1 Kuzwaawo Jesu wakazwida anembo okubaambila kuteeti, "Nconzyo ndamwaambila kuteeti, kobali bamwi baimvwaawa batayoofwi mane bakabone Bwami bwa Leza kabuza enguzu."

2 ✝ Nikwakainda mazuba aali cisambomwe, Jesu wakabweza Pita, Jemusi o Joni okubatola acilundu cilamfu kuteegwa bakabe abalike. Kabalangilide mubili wa Jesu wakasanduka, 3 zizwato zyakwe zyakamweka, okutuba buu! Zyakatuba buu mbozitakonzi kutubizigwa omuntu muno munyika. 4 Mpoonyina basikwiiya bakwe botatwe bakabona Elija o Mozesi kabaamboola o Jesu. 5 Mpoonyina Pita wakaambila Jesu kuteeti, "Omwiiyi, cabota tuli kuno! Atupange tutungu totatwe, komwi kako, komwi ka Mozesi akomwi ka Elija." 6 We abamwi bakaliyoowede loko cokuteeti taalizi caali kwaamba.

7 ✝ Mpoonyina kwakeza joba okubavumba boonse aceemvule cateni, mpoonyina kwakazwa jwi mujoba lyalikwaamba kuteeti, "Ooyu Mwanaangu uuyandika. Amumumvwide!" 8 Mpoonyinaawo nibakalanga-langa, taakwe ngubakabona, aati feela Jesu nguwali abo.

9 Nibalikuseluka acilundu, Jesu wakabaambila kuteeti, "Mutakaambili muntu naanga omwi zimwabona, kusikila Mwanoo Muntu akubuka kuzwa kubafu."

10 Bakaacilizya malailile aya, kono mulicabo bakatalika kuyaamboola nkani eeyi yokuteeti, "Ino kubuka kuzwa kubafu caamba nzi?" 11 ✝ Mpoonyina bakabuzya Jesu kuteeti, "Ino niinzi bamayi bo Mulawo cebaamba kuteeti Elija nguweelede kusaanguna kuza Mesiya katana?"

12 Wakataba kuteeti, "Mbombubo, Elija nguweelede kusaanguna kuza okubambulula zintu zyoonse. Ino niinzi Malembo naamba kuteeti Mwanoo Muntu uyoopenga loko okusulaikwa? 13 Nconzyo ndimwaambila kuteeti, Elija wakeza kale, kono bantu bakamucita zyoonse zibi zyobali kuyanda kweendelana a Malembo mbwaamba zyakwe."

14 Jesu abasikwiiya botatwe nibakaseluka acilundu bakajana basikwiiya bamwi balaakati kembunga yabantu kabakazyanya abamayi bo Mulawo. 15 Bantu nibakamubona feela Jesu bakakomokwa loko, mpoonyina bakamuzuzila okumulumelesya. 16 Jesu wakabuzya basikwiiya bakwe kuteeti, "Ino mukazyanya nzi abo?"

17 Umwi mwaalumi wali mubantu wakataba kuteeti, "Omwiiyi, ndakweetela mwanaangu kaambo unjilidwe muuya mubi ape taambooli. 18 Kufumbwa feela wamujata, ulamusuntusya, okuzwa kovu kumulomo ape okuluma ntwino omubili ulayuminina ntaa! Ndakumbide basikwiiya bako kuteeti bautande kono bakacilwa."

19 Mpoonyina Jesu wakabaambila kuteeti, "Nywebo nobantu batakwe lusyomo, ino ndikale nako ndamfu buti andinywe? Ndilamulangilizya nako ndamfu buti? Amumweete kuno musyimani ooyo." 20 Bakamweeta kuli Jesu.

Muuya niwakabona feela Jesu, wakawisya musyimani ansi, okumusuntusya mpoonyina wakatalika kwaalabana, okuzwa kovu kumulomo. 21 Mpoonyina Jesu wakabuzya baisi kuteeti, "Ino wakala nako ndamfu buti kali namu?"

Bakateeti, "Kuzwa kubwana." 22 Ziindi zinji muuya mubi umusowela mumulilo omumaanzi kuyanda kumujaya. Tufwide mangʼeke okutugwasya na ulakonzya!

23 Jesu wakateeti, "Ino niinzi nowaamba kuteeti, ‘Na ulakonzya’? Zyoonse zila konzeka kumuntu uusyoma."

24 Mpoonyinaawo baisi musyimani bakoongolola kuteeti, "Ndilasyoma aniini. Ndigwasye kuteeti ndisyome loko!"

25 Jesu wakabona kuteeti mbunga yabantu yalikuyoobukomena okuyoobuswena afwiifwi ambabo, mpoonyina wakapatookela muuya mubi kuteeti, "Yebo omuuya wokutamvwa obucimuumu, ndikwaambila kuteeti, zwa mumusyimani ooyu utakapilukili ape mulinguwe!"

