1 Kuzwaawo Jesu antoomwi abasikwiiya bakwe bakazwa kucibaka eeco okuya kulibo. 2 Mu Nsabata wakatalika kwiisya mucikombelo. Mpoonyina bunji bwaabo bakamumvwa, bakakomokwa okubuzyana kuteeti, "Ino wakazijanayi eezi ziisyo? Ino oobu busongo wakabujanayi? Ino uzijanayi nguzu zyokupanga maleele?" 3 "Ino ooyu taalisikubeza, ooyu mwanaa Maliya, muzyalwanyina o Jemusi, Josefa, Judasi o Saimoni? Ede tukalaamwi abacizi bakwe?" Mpoonyina bakamukaka.

4 ✝Kuzwaawo Jesu wakabaambila kuteeti, "Musinsimi takwe mpuwo mucisi mwazwa okubamukwasyi wakwe."

5 Talikukonzya kupangila kwateni maleele, kono wakabika maanzaakwe abantu baniini feela balikuciswa okubaponya. 6 Wakakomokwa loko kaambo kokubula lusyomo kwabantu.

Mpoonyina Jesu wakazinguluka mumiinzi kayoobwiisya bantu. 7 Jesu wakaita basikwiiya bali kumi abobile, wakabapa nguzu zyokugwisya myuuya mibi okubatuma bobile-bobile. 8 Okubalailila kuteeti, "Mutabwezi cilicoonse mumusinzo wenu aati feela nkoli. Mutanyamuni cilyo*, mpotomona, naanga mali munkomo. 9 Muzwaate zinyantela, kono mutabwezi zibaki kunzaazyomuzweete." 10 Ape wakaamba kuteeti, "Kufumbwa mu ngʼanda mobayoomutambula, mukakale moonyoomo kusikila mukazwe mucibaka eeco. 11 ✝✝ Kono na mwasika mucibaka mumwatatambulwa, naanga bantu kobatayandi kumumvwida, mwanozwa kwateni mukunkumune suko ili kumaulu eenu kuteeti cikabe citondezyo cokubacenjezya."

12 Mpoonyina bakainka kabayoobukambooka kuteeti bantu beempwe. 13 Bakagwisya madimona manji, okunanika baciswa banji mafuta a oliva okubaponya.

14 Kwakali Mwami walikuteegwa Helodi, wakali kulela cooko ca Galileya e ca Peliya. Mpuwo ya Jesu yakazomvwika loko cokuteeti Mwami Helodi wakiimvwa. Bamwi bantu balikwaamba Jesu kuteeti, "Ooyu ngu Joni Mubbabbatizi wabuka kuzwa kubafu! Cajesi nguzu zili namu zyokupanga maleele."

15 Kono bamwi balikwaamba kuteeti, "Ngu Elija.*" Bamwi balikwaamba kuteeti, "Uli mbuli musinsimi umwi wabeciindi."

16 Helodi naakamvwa eezi wakateeti, "Ngu Joni Mubbabbatizi ngundakatimbuzya mutwe, kono wabuka kubafu." 17 Helodi mwini wakatuma baalumi kuyoojata Joni okumubika muntolongo kaambo ka Helodiyasi mwanakazi wa Filipo muzyalwanyina ooyo Helodi ngwaalikukwete. 18 Helodi wakabika Joni muntolongo kaambo Joni walikumwaambilaanga kuteeti, "Tacili mumulawo yebo kukwata mwanakazi womuzyalwanyoko."

19 Kaambo kamajwi a Joni, Helodiyasi wakaba emfundiilili okuyanda kujaya Joni. Kono talikukonzya, 20 kaambo Helodi walikuyoowa Joni. Walizi kuteeti uliluleme ape ulasalala, kaambo keeci walikumukwabilila. Helodi Walikuyandisisya kumumvwa nekuteegwa nako yoonse amumvwa walikukatazigwa loko.

21 Kumamanino Helodiyasi wakaba ecoolwe. Bwali buzuba bokusekelela kuzyalwa kwa Helodi. Helodi wakapanga mukiti okwiita bolupati-pati mumfulumende, abolupati-pati babasilumamba, abasololeli boku Galileya. 22 Nibali kusekelela, mwanaa Helodiyasi musimbi wakanjila okuzozyana okubotezya Helodi abeenzu bakwe, mpoonyina mwami wakamwaambila kuteeti, "Ndaambile kufumbwa coyanda, ndilakupa." 23 Helodi wakakonka kuteeti, "Ndilakupa kufumbwa cotikumbile, naanga kukwaandwida bwami bwangu akati!"

24 Mpoonyina ooyu musimbi wakainka okuyobuzya banyina kuteeti, "Ndikumbile nzi?"

Bakamutaba kuteeti, "Mutwe wa Joni Mubbabbatizi."

25 Cokufwaambana musimbi wakapiluka kumwami okuyookumbila kuteeti, "Ndiyanda mutwe wa Joni Mubbabbatizi inawa-inawa mumukeke!"

