Milagres de Jesus

Jesu Waponya Moofu ku Betisaida

22 Jesu abasikwiiya bakwe nibakasika ku Betisaida, bamwi bantu bakeeta mwaalumi moofu kuli Jesu okumukumbila kuteeti amukume kuteegwa apone. 23 Jesu wakajatilila mwaalumi moofu kujanza okumugwisya mumuunzi. Naakamana kumubika mate mumenso wakamubika maanzaakwe okumubuzya kuteeti, "Ino kuli cobwene na?"

24 Ooyu mwaalumi wakalanga-langa okutaba kuteeti, "Iiyi ndibwene bantu, nekuteegwa baboneka mbuli zisamu ziyobweendeenda."

25 Ape Jesu wakamubika maanzaakwe amenso. Mpoonyina mwaalumi ooyu wakalangisisya mpoonyina menso aakwe akapona okutalika kubona kabotu. 26 Kuzwaawo Jesu wakamwaambila kuteeti ainke kungʼanda okumulailila kuteeti, "Utapilukili mumuunzi kuyaambila bantu zyacitika."

Jesu Waponya Cimuumu

31 Mpoonyina Jesu wakazwa kucilalaanda cizungulukide Taila okuyoinda mutaindi pati lya Sidoni. Kuzwaawo, wakaselela kuya kulwizi lwa Galileya kaya kucilalaanda ca Mataindi aali Kumi. 32 Kwali mwaalumi wakali cimuumu. Bamwi bantu bakamweeta kuli Jesu. Mpoonyina bakamukumbila kuteeti amukume amaanzaakwe. 33 Mpoonyina Jesu wakamugwisya abantu okumutola kumbali kuzwaawo wakamusyonka minwe mumatwi, okuswida, mpoonyina wakamujata kululimi mwaalumi ooyu. 34 Kuzwaawo wakalanga kujulu mpoonyina wakayeekesya, okwaamba kuteegwa, "Efata*Ibbala lye "Efata" ci Alamaiki. Ooyu musyobo walikwaambolwa loko mucilalaanda ca Palestina muciindi ca Jesu.," kokuteeti, "Sinkuka!"

35 Mpoonyinaawo matwi omwaalumi ooyu akasinkuka olulimi lwakwe lwakaangunuka okutalika kwamboola kabotu. 36 Mpoonyina Jesu wakalailila bantu kuteeti bataambili naanga muntu womwi zyacitika, mbwaalikuzumanana kubakasya kwaambila bantu, abo mbobakazumanana kwaambila bantu. 37 Bantu bakakomokwa loko okuteeti, "Zyoonseneni uzicita kabotu, mane ulaponya bacimuumu."

Jesu Waponya Moofu

46 Kuzwaawo Jesu abasikwiiya bakwe bakeza kutaindi pati lye Jeliko. Nibalikuzwa kwateni abantu banji, umwi moofu sikukumbila uutegwa Bbatimeyo, mwanaa Timeyo walikede mumbali enzila. 47 Naakamvwa kuteeti ngu Jesu woku Nazaleta, wakatalika koongolola kateeti, "Jesu Mwanaa Deveti, ndifwide kwateni mangʼeke!"

48 Bantu banji bakamupatookela okumwaambila kuteeti aumune. Kono we naakoongololesya kuteeti, "Mwanaa Deveti, ndifwide kwateni mangʼeke!"

49 Jesu wakaima okwaamba kuteeti, "Amumwiite."

Mpoonyina bakamwiita mwaalumi moofu, kabateeti kulinguwe, "Botelwa! Nyamuka! Ulakwiita."

50 Wakasowa jansi lyakwe okusotoka, mpoonyina wakavwalooka kuza kuli Jesu.

51 Jesu wakamubuzya kuteeti, "Ino uyanda kuteeti ndikucitile nzi?"

Wakataba kuteeti, "Omwiiyi wangu, ndiyanda kuteeti ndibonaape."

52 Jesu wakamwaambila kuteeti, "Koya, lusyomo lwako lwakuponya."

Mpoonyinaawo wakakonzya kubona, okucilila Jesu munzila.

Jesu Waponya Moofu Sikukumbilila

35 Jesu naakasika afwiifwi o Jeliko, umwi mwaalumi moofu wakede mumbali enzila kakumbilila. 36 Ooyu mwaalumi naakamvwa kuyoba kwe bbunga lyabantu lyalikwiinda, wakabuzya kuteeti, "Ino niinzi cicitika?"

37 Mpoonyina bakamwaambila kuteeti, "Ngu Jesu woku Nazaleta nguuyobwiinda."

38 Mpoonyina wakoongolola kateeti, "Jesu! Mwanaa Deveti! Ndifwide mangʼeke!"

39 Mpoonyina bantu bali kunembo bakamupatookela okumwaambila kuteeti aumune, kono we naakoongololesya kateeti, "Mwanaa Deveti! Ndifwide mangʼeke!"

40 Jesu naakamumvwa, wakaima okulailila kuteeti ooyu mwaalumi bamweete kulinguwe. Naakaswena afwiifwi, Jesu wakamubuzya kuteeti, 41 "Ino uyanda kuteeti ndikucitile nzi?"

Wakataba kuteeti, "Mwami, ndiyanda kubonaape."

42 Mpoonyina Jesu wakamwaambila kuteeti, "Ano kobona! Lusyomo lwako lwakuponya."

43 Mpoonyinaawo wakakonzya kubona ape, okucilila Jesu okukayoobulumbaizya Leza. Bantu boonse nibakabona namu abo bakalumbaizya Leza.

30 Banyinazyala Saimoni balilede kaambo kokuciswa kupya mubili. Jesu ucisika feela bakamwaambila. 31 Mpoonyina Jesu wakainka okuyoobajata kujanza okubagwasya kunyamuka. Bakapona, mpoonyina bakayumbula Jesu abasikwiiya bakwe cokulya.

Jesu Waponya Mwaalumi Sicinsenda

40 Umwi mwaalumi walikuciswa cinsenda* wakainka kuli Jesu okuyoomufugamina. Mpoonyina wakamukumbila kuteeti amugwasye. Wakateeti, "Na ulayanda inga wandiponya."

41 Jesu wakamumvwida mangʼeke* loko, wakatandabika janza lyakwe okumuguma. Mpoonyina wakateeti, "Ndilayanda. Kopona!" 42 Mpoonyinaawo cinsenda cakamana, ooyu mwaalumi wakapona.

