1 Sauli anndandila mwana waki Yonasani na akakilongosi baki kupete mpangu waki ukunkoma Daudi. Lakini Yonasani, mwana waka Sauli, ampai ngamaa Daudi. 2 Ndienu ampwagila, "Atati bangu apangi kugukoma. Ndienu gujepana. Kilabu pulukela, wiijoba pandu pu ujobu, gwitama papu. 3 Nepani nihika nu kujema pambipi na atati bangu ku litui pandu pawiikuba. Papuje nagulongaliya wehapa, nasindu sokapi seniigundua kuhuma kwabu, niitenda kugulandi."

4 Yonasani anndumbali Daudi palongi ja atati baki, ampwagila, "Wanhenge majambu giliya ntumisi waku Daudi ndaba jombi ngasejuguhengi majambu giliya gokapi wehapa, mahengu gaki goti gajuguhengi gabia gaamboni kwaku. 5 Paankoma Npilisti Goliati, ngasejajogupa kuwa, najombi Bambu Sapanga jaapekia Aizilaeli kuwesa kukolongu. Wehapa paulibona lijambu heli watogulii ngamaa. Ndaba jakii guhenga majambu giliya kwaka mundu jwanga na makosa ngati Daudi sukupala kunkoma sanga makosa?"

6 Sauli annzoaninya Yonasani ndienu jaalapa, "Naapa kwaka Bambu Sapanga jojubii mwomi, nganaakomi Daudi." 7 Ndienu, Yonasani ankema Daudi nu kunndandi majambu haga goti. Yonasani ampelika Daudi kwaka Sauli, na Daudi akuntumakiya bambu nkolongu Sauli ngati pu utumbulii.

8 Mwenikatai kwabiya na ngondu kabee kati ja Apilisti na Azilaeli. Daudi japita kukomana na Apilisti, jaakoma Apilisti bingi na babahigali batenda kuntila.

9 Ndienu, loho jiliya jejilekakiwi na Bambu Sapanga junhikila Sauli pajabiya jutami nnyumba jaki jabiya jukamwi mkoa mukuboku, kipindi sesuse Daudi pajabiya juhona kilimba. 10 Sauli pajalenga kunhosa Daudi ku nkoa hogu, lakini Daudi jatenda kugujepa nkoa waka Sauli nu nkoa watonga mulumatu. Ikilu jela Daudi jatila ili kulilamisa.

11 Ikilu jela Sauli jaatuma alonda kwaka Daudi bikijilonda nyumba ili ana jubii juwesa kunkoma pulukela. Lakini Mikali, nhwanu waka Daudi ampwagila jutila, "Ana ngasekutiliki kulamisa womi waku ikilu jenu biitenda kugukoma." 12 Ndienu, Mikali ampia Daudi kupeta pilindilisa, najombi jaapita nu kutila. 13 Mikali jajukua kimong'umong'u, jikigonika pikitanda nukukiyekale ingobu, jabeka ntou wa mangoma gi imbui pamutu ji kimong'umong'u hesi. 14 Sauli paajatuma bandu kunkamu Daudi, Mikali jaapwagila Daudi we nngonzu. 15 Ndienu Sauli jaatuma akelubuka kabee koku, jaalagalakiya kupwaaga, "Mundeta kwangu Daudi panani ji kitanda nunnkoma." 16 Bandu bala pabajingala munyumba jaka Daudi nukukilingali kitanda babona kibii kimong'umong'u nu ntou wa mangoma gi imbui kumutu. 17 Ndienu Sauli anndalukiya Mikali ndaba jakii gutei kungonga? "Gundei mbaja wangu jutilaje?"

Najombi Mikali annzibua Sauli jandisila kungoma, "Jambwaagila, ‘Neka nyenda nhwesa kugukoma.’ "

18 Daudi pajatila, jajenda ku Lama kwaka Samweli. Anndandila Samweli majambu goti gajabiya anhengi Sauli. Ndienu, Daudi na Samweli bajenda nu kutama ku musi uku Nayoti. 19 Mwenikatai mundu jumu ampwagila Sauli kubanga Daudi jubii ku musi uku Nayoti ku Lama. 20 Ndipapuje pajaapelika bandu bunkukamula. Lakini biliketaninya likundi la alota lakalondula na Samweli koni jililongosa, loho jaka Sapanga jaahikila atumisi baka Sauli nabombi kabee batumbuliya kulondo. 21 Sauli pabumpwagila majambu haga, jaatuma atumisi bangi, nabombi kabee batumbuliya kulondo. Sauli pajaatuma atumisi bangi kwa mala ja tatu, nabombi kabee batumbuliya kulondo. 22 Ndipala mweni jajenda ku Lama. Pajahika ku kiliba kikolongu sekibii ku Seku, anketaninya mundu jumu jojuwe anndalukiya, "Samweli na Daudi abii kwako?"

Mundu we hoju anzibua, "Abii ku musi uku Nayoti ku Lama." 23 Najombi Sauli jajenda ku musi uku Nayoti ku Lama. Pajahika hoku loho jaka Sapanga junhikila, najombi jatumbuliya kulondoo jubii mwiindela mbaka pajahika ku musi uku Nayoti ku Lama. 24 Jahula ingobu yaki jabiya julondoo palongi jaka Samweli. Jahigaliya heu kwi lisoba limu, ikilu na mui. Ndienu bandu batumbuliya kulilaluki, "Boo, Sauli najombi kabee jabiya jumu jwa alota?"