1 Solomoni jwajongana na bambu nkolongu Falau bambu nkolongu juku Misili, sukunzukuu kamwali waki. Anndeta kamwali waka Falau nu kumbeka mu musi uka Daudi, mbaka pajwajomula kusenga nyumba ji kibambu na Nyumba jaka Bambu Sapanga pamu nu lumatu kuyongalota musi uku Yelusalemu.

2 Kabula jaki, bandu abiya apiya matambiku gukutii ku itombi kwa ndaba nyumba jaka Bambu Sapanga jabii ngase asengiki. 3 Solomoni ampai Bambu Sapanga, nukulongosa ngati ealongusa atati baki a Daudi, ila pe najwombi jwapalika kupia matambiku gukutini nukupogale ubani ku itombi.

4 Kipindi simu Bambu nkolongu Solomoni jwajenda ku Gibeoni kupia matambiku, ndaba hoku ndi kwabii na pandu pukundumbali Sapanga. Solomoni jwayobali kupia maelupu ga matambiku gukutinii pandu pukupiiki matambiku pala. 5 Ku Gibeoni hoku Bambu Sapanga ampitila Solomoni mu ndotu ikilu, ampwagila ana, "Guloba sokapi nanepani isindenda kugupekea."

6 Solomoni ampwagila, "Gunhengi ntumisi aku Daudi upali anga kujomoka, kwa ndaba jabii jojuhobaleka kaku na jojujetakeka palongi jaku na jojubii na mwoju wamboni. Nanagu kumpeke upali hogu sukumpekee mwana waki sukutama pi kiteu saki su ubambu ngati ekubii lelenu. 7 Henu, Mwaa Bambu Sapanga, Sapanga wangu, gumekiki nepani ntumisi waku kuba bambu nkolongu badala ja atati bangu Daudi. Lakini nepani nakoli na mwana pena na ngasemanyiki namuna jukulongosa. 8 Gumei pamba pikilanda ja bandu baku bawahagwi, na bombi abii bingi hata ngaseawesa kubalangika. 9 Ndienu nuguloba gumbekia mwoju gukujowana ili kwaatemu bandu baku, nhwesa kumanya gaamboni na mabaja, kwa ndaba ndi nyane jojiwesa kwaatemu bandu baku baabii bingi anana?"

10 Kuloba kwaka Solomoni hoku kunndenganinya Bambu Sapanga, 11 najwombi ampwagila, "Kwa ndaba gunobiki sindu hesi, na ngasegulobiki kutama kipindi kilasu au mali na wala ngasegulobiki akabaja baku akuwaji, ila kulobiki pe kumanya namuna jukulongosa bandu kwa saamboni, 12 ndienu isinuguhengila ngati egulobiki. Henu, isinugupekia umanyi na malangu yeyuye kabula jaku ngajojuwaiki kuba mundu ngati wehapa, na wala ngajwipiti mundu jongi ngati wenga baada jaku. 13 Kabee nagupekia gangi gaguge ngasegunobiki. Naguhenga gubiya na mali gingi na kuba ni isima ngani kupeta bambu nkolongu jokapi mwiipindi yaku. 14 Nakabee anagupwatiki indela jangu na malagalaki gangu nu kukamu mihilu jangu ngati ebahenga atati baku Daudi, ndienu, naguhenga gutama kipindi kilasu."

15 Solomoni pajwajumuka, jwamanya kubanga heji jabiya ndotu. Ndienu jwabuja ku Yelusalemu, jwajema palongi ji Lisanduku li Lilaganu laka Bambu Sapanga nukumpiiki matambiku gukutinii na gu lukwali. Henu jwaahengila matola akatumisi baki boti.

16 Lisoba limwa, akambomba abeli aselati, bajenda kwaka bambu nkolongu Solomoni. 17 Jumwa wabu jwapwaaga, "Wa bambu wangu nepani nu mbomba hajo tutamani nyumba jimwa, nepani nabelika mwana kipindi nzaa ajo jubii nnyumba. 18 Egapeta masoba ga tatu najombi jabelika mwana. Ngasejwabii mundu jongi nnyumba ila pee twepani twaabeli. 19 Ikilu jimu mwana waki jwatenda kuwa kwa ndaba jwatei kungonalela. 20 Hejabona hela jajumuka pamahiku ngani, nu kunzukuu mwana wane kipindi nepani panabiya ng'osili, nukungoneka puluteta jaki. Kabee anzukua mwana waki jojuwii, nukungoneka puluteta jangu nepani. 21 Enajumuka pulukela ili nunzongisa mwana wangu, numbona mwana juwii. Enundingalia ngani namanya kubanga jola nga mwana wango jonumbeliki."

22 Lakini mbomba jongi jola jwapwaaga, "Ngahela! Mwanawangu ndi jojubii mwomi na waku wehapa ndi jojuwii."

Najombi mbomba jojatumbuliya jola jwapwaga, "Ngahela ndeka! Mwana waku ndi jojuwii, na jwanepani jojubii mwomi!"

Ndienu baendalia kubisana ahelahe palongi jaka bambu nkolongu.

23 Ndipala bambu nkolongu Solomoni jwapwaga, "Kila jumu winu julaja kubanga, mwana waki ndi jojubii mwomi na jojuwii nga jwaki." 24 Ndienu bambu nkolongu jwalagalakia kupwaaga, "Netila upanga!" Bundetila upanga bambu nkolongu. 25 Bambu nkolongu jwapwaaga. "Gunsekula mwana jojubii mwomi ipandi ibeli, na gumpekia nusu ajo na nusu jongi."

26 Mbomba jojwabii amabu ba sakaka bakamwana jojwabii mwomi jola ambonila ikia mwanamundu ampwagila bambu nkolongu, "Gupepa koku bambu nkolongu, wankoma mwana. Gumpekia pe nzaa hoju mwanahoju jojubii mwomi, anzukua jwombi."

Lakini mbomba jongi jola jwapwaga, "Ngahela mwana hoju jwiikuba jwanepani wala jwaki gunsekula ipandi ibeli."

27 Bambu nkolongu Solomoni japwaaga, "Wankoma mwana! Gumpekia mbomba jukutumbuli hoju anzukua, ndaba sakaka jwombi ndi amaki baki."

28 Bandu boti Aizilaeli ebajowana namuna ejatemula bambu nkolongu Solomoni, batenda kunzogopa ndaba bamanyiki kubanga jabii nu umanyi waka Bambu Sapanga gogunnzangatiya kutemu kwaamboni.