3 kwakeza bantu kulinguwe bakeeta mwaalumi wayuminide mubili, kanyamwidwe abaalumi bone. 4 Bakabula okumwiinzya kumutola kuli Jesu kaambo kokuvula kwabantu. Mpoonyina bakatulula atala eciluli* kululama paali kubede Jesu okumwiinzya fateni kalede abulo bwakwe. 5 Jesu naakabona lusyomo lwabo wakaambila mulwazi kuteeti, "Mwanaangu, zibi zyako zyajatilwa."

6 Bamwi bamayi bo Mulawo bakakedeko bakatalika kulyamboozya mumyoyo yabo kuteeti, 7 "Ino niinzi naamboola namu ooyu? Ooku kusampula Leza! Ngwani uunga wajatila zibi kunzaa Leza alike."

8 Mpoonyinaawo Jesu wakaziba zyobakali kuyeeya, mpoonyina wakababuzya kuteeti, "Ino niinzi nemuyeeya zili namu?" 9 Wakababuzya kuteeti, "Ceecili cuuba, kwaambila uyumininide mubili kuteegwa ‘Zibi zyako zyajatilwa’ na kumwaambila kuteeti ‘Nyamuka, bweza bulo bwako weende’? 10 Iino ndiyanda kumutondezya kuteeti Mwanoo Muntu uleenguzu aano ansi zyokujatila zibi." Mpoonyina Jesu wakaambila mulwazi kuteeti, 11 "Ndikwaambila kuteeti, nyamuka, bweza bulo bwako uye kungʼanda yako!"

12 Cokufwambaana wakanyamuka, okubweza bulo bwakwe, okuzwawo kabalangilide boonse. Bantu bakakomokwa loko, okutalika kulumbaizya Leza kabateeti, "Tatunabwene cilinamu!"

Jesu Waponya Mwaalumi Uyuminide Janza mu Nsabata

1 Aimwi Nsabata, Jesu wakanjila mu cikombelo ape. Oomo mwali mwaalumi wayuminide janza. 2 Bakamulangisisya kuyanda kubona na ulamuponya mu Nsabata kuteegwa bamujanine mulandu. 3 Mpoonyina Jesu wakaambila mwaalumi ooyu kuteeti, "Koza kunembo." 4 Mpoonyina wakababuzya kuteeti, "Ino ceecili Mulawo wesu cuuzumizya kucita mu Nsabata? Kucita cibotu na cibi? Kufutula buumi na kujaya?"

Taakwe nibakamutaba naanga comwi. 5 Jesu naakabalanga wakanyema o kuusa kaambo kokuyuma kwemyoyo yabo. Mpoonyina wakaambila mwaalumi ooyu kuteeti, "Olola janza lyako." Mpoonyina wakacita mboonyina namu, janza lyakapona.

Jesu Waponya Mwaalumi Sicinsenda

12 Imwi nako Jesu naali mutaindi limwi, oomo mwali mwaalumi wajesi cinsenda* mubili woonse. Ooyu mwaalumi naakabona Jesu, wakavundama kunembo lyakwe okumukumbila kuteeti, "Mwami, na ulayanda inga wandiponya."

13 Mpoonyina Jesu wakatandabika janza lyakwe okumuguma okuteeti, "Ndilayanda. Kopona!" Mpoonyinaawo cisenda cakamana, ooyu mwaalumi wakapona.

18 Iino bantu bamwi bakeeta mwaalumi wayuminide mubili amacile. Bakasola kuteeti bamweete kunembo lya Jesu mungʼanda. 19 Kono mukubula cibaka cokwiinda kaambo kokuvula kwabantu, bakatanta manela kabaya atala lyeciluli cipateme, okudonkola cipulo okumwiinzya fateni kalede amacile aakwe kumusisya akati kabantu paabede Jesu. 20 Jesu naakabona lusyomo lwabo wakateeti kumulwazi, "Mweenzuma, zibi zyako zyajatilwa."

21 Bafalisi abamayi bo Mulawo bakatalika kulyamboozya mumyoyo yabo kuteeti, "Ngwanooyu muntu usampoola Leza? Ngwani uunga wajatila zibi kunzaa Leza alike?"

22 Jesu mukuziba zyobali kuyeeya mumyoyo yabo wakateeti, "Ino niinzi comuyeeya zili namu? 23 Ino ceecili cuuba, kwaamba kuteeti, ‘Zibi zyako zyajatilwa,’ naakuteeti, ‘Nyamuka weende’? 24 Kono ndiyanda kumutondezya kuteeti Mwanoo Muntu ulijesi nguzu zyokujatila zibi aanaansi." Mpoonyina Jesu wakaambila mwaalumi wakayumininide mubili kuteeti, "Nyamuka! Bweza macile aako, uye kungʼanda yako."

25 Mpoonyinaawo wakanyamuka kabalangilide okubweza macile aakwe, okuya kungʼanda yakwe kalumbaizya Leza.

Jesu Waponya Mwaalumi mu Nsabata

6 Bumwi buzuba bwe Nsabata, Jesu wakanjila mu cikombelo okutalika kwiisya. Oomo mwali mwaalumi wayuminide janza lyolulyo. 7 Kwali bamwi bamayi bo Mulawo abamwi Mafalisi bali kuyandoola nzila yokupeda fateni Jesu mulandu. Kaambo keeci bakamulangisisya kuyanda kubona na ulaponya mu Nsabata. 8 Kono Jesu waliizi mizeezo yabo, mpoonyina wakaambila mwaalumi ooyu kuteeti, "Nyamuka uze kuno." Mwaalumi wakainka okuyoima. 9 Mpoonyina Jesu wakababuzya kuteeti, "Ino ceecili Mulawo wesu cuuzumizya kucita mu Nsabata? Kucita cibotu na cibi? Kufutula buumi na kubusinyoona?" 10 Amane wakazinguluka kubalanga boonse okwaambila mwaalumi kuteeti, "Olola janza lyako." Mpoonyina wakacita mboonyina namu, janza lyakapona.

