1 Akanalomi bangi kuhuma ku musi uku Zifu bunzendila Sauli ku Gibea bumpwagila ana Daudi jujobiki ku kitombi suku Hakila, upandi golipiti lyoba uku Heshimoni. 2 Apalapa Sauli jajenda ku lukoba la Zifu kuntaputa Daudi, jabiya julongini na akalonda baabi nganganganga elupu itatu babahaguliwi kuhuma ku Izalaeli. 3 Sauli jagonila kabee panani ji kitombi suku Hakila, pambipi ni indela ju upandi golipiti lyoba uku Heshimoni. Lakini Daudi jabiya jakona ku lukoba. Daudi pajamanya kubanga Sauli jabiya juhikiki ku lukoba kuntaputa, 4 jaatuma bandu baalaluki, nabombi bummanyisa kubanga ndi sakaka. 5 Daudi japita, jajenda pandu pajabiya Sauli jugonii. Pajupabona pandu pajugoni Sauli na Abineli mwana waka Neli, jojuwe jabia kilongosi wamakundi ga alonda baka Sauli, jabiya jugoni pambipi na Sauli. Sauli jabiya jugonii pikilanda ja mahema gagayongalitwi na alonda baki.

6 Daudi jaapwagila Ahimeleki mundu juku Hiti na Abishani nndongu waka Yoabu, "Nya jojijenda pamu nanepani mu likambi laka Sauli?"

Abishai anzibua, "Nepani niijenda pamu wehapa."

7 Ndienu ikilu, Daudi na Abishai bajingala mu likambi laka Sauli. Bunketaninya Sauli jugonii pikilanda ji likambi heli, nu nkoa waki juhomiki mu nndema pambipi ni kimutu saki. Abineli pamu na alonda babaii agonii kunyongolota Sauli. 8 Abishai ampwagila Daudi, "Lelenu Sapanga jugujangati guunhwesa Sauli. Ndienu neka nunhosa nkoa mala jimu pena, nganuhosi mala pabeli."

9 Lakini Daudi ampwagila Abishai, "Waankoma ndaba sakaka Bambu Sapanga anndapula mundu jokapi jojandapula nu kuhumisa mundu joanhagwi sukumpaki mahuta. 10 Napa kwaka Bambu Sapanga jojubii mwomi, kubanga Bambu Sapanga mweni ndi joankoma Sauli, au lisoba la kuwa lihika au jwiijenda kukukomana ngondu nukuwele hoku. 11 Lakini Bambu Sapanga jangana naandapu wala kuunhumisa mundu joanhagwi sukunnzakanii mahuta. Lakini jukua nkoa waki gogubii pambipi ni kimutu saki pamu ni liboto laki la masi tujendaniya." 12 Ndienu, Daudi jajukua nkoa ni liboto la masi lelabii pambipi ni kimutu saka Sauli. Lakini nga mudnu jojabona au kumanya lijambu heli, nabombi wala ngajojujumwiki, ndaba Bambu Sapanga jaaletila lugonu lwingi.

13 Ndienu Daudi jajenda upandi wa pili u ligomba heli, jajema panani ji kitombi kutali ni likundi laka Sauli. 14 Daudi jaakema alonda bi likundi laka Sauli na Abineli mwana waka Neli, japwaaga, "Abineli boo, gunyoana lena?"

Abineli jajalukiya, "Wa nyane wegunkemiki bambu nkolongu?"

15 Daudi jajibua, "Boo, wehapa nga le wa mwanalome? Nya jojulengini na wehapa mu Izilaeli? Mbona ngasegunndendiki bambu nkolongo wako? Mundu jumu jajingala hoku nukupala kunkoma bambu nkolongu waku! 16 Gusindwiki kuhenga lihengu laku sapi. Napa kwaka Bambu Sapanga jojubii mwomi, kubanga jupalika kuwa, ndaba ngasegundonda bambu waku, jojuwe Bambu Sapanga annzakani mahuta. Ndienu gulinga nkoa waka bambu nkolongu ni liboto la masi lela lelabii pambipi ni kimutu saki ana ibii!"

17 Sauli jijimanyiki sauti jaka Daudi anndalukiya, "Boo heji ndi sauti mwana Daudi?"

Daudi anzibua, "Bambu wangu, bambu nkolongu ndi sauti jangu." 18 Ndienu jaendaliya kupwaaga, "Lakini ndaba jakii, wehapa wa bambu wangu gumbwataliya nepani nu ntumisi wako? Boo, nhengiki kike? Boo, nhengiki likosa bole? 19 Ndienu, bambu wangu nkolongu gujoania malobi guku ntumisi waku. Ana kubii Bambu Sapanga ndi jojugukoluke guhika kwangu nepani, ndienu jujopa matambiku gaganhenga jung'anambula mawasu gaki. Lakini ngati ndi bandu, ndienu Bambu Sapanga jaalapila bandu haba ndaba amengiki mu nndema gojutupeki Bambu Sapanga gubiya witu, kupwaaga, ‘Jenda ukuitumakiya isapanga yengi.’ 20 Wineka ngua mu nndema ukigeni, kutali na Bambu Sapanga. Ndaba wehapa wa bambu nkolongu juku Izilaeli guhuma kugutaputa womi wangu. Ngati mundu jojubenga ngwali mwiitombi."

21 Ndienu Sauli jajibua, "Nepani nhengiki Kihakau. Kelubuka mwanangu Daudi. Nganaguhumisi kabete ndaba gunei sanga kungoma lelenu. Nepani nu ng'ang'a na ngosii ngamaa."

22 Daudi jajibua, "Waa bambu, nkoa waku gubii pamba, ntuma nkombu waku jumu juhika kujuku. 23 Bambu Sapanga antunza kila mundu kwa uamboni nu kuhobaleka kwaki. Lelenu Bambu Sapanga junyangati nuguwesa, lakini nepani ngasenugulapwi wala kuguhumisa wehapa ndaba wehapa Bambu Sapanga jugujakanii mahuta ili gubiya wabambu nkolongu. 24 Linga ngati lelenu eahamwi kuguleka sanga kugukoma, ahelahe nunndoba Bambu Sapanga jumokia mang'aliku goti mu kutama kwangu kwoti."

25 Sauli ampwagila Daudi, "Sapanga jugupengaliya wa mwanawa Daudi. Wiihenga majambu makolongu, na majambu gaku goti gagujendila sapi." Ndienu Daudi jatenda kuboka, Sauli najombi jabuja kunyumba jaki.