1 Jesu wakazwa ooko okwiinka kucooko ce Judiya okuyozubuka mulonga wa Jolodani. Mpoonyina bantu banji bakamubunganina ape, wakabaisya mbuli lyoonse.

2 Bafalisi bamwi bakamuzida kuteeti bazomuce kabateeti, "Twaambile, ino Mulawo wesu ulazumizya mwaalumi kuleka mwanakazaakwe na?"

3 Jesu wakabataba kuteeti, "Ino Mozesi wakamulailila kutiinzi?"

4 ✝ Bakataba kuteeti, "Wakazumizya kuteeti, mwaalumi inga walembela mwanakazaakwe lugwalo lokulekana okumuleka kuteeti ainke."

5 Jesu wakabaambila kuteeti, "Mozesi wakamulembela mulawo ooyu kaambo muleenkazi. 6 Kono kuzwa kumatalikilo Leza naakalenga zintu, ‘wakalenga mwaalumi omwanakazi.’ ✝ 7 Kaambo keeci, ‘Mwaalumi ulasiya baisi abanyina okukakatila kumwanakazaakwe, 8 mpoonyina bobile balaba muntu omwi.’✝ Kokuteeti tabacili bobile kono omwi. 9 Mpoonyina eeco Leza caakaswaanya muntu atacaanzaanyi."

10 Nibakapiluka mungʼanda, basikwiiya bakwe bakamubuzya fateni ankani eeyi ape. 11 Mpoonyina Jesu wakabaambila kuteeti, "Kufumbwa uleka mwanakazaakwe okukwata umbi wacitila mwanakazaakwe bumambe. ✝ 12 Mbwenya namu awe mwanakazi uuzwa mungʼanda yakwe okukwatwa kumbi wacita bumambe."

13 Bamwi bantu balikweeta bana baniini kuli Jesu kuteeti azobabike maanzaakwe amitwe okubaleleka, mpoonyina basikwiiya ba Jesu bakanyemena bantu aaba. 14 Jesu naakabona namu wakanyema okwaambila basikwiiya bakwe kuteeti, "Amubaleke bana baniini baze kulindime, mutabakasyi kaambo Bwami bwa Leza mbwabantu babede mbulimbabo. 15 ✝ Ndimusyomezya kuteeti kufumbwa utikacilwe kutambula Bwami bwa Leza mbuli mwana muniini takoyonjila mwateni." 16 Mpoonyina wakabakumbata okubika maanza ali umwi oumwi okubaleleka.

17 Jesu naalikutalika musinzo wakwe, kwakamuzuzila mwaalumi okumufukamina, wakamubuzya kuteeti, "Omwiiyi mubotu, ndeelede kucita buti kuteeti nditambule buumi butamani?"

18 Jesu wakamutaba kuteeti, "Ino niinzi nondiita kuteegwa mubotu? Taakwe mubotu aati feela Leza. 19 ✝ Ede uliizi milawo, ‘Utajayi, utaciti bumambe, utabbi, utabejekezyi umwi kaambo, utabeji, kuteka bauso abanyoko.’"

20 Mwaalumi wakataba kuteeti, "Omwiiyi, yoonse eeyi milawo ndakaicilizya kuzwa kubwana."

21 Jesu wakamulanga coluyando okumwaambila kuteeti, "Uyandika feela kucita cintu comwi, koya ukauzye zintu zyako zyoonse, mpoonyina mali ukape bapengede notikabe obuvubi kujulu. Wazwaawo uze undicilile." 22 Ooyu mwaalumi naakamvwa namu wakatyompwa, wakainka kauside kaambo walivubide loko.

23 Mpoonyina Jesu wakalanga-langa basikwiiya bakwe okubaambila kuteeti, "Cintu ciyumu loko kubantu bavubide kuyoonjila mu Bwami bwa Leza!"

24 Basikwiiya bakakomokwa* nibakamvwa majwi aya, kono Jesu wakaindilizya okwaamba kuteeti, "Bana bangu, cintu ciyumu loko kunjila mu Bwami bwa Leza! 25 Cintu cuuba nkamela kwiinda muliinso lyendonga, kwiinda muntu uvubide kunjila mu Bwami bwa Leza."

26 Basikwiiya nibakamvwa namu, bakakomokwa loko okutalika kubuzyanya kuteeti, "Ino mpoonyina ngwani ukonzya kufutulwa?"

27 Jesu wakabalanga okubaambila kuteeti, "Eeci kubantu tacikonzeki kono kuli Leza cilakonzeka, kaambo zyoonse zilakonzeka kuli Leza."