Jesu Waponya Muzike Wasilutwe Wabasilumamba

1 Jesu naakamana kwaamba zintu eezi zyoonse kubantu, wakanjila mu Kapenaumu. 2 Mutaindi eelyo kwakali umwi mweendelezi wabasilumamba beci Loma, wakajesi muzike ngwaalikuyandisya loko. Muzike ooyo walikuciswa colufu. 3 Silutwe wabasilumamba naakamvwa zya Jesu, wakakumbila bamaalu beci Juda bamwi kuteegwa bakamukumbilile kuteeti Jesu aze kuzooponya muzike wakwe. 4 Mpoonyina bakeza kuli Jesu, okumukombelezya loko kabateeti, "Ooyu muntu uleelede kugwasigwa ayibo. 5 Muntu uuyanda musyobo wesu weci Juda ape nguwakatuyakila cikombelo."

6 Mpoonyina Jesu wakainkaabo. Naakasika afwiifwi engʼanda, mweendelezi wabasilumamba wakatuma bamwi beenzinyina kuteegwa baambile Jesu kuteeti, "Mwami, utalikatazyi, kaambo tandelede kuteeti undizide mu ngʼanda yangu. 7 Naanga mebo kulimvwa kuteeti ndileelede kuza kulindiwe. Lailila feela mpoonyina mubelesi wangu ulapona. 8 Ndilizi kaambo amebo ndili muntu weendelezegwa abolupati-pati ape ndeendelezya basilumamba bamwi. Ndaambila omwi kuteeti ‘Koya’, ulainka, ape na ndaambila umwi kuteeti, ‘Koza’ uleza. Ape ndalailila mubelesi wangu kuteeti, ‘Cita namu,’ ulacita."

9 Jesu naakamvwa namu wakamukomokwa. Wakalanga bbunga lyabantu lyalikuyoobumucilila okuteeti, "Ndimwaambila kuteeti tandina kujana lusyomo mbuli oolu nekuba kubana Izilaili!"

10 Aabo bakatumidwe nibakapiluka kungʼanda ya silutwe wabasilumamba, bakajana mubelesi wapona kale.

11 kwali mwanakazi walikujesi muuya mubi walikumucisya kwemyaaka iili kumi o lusele. Waloongomene cokuteeti taalikukonzya kwiinamuka naanga aniini. 12 Jesu naakamubona wakamwiita okuteeti, "Mwanakazi, waangununwa kubulwazi bwako!" 13 Mpoonyina Jesu wakabika maanzaakwe alinguwe, mpoonyinaawo mwanakazi wakainamuka okulumbaizya Leza.

Jesu Waponya mu Nsabata

1 Bumwi buzuba bwe Nsabata Jesu naakainka kuyoolya kungʼanda youmwi mweendelezi wa Bafalisi, boonse bantu ooko bakamulangisisya. 2 Mpoonya-mpoonya umwi mwaalumi walikuciswa bulwazi bokuzimba maulu amaanza wakeza kuli Jesu. 3 Mpoonyina Jesu wakabuzya bamayi bo Mulawo a Bafalisi kuteeti, "Ino Mulawo wesu ulazumizya na tuuzumizyi kuponya muntu mu Nsabata?"

4 Kono taakwe nibakamutaba naanga comwi. Mpoonyina Jesu wakajata mwaalumi ooyo okumuponya. Amane, wakamuleka wainka.

Jesu Waponya Basizinsenda Bali Kumi

11 Iino Jesu naali mumusinzo woku Jelusalemu, wakainda mumunyinza wa Samaliya o Galileya. 12 Naalikunjila mumunzi umwi, basizinsenda bali kumi bakeza kulinguwe okwiimina aleele, 13 okoongolola kabateeti, "Jesu! Simalelo! Tufwide mangʼeke!"

14 ✝Jesu naakababona wakateeti kulibo, "Kamuya ku Ngʼanda ya Leza kubapaizi bakaakubone kuteeti mwapona."

Kumane bakaponisigwa kabayoobuya. 15 Umwi wabo naakabona kuteeti wapona, wakapiluka kuli Jesu kalumbaizya Leza ejwi pati. 16 Naakasika wakaavuntamina Jesu okumulumba. Mwaalumi ooyu wali muna Samaliya. 17 Mpoonyina Jesu wakateeti, "Ede kwaponesegwa bali kumi. Ino bali fuka bali kuli? 18 Kaambo nzi nikwapiluka feela wamasi ooyu kuzoolumba Leza?" 19 Mpoonyina Jesu wakateeti kulinguwe, "Nyamuka, koya. Lusyomo lwako lwakuponya."

25 Iino kwali mwanakazi walikuciswa bulwazi bwakalobola kwemyaka iili kumi eyobile. 26 Wakapenga loko kasilikwa abasilisi basiyene-siyene. Wakabelesya lubono lwakwe loonse, kono taakwe naakapona obulwazi nibwakazwida anembo kukomena. 27 Walimvwide kale zya Jesu mpoonyina wakanjila mubantu kusule lyakwe. 28 Okulyaambila kuteeti, "Naa ndakuma feela jansi lyakwe ndilapona."

29 Wakakuma kwateni, mpoonyinaawo gazi lyakaleka kuzwa okulimvwa kuteeti wapona.

43 Iino kwali mwanakazi walikuciswa bulwazi bwakalobola kwemyaka iili kumi eyobile, wakabbadela zyoonse zyaajesi kubasilisi*, kono taakwe wakakonzya kumusilika.

44 Wakanjila mubantu kusule lya Jesu, okukuma kumamanino ejansi lya Jesu, mpoonyinaawo gazi lyakaleka kuzwa. 45 Jesu wakabuzya kuteeti, "Ngwani wandikuma?"

Kono boonse bakakaka. Mpoonyina Pita wakateeti, "Simalelaangu, bantu banji balikuzungulukide okukusyaanikizya."

46 Kono Jesu wakateeti, "Kuluumwi wandikuma ecaali, kaambo ndamvwa nguzu ziponya zyazwa mulindime." 47 Ooyu Mwanakazi naakabona kuteeti wasyungulwa, wakeza kuli Jesu katuntuma* okufugama anembo lyakwe. Mpoonyina wakalungulwida Jesu akati kabantu boonse caakamukumina ombwaakaponesegwa mpoonyinaawo. 48 Mpoonyina Jesu wakamwaambila kuteeti, "Omwanaangu, lusyomo lwako lwakuponya. Koya muluumuno."

