1 Nikwakainda mazuba maniini, Jesu wakapiluka ku Kapenaumu. Makani okuteeti kwali angʼanda akasakana. 2 Mpoonyina bantu banji bakabungana cokuteetii mukati tikwalikwe cibaka aamulyango oonse. Jesu naalikubakambookela Makani Mabotu, 3 kwakeza bantu kulinguwe bakeeta mwaalumi wayuminide mubili, kanyamwidwe abaalumi bone. 4 Bakabula okumwiinzya kumutola kuli Jesu kaambo kokuvula kwabantu. Mpoonyina bakatulula atala eciluli* kululama paali kubede Jesu okumwiinzya fateni kalede abulo bwakwe. 5 Jesu naakabona lusyomo lwabo wakaambila mulwazi kuteeti, "Mwanaangu, zibi zyako zyajatilwa."

6 Bamwi bamayi bo Mulawo bakakedeko bakatalika kulyamboozya mumyoyo yabo kuteeti, 7 "Ino niinzi naamboola namu ooyu? Ooku kusampula Leza! Ngwani uunga wajatila zibi kunzaa Leza alike."

8 Mpoonyinaawo Jesu wakaziba zyobakali kuyeeya, mpoonyina wakababuzya kuteeti, "Ino niinzi nemuyeeya zili namu?" 9 Wakababuzya kuteeti, "Ceecili cuuba, kwaambila uyumininide mubili kuteegwa ‘Zibi zyako zyajatilwa’ na kumwaambila kuteeti ‘Nyamuka, bweza bulo bwako weende’? 10 Iino ndiyanda kumutondezya kuteeti Mwanoo Muntu uleenguzu aano ansi zyokujatila zibi." Mpoonyina Jesu wakaambila mulwazi kuteeti, 11 "Ndikwaambila kuteeti, nyamuka, bweza bulo bwako uye kungʼanda yako!"

12 Cokufwambaana wakanyamuka, okubweza bulo bwakwe, okuzwawo kabalangilide boonse. Bantu bakakomokwa loko, okutalika kulumbaizya Leza kabateeti, "Tatunabwene cilinamu!"

13 Kuzwaawo Jesu wakapiluka ankomwe yo Lwizi lwa Galileya. Imbunga yoonse yakeza kulinguwe mpoonyina wakatalika kubaiisya. 14 Naali kuyoobweenda wakabona simutelo Levi mwanaa Alifasi kakede paali kubelekela. Jesu wakamwaambila kuteeti, "Ndicilila!" Mpoonyinaawo wakanyamuka okumucilila.

15 Kuzwaawo Jesu naalikulya mungʼanda ya Levi. Basimutelo banji abasizibi* bamwi bakasika okulyoo Jesu abasikwiiya bakwe, kaambo balibanji bakamucilila. 16 Bamwi bamayi bo Mulawo a Bafalisi, nibakabona kuteetii wali kulya abasizibi abasimutelo, bakabuzya basikwiiya bakwe kuteeti, "Ino niinzi nalya abantu bali namu?"

17 Jesu naakamvwa namu wakabaambila kuteeti, "Bantu baumbulu tabayandiki musilisi aati baciswa. Sikazidilide kwiita bantu baluleme kono ndakazida kwiita basizibi."

18 Basikwiiya ba Joni Mubbabbatizi a Bafalisi bali kuliimya kulya. Mpoonyina bakeza kuli Jesu okubuzya kuteeti, "Ino kaamboonzi basikwiiya bako nebataliimyi kulya mbuli ndiswe a Bafalisi?"

19 Jesu wakabataba kuteeti, "Ino inga beenzu basikukwata baliimya kulya acinolaabo na? Nee! Kutali nacilaabo. 20 Kono nako iyoosika, sikukwata nayoobwezegwa kuzwa kulibo. Pepawaawo nebayooliimya kulya.

21 "Taakwe unga wabelesya cigamba cecizwato cipya okucilukila acizwato ceciindi, kaambo cigamba cipya cilafwiinyana okumonkola cizwato ceciindi, mpoonyina bbanga lilakomenena limwi.* 22 Ape taakwe uutila waini impya munkomo zyamatobo zyakabeleka kale, kaambo zilabbotoka, okusinyekelaamwi o waini. Kono waini impya yeelede kutilwa munkomo zyamatobo zipya."

23 ✝ Bumwi buzuba bwe Nsabata, Jesu abasikwiiya bakwe bakatimbwida mumyuunda yamaila. Basikwiiya bakwe bakatalika kupulula mitwe yamaila. 24 Bamwi Bafalisi baliwo bakabuzya Jesu kuteeti, "Bona! Ino niinzi basikwiiya bako nebacita cuutazumizi Mulawo wesu mu Nsabata?"*

25 ✝ Mpoonyina Jesu wakababuzya kuteeti, "Ino taakwe nimwakabala caakacita Deveti, we abantu mbaalaabo nibakafwide nzala na?* 26 ✝ Wakanjila mulabba lye Ngʼanda ya Leza okulya cinkwa calicipaizyo kuli Leza. Eezi zyakacitika Abbiyata naali Mupaizi mupati. Kweelana omu Mulawo, bapaizi abalike mbibakazumizidwe kulya cinkwa eeci, kono Deveti wakacilya okupako bantu bakwe."

27 Mukumaninizya Jesu wakaamba kuteeti, "Nsabata yakalengelwa bantu, kono bantu tabakalengeledwe Nsabata. 28 Kaambo keeci Mwanoo Muntu ngo Mwami owe Nsabata."