1 ✝ Mpoonyina Jesu wakabaiisya kwiinda muzikozyanyo wakateeti, "Kwali mwaalumi wakabyala muunda womusaansa* okuuyakila cilabba, wakasya mugodi wokusinina mwateni nsaansa okuyaka ngalani yomulindizi. Mpoonyina ooyu muunda wakuusiila balimi kuteeti baweendelezye kuteegwa bapanga mpindu kabaabana anguwe. Mpoonyina wakainka mumusinzo. 2 Niyakasika nako yokukutula, wakatuma muzike wakwe kuteeti akamubwezele caabilo cakwe kubalimi. 3 Aaba balimi bakamujata okumuuma loko, okumupilusya cinkwa maanza. 4 Ape wakatuma umwi muzike, ooyu balimi bakamuuma kumutwe okumusampoola. 5 Mpoonyina wakatuma umbi, ooyu bakamujaya. Abamwi banji mbaakali kutuma bakacitwa mbwenya namu, bamwi balikuumwa bamwi balikujaigwa. 6 Kwakazosyala feela omwi wokutuma, ooyu wali mwana wakwe muyandisi. Kumamanino wakatuma nguwe kayeeya kuteeti, ‘Nconzyo bayoomukuteka mwanaangu.’ 7 Kono bo bakaamboozyanya kuteeti, ‘Ooyu ngoswaana. Amuze tumujaye kuteegwa muunda tuubweze!’ 8 Mpoonyina bakamujata okumujaya, mubili wakwe bakausowela anzoomuunda."

9 Jesu wakabuzya kuteeti, "Ino mwini muunda uzocita buti? Uzooza okubajaya mpoonyina okuupa balimi bamwi kuteeti baweendelezye muunda wakwe. 10 ✝Ino taakwe nimwakaabala Malembo aamba kuteeti,

‘Bbwe ndibakakaka bayaki kuteeti talikwe musebezi

lyakaba ndeliyandisi kwiinda oonse kuyumya ntalisyo ye ngʼanda.

11 Mwami nguwakacipanga namu,

catukomosya loko!’?"

12 Iino basololi ba Majuda nibakamvwa namu, bakasoleka kwaanga Jesu kaambo bakaziba kuteeti mucikozyanyo eeci walikwaamba mbabo. Kono bakayoowa bantu, mpoonyina bakamusiya okwiinka.

13 Kuzwaawo bamwi Bafalisi a bana Helodi bakatumwa kuli Jesu kuteeti bazomuce mukwaamboola. 14 Bakamuzida okumwaambila kuteeti, "Omwiiyi, tulizi kuteeti inga waambanga zyencozyo, topengani azyebayeeya bantu. Wiisya bantu luyando lwa Leza lwenconzyo kotasalululi. Twaambile na cililuleme mu Mulawo wesu kutela kuli Kaisala Muleli Mupati waba Loma? Katutela na nee?"

15 Kono Jesu wakaziba kuteeti mibuzyo yabo njolweeno, mpoonyina wakabataba kuteeti, "Ino niinzi nemusola kundica? Amundeetele kadibilisi* ndikabone."

16 Bakamweetela mpoonyina wakabuzya kuteeti, "Ino cifwanikiso eeci ezina zizyani?"

Bakamutaba kuteeti, "Zyomuleli Mupati Kaisala."

17 Mpoonyina Jesu wakateeti, "Kaisala mumupe zyakwe, o Leza mumupe zyakwe."

Mpoonyina bakamukomokwa.

18 ✝ Kuzwaawo bamwi Basaduki bakeza kuli Jesu. Basaduki baamba kuteeti bantu tabayoobuki kuzwa kubafu. Nibakasika bakamwaambila kuteeti, 19 ✝"Omwiiyi, Mozesi wakatulembela Mulawo wokuteeti: ‘Na mwaalumi wafwa katazyede, muzyalwanyina womufu weelede kukwata mukamufu okuzyalila mufu bana.’ 20 Imwi nako kwali baalumi bali ciloba bazyedwaamwi. Mupati wakakwata okufwa katakwe mwana. 21 Mpoonyina walikumucilila wakakwata mukamufu, anguwe wakafwa katakwe mwana. Okuliwatatu mbweenya namu, 22 mane boonse bakamana. Kumamanino mwanakazi awe wakafwa. 23 Ino bakubuka bafu, ooyu mwanakazi uyoba wani? Kaambo boonse bali ciloba balikumukwete."

24 Jesu wakataba kuteeti, "Mulisweekede kaambo tamweezi Malembo enguzu zya Leza. 25 Bafu baakubuka takuyoobi zyokukwata, banooli mbuli bangelo kujulu. 26 ✝ Ede muliizi kale nkani yokubusigwa kwabafu. Ino taakwe nimwakalibala bbuku lya Mozesi, ankani ye citeyo calikuyaka? Kulembedwe kuteeti Leza wakaambila Mozesi kuteeti, ‘Ndime Leza wa Abbulahamu, Leza wa Isaka ape o Leza wa Jakobo.’ 27 Ngu Leza wabaumi, tainsi Leza wabafu. Mulisweekede loko!"

28 Umwi mwiiyi wo Mulawo waliwo wakamvwa zibalikukazyanya. Wakabona kuteeti Jesu wakabataba kabotu ba Saduki, mpoonyina wakamubuzya kuteeti, "Ino Mulawo nzi mupati kwiinda yoonse?"

29 ✝ Jesu wakateeti, "Mulawo mupati kwiinda yoonse, ngooyu ‘Swiilizya, Izilaili! Mwami Leza wesu ngo Mwami alike. 30 Yanda Mwami Leza wako omoyo wako woonse, omuuya wako woonse, emizeezo yako yoonse enguzu zyako zyoonse.’ 31 ✝ Ucilila mubupati waamba kuteeti: ‘Yanda muntunyoko mboonyina mboliyanda.’ Taakwe uumbi mulawo mupati kwiinda eeyi yobile."

32 ✝ Mwiiyi wo Mulawo wakaambila Jesu kuteeti, "Waamba kabotu omwiiyi! Zyanconzyo zyowaamba, zyokuteeti Mwami Leza alike ngo Leza, ape taakwe Leza umbi kunze lyakwe. 33 ✝ Weelede kuyanda Leza omoyo wako woonse, emizeezo yako yoonse, enguzu zyako zyoonse. Ape yanda muntunyoko mboonyina mboliyanda. Eeyi njemilawo mipati, kwiinda kweeta banyama kuteeti batentwe acipaililo okupa zipaizyo zimwi kuli Leza."

34 ✝ Jesu naakabona kuteeti wataba cobusongo, wakamwaambila kuteeti, "Tolikule Obwami bwa Leza".

Kuzwa aawo, taakwe wakasola kubuzya Jesu mubuzyo.

35 Jesu naalikwiisya mulabba lye Ngʼanda ya Leza, wakabuzya kuteeti, "Ino baamba nzi bamayi bo Mulawo banoteeti Mesiya uyoozwa kulunyungu lwa Mwami Deveti? 36 ✝ Muuya Uusalala wakapa kuteeti Mwami Deveti we aambe kuteeti,

‘Mwami wakaambila Mwami wangu kuteeti

kala kubbazu lyolulyo* lwangu lyobulemu

kusika mane ndibike basinkondonyoko kunsi amaulaako.’*

37 Nakuteeti Mwami Deveti we wakaita Mesiya kuteeti, ‘Mwami’ ino inga Mesiya waba buti wolunyungu lwakwe?"

Bantu banji balikubotelwa kumvwa Jesu kaiisya. 38 Naalikwiisya wakaamba kuteeti, "Amucenjele eziyanza zya bamayi bo Mulawo, bayandisya kuzyungaana kabazwete majansi malamfu okulumelesigwa elikute mumisika 39 okukala azibbula zibotu muzikombelo omumikiti. 40 Beenena bamukabafu okubanyanga lubono lwabo, ape bayanda kulibonesya kubantu kwiinda mukukomba kwabo kulamfu. Cisubulo cabo cinoindilide!"

41 Kuzwaawo Jesu wakakala ambali ecibikilo camali mulabba lye Ngʼanda ya Leza, kaebela bantu babika mali. Bunji bwabavubi bakabika mali manji. 42 Mpoonyina kwakeza mukamufu uupengede okubika tudibilisi tobile tomukuba. 43 Jesu wakaita basikwiiya bakwe antoomwi okubaambila kuteeti, "Nconzyo ndimwaambila kuteeti ooyu mukamufu, wabika kwiinda boonse, 44 kaambo bamwi babika tuniini kuzwa mubuvubi bwabo bunji. Kono we obupenzi bwakwe, wabika tudibilisi toonse twaajesi."