1 Ndienu Apilisti bakusanya alonda babu boti ku Afeka na Aizilaeli batama ku kiliba si ligomba luku Yezileeli. 2 Akolongu nhwanu buku Pilisti pababiya apeta ni ikundi yabu ya bandu mia na elupu, Daudi pamu na bandu baki pamu na Akishi babiya apwata upandi gu munyuma gwa alonda haba. 3 Alonda ba Apilisti balalukiya, "Aebulania haba ahenga ki apapa?" Akishi jajibua alonda haba ba Apilisti, "Ajo ndi Daudi, ntumisi waka Sauli bambu nkolongu juku Izilaeli, najombi jubii na nepani kwa masoba gingi, yaka isokopi tumbuka ejatilila kwangu ngasenilibweni likosa lokapi."

4 Lakini alonda buku Pilisti bunyomi ngamaa Akishi, bumpwagila, "Nkelubua jujenda pandu pabumpeki jutama. Ngasekupalika kujenda na twepani ku ngondu anangahela kipindi sukukomana jiing'anambuka nukutumbuli kwaakoma alonda bitu. Sukuhenga hela ngasegubona kubanga mundu hoju jwiipata indela ja sapi jukulengana na bambu waki kabete? 5 Boo, Hajo lee nga Daudi jojuwe akammbomba bajemba majambu gaki pababiya ahina bakapwaga, ‘Sauli jukomiki bandu elupu, lakini Daudi jukomiki makome elupu.’ "

6 Ndienu Akishi ankema Daudi nukumpwagi, "Napa kwaka Bambu Sapanga ngati ejutama, wehapa gubii wa mundu woguhobaleka, nanepani napala guhenga lihengu pamu nanepani. Tumbuka lisoba lewahika kwangu lela mbaka sajenu, ngasenilibweni likosa lokapi kwaku, hata hela akolongu haba ngasebalisiki na wehapa. 7 Ndeinu gubuja kunyumba. Gujenda ku lukwali ili wasukisa akolongu ba Apilisti."

8 Daudi andalukiya Akishi, "Lakini nepani ndei kike? Boo, gukibweni kii sindu siliya tumbuka lisoba lenahika kwaku mbaka leleno? Ndaba jakii niijenda nukukomana na abaja baka bambu nkolongu wango?"

9 Akishi anzibua Daudi, "Nepani manyiki kubanga wehapa gubii wogulenganii pamihu jangu ngati atumi baka Sapanga. Lakini alonda ba Apilisti apwaaga, ‘Hoju ngasegundengane kujenda ngondu pamu na twepani.’ 10 Ndienu, jumuka kanyata, pamu na atumisi babundekiki bambu waku baalongini nawehapa, kilabu pulukela mmbokania."

11 Ndienu, Daudi na bandu baki bajumuka pulukela nakanopi, bajenda kukelabuka mu nndema uku Pilisti, nabombi Apilisti bakwela kujenda ku Yezileeli.