22 Mpoonyina kwakasika mwaalumi walikwiitwa kuteeti Jailosi, mweendelezi womu cikombelo. Naakabona Jesu wakamufugamina 23 okumukumbila cokuzumanana kuteeti, "Mwanaangu musimbi wafwa kuciswa. Aakaka koza umubike maanzaako kuteeti apone!"

24 Mpoonyina Jesu wakainka anguwe. Bantu balikuyoobucilila Jesu bali banji cokuteeti balikuyoobumusyanikizya.

38 Bakasika kungʼanda ya Jailosi okubona manyongwe abantu kabalila okoongolola loko. 39 Wakanjila mukati okubabuzya kuteeti, "Ino mwanyonganinanzi namu? Mulila nzi? Ooyu mwana tafwide, ulede feela." 40 Kono bo bakatalika kumufubaazika.

Mpoonyina wakabagwisizya anze okutola baisi abanyina aabo basikwiiya bakwe botatwe okunjila mwalikulede mwana. 41 Wakamujata kujanza okwaamba kuteeti, "Talita, komi!" Kokuteeti, "Musimbi, ndikwaambila kuteeti nyamuka!"

42 Wakanyamuka mpoonyinaawo okutalika kweendeenda. Waleemyaka ili kumi ayobile. Nicakacitika eeci aabo bakabona bakakomokwa loko.

31 Jesu wakaindilizya kateeti "Ino bantu bomusela wesunu inga ndabakozyanye enzi? Babede mbuli nzi? 32 Bali mbuli bana bakede mumusika. Kamwi kabunga kabana kalateeti kuli kamwi, ‘Twamulizizya nyeele, kono taakwe nimwazyana! Twaimba nyimbo zyecililo kono taakwe nimwalila.’ 33 Ede Joni Mubbabbatizi wakeza katalyi zilyo zibalikulya obuzuba bantu boonse okutanywa waini, mpoonyina mwaamba kuteeti, ‘Uleedimona.’ 34 Mwanoo Muntu wakeza kalya okunywa, mpoonyina mwaamba kuteeti, ‘Amumubone, uleendya ape mukolwi, mweenzinyina wabasimutelo abasizibi.’ 35 Kono busongo bwa Leza bulalitondezya kuteeti mbwanconzyo mubana bakwe."

Jesu Wananikwa o Mwanakazi Sizibi

36 Umwi Mufalisi wezina lya Saimoni wakatamba Jesu kuteeti akalalile awe. Mpoonyina Jesu wakainka kungʼanda yo Mufalisi okuyookalaansi kuteegwa alye. 37 ✝Iino oomo mutaindi mwali mwanakazi sizibi. Naakamvwa kuteeti Jesu walikulya mu ngʼanda yo Mufalisi, wakeeta nsanzi yakapangwa ebbwe lya alabbasita* yalikuzwide mafuta aanunkilila.

41 Mpoonyinaawo umwi wabeendelezi be cikombelo walikwiitwa kuteeti Jailosi wakeza okufugama anembo lya Jesu, okumukombelezya kuteeti ainke kungʼanda yakwe, 42 kaambo kokuteeti mwana wakwe musimbi waleemyaka ili kumi ayobile walikuciswa cokuyanda kufwa. Ngomwana ngwaalikujesi alike.

Jesu wakazumina kwiinka awe. Mpoonyina naalikuyobweenda bantu balikuyoobumusyaanikizya.

49 Jesu naacilikwaamboola omwanakazi, kwakeza mutumwa kuzwa kungʼanda ya Jailosi okwaambila Jailosi kuteeti, "Mwanaako wafwa, lekakusyupa mwiiyi."

50 Kono Jesu naakamvwa zyakacitika, wakaambila Jailosi kuteeti, "Utayoowi, syoma feela, mpoonyina mwana wako ulapona."

51 Jesu naakasika kungʼanda ya Jailosi taakwe ngwakazumizya kumucilila kunjila anguwe mu ngʼanda kunze lya Pita, Joni, Jemusi, baisi abanyina mufu. 52 Boonse bantu balikubede kwateni balikulila, kono Jesu wakabaambila kuteeti, "Amuleke kulila, kaambo ooyu mwana tafwide ulede feela."

53 Kono bo bakatalika kumufubaazika, kaambo balizi kuteeti mwana wafwa. 54 Kono Jesu wakajata janza lyomwana ooyo okwaambisya kateeti, "Mwanaangu, buka!" 55 Muuya womwana wakapiluka, mpoonyinaawo mwana wakabuka. Kuzwaawo Jesu wakabalailila kuteeti, "Amumupe cokulya." 56 Bazyali bo mwana bakakomokwa, kono Jesu wakabakasya kwaambila muntu naanga omwi kuli zyakacitika.

37 Pobatalikuyeeyela kwakaunga guwo pati, cokuteeti mayuwe akatalika kukupailila manzi mumugolo, mane watikazule. 38 Nako eeyo Jesu walilede musule lyomugolo, kabikide mutwe pokusegela. Basikwiiya bakwe bakamubusya okuteeti, "O mwiiyi, tobwene kuteegwa tuyanda kufwa na?"

39 Mpoonyina Jesu wakanyamuka okulailila guwo amayuwe kuteeti, "Umuna!" Guwo lyakamana mpoonyina kwakaumuna zii. 40 Jesu wakabuzya basikwiiya bakwe kuteeti, "Ino niinzi nemuyowa namu? Eino tamuna kuba olusyomo na?"

41 Kono bakayoowa loko okubuzyana kuteeti, "Ngwanooyu uunga mane guwo amayuwe zilamumvwida?"

35 Kujolezya, basikwiiya bakwe bakamuzida okwaamba kuteeti, "Nako yainka loko ape ecino cibaka cilikule abantu. 36 Tuyeeya kuteeti niwabaambila bantu kuteeti bainke mumiinzi otuunzi tulaafwiifwi kuteeti bakalyuulile zyokulya."

37 Kono Jesu wakataba kuteeti, "Ndinywenya nywebo amubape zyokulya."

Bakamubuzya kuteeti, "Ino waamba kuteegwa tubelesye miwayawaya ye nsiliva* ili myaanda yobile kuula cinkwa cokusanina bantu aaba na?"

38 Mpoonyina Jesu wakababuzya kuteeti, "Mujesi zinkwa zyongayi? Kamuya mukabone."

Nibakaakulanga, bakazomwaambila kuteeti, "Zili zyosanwe enswi zyobile."