28 Mpoonyina Pita wakaambila Jesu kuteeti, "Langa! Twakasiya zintu zyoonse okukucilila."

29 Jesu wakabaambila kuteeti, "Iiyi, iino ndimwaambila kuteeti, kufumbwa usiya ngʼanda, naanga bazyalwanyina, naanga bacizi, naanga banyina, naanga baisi, naanga bana, naanga myuunda kaambo kangu a Makani Mabotu, 30 uyootambula loko muluuno musela, myaanda-myaanda yamaanda, yabazyalwanyina, yabacizi, yamanyina, yabana, ayemyuunda ape ayokupenzegwa. Mpoonyina mumusela uza uyootambula buumi butamani. 31 ✝ Kono banji balikunembo bayojanika musule, ape banji balimusule bayojanika kunembo."

32 Jesu abasikwiiya bakwe balimunzila kabaya ku Jelusalemu. Walikuyoobweenda kunembo lyabo, kabakomokedwe loko. Bantu balikuyoobumucilila musule baliyoowede. Mpoonyina ape Jesu wakaitila basikwiiya bakwe bali kumi abobile kumbali okubaambila ziyanda kumucitikila. 33 Wakabaambila kuteeti, "Amuswiilizye, aawa tuya ku Jelusalemu, Mwanoo Muntu kwayoabwa mumaanza aba paizi basilutwe abamayi bo Mulawo. Bayoomwaatula kuteeti ajaigwe okumwaaba mumaanza abamasi, 34 bayoomufubazika okumuswida okumukwabboola okumujaya kono kwaakwiinda mazuba otatwe uyoobuka kuzwa kubafu."

35 Jemusi o Joni bana ba Zebbediya, bakainka kuli Jesu okumwaambila kuteeti, "Omwiiyi kuli zetuyanda kuteeti utucitile."

36 Wakababuzya kuteeti, "Ndimucitile nzi?"

37 Bakateeti, "Wakukala acibbula cako co Bwami cobulemu, tuyanda kuteeti umwi wesu akakale kululyo lwako umwi kucigoyo cako."

38 ✝ Jesu wakataba kuteeti, "Tamuzi zemukumbila. Ino nkomoki yamapenzi njendeelede kunywa, inga mwainywa na? Naanga lubbabbatizyo lwamapenzi lwaandoondicitikila, inga mwalukonzya na?"

39 Bakateeti, "Iyii tulakonzya."

Mpoonyina Jesu wakabataba kuteeti, "Mbombubo nkomoki yamapenzi njendeelede kunywa, muyooinywa, naanga lubbabbatizyo lwamapenzi lwaandoondicitikila, luyoomucitikila. 40 Kono tandikwe nguzu zyokusala uyokala kululyo lwangu okucigoyo cangu. Leza nguyopa ezyo zibbula kulimbakabambila."

41 Aabo bamwi basikwiiya nibakamvwa nkani eeyi, bakanyemena Jemusi o Joni. 42 ✝ Mpoonyina Jesu wakabaitila antoomwi boonse okubaambila kuteeti, "Mulizi, aabo baitwa kuteeti mbami Bamasi balela bantu babo cokudyaminina, ape abasololi babelesya nguzu zyabo kuteeti babacilile. 43 ✝ Kono tacili namu kulindinywe. Uuyanda kuba mupati akati kenu, weelede kuba mubelesi wenu. 44 Uuyanda kuba kunembo, weelede kuba muzike waboonse. 45 Ndimwaambila namu kaambo naanga Mwanoo Muntu taakwe naakazida kuzobelekelwa, kono wakazida kuzobelekela bamwi okupa buumi bwakwe kuteeti anunune bantu banji."

46 Kuzwaawo Jesu abasikwiiya bakwe bakeza kutaindi pati lye Jeliko. Nibalikuzwa kwateni abantu banji, umwi moofu sikukumbila uutegwa Bbatimeyo, mwanaa Timeyo walikede mumbali enzila. 47 Naakamvwa kuteeti ngu Jesu woku Nazaleta, wakatalika koongolola kateeti, "Jesu Mwanaa Deveti, ndifwide kwateni mangʼeke!"

48 Bantu banji bakamupatookela okumwaambila kuteeti aumune. Kono we naakoongololesya kuteeti, "Mwanaa Deveti, ndifwide kwateni mangʼeke!"

49 Jesu wakaima okwaamba kuteeti, "Amumwiite."

Mpoonyina bakamwiita mwaalumi moofu, kabateeti kulinguwe, "Botelwa! Nyamuka! Ulakwiita."

50 Wakasowa jansi lyakwe okusotoka, mpoonyina wakavwalooka kuza kuli Jesu.

51 Jesu wakamubuzya kuteeti, "Ino uyanda kuteeti ndikucitile nzi?"

Wakataba kuteeti, "Omwiiyi wangu, ndiyanda kuteeti ndibonaape."

52 Jesu wakamwaambila kuteeti, "Koya, lusyomo lwako lwakuponya."

Mpoonyinaawo wakakonzya kubona, okucilila Jesu munzila.