1 Samweli ampwagila Sauli, "Bambu Sapanga janduma kunnzakani mahuta gubiya wa bambu nkolongu wa bandu baki buku Izilaeli. Ndienu gujoaninya malobi gaka Bambu Sapanga. 2 Bambu Sapanga ju ulonda jupwaaga ana, ‘Naalapula Aamaleki boti ndaba baalapula Aizilaeli pababiya ahuma ku Misili. 3 Ndienu jenda kaalapula nu kwaakoma tipitipi hindu yoti yebabii naku. Waaleka abiya bomi ila wakaakoma bandu boti. Akanalomi na akammbomba bana akeki na akanyongo, ng'ombi na makondoo na ngamia na maponda.’ "

4 Sauli jaakema alonda baki, jaakagula ku Telaimu. Kwabii na alonda baajenda kwa magolu laki ibeli kuhuma ku Izilaeli nuku Yuda babii elupu komi. 5 Ndienu jombi na bandu baki bajenda ku musi uku Amaleki, babiya baajobale ku ligomba. 6 Sauli jaapwagila Akeni, "Nzendaninya! Mmbokannya! Mmbokannya pikilanda ja Aamaleki anangaela ngiti naakoma pamu nabombi. Mmbokannya kwa ndaba mwanganya mwahengii gaamboni Aizilaeli pabahuma ku Misili." Ndienu Akeni baboka pikilanda ja Aamaleki.

7 Sauli jaalapula na kwaawesa Aamaleki kutumbuli ku Havila mbaka ku Shuli upandi golipiti lyoba ku Misili. 8 Ankamula bambu nkolongu Agagi jwa Aamaleki pajabii mwomi. Jaakoma bandu kwa ngondu. 9 Lakini Sauli na alonda baki ngaseankomiki bambu nkolongu Agagi wala makondoo gagakendiki ngani, ng'ombi yeikendiki ngani na matoli ga makondoo gagakendiki na sokapi sela sesabii saamboni ngasebikikomike. Lakini hindu yoti iliya na yanga na bei ngolongu batenda kwiikoma.

10 Bambu Sapanga ampwagila Samweli, 11 "Niligana ngamaa nunhengiki Sauli kuba bambu nkolongu. Jombi jukotwiki kumbwata nepani na ngasejijihenga mihilu jangu." Lakini Samweli jayomiki ngamaa, andobila kwaka Bambu Sapanga ikilu joti koni julela. 12 Samweli jajoana kubanga Sauli jabiya juhikiki ku Kalumeli na jugujemiki nnala waki ili bandu buntendila isima, nu jupiti ku Giligali. Ndienu kilabu jaki, Samweli jajumuka pulukela ngani jajenda kuketangana na Sauli. 13 Samweli paanhikila Sauli, Sauli ampwagila Samweli, "Bambu Sapanga jugupengila! Nhengiki mihilu jaka Bambu Sapanga."

14 Samweli ampwagila, "Ana sakaka boo kumetale kwa makondoo nu kupongale kwa ng'ombe ako kuhumi kwako?"

15 Sauli jajibua, "Bandu bagaleka makondoo na ng'ombi yeikendiki ngani ili kumpiki matambiku Bambu Sapanga, Sapanga waku, lakini bangi boti twaakomiki."

16 Samweli ampenga Sauli, "Tumbala! Ngiti nugupwagila lijambu lejumbwagi Bambu Sapanga lelenu ikilu."

Sauli jaapwaga, "Mbwagila."

17 Samweli ampwagila, "Hata ngati ulibona wehapa ngasegumanayakini, boo, wehapa le nga ukilongosi wa makabila goti guku Izilaele? Bambu Sapanga jugujakania mahuta gubiya gwa bambu nkolongu juku Izilaeli. 18 Bambu Sapanga pajugutuma jugupwagila, ‘Jenda wakaakoma Aamaleki boti baahengiki mahakau, gukomana nabu mbaka waakoma boti!’ 19 Ndaba jakii, ngasegunnzoane Bambu Sapanga? Ndaba jakii waabutukiya kunyaga hindu yabu ya sapi nukuhenga majambu gangakunndengane Bambu Sapanga?"