26 Eeci cakausisya mwami loko, kono talikuyanda kumukakila kaambo kokukonka kwakakonka kunembo lya beenzu bakwe. 27 Mpoonyinaawo Helodi wakaambila mulindizi kuteeti eete mutwe wa Joni. Mulindizi wakazwa okwiinka muntolongo okuyootimbula mutwe wa Joni. 28 Mutwe wakwe wakaweta mumukeke okuupa musimbi mpoonyina wakakuupa banyina. 29 Basikwiiya ba Joni nibakamvwa, bakeza okuzobweza mubili wakwe okuyouzika.

30 Mpoonyina baapositola bakapiluka okubunganina Jesu, okumwaambila zyoonse zibakakucita azibakaiisya. 31 Kwali bantu banji loko balikuza okuzwa kwateni, cokuteeti Jesu abasikwiiya bakwe bakabula eciindi cokulya. Mpoonyina wakabaambila kuteeti, "Mulicesu katiya kucibaka cimbi kotutikabe atulike kuteegwa mujane nako yokupumuna." 32 Mpoonyina bakanjila mumugolo mulicabo okutalikizya kwiinka kucibaka cuumwine kobakonzya kuyooba abalike.

33 Kono bantu banji bakababona nibalikuzwa okubaziba, mpoonyina bakazuza kuzwa mumataindi oonse okubaindila kubalikwiinka. 34 ✝Jesu naakazwa mumugolo wakiibona eeyi mbunga mpati, wakabafwida mangʼeke kaambo bali mbuli mbelele zitajesi mweembezi. Mpoonyina wakatalika kubaiisya zintu zinji. 35 Kujolezya, basikwiiya bakwe bakamuzida okwaamba kuteeti, "Nako yainka loko ape ecino cibaka cilikule abantu. 36 Tuyeeya kuteeti niwabaambila bantu kuteeti bainke mumiinzi otuunzi tulaafwiifwi kuteeti bakalyuulile zyokulya."

37 Kono Jesu wakataba kuteeti, "Ndinywenya nywebo amubape zyokulya."

Bakamubuzya kuteeti, "Ino waamba kuteegwa tubelesye miwayawaya ye nsiliva* ili myaanda yobile kuula cinkwa cokusanina bantu aaba na?"

38 Mpoonyina Jesu wakababuzya kuteeti, "Mujesi zinkwa zyongayi? Kamuya mukabone."

Nibakaakulanga, bakazomwaambila kuteeti, "Zili zyosanwe enswi zyobile."

39 Kuzwaawo Jesu wakaambila basikwiiya bakwe kuteeti bakazike bantu mutubunga-bunga abwizu buteteete. 40 Mpoonyina bantu bakakala mbwakaamba mutubunga-bunga twamwaanda, bamwi twamakumi osanwe. 41 Mpoonyina Jesu wakabweza zinkwa zyosanwe enswi zyobile, okulanga kujulu okulumba Leza. Wakakomoona zinkwa okupa basikwiiya bakwe kuteeti baabanye bantu. Mpoonyina wakabweza nswi zyobile okubaabanya boonse. 42 Boonse bakalya okukuta. 43 Kuzwaawo, basikwiiya bakwe bakabwezelela zizuma zili kumi ezyobile zyezilyo zyakasyaala. 44 Baalumi bakalya bali zyuulu zyosanwe kutabalilizya banakazi abana.

45 Kuzwaawo, cokufwambaana Jesu naacilikumwaisya bantu wakaambila basikwiiya bakwe kuteeti banjile mumugolo kuteegwa batalikile kwiinka ku Betisaida, mutala limwi lyo lwizi. 46 Naakamanisya kulaizyanya abantu wakainka acilundu kuyookomba. 47 Kujolezya mugolo wali akati kolwizi, we wacili ankomwe alike. 48 Wakabona kuteeti basikwiiya bakwe balimukupenga kukwasula mugolo, kaambo ke guwo lyalikubaungila. Kuseeni-seeni loko wakeza kulibo kayobweenda atalaamaanzi. Watikabaindilile, 49,50 kono nibakamubona kayobwenda atalaamaanzi, boonse bakayoowa loko okutalika kukwiila kaambo balikuteeti ndi saku.

Kono mpoonyinaawo Jesu wakabaambila kuteeti, "Mutazwi myoyo! Mutayowi! Ndime." 51 Mpoonyina wakanjila mumugolo mubalikubede, eguwo lyakamana. Basikwiiya bakwe bakakomokwa loko 52 kaambo taakwe nibakamvwisisisya zyamaleele aazinkwa Jesu zyaakasanizya bantu, kaambo kokuyuma kwemyoyo yabo.

53 Mpoonyina Jesu abasikwiiya bakwe bakazubuka lwizi okusika kunyika yoku Genesaleti, kubakakwaangilila mugolo ankomwe. 54 Bacizwa feela kumugolo, bantu bakamuziba Jesu. 55 Mpoonyina bakazuzana cilalaanda coonse kabayobwaambilizya kuteeti Jesu kwali. Kufumbwa kubamvwa kuteeti kwabede, balikumutolela bantu bacisidwe kabalede amalo aabo. 56 Kufumbwa kwaali kwiinka Jesu, mumiinzi, mumataindi, naanga mumyuunda okumisika, bantu balikumutolela bacisidwe okumukumbila kuteeti balwazi bakume feela kumamanino ejansi lyakwe. Mpoonyina boonse bakakuma kwateni bakapona.