1 Lisoba limu bambu nkolongu Yelobuamu jwabiya jujemiki pandu pukupiiki matambiku ili jupogalia ubani. Ndienu mundu waka Sapanga kuhuma ku Yuda jahika papu na malobi gaka Bambu Sapanga. 2 Mundu jola jajamalia pandu pukupiiki matambiku pala koni jupwaga, "Wehapa wapandu pukupiiki matambiku! Pamba Bambu Sapanga jupwaga ana, ‘Jwiisaliwa mwana mu lukolu lwaka Daudi, lihina laki ndi Yosia. Hoju jwaajukua akagolu baahenga lihengu pandu pukulumbali nu kupogale ubani panani jaku, nu kupiya matambiku panani jaku, ena, mahupa ga bandu biitinia panani jaki!’" 3 Mundu hoju jalangia nginyuli lisoba lelale sukupwaga, "Pandu pamalibu pukupiiki matambiku pamba piitenda kubomboka, ni liliu lelibii panani jaki litenda kujitika."

4 Bambu nkolongu Yelobuamu ejajowana malobi haga gajalongila mundu waka Sapanga kwa ndaba ja pandu pukupiiki matambiku ku Beseli, jwalangia kuboku nukupwaga, "Munkamula hoju!" Ndienu palapa kuboku kwaki kojanyosiki hoku kwatenda kujoma, ngasejawesa kabe kugonza. 5 Napombi pandu pukupiiki matambiku hapa patenda kubomboka, ni liliu laki latenda kujitika pai, ngati nginyuli jela jejalongila mundu waka Sapanga hoju na majambu gajalongila Bambu Sapanga. 6 Ndienu, bambu nkolongu Yelobuamu ampwagila mundu waka Sapanga, "Gupepa koku, nagunobe kuka Bambu Sapanga Sapanga waku, kuboku kwangu kuwesa kulama."

Najombi mundu waka Sapanga, nu kuboku kuka bambu nkolongu kwatenda kulama, na kuba ngati ejabii puuwanzu. 7 Ndienu bambu nkolongu apwagila mundu waka Sapanga, "Hegalia pa nyumba jangu gukula posu, na nepani nugupekia unhupi."

8 Lakini mundu waka Bambu Sapanga apwagila, "Hata ngati gumbeke nusu ja mali gaku, nganyendi pamu na wehapa. Nganguli wala kunywa masi pandu pambane, 9 ndaba Bambu Sapanga jambwagila niikula posu wala kunywa masi, wala niikelabuka kwiindela jelaje jenahikila pamba." 10 Ndienu mundu hoju jwatenda kuboka, wala ngase jwakelabuka kwiindela jelaje jejahikilaje juku Beseli.

11 Kipindi hesi jwabii nndota nseja ku Beseli. Bana baki bunzendila nukundandi majambu goti gajahenga mundu waka Sapanga jola, lisoba lela ku Beseli, ampwagila kabee majambu goti gajabia ampwagi bambu nkolongu Yelobuamu. 12 Atati babu jwaalalukia ana, "Jupetiki indela bole?" Nabombi bana baki bundangia indela jejupetiki mundu waka Sapanga hoju kuhuma ku Yuda. 13 Najombi jwaapwagila bana baki, "Nhandalia liponda." Nabombi bunhandalia liponda, nu nseja jola jwakwelalia panani jaki. 14 Ampwata mundu waka Sapanga hoju anketania jutemi pu nkongu gobugukema mwaloni. Ndienu andalukia, "Gwehapa lee wamundu waka Sapanga kuhuma ku Yuda?"

Najombi jwajibua, "Eena! Nenganenga." 15 Nseja jola ampwagila ana, "Tumboka kunyumba jangu ili gukula posu."

16 Lakini jwombi ampwagila, "Ngawesi kubuja pamu na wehapa, wala kujingi mu nyumba jaku. Nganhwesi kula posu wala kunywa masi pandu pamba, 17 ndaba Bambu Sapanga jwambwagila niikula posu wala kunywa masi pandu pambane, wala niikelabuka kwiindela jenahikila."