20 Sauli jajibua, "Nunzoani Bambu Sapanga. Najenda kojandumiki Bambu Sapanga, nunkamwi nukundeta bambu nkolongu jwa Aamaleki Agagi na naakomiki tipitipi Aamaleki. 21 Lakini alonda ngasebakomiki inyama yeikendiki yeyuye ndi, makondoo na ng'ombi yeikendiki na hindu yoti yeibii yaamboni, ila ailetiki pani pa Giligali ili kumpiki Bambu Sapanga, Sapanga waku."

22 Ndienu Samweli ampwagila,

"Boo, Bambu Sapanga jupala nakanopi kike?

matambiku gukutini na matambiko lena?

kupeta kunnzoane Sapanga?

Linga, kunnzetake jombi ndi kwaamboni kupeta matambiku,

nu kunzoane jombi ndi kwaamboni kupeta kumpiki mahuta gi lipongu. 23 Kunng'anambuka mundu kulengana nu mahakau guhabi,

ni ing'omu ilengana ni kihakau sukuilumbali imong'umong'u.

Ndaba ujikaniki mihilu jaka Bambu Sapanga,

najombi jugukaniki wiikuba wa bambu nkolongu."

24 Sauli ampwagila Samweli, "Nhengiki mahakau. Nng'anambwiki mihilu jaka Bambu Sapanga ni mihilu jaku, ndaba naajogopa bandu, nakwaajoane bombi. 25 Lakini henu nuguloba, gunekakiya mahakau gangu. Nyetakaliya ngelubuka pamu nawehapa ili nhwesa kunndumbali Bambu Sapanga."

26 Samweli jajibua, "Kyee nganhwesi kukelabuka pamu nawehapa. Wehapa gukaniki mihilu jaka Bambu Sapanga, najombi jugukaniki wehapa kuba wa bambu nkolongu juku Izilaeli."

27 Samweli jang'anambuka ili juboka, Sauli jakamula lupeta lwi ingobu jaki nalwombi lwatenda kujenduka. 28 Ndienu Samweli ampwagila Sauli, "Kutumbuli lelenu Bambu Sapanga jujendwii ubambu ukolongu waku ku Izilaeli, kuhuma kwaku na ngiti ampekiya mundu jongi bapambipi jaku baabii baamboni kupeta wehapa. 29 Sapanga jojubii nu ulumbi guku Izilaeli ngasejupwaga isoli, wala ngasejung'anambu liwasu laki. Ndaba jombi ngamundu mbaka kung'anambuu mawasu gaki."

30 Sauli jajibua, "Nhengiki mahakau. Hata hela wiimboa lihamu palongi ja aseja na bandu bangu na Aizilaeli. Gunyetakaliya ngelubuka na wehapa ili nu kunndumbaliya Bambu Sapanga, Sapanga waku." 31 Ndienu, Samweli jakelubuka pamu najombi mbaka ku Giligali na Sauli anndumbaliya Bambu Sapanga.

32 Ndienu, Samweli jaapwaga, "Netila pamba Agagi bambu nkolongu juku Amaleki." Agagi annzendila Samweli koni jutogulee ndaba jaholaliya, "Ngabaakome." 33 Samweli japwaaga, "Suupanga upanga waku wahengiki akambomba bingi biikuba na bana, ndienu na akanyongo baku ebibiya sanga mwana kati jaka akanyongo." Ansekulana Agagi ipandi ipandi palongi ja pandu pukupiki litambiku laka Bambu Sapanga ku Giligali.

34 Ndienu, Samweli jajenda ku Lama na bambu nkolongu Sauli jakelubuka ku nyumba jaki ku Gibea. 35 Kutumbulii lisoba heli, Samweli ngaseammbona kabee Sauli, mbaka lisoba lejakuwa. Hata hela Samweli anndelila Sauli. Najombi Bambu Sapanga jayoma ndaba jabiya anzakanii mahuta Sauli kuba bambu nkolongu juku Izilaeli.