26 Muuya wakakwiila, okusuntusya musyimani, okuzwa. Mpoonyina musyimani wakaboneka anga wafwa, cokuteeti bantu banji bakateeti, "Wafwa!" 27 Kono Jesu wakajata musyimani kujanza okumugwasya kwiima, mpoonyina wakaima.

28 Kuzwaawo Jesu naakanjila mungʼanda, basikwiiya bakwe bakamubuzila kumbali kuteeti, "Ino niinzi capa kuteeti tukacilwe kuutanda muuya?"

29 Mpoonyina Jesu wakataba kuteeti, "Ooyu muuya uuli namu inga watandwa feela kwiinda mukukomba."

30 Kuzwaawo Jesu abasikwiiya bakwe bakazwa kwateni kucibaka eciya okuyoinda mu Galileya. Taalikuyanda kuteeti bantu bazibe kwali kubede, 31 kaambo walikwiisya basikwiiya bakwe kuteeti, "Mwanoo Muntu uyoabwa mumaanza aabantu batikamujaye. Mpoonyina kwakwiinda mazuba otatwe uyoobuka."

32 Kono basikwiiya bakwe taakwe nibakamvwisisisya zyaali kwaamba, kono balikuyoowa kumubuzya.

33 Mpoonyina Jesu abasikwiiya bakwe bakeza ku Kapenaumu, nibakanjila mungʼanda wakababuzya kuteeti, "Ino mwalikukazyanya nzi munzila?"

34 ✝ Kono taakwe nibakamutaba kaambo balikukazyanya kuteeti na ngwani mupati loko alibo. 35 ✝ Mpoonyina Jesu wakakala okwiita basikwiiya bakwe bali kumi abobile kuteeti baswene afwiifwi okubaambila kuteeti, "Kufumbwa uyanda kuba kunembo abe musule okuba mubelesi waboonse." 36 Wakabweza mwana muniini okumwiimika akati kabo. Wakamukumbata okwaamba kuteeti, 37 ✝ "Kufumbwa utambula mwana uuli namu muzina lyangu watambula ndime, ape kufumbwa unditambula tatambuli ndime andilike kono antoomwi owakandituma."

38 Mpoonyina Joni wakaambila Jesu kuteeti, "Omwiiyi, twabona muntu walikutanda madimona muzina lyako, mpoonyina twamwaambila kuteeti aleke kaambo tali umwi wesu."

39 Jesu wakataba kuteeti, "Mutasoli kumukasya, kaambo taakwe muntu unga kacita maleele muzina lyangu kwamana muciindi ciniini wasanduka okutalika kwaamba zibi alindime. 40 ✝ Kufumbwa utatulwani tulilimwi. 41 ✝ Ape ndimwaambila kuteeti, kufumbwa utikamupe maanzi okunywa kaambo kokuteeti mulibantu bangu nde Mesiya, nconzyo uyootambula bulumbu.

42 "Kufumbwa ulebya umwi waaba baniini* basyoma mulindime, inga cabota kuteeti muntu ulinamu waangililwa ziyo pati munsingo okusowelwa mulwizi. 43 ✝ Nakuteeti janza lyako kalikulebya weelede kulitimbula! Kuli kabotu kuyoonjila mubuumi butamani ejanza lyomwi kwiinda kwiinka ku Gehena*, kumulilo utamani amaanza obile. 44 [Ooko mvwinyu zibalya tazifwi omulilo uubatenta tuuzimi.]* 45 Nakuteeti gulu lyako kalikulebya weelede kulitimbula! Kuli kabotu kuyoonjila mubuumi butamani egulu lyomwi kwiinda kusowelwa mu Gehena amaulu obile. 46 [Ooko mvwinyu zibalya tazifwi omulilo uubatenta tuuzimi.]* 47 ✝ Nakuteeti liinso lyako kalikulebya weelede kuligwisya! Kuli kabotu kunjila mu Bwami bwa Leza eliinso lyomwi kwiinda kusowelwa mu Gehena ameenso obile. 48 ✝ Ooko mvwinyu zibalya tazifwi omulilo uubatenta tuuzimi.

49 "Mbuli cilyo mbocibikwa sautu, mbwenya namu boonse bayoobotesegwa omulilo wamapenzi.*

50 ✝"Sautu ndibbotu, kono kuteeti lyasampuka, ino inga mwalicita buti kuteeti linone ape?

"Amube osautu mulindinywe okukala muluumuno umwi oumwi."