39 Kuzwaawo Jesu wakaambila basikwiiya bakwe kuteeti bakazike bantu mutubunga-bunga abwizu buteteete. 40 Mpoonyina bantu bakakala mbwakaamba mutubunga-bunga twamwaanda, bamwi twamakumi osanwe. 41 Mpoonyina Jesu wakabweza zinkwa zyosanwe enswi zyobile, okulanga kujulu okulumba Leza. Wakakomoona zinkwa okupa basikwiiya bakwe kuteeti baabanye bantu. Mpoonyina wakabweza nswi zyobile okubaabanya boonse. 42 Boonse bakalya okukuta. 43 Kuzwaawo, basikwiiya bakwe bakabwezelela zizuma zili kumi ezyobile zyezilyo zyakasyaala. 44 Baalumi bakalya bali zyuulu zyosanwe kutabalilizya banakazi abana.

48 Wakabona kuteeti basikwiiya bakwe balimukupenga kukwasula mugolo, kaambo ke guwo lyalikubaungila. Kuseeni-seeni loko wakeza kulibo kayobweenda atalaamaanzi. Watikabaindilile, 49,50 kono nibakamubona kayobwenda atalaamaanzi, boonse bakayoowa loko okutalika kukwiila kaambo balikuteeti ndi saku.

Kono mpoonyinaawo Jesu wakabaambila kuteeti, "Mutazwi myoyo! Mutayowi! Ndime." 51 Mpoonyina wakanjila mumugolo mubalikubede, eguwo lyakamana. Basikwiiya bakwe bakakomokwa loko

Jesu Wasanina Bantu Bali Zyuulu Zyone

1 Taakwe nikwakainda nako ape kwakabungana bantu banji. Kaambo kokuteeti tibalikwe zyokulya, Jesu wakaita basikwiiya bakwe kuteeti baze kulinguwe okubaambila kuteeti, 2 "Aaba bantu ndabamvwida mangʼeke kaambo kwamazuba otatwe tulilimwi, ape taakwe cokulya. 3 Kuteeti ndabaambila kuteegwa bapiluke kumaanda aabo enzala, balanetuka munzila kaambo bamwi bazwa kule."

4 Basikwiiya bakwe bakabuzya kuteeti, "Ino tulazijanayi zilyo muno munkanda zyokusanina bantu boonse aaba?"

5 Jesu wakababuzya kuteeti, "Ino kuli zinkwa zyongayi?"

Bakamutaba kuteeti, "Ciloba."

6 Mpoonyina Jesu wakaambila bantu kuteeti bakale ansi. Kuzwaawo wakabweza zinkwa ziliciloba, wakalumba Leza okuzikomoona. Mpoonyina wakapa basikwiiya bakwe kuteeti baabanye bantu, abo bakacita mboonyina mbubakaambilwa. 7 Balikujesi otuswi tuniini, Jesu naakamana kulumba wakaambila basikwiiya bakwe kuteeti ato batwaabanye bantu. 8,9 Boonse bakalya okukuta. Kwali bantu batakasike kuzyuulu zyone bakalya. Mpoonyina basikwiiya bakabwezelela zizuma ziliciloba zyezilyo zyakasyaala. Mpoonyina Jesu wakamwaisya bantu.

Mukuyu Uutakwe Micelo

12 Nibwakaca Jesu abasikwiiya bakwe kabayoobuzwa ku Bbetaniya, wakafwa nzala. 13 Aleele wakabona cisamu comukuyu cavuzyenye maani, mpoonyina wakainka kwateni kuyobona na cilizyede. Kono naakasika wakajana maani feela, kaambo nako yenkuyu tiyalina sika. 14 Jesu wakaambila cisamu kuteeti, "Kutakabi utakalye nkuyu zyako ape!"

Basikwiiya bakwe bakamumvwa caakaamba.

Ciiyo Kuzwa Kucisamu Comukuyu

20 Mujunzoonza nibalikuyoobweenda munzila, bakabona ciya cisamu comukuyu kaciyumide kuzwa kumiyanda. 21 Pita wakayeeya zyakacitika, mpoonyina wakaambila Jesu kuteeti, "Omwiiyi, bona! Cisamu comukuyu ciwakafwiza cayuma!"

22 Mpoonyina Jesu wakabataba kuteeti, "Amusyome muli Leza! 23 ✝Ndimusyomezya kuteeti kufumbwa waambila cilundu eeci kuteeti, ‘Nyukuka okulifusila mulwizi,’ ape kuteeti katazumboozyi mumoyo kono kasyoma kuteeti zyaamba zilacitika, ulacitilwa. 24 Kaambo keeci ndamwaambila kuteeti, mwanokomba okukumbila zintu, musyome kuteeti mwatambula kale, mpoonyina muyopegwa kufumbwa cimwakumbila. 25 ✝Ape mwanookomba, mweelede kujatila zibi zyoonse zibakamubisizya bamwi kuteegwa uso uuli kujulu amujatile zibi zemwakacita.

Jesu Waita Basikwiiya Bakwe Bokusaanguna

1 ✝Bumwi buzuba Jesu kaimvwi ankomwe yo lwizi lwa Genasaleti,* bantu banji balikusyanikizyanya kabaswena kulinguwe kuteegwa bamvwe majwaa Leza. 2 Jesu wakabona migolo yobile yalaambali olwizi. Basikuzuba baliiside kabayoosanzya tunyandi twabo. 3 Mpoonyina Jesu wakanjila mumugolo umwi wali wa Saimoni okumukumbila kuteeti autontele mumaanzi aniini. Kumane Jesu wakakala mumugolo okwiisya mbunga.

4 Naakamana kwiisya, wakateeti kuli Saimoni, "Tontela mugolo mumaanzi malamfu kuteegwa yebo abeenzinyoko musowele tunyandi twenu mumaanzi mujate nswi."

5 ✝Mpoonyina Saimoni wakateeti, "O mwami, twabeleka cenguzu busiku boonse kusola kujata nswi kono taakwe citwajata naanga comwi. Kono kaambo waamba, ndilacita mboonya namu." 6 ✝Nibakacita namu bakaca nswi zinji loko, mane tunyandi twakatalika kuyawooka. 7 Bakacita kukobeta beenzinyina bali mumugolo umwi kuteegwa bazoobagwasye. Bakeza okuzuzya migolo yobile mane yalikuyanda kubbila. 8 Saimoni Pita naakabona cakacitika, wakafugama kunembo lya Jesu okuteeti, "Mwami ndisiya! Ndilisimucita zibi!"