18 Ndota nseja juku Beseli hoju ampwagila ana, "Nepani nu nndota ngati wehapa, na Bambu Sapanga julongi na nepani kwiindela juku ntumisi jukunani kupwaga, ‘Gunkelabua kunyumba jangu jukula posu na kunywa masi.’" Lakini nndota nseja hojo jabiya jutenda kunkonga pena.

19 Ndienu, mundu waka Sapanga jola jabuja pamu najombi, jwakula posu na kunywa masi ku nyumba juku ndota nseja jola.

20 Ebabiya pa mesa, lilobi laka Bambu Sapanga lunhikila nndota nseja joankelabua mundu waka Sapanga jola, 21 najombi ampwagila mundu waka Sapanga juku Yuda kubanga, "Bambu Sapanga jupwaga ana, ‘Wehapa gukotwiki kupwata lilobii laka Bambu Sapanga, na ngasegupwatiki malagalaki gajugulagalakia Bambu Sapanga, Sapanga waku. 22 Badala jaki gukelabwiki pamba, kula posu na kunywa masi pandu pamba panugupwagila wiikula posu wala kunywa masi. Ndienu, ntuhi waku ngabagutagi ku matenge gaka hoku bako.’"

23 Ejajomula kula, nndota nnseja hoju anhandalia liponda mundu waka Sapanga hoju, najombi jatenda kuboka. 24 Ejabiya mwiindela, jwaketangana ni lihimba latenda kunkoma, ntuhi waki wabiya buguleki pi indela, liponda laki ni lihimba lela labiya lijemiki pulutengu jaki. 25 Bandu babapeta hapu nukugubona ntuhi hogu guhabuki piindela, ni lihimba lijemiki pambipi jaki, bajenda mbaka ku musi kojabiya jutama nndota nseja jola, nukwaalandi bandu.

26 Ndota nseja jola jojabia ankemiki kunyumba jaki ejajowana majambu haga, japwaga, "Ajo ndi mundu waka Sapanga jola jojasindwa kupwata lilobi laka Bambu Sapanga! Bambu Sapanga antumi lihimba, luntukalia nukunkoma ngati ejabiya ampwagi." 27 Hapa ndi jaapwagila bana baki, "Nhandalia liponda." Nabombi batenda kunhandali. 28 Nseja jola jajenda nukugukole ntuhi waka mundu jwaka Sapanga mwiindela, lihimba ni liponda laki ibii pulutengu jaki, lihimba heli ngaselakuliki ntuhi hogu wala kulitukali liponda lela. 29 Ndienu, nndota nseja jola jugujukua ntuhi waka mundu jwaka Sapanga jola, nukugubeka panani jiliponda laki, nukugukelabu ku musi waki, ili kundele kuwa kwaki nukuntaga. 30 Ndienu buntaga pi litenge laki, bundelila koni apwaga, "Oo! Nndongu wito tugubone ikia, gunndongu witu!" 31 Ebabiya buntagiki, ndota nseja hoju jaapwagila bana baki, "Enikuwa mwindaga mu litenge lende lituntagiki mundu waka Sapanga jonzo, mahupa gangu mwagabeka pulutengu ja mahupa gaki. 32 Majambu goti gaguge Bambu Sapanga jabiya jupwagiki kupete pandu pukupiiki matambiku puku Beseli, na pandu poti pukupiiki matambiku kwiitombi ku misi juku Samalia, sakaka giitenda kuhengeka."

33 Baada ja haga goti bambu nkolongu Yelobuamu ngasejwakotwiki kuhenga ubaja, ila jwaendalia kwaahagu bandu banga kuba Alawi kuba aka agolu, ahenga lihengu pandu pukupiiki matambiku ku itombi. Mundu jokapi jola jojwapala kuba ngolu ahimika kuba ngolu ili juhenga lihengu lukumpiiki matambiku ku itombi. 34 Kihakau hesi suluhenga lukolu lwaka Yelobuamu kuabuka nukuguhoa mbaka ngasewabonika pu nndema.