambuka na kwaakoma akaagolu baka Bambu Sapanga, ndaba bombi ajongana na Daudi, bamanyiki jwatiliki kwangu lakini ngasebambwagi." Lakini alonda haba ngasebatondabiya maboku gabu ili kwaakoma agolu baka Bambu Sapanga. 18 Ndienu bambu nkolongu Sauli ampwagila Doegi, "Wehapa ng'anambuka wakakoma agolu." Doegi, mundu juku Edomu jajenda na kwaakoma agolu nhwanu boti. Lisoba heli Doegi jaakoma agolu semanini nu nhwanu babube awata izibau ikigolu ni ikitambaa kihuu. 19 Sauli jaakoma ku upanga bandu boti buku Nobu goguwe ndi musi wa agolu, akanalomi na akammbomba na bana asoku na bana baajonga na ng'ombi na maponda na makondoo.

20 Lakini Abiazali jumu ja bana baka Ahimeleki, mwana waka Ahitubu jakwelapuka jatilila kwaka Daudi. 21 Abiazali anndandila Daudi kubanga Sauli jaakomiki agolu baka Bambu Sapanga. 22 Najombi Daudi ampwagila Abiazali, "Lisoba alelale panummbona Doegi mundu juku Edomu namanyiki hotuhotu kubanga ngiti ampwagila bambu nkolongu Sauli. Ndienu, nepani ndi nenaahengiki bandu bu lukolu lwa atati baku akuwaje. 23 Wehapa tama pamba pamu nanepani, wala wiijogopa. Ndaba jojutaputa kungoma nepa ndi jojutaputa hata kugukoma wehapa. Ndienu ana gubii na nepani ngabagukome."