9 Saimoni wakaamba namu kaambo we abeenzinyina bakakomokwa loko obunji bwe nswi zibakajata. 10 Beenzinyina Saimoni bene Jemusi o Joni bana ba Zebbediya abo bakakomokwa. Kono Jesu wakateeti kuli Saimoni, "Utayoowi, kuzwa sunu unooli muzubi wabantu."

11 Kuzwaawo bakakwelela migolo yabo anze amaanzi mpoonyina bakasiya zyoonse okumucilila.

Jesu Waumuzya Guwo

22 Bumwi buzuba Jesu abasikwiiya bakwe bakanjila mumugolo mpoonyina wakabaambila kuteeti, "Atuzubukile kutala limwi lyo lwizi." Kumane bakatalikizya. 23 Nibalikuyoobuya mumugolo, Jesu wakoona. Mpoonyinaawo kwakabbubbula guwo pati mulwizi, mane maanzi akatalika kukupaikila mumugolo. Bakaba muntenda mpati. 24 Basikwiiya bakeza kuzoomubusya kabateeti, "Mwami! Mwami! Tuyanda kufwa!"

Mpoonyina Jesu wakabuka okupatookela guwo amayuwe, mpoonya-mpoonya zyakamana olwiizi lwakaumuna zii. 25 Mpoonyina wakateeti kuli basikwiiya bakwe, "Lulikuli lusyomo lweenu?"

Kono basikwiiya bakakomokwa okuyoowa loko, okulyaamboozya kabateeti, "Ngwanooyu uunga mane apatooka guwo amayuwe zilamumvwida?"

Jesu Waumuzya Guwo

22 Bumwi buzuba Jesu abasikwiiya bakwe bakanjila mumugolo mpoonyina wakabaambila kuteeti, "Atuzubukile kutala limwi lyo lwizi." Kumane bakatalikizya. 23 Nibalikuyoobuya mumugolo, Jesu wakoona. Mpoonyinaawo kwakabbubbula guwo pati mulwizi, mane maanzi akatalika kukupaikila mumugolo. Bakaba muntenda mpati. 24 Basikwiiya bakeza kuzoomubusya kabateeti, "Mwami! Mwami! Tuyanda kufwa!"

Mpoonyina Jesu wakabuka okupatookela guwo amayuwe, mpoonya-mpoonya zyakamana olwiizi lwakaumuna zii. 25 Mpoonyina wakateeti kuli basikwiiya bakwe, "Lulikuli lusyomo lweenu?"

Kono basikwiiya bakakomokwa okuyoowa loko, okulyaamboozya kabateeti, "Ngwanooyu uunga mane apatooka guwo amayuwe zilamumvwida?"

Jesu Watanda Madimona Manji Mumwaalumi

26 Jesu abasikwiiya bakwe bakazubuka mumugolo okusika kucilalaanda cabana Gelasa, calangene o Galileya.

12 Izuba nilyakainka mukubbila, basikwiiya balikumi abobile bakeza kulinguwe okuteeti, "Niwabaambila bantu kuteeti bainke mumiinzi otuunzi tulaafwiifwi kuteegwa bakalijanine zyokulya amalalo kaambo ecino cibaka cilikule abantu."

13 Kono Jesu wakaambila basikwiiya bakwe kuteeti, "Ndinywenya nywebo amubape zyokulya."

Mpoonyina bakataba kuteeti, "Kono tujesi feela zinkwa zyosanwe enswi zyobile. Ino uyanda kuteeti tukabaulile zilyo bantu boonse aaba na?" 14 Kwakali baalumi balikutandila kusika kuzyuulu zyosanwe mumbunga.

Jesu wakaambila basikwiiya bakwe kuteeti, "Amubaambile bantu bakale makumi osanwe kabunga akabunga."

15 Basikwiiya nibakamana kucita namu, 16 Jesu wakabweza zinkwa zyosanwe enswi zyobile, wakalanga kujulu okuzileleka. Mpoonyina wakazikomoona okupa basikwiiya bakwe kuteegwa baabanye bantu. 17 Boonse bakalya okukuta. Kuzwaawo basikwiiya bakabwezelela zizuma zili kumi ezyobile zyezilyo zyakasyaala.

23 Mpoonyinaawo mucikombelo kwali mwaalumi waloomuuya mubi, wakatalika koongolola kuteeti, 24 "Ino uyandanzi kulindiswe, Jesu woku Nazaleta? Wazotusinya na? Ndilikuzi, ndiwe uusalala wa Leza."

25 Jesu wakalailila muuya mubi kuteeti, "Umuna! Zwa mumwaalumi ooyu!"

26 Mpoonyina muuya mubi wakamusuntusya kaukwiila loko, okuzwa mulinguwe.

Jesu Wafutula Mwaalumi Unjilidwe Muuya Mubi

1 Mpoonyina Jesu abasikwiiya bakwe bakasika mutala limwi lyo Lwizi lwa Galileya, lili mucilalaanda ca Gelasa. 2 Mbwaakazwida feela mumugolo Jesu, mwaalumi wakanjilidwe muuya mubi wakeza kuzwa mumayumbelo* okumuswaana. 3 Ooyu mwaalumi walikukala mumayumbelo. Taakwe wacilikukonzya kumubamba kaangidwe naanga amaceeni. 4 Ziindi zinji walikwaangwa kumaulu okumaanza amaceeni kono nako yoonse walikwaabbansula okutyoloola nsimbi zyakalikwaangwa kumaulu. Taakwe waleenguzu loko zyokumuzunda. 5 Masiku esikati walikweendeenda mumayumbelo omumalundu, kakwiila okulitendoola amabwe.

6 Muntu ooyu naakabona Jesu kacili aleele, wakazuza okuyoomuvundamina kunembo lyakwe, 7 okukwiila loko kateeti, "Jesu, Mwanaa Leza Sijulu Wama Julu! Ino uyanda nzi kulindime? Muzina lya Leza ndakukumbila utandipi cisubulo!" 8 Wakaamba namu kaambo Jesu walikumwaambila kuteeti, "O muuya mubi, kozwa mumwaalumi ooyu!"

9 Mpoonyina Jesu wakamubuzya kuteeti, "Ino ndiweni zina?"

Wakamutaba kuteeti, "Ndime ‘Dwi lyabasinkondo’ kaambo tulibanji loko!" 10 Mpoonyina wakazumanana kukumbila Jesu kuteeti myuuya mibi ataitandi kuzwa mucilalaanda eeco.

11 Iino afwiifwi kwali tanga pati lyengulube zyalikucela acilundu. 12 Mpoonyina madimona akakumbila Jesu kuteeti, "Tutandile mungulube kuteegwa tunjile mulizizyo." 13 Kumane wakaazumizya. Mpoonyina akazwa mumwaalumi okuyoonjila mungulube. Lyakali tanga lyataakasike zyuulu zyobile, lyoonse lyakaselemuka kuzwa acilundu okuwida mulwizi okwiinkila.

14 Baalumi bali kweembela ngulube bakacija kabayoobusabalanganya nkaneeyi mutaindi omumiinzi. Mpoonyina bantu bakainka kuyoobona zyakacitika.

11 Kono mwiisya kuteeti na bantu kabajesi cebakonzya kubelesya kugwasya baisi naanga banyina, bacaambilizya kuteeti kobani, caamba kuteeti, ‘capegwa kuli Leza’, 12 kokuteeti mwabakasya kugwasya bazyali. 13 Mwanoiisya okusiila bamwi ziisyo zyabasikale benu, musowela ambali majwi aa Leza. Ape zinji zyemucita zili namu."

Zintu Zisofwaazya Muntu

14 Mpoonyina Jesu wakaita mbunga yabantu antoomwi ape okubaambila kuteeti, "Amuswiilizye noonseneni, mundimvwisisisye. 15 Taakwe cinjila mumuntu cizwaanze cipa kuteeti asofwaale, aati cizwa mumuntu."

Lusyomo lo Mwanakazi Wamasi

24 Mpoonyina Jesu wakazwa fateni okwiinka kucilalaanda cilaafwiifwi etaindi pati lya Taila. Wakanjila mungʼanda, talikuyanda kuteeti bantu bazibe kuteegwa kwali, kono taakwe naakakonzya kulisisa. 25 Mwanakazi umwi waloomwana musimbi wakanjilidwe muuya mubi wakamvwa zya Jesu, mpoonya-mpoonya wakeza okuzoomufukamina. 26 Ooyu mwanakazi wali muzwamasi, wakazyalilwa mucilalaanda ca Fonisia mu Siliya. Wakakumbila Jesu kuteeti agwisye dimona mumwanaakwe. 27 Mpoonyina Jesu wakamutaba kuteeti, "Pili tusanine bana bakute, kaambo zilyo zyabana tazyeelede kusowela babwa."

28 Mpoonyina wakamutaba kuteeti, "Simalelaangu, ede naanga babwa balalya buungululwa buzwa atafule alida bana."

29 Mpoonyina Jesu wakamwaambila kuteeti, "Kaambo wataba namu, piluka kungʼanda, uyojana muuya mubi wazwa mumwanaako musimbi!"

30 Mpoonyina naakakusika kungʼanda, wakakujana mwana wakwe ulilede abulo kaliibide omuuya mubi wazwa.

17 Umwi mwaalumi wali mubantu wakataba kuteeti, "Omwiiyi, ndakweetela mwanaangu kaambo unjilidwe muuya mubi ape taambooli. 18 Kufumbwa feela wamujata, ulamusuntusya, okuzwa kovu kumulomo ape okuluma ntwino omubili ulayuminina ntaa! Ndakumbide basikwiiya bako kuteeti bautande kono bakacilwa."

19 Mpoonyina Jesu wakabaambila kuteeti, "Nywebo nobantu batakwe lusyomo, ino ndikale nako ndamfu buti andinywe? Ndilamulangilizya nako ndamfu buti? Amumweete kuno musyimani ooyo." 20 Bakamweeta kuli Jesu.

Muuya niwakabona feela Jesu, wakawisya musyimani ansi, okumusuntusya mpoonyina wakatalika kwaalabana, okuzwa kovu kumulomo. 21 Mpoonyina Jesu wakabuzya baisi kuteeti, "Ino wakala nako ndamfu buti kali namu?"

Bakateeti, "Kuzwa kubwana." 22 Ziindi zinji muuya mubi umusowela mumulilo omumaanzi kuyanda kumujaya. Tufwide mangʼeke okutugwasya na ulakonzya!

23 Jesu wakateeti, "Ino niinzi nowaamba kuteeti, ‘Na ulakonzya’? Zyoonse zila konzeka kumuntu uusyoma."

24 Mpoonyinaawo baisi musyimani bakoongolola kuteeti, "Ndilasyoma aniini. Ndigwasye kuteeti ndisyome loko!"

25 Jesu wakabona kuteeti mbunga yabantu yalikuyoobukomena okuyoobuswena afwiifwi ambabo, mpoonyina wakapatookela muuya mubi kuteeti, "Yebo omuuya wokutamvwa obucimuumu, ndikwaambila kuteeti, zwa mumusyimani ooyu utakapilukili ape mulinguwe!"

26 Muuya wakakwiila, okusuntusya musyimani, okuzwa. Mpoonyina musyimani wakaboneka anga wafwa, cokuteeti bantu banji bakateeti, "Wafwa!" 27 Kono Jesu wakajata musyimani kujanza okumugwasya kwiima, mpoonyina wakaima.

Jesu Waponya Bantu Banji

38 Jesu naakazwa kucikombelo wakainka kungʼanda ya Saimoni kwaakakujana banyinazyala Saimoni mbalwazi, mubili wali kupya loko. Mpoonyina bakakumbila Jesu kuteeti abagwasye. 39 Kuzwaawo Jesu wakainka okuyoobakotamina. Wakalailila bulwazi kuteeti buzwe mumubili mpoonyina bakapona. Mpoonya-mpoonya bakanyamuka okuyumbula Jesu abasikwiiya bakwe cokulya.

27 Jesu naakaseluka mumugolo, umwi mwaalumi wanjidwe madimona wakeza okuzomuswanganya. Ooyu mwaalumi walikuzwa mutaindi eeli kono kweciindi cilamfu taalikukala mungʼanda walikukala mumayumbelo ape taalikuzwaata. 28 Naakabona Jesu, wakoongolola okulifusa kuzituta zya Jesu okwaamba kuteeti, "Jesu Mwanaa Leza, Sijulu Wama Julu! Ino uyanda nzi kulindime? Ndakukumbila utandipi cisubulo!" 29 Wakaamba namu kaambo Jesu wakalailide kale muuya mubi kuteeti uzwe mulinguwe. Bunji bweziindi naalikupenzegwa omuuya mubi ooyu walikulindilwa kaangidwe amaceeni kumaanza okumaulu kono walikwaadunsula mpoonyina muuya mubi walikumutola musaka.

30 Jesu wakamubuzya kuteeti, "Ndiweni zina lyako?"

Wakateeti, "Ndime dwi lyabasinkondo," kaambo wanjidwe madimona manji. 31 Madimona akazumanana kukombelezya Jesu kuteegwa ataatandili mudindi litagoli.*

32 Iino afwiifwi kwali tanga pati lyengulube zyalikucela acilundu, mpoonyina madimona akakumbila Jesu kuteeti aazumizye kunjila mungulube. Kumane wakaazumizya. 33 Madimona aaya akazwa mumwaalumi ooyu okuyoonjila mungulube mpoonyina tanga lyoonse lyakaselemuka kuzwa acilundu okuwida mulwizi okwiinkila.

34 Baalumi bali kweembela ngulube nibakabona namu, bakacija kabayoobusabalanganya nkaneeyi mutaindi omumiinzi yalaafwiifwi. 35 Kuzwaawo bantu bakainka kuyoobona zyakacitika, mpoonyina nibakeza kuli Jesu bakamujana mwaalumi ooyo wakagwisigwa madimona kakede kumaulu a Jesu kazweete ape kasitikide, mpoonyina bakayoowa boonse.

27 Nconzyo ndamwaambila kuteeti, kobali bamwi baimvwaawa batayoofwi mane bakabone Bwami bwa Leza."

Kusanduka Kobube bwa Jesu

28 Naalikuyanda kukwana mazuba aali lusele kaambide eezi, Jesu wakabweza Pita, Joni o Jemusi okwiinkaabo atala eecilundu kuyookomba. 29 Naalikukomba, bube bwe ciinso cakwe bwakasanduka, ezizwaato zyakwe zyakatuba buu. 30 Mpoonyinaawo kwakadunuka baalumi bobile, Mozesi o Elija okutalika kwaamboola anguwe. 31 Bakalibonya mubulemu bokujulu kabaamboola o Jesu mbwayoozuzilikizya muzeezo wa Leza kwiinda mukufwida mu Jelusalemu.

32 Iino Pita abeenzinyina bakalikoona. Nibakabuka bakabona bulemu bwa Jesu ape bakabona baalumi bobile kabaimvwi anguwe. 33 Mozesi o Elija nibalikuzwa kuli Jesu, Pita wakateeti, "Simalelo, cabota tuli kuno! Atupange tutungu totatwe, komwi kako, komwi ka Mozesi akomwi ka Elija." Nconzyo taakwe naakazi caali kwaamba.

38 Mpoonyina mwaalumi umwi akati kebbunga lyabantu wakoongolola kateeti, "Omwiiyi! Ndakukomba, bona mwanaangu musyimani ngondijesi alike! 39 Kucitika kuteeti muuya mubi ulamujataanga, mbuumujatila mpoonya-mpoonya ulamukwiizya okumusuntusya cokumugwisya kovu kumulomo, tuumuleki ape ulamucisa loko. 40 Ndakumbide basikwiiya bako kuteeti bautande kono bakacilwa."

41 Jesu wakabaambila kuteeti, "Nywebo nomusela utakwe lusyomo, basicinguni! Ino ndikale nako ndamfu buti andinywe? Ndilamulangilizya nako ndamfu buti? Mweete kuno mwana wako."

42 Musyimani naali kuyoobuza, dimona lyakamuwisizyaansi okumusuntusya. Mpoonyina Jesu wakalailila muuya mubi kuteeti uzwe okuponya musyimani, amane wakamupilusya kuli baisi. 43 Mpoonyina bantu boonse bakakomokwa nibakabona nguzu zya Leza.

Jesu Waamba Zyolufu Lwakwe Ape

Bantu kabacikomokedwe alizyoonse zyaakacita Jesu, wakateeti kuli basikwiiya bakwe,

Jesu o Bbelizabbuli Mwami Wamadimona

14 Bumwi buzuba Jesu walikutanda dimona lyalikupa umwi mwaalumi kutaamboola. Nilyakazwa, mwaalumi ooyu wakatalika kwaamboola. Mpoonyina mabunga aabantu akakomokwa,

50 Mpoonyina umwi wabo wakatema muzike wo Mupaizi mupati okumutimbula kutwi kokululyo.

51 Kono Jesu wakateeti, "Kwamana! Amuleke!" Kumane wakajata kutwi kooyo muzike, okumuponya.

24 Kuzwaawo basikwiiya ba Joni nibakapiluka, Jesu wakatalika kwaamboola zya Joni Mubbabbatizi kubantu banji kateeti, "Nimwakainka munkanda kuli Joni mwalikuyanda kubona muntu uulibuti? Kana ndubu lwali kuzungaana kaambo koluwo na? 25 Nee? Ino mwainkide kuyobona ni? Mwaalumi uzwete zizwato zidula na? Bantu bazwata namu okupona kabotu bajanika mumaanda aabami! 26 Ino mwakainkilide kuyoobonaanzi? Musinsimi na? Iiyi nconzyo, kono mwakabona ciinda amusinsimi. 27 ✝Joni nguwaambwa mumalembe kuteeti, ‘Leza wakaamba kuteegwa, Bona! Ndiyootuma mutumwa wangu kunembo lyako kuyoobamba nzila motizooinde.’" 28 Jesu wakayungizizya okuteeti, "Ndimwaambila kuteeti, Joni mupati kwiinda boonse bakaponaansi aano. Kono ooyo muniini mu Bwami bwa Leza mupati kwiinda Joni."

29 ✝Bantu boonse antoomwi abasimutelo bakamvwa kukambooka kwa Joni, bakazumina kuteeti nzila ya Leza ililuleme mpoonyina ncibakabbabbatizigwa okucililizya zyayanda Leza. 30 Kono Bafalisi abamayi bo Mulawo bakakaka muzeezo ngwaali kujesi Leza alibo, ncibakakakila kubbabbatizigwa o Joni.