1 Mpoonyina Jesu abasikwiiya bakwe bakasika mutala limwi lyo Lwizi lwa Galileya, lili mucilalaanda ca Gelasa. 2 Mbwaakazwida feela mumugolo Jesu, mwaalumi wakanjilidwe muuya mubi wakeza kuzwa mumayumbelo* okumuswaana. 3 Ooyu mwaalumi walikukala mumayumbelo. Taakwe wacilikukonzya kumubamba kaangidwe naanga amaceeni. 4 Ziindi zinji walikwaangwa kumaulu okumaanza amaceeni kono nako yoonse walikwaabbansula okutyoloola nsimbi zyakalikwaangwa kumaulu. Taakwe waleenguzu loko zyokumuzunda. 5 Masiku esikati walikweendeenda mumayumbelo omumalundu, kakwiila okulitendoola amabwe.

6 Muntu ooyu naakabona Jesu kacili aleele, wakazuza okuyoomuvundamina kunembo lyakwe, 7 okukwiila loko kateeti, "Jesu, Mwanaa Leza Sijulu Wama Julu! Ino uyanda nzi kulindime? Muzina lya Leza ndakukumbila utandipi cisubulo!" 8 Wakaamba namu kaambo Jesu walikumwaambila kuteeti, "O muuya mubi, kozwa mumwaalumi ooyu!"

9 Mpoonyina Jesu wakamubuzya kuteeti, "Ino ndiweni zina?"

Wakamutaba kuteeti, "Ndime ‘Dwi lyabasinkondo’ kaambo tulibanji loko!" 10 Mpoonyina wakazumanana kukumbila Jesu kuteeti myuuya mibi ataitandi kuzwa mucilalaanda eeco.

11 Iino afwiifwi kwali tanga pati lyengulube zyalikucela acilundu. 12 Mpoonyina madimona akakumbila Jesu kuteeti, "Tutandile mungulube kuteegwa tunjile mulizizyo." 13 Kumane wakaazumizya. Mpoonyina akazwa mumwaalumi okuyoonjila mungulube. Lyakali tanga lyataakasike zyuulu zyobile, lyoonse lyakaselemuka kuzwa acilundu okuwida mulwizi okwiinkila.

14 Baalumi bali kweembela ngulube bakacija kabayoobusabalanganya nkaneeyi mutaindi omumiinzi. Mpoonyina bantu bakainka kuyoobona zyakacitika. 15 Nibakeza kuli Jesu, bakabona mwaalumi walinoonga wanjilidwe dwi lyamadimona kakede kazweete ape kasitikide. Mpoonyina boonse bakayoowa. 16 Aabo bakabona, bakaambila aabo bakeza zyakacitika kumwaalumi wakanjilidwe madimona, ezyakacitika kungulube.

17 Mpoonyina bakakombelezya Jesu kuteeti azwe mucilalaanda cabo.

18 Jesu naalikutanta mumugolo, mwaalumi wakanjilidwe madimona wakamukombelezya kuteeti ainke anguwe.

19 Kono Jesu wakakaka okumwaambila kuteeti, "Piluka kungʼanda ukaambile mbokalaabo zyoonse zyaakucitila Mwami ambwaakufwida mangʼeke."

20 Mpoonyina mwaalumi ooyu wakazwa okwiinka kucibaka camataindi aali Kumi, kayoobwaambilizya zyoonse caakamucitila Jesu. Boonse bakamvwa bakakomokwa.

21 Jesu naakazubuka omugolo kupiluka kubbazu limwi lyo lwizi, bantu banji bakamubunganina ankomwe. 22 Mpoonyina kwakasika mwaalumi walikwiitwa kuteeti Jailosi, mweendelezi womu cikombelo. Naakabona Jesu wakamufugamina 23 okumukumbila cokuzumanana kuteeti, "Mwanaangu musimbi wafwa kuciswa. Aakaka koza umubike maanzaako kuteeti apone!"

24 Mpoonyina Jesu wakainka anguwe. Bantu balikuyoobucilila Jesu bali banji cokuteeti balikuyoobumusyanikizya.

25 Iino kwali mwanakazi walikuciswa bulwazi bwakalobola kwemyaka iili kumi eyobile. 26 Wakapenga loko kasilikwa abasilisi basiyene-siyene. Wakabelesya lubono lwakwe loonse, kono taakwe naakapona obulwazi nibwakazwida anembo kukomena. 27 Walimvwide kale zya Jesu mpoonyina wakanjila mubantu kusule lyakwe. 28 Okulyaambila kuteeti, "Naa ndakuma feela jansi lyakwe ndilapona."

29 Wakakuma kwateni, mpoonyinaawo gazi lyakaleka kuzwa okulimvwa kuteeti wapona. 30 Mpoonyinaawo Jesu wakamvwa kuteeti ngunzu zyazwa mulinguwe, wakacebooka mubantu okubuzya kuteeti, "Ngwani wandikuma kujansi?"

31 Basikwiiya bakwe bakamutaba kuteeti, "Ulibwene bantu mbubakusyanikizya. Ino inga wabuzya buti kuteeti, ‘Ngwani wandikuma?’"

32 Kono Jesu wakaindilizya kulangoola wakamukuma. 33 Mwanakazi ooyu wakaziba cakamucitikila, mpoonyina wakeza kuli Jesu kayoobutuntuma obuyoofu. Wakamufukamina, amane wakamwaambila zyanconzyo zyoonseneni. 34 Jesu wakamwaambila kuteeti, "Omwanaangu, lusyomo lwako lwakuponya. Koya muluumuno, mapenzi aako amana."

35 Naacilikwaamboola namu Jesu, kwakeza bantu bakazwa kungʼanda ya Jailosi okwaambila Jailosi kuteeti, "Mwanaako wafwa. Ino ucimukatazizya nzi mwiiyi?"

36 Jesu taakwe naakabikila kwateni maano zibakaamba, kono wakamwaambila kuteeti, "Utayoowi, syoma feela." 37 Mpoonyina taakwe ngwakazumizya kumucilila aati feela Pita o Jemusi omuzyalwanyina Joni. 38 Bakasika kungʼanda ya Jailosi okubona manyongwe abantu kabalila okoongolola loko. 39 Wakanjila mukati okubabuzya kuteeti, "Ino mwanyonganinanzi namu? Mulila nzi? Ooyu mwana tafwide, ulede feela." 40 Kono bo bakatalika kumufubaazika.

Mpoonyina wakabagwisizya anze okutola baisi abanyina aabo basikwiiya bakwe botatwe okunjila mwalikulede mwana. 41 Wakamujata kujanza okwaamba kuteeti, "Talita, komi!" Kokuteeti, "Musimbi, ndikwaambila kuteeti nyamuka!"

42 Wakanyamuka mpoonyinaawo okutalika kweendeenda. Waleemyaka ili kumi ayobile. Nicakacitika eeci aabo bakabona bakakomokwa loko. 43 Mpoonyina Jesu wakabalailisya kuteeti bataambili naanga muntu omwi. Kuzwaawo wakabaambila kuteeti, "Amumupe